عيون العرب - ملتقى العالم العربي

العودة   عيون العرب - ملتقى العالم العربي > عيـون القصص والروايات > روايات طويلة > روايات و قصص بالعاميه

روايات و قصص بالعاميه قصص و روايات باللهجه العاميه

 
 
LinkBack أدوات الموضوع انواع عرض الموضوع
  #6  
قديم 07-11-2008, 01:54 PM
 
رد: نور وعبدالله روايه كويتيه سعوديه

سوووووووووووووووري على تأخير البارت
  #7  
قديم 07-12-2008, 02:58 AM
 
رد: نور وعبدالله روايه كويتيه سعوديه

الجزء الثالث

سكرت نور التلفون من هشام وهي مستغربه .. اول مرة نطلع مع ريم بنت عمي .. صحيح اهيا حبوبه .. بس ماصارت ولا مرة .. وبعدين شنو ياب طاريها .. وخلا هشوم يقترح هالاقتراح ..!!

ممم ماراح اقدر انام اليوم الين مااعرف السالفه .. راح انطره
وتدش فرح اللي للحين لابسه وجاهزة ..
فرح : ها كلمتيه ..؟؟ وينه يلله ترى راح نتأخر
نور : روحي بدلي مابيدوينا

فرح بضييق : لييييييييييش ؟
نور : يقول تعبان وماله خلق ..
فرح اللي شوي تبجي : نحيسس بروح اقول حق امي .. شنو هذا مليت من البيت .. محد يحس فيني
نور : تعالي يالمينونه وين بتروحين عندي لج خبر .. باجر بنروح السوق بس مع ريم بنت عمي
فرح : شوفي مالي خلق غشمرتج ..
نور : انا مثلج ماصدقت يوم قالي هشوم .. بس شكلها السالفه صج
فرح : من صجج انتي ؟ شلون .. ماعمرها صارت
نور : والله ماادري الحين يي هشوم ونفهم السالفه .. الا تعالي امي وينها ؟
فرح : راحت عند يدي تسلم عليه .. تدرين بعد مرت يدي سافرت وامي انتهزتها فرصه تسلم على ابوها
نور : مسكينه امي .. شافت من مرت ابوها الويل .. صج الريايل مايفكرون الا بروحهم ..
فرح : أي والله حبيبتي امي .. صج خل اقولها تيبي من مطعم واهيا يايه .. مابي اكل طباختنا مليت منه
نور : وانتي مايهمج الا بطنج .. خلي امي تقعد مع ابوها دام العقربه مو هني
فرح : بس بقولها قبل ماتيي .. مااقدر نور يوووعاااانه
نور : ههههه انا لو اعرف هالاكل وين يروح ارتااح
فرح : قولي مشالله حرام عليج .. حاسديني على الاكل
نور : لا حبيتبي عليج بالعافيه
وهما على هالسوالف .. يدش ابو راشد
تفز نور وفرح من الخوف ..
ابو راشد : قوة .. ها وين امكم

فرح تدز نور عشان تتكلم
نور : ا أ .. امي راحت بيت يدي العود تسلم عليه
ابو راشد .: وين هشام ؟ للحين مارد ؟
نور : الحين ياي بالطريج
بو راشد : زين اذا يت امج قوليلها خل تكلمني
نور : ان شالله يبا ..
وطلع بوراشد من البيت كالعادة
فرح ونور يتنهدون براحه
اوووف . . اخترعت والله .. اشوه انه طلع كنت راح اموت لو قعد معانا وامي مو هني
فرح : شدعوه نور ابوي مو رعب لهالدرجه
نور : اييه انتي لانج دلوعه البيت ومحد يكلمج .. ماتدرين ابوي اذا عصب ولا تنرفز شيسوي
ماتذكرين يوم سالفه زواج رشود من سلوى بنت خالة ريم .. شسوى فيه عشان يوافق
فرح : أي والله اذكر .. مسكين هالرشود .. تغرب وابتعد بس عشان يرتاح .. تعالي ماكلمتيه ؟
نور : بلا كلمته من جم يوم .. وقالي انه عنده ماده رسب فيها بس قالي لاتقولين حق امي عشان مايضيق خلقها
فرح : ويي لا يدري عنه ابوي بس
نور : أي والله
وهما يسولفون .. دش عليهم هشام وبيده كيسين
هشام : مسا الخير لاحلى دبتين في الكويت
نور وفرح : الله شنو يايب لنا .. طالب لنا هشوم
هشام : أي والله كسرتو خاطري
فرح اللي كانت بتموت من اليوع : اشوه انك يبت لي شي توني كنت بدق على امي تيبلي معاها
هشام : عشان تعرفون اخوكم شلون يفكر فيكم .. بس وين اللي يقدر
نور : خلنا الحين .. قولي شسالفه ريم
هشام ببرود : ماكو سالفه بنت عمكم وتبي تروح معاكم السوق شنو فيها ؟
نور سكتت كلام اخوها صح وهي ترتاح لريم .. وفكرت صح شفيها اذا راحت معاها السوق .. على الاقل يفتكون من تحلطم هشوم عليهم
نور : زين منو اقترح هالاقتراح ؟
هشام : انا وخلود .. اهوا يبي يفتك من اخته وانا ابي افتك منكم .. بس
نور وفرح : يالمجرم يقول الحين كل يوم تطلعنا وتودينا
هشام : يله الحين تبون تاكلون ولا اكل وجباتكم انتوا الثنين
نور : لحظة انا ماحب مكدونالدز L
هشام : ادري ادري مالت عليج سويت مشوار على الريال عشانج .. قلته نور ماتاكل ماكدونالدز .. خله تطلب بالبيت واهوا اصر الا يبيلج
نور من غير اهتمام .. بس يمكن حست بالفشله : فشلتني .. يله يبي كيسي
قعدوا ياكلون .. وهشام يفكر باهتمام خالد بنور اللي لاحظه عليه




ياترى شو ممكن يصير بالجزء الرابع انتظر توقعاتكم وردودكم

بليييييييييييييييييييييز ابيي الردود علشان اكمل القصه
  #8  
قديم 07-12-2008, 03:01 AM
 
رد: نور وعبدالله روايه كويتيه سعوديه

الجزء الرابع

في بيت يد نور .. ام راشد قاعده مع ابوها اللي ماتشوفه الا بالمناسبات بس تطمن عليه بالتلفون
ام راشد ( عايشة ) كانت البنت الوحيده لابوها .. ماتت امها واهيا صغيرة وتزوج ابوها وحده ثانيه ماتعرف الرحمه
وهذا اللي خلا عايشه تتزوج اول واحد يتقدم لها عشان تفتك من مرت ابوها .. في البدايه كانت تزور ابوها كل اسبوع
لكن هالوضع ما استمر .. بسبب المشاحنات اللي كانت تصير بينها وبين مرت ابوها .. وكل اسبوع كانت ترد تبجي الين مامنعها بوراشد من الزيارة الاسبوعيه .. وتمت تطمن على ابوها بالتلفون والزيارات البعيده
عايشه عندها اخوين من مرت ابوها .. عبدالعزيزعمره28 وصلاح22 واخت وحده ليلى عمرها 25 متزوجه بالسعوديه
عبدالعزيز وصلاح يحبون عايشه لكن بحكم العلاقة المكهربه بين امهم وبين عايشه كان الاتصال شبهه منقطع
بس يسألون عليها بين فترة والثانيه
ليلى علاقتها زينه مع عايشه بحكم انها بعيده عن تحكم امها .. وتسأل عن اختها وتدق عليها دايما

اليد العود : قعدي يايبا تو الناس وين رايحه ؟
عايشه اللي للحين ماملت من ابوها : والله يبا ماتنمل القعده معاك بس تدري الوقت تأخر ولازم ارد البيت البنات بروحهم
اليد العود : وليش مايبتيهم معاج .. والله ولهت عليهم
عايشه : ان شالله يبا .. باجر بخلي هشام يمرك الصبح
اليد العود : وابوراشد .. ماقمنا نشوفه كلش شدعوه كل هذا شايل علينا ؟
عايشه : لا والله بس تدري اشغاله و سفراته اللي ماتخلص .. بخليه يدق عليك قريب .. تامرني على شي ؟
اليد العود : سلامتج يابنيتي
عايشه : الله يسلمك .. سلم على عزيز وصلاح .. وقولهم يمروني من زمان ماشفتهم
اليد العود : نطري شوي اكيد الحين بييون
عايشه اللي حست انه ابوها ضايق خلقه من القعده بروحه .. وحبت تتم معاه شوي : تدري شلون يبا انا بتم انطرهم .. ومنها اقعد معاك ..
اليد العود اللي من فرحته نادى الخدامه تسوي عشا حقهم ولما تعشوا وخلصوا .. وشربو شاي مع بعض وصل صلاح وكملو القعده مع بعض الين ماتأخر الوقت وقررت عايشه تروح بعد ماوصتهم يسلمون على عزيز لانه تأخر


في بيت بوراشد

جرس الباب
نور : هشوم قوم افتح الباب هذي اكيد امي
هشام : يحليلها كل هذا عند ابوها .. اكيد الجو فاضي لها لا اكو حد يبجيها ولا ينزل دموعها الغاليه
نور : ايي .. مرت يدي مسافرة عند خالتي ليلى
هشام : وانا اقول الحبيبة سهرانه عندهم اليوم ..

يفتح هشام الباب لامه اللي باين على ويهها الراحه
ام راشد : ليش قافين الباب .. ماتدرون اني مو بالبيت .!!
هشام : بلا بس هذي سوالف نور بنتج ماتعرفينها .. تخاف يطب علينا حرامي .. وبتنطرج عشان تفتحلج الباب
ام راشد : هالبنت تخاف من ظلها ماادري متى بتكبر
فرح اللي نازله من الدري : هلا وغلا بكل الحلا والزين .. هلا بريحه البخور .. هلا بالنور
ام راشد : فدييت بنتي انا .. تعالي عند امج حبيبة امج
نور اللي سمعت صوت فرح ويت تركض : لحظه جنكم نسيتوني انا .. ولا انا مو بنتج بعد
هشام : انا وياج بالقائمه السوده نوروه دام هالدلوعه موجوده
ام راشد : والله كلكم غالين .. بس عاد فروحه بنت الغزو ماخذت حنان مني وايد .. وابي اعوضها
هشام وهوا يقلد فرح : ياليتني ولدت بالغزو .. حسره علي .. ولدت في ليله مافيهاش ضو قمر ..
نور : هههههههههههههه عاد انا عارفة مكانتي عند امي ..
ام راشد : فديتج انتي النور كله
وتموا يضحكون بفرح ووناسه .. وقالت ام راشد لهشام يدق على راشد من زمان ماسمعت صوته
هشام : يما شتبين فيه تلقينه يحوس بالملاهي الليلية بين هالشقر الحلوين .. وهالجو البارد الحلو .. وحنا خايسين بهالحر
ام راشد : ويه اسم الله على وليدي من هالشقر .. ولدي عاقل مو مال هالسوالف الخربوطيه .. يله دق عليه خلصني
هشام وهو يدق : يما يرن التلفون ..
يقول بصوت مرتفع يبي يطفر امه : يارب يكون اليوم موسكران ويفشلنا
ام راشد بعصبيه : هشووم وويعه لاتقول جذي عن اخوك
هشام : هههههههههههههه زيين بل كليتينا كل هذي محبه
الو .. الو >> راشد من الطرف الثاني يسمع ضحك هشام
هشام : الو الو .. هلا رشود شلونك شخبارك ؟
راشد : بخير عساكم بخير انتو شلونكم كلكم .. امي وابوي ونور وفرح ؟
هشام : امي ذبحتنا دقو على رشود ودقو على رشود .. ذبحتنا جنه ماعندها غيره
راشد بغصة ودموعه شوي وتنزل : فديته امي عطني ياها مشتاقلها ام راشد
هشام يسوي روحه يبجي : الحين انا اكلمك الحين .. ليش ماتحبوني ها .. انا ماحد يحبني .. اخاف مو اخوكم .. قولولي .. انا من ولده ؟ خل ادور اهلي
راشد : هههههههههههههههههههه الله يقطع سوالفك انتا الين متى بتم جذي متى تعقل ؟
هشام : لما تحبوني احم احم هههههههه
ام راشد : هشوم يلله يب السماعه .. >>> دموعها غرقت عينها
هشام حس انه لازم يعطي السماعه حق امه .. بس كان يبي يلطف الجو من غير دموع
نور وهشام سكتوا احتراما لامهم اللي من سمعت صوت راشد واهي تبجي
وفرح تبجي مع امها وحاظنه ايدينها بقوة
راشد من الطرف الثاني وهو يكلم امه : يما حبيبتي لاتبجين مابقى غير كورس واخلص ان شالله .. وراح أيي التدريب العملي بالكويت
ام راشد : ان شالله ياوليدي .. انتا شلونك تاكل زين ؟ تنام زين ؟ حط بالك على روحك يما
راشد : ان شالله . .انتي بس قوليلي شنو تبين اييبلج من هناك ؟
ام راشد : ابيك تيي سالم وبيديك الشهاده اللي تبيض الويه ..
راشد بضحك : ماتبين اييب معاي شقرة ؟
ام راشد : رشود اعقل والله اذا تبيني ازعل عليك سوها
راشد : هههههههههه يماا لا يبا خلاص هوننا .. يما البنات يمج ؟
ام راشد : أي هاك فرح كلمها
فرح : الو هلا رشود .. شلونك .. انا بخير وانتا ؟ .. الحمدلله
لاتنسى اللي وصيتك عليه .. ايي يمي نور .. هاك
نور : الو راشد .. هلا والله .. شنو ؟.. ان شالله متى ؟ .. خلص اوكي .. الله يسلمك .. باي
هشام : شنو قالج ؟
نور : لا ولاشي يبي جم شغله ادزه له اذا خالي راحله
هشام : اوكي ياهوانم .. انا رايح انام .. تصبحون على خير
ام راشد : وانا بعد والله .. يله بنات لاتسهرون متأخر عشان تقومون للصلاة
نور وفرح: زين يما ..





السعوديه

ال2 بليل في الاستراحه ..
تركي صاحب عبدالله : عبود شرايك لو نضبط لنا سفرة هالويك اند .. يااخي زهقت من الدوام .. ابي اغير جو
عبدالله : أي والله صدقت .. وتبي الصج انا ملييت من حنة ابوي محتاج اسافر يومين ولا ثلاثه
تركي : خلاص .. عيل شوف لنا اذا في حجز حق الثلثاء الياي .. وانا باخذ اجازة من مديري .. اربع ايام حلوين
عبدالله : وانت قلتها .. الا ماقلتلي وين فيصل ..!! صارلي اسبوعين مو شايفه
تركي : وييي انتا وينك .. فيصل خطب الاسبوع اللي فات وتلقاه لاهي مع اهل خطيبته وماقام ينشاف
عبدالله اللي تحسر على عمره : يحليله .. الله يوفقه
تركي اللي حاس بعبد الله ويعرف سبب عزوفه عن الزواج : وانتا اليا متى بتم جذي عبود ؟
عبدالله : وللي يرحم والديك .. سكر الموضوع ترى مو متحمل كلمة فيه
تركي : زيين زين بشويش علينا يااخوي . . قوم بس خل نقعد مع الربع هناك
عبدالله من غير نفس : لا انا بروح البيت باجر دوامي مبجر يلله سلم عليهم ..

اليوم الثاني ..
صحى عبدالله وراح الدوام .. وعقبها راح يشوفله تذكرتين له ولتركي يسافرون فيها وغيرون جو ..
بالسيارة وهو راد البيت يرن تلفونه
عبدالله : هذا علي زوج سارة اكييد سارة ولدت
علي زوج اخته ساره من الكويت : الو السلام عليكم
عبدالله : وعليكم السلام هلا بو محمد شلونك شخبارك ؟
علي : بخير عساك بخير انتا شلونك وشلون عمي والاهل .. كلهم بخير ؟
عبدالله : بخير وسلمون عليك .. ها طمني شلون سارة .. عسى ولدت بالسلامه ؟
علي : أي والله اليوم الصبح ولدت ويابت ولد
عبدالله : لا والله .. طمنتني يلله يتربى بعزكم ان شالله .. هي يمك الحين ؟
علي : أي هاك كلمها
سارة : السلام عليكم
عبدالله : وعليكم السلام هلا ام محمد الحمدلله على سلامتج . ومبروك ماجاكم
سارة : الله يبارك فيك عبدالله .. يله عاد ماتبون تشوفون ناصر ؟
عبدالله : هههه خلص سميتوه ناصر
سارة : أي والله على اسم عمي ..
عبدالله : الا ماقلتيلي يشبهه مين ؟
سارة : والله فيه منك شوي وفيه من امي الله يرحمها .. يله عاد عبدالله تعالوا .. والله وحشتونا
عبدالله : لا دام جذي لازم نجي .. بس تعرفين ابوي مايقدر يسافر وغسيل الكلى متعبه ..
سارة : بعد عمري ابوي .. خلاص انتا تعال يله
عبدالله : لا والله انا بروح احجز تذكرتين بسافر انا وصاحبي يومين ثلاث جذي
سارة : لا مع صاحبك ولا غيره .. تحجز للكويت وتجي الاسبوع الياي ولا ترى ازعل منك
عبدالله : خلص مثل ماتبين .. يله سلمي على علي وبوسيلي شبيهي فديت قلبه انا
ساره : هههه وصل .. سلم على ابوي وفراس واميرة .. مع السلامه

سكر عبدالله من سارة .. وهو محتار .. جذي ماراح يقدر يسافر مع تركي .. بس معليه والله وحشتني سارة وعلي وعيالهم .. وبعدين من ثلاث سنين مازرنا بيت عيال عم ابوي .. فرصة نسلم عليهم
صحيح اختربت مخططاتي .. بس معليه .. عشان مااكسر بخاطر سارة اكيد اهيا بروحها الحين لازم نكون يمها
وعلى هالتفكير اللي استغرق فيه عبدالله .. وصل البيت وبلغ ابوه وفراس اللي قاموا ودقو يباركون لعلي وسارة
وبوعبدالله رحب بفكرة سفر ولده ومنها فرصه يطمنه على بنته ويوصل هدية ولادتها
  #9  
قديم 07-12-2008, 03:03 AM
 
رد: نور وعبدالله روايه كويتيه سعوديه

بلييييييييييييييييييييييييييييييييييييييييييييييييز ابييييييييييي الردووووووووووود
  #10  
قديم 07-12-2008, 03:09 AM
 
رد: نور وعبدالله روايه كويتيه سعوديه

الجزء الخامس
في بريطانيا
في شقة راشد في البوند ستريت
يرن تلفون راشد
راشد بكسل ونعس : الووو
عيسى : الو صباح الخير رشود انتا للحين نايم
راشد : هلا عيسى .. ليش الساعه جم
عيسى : الساعه 8ونص قووم يلله مو اتفقنا نروح المكتبه نخلص الريبورتات
راشد وهو يلحف روحه بالفراش : اوو عيسى تو الناس
عيسى : أي تو الناس الله يهداك ..ناسي ان عندنا ثلاث ريبورتات بنسويهم قوم اخاف مايمدينا نخلص وننحكر بالويك اند
راشد يقوم بكسل : اووف زين لاتحن خلص .. ساعه واييك .. !!
عيسى : خلص انا انطرك بستار بكس في اكسفورد .. نلتقي هناك
راشد : اوكيه يله باي
عيسى : باي

يقوم راشد ويسبح ويغير ملابسه .. ولبس هاليوم جينز داكن مع بلوزه بيضا مبين فيه جسمه العريض .. ولبس نظاره سوده وطالع شكله كول

اخذ اهم الاوراق اللي يحتاجها .. وراح لعيسى بستار بكس اللي اتفقوا يلتقون فيه

راشد وهوا ينزع نظارته : صباح الخير يا مزعجنا في يوم العطلة
عيسى وهو يضحك : صباح النور .. الحين هذا يزاي ابي اخليك تتهنى باليومين الباجين من العطله يااخي خلنا نفتك من ريبورتات مس لوسي .. عندنا يومين سهر ووناسه .. مانبي نضيعها علينا
راشد : أي والله وانتا صاج .. اقولك يله اطلبي اميركان كوفي خلنا نخلص ونروح المكتبه
عيسى : اوكيه وانتا ييب الجرايد اللي هناك
راشد : صار

في الكويت

في بيت بو خالد وتحديدا في غرفة ريم

ريم تتحجى بالتلفون : ايي يحليلها خوش بنيه .. اقول يله خلصيني عطيني نوت الادارة اللي طايفني .. من ساعه واحنا نسولف وانا اللي داقه ابي النوت ههه

يدق خالد غرفة ريم
ريم : منو ؟
خالد : ولد الاجاويد .. خالد الزين احم احم
ريم : ههههههههه ادخل ياولد ابوك
اسماء من الطرف الثاني : ياويل قلبي هذا خالد اخوج
وخالد يدخل غرفه ريم وهو مبتسم
ريم : هههههههههه لاتموتين علينا بس اقول .. انا اكلمج بعدين .. خل اشوف خلود شنو يبي ؟
اسما : زين لما يطلع منج دقي علي
ريم : صار يله بيباي
خالد بخبث : منو هذي اللي تبي تموت ها ..
ريم بضحك على رفيجتها : مالك شغل يله قول شعندك زايرني في مملكتي
خالد : والله انا ياي اقترح على اختي الغاليه اقتراح ..
ريم : ياكثر ماتقترح .. شوف غرفتي ابيها لاتحاول تقنعني ابدل مع غرفتك
خالد : ههههه وانتي بس هذا اللي يهمج .. لا انا ياي اقولج اذا تبين تروحين السوق
ريم : أي سوق الله يهداك تدري انه هاليومين عندي امتحانات
خالد بخيبة : زين ماتقدرين تروحين كلش
ريم : اقولك امتحانات .. ليش
خالد بارتباك بس يحاول يخفيه : ماكو بنات عمج نور وفرح يبي يروحون السوق وانا قلت اذا بتروحون يميع شرايج
ريم بطلت عيونها : منو ؟
خالد : شفيج .. يعني اهما مو بنات عمج .. ولا خواتج محذرينج
ريم : مو جذي خلود .. السالفه انه ماصارت من قبل .. وبعدين انا استانس على بنات عمي .. بس تدري عقب سالفه راشد وسلوى .. انقطعت العلاقات .. ويادوب نشوفهم بالمناسبات
خالد : علشان جذي فكرنا انا هشام نجمعكم مثل اول واحسن
ريم اللي راقتها الفكرة : ممم زين بس عقب هاليومين خالد .. والله تدري امتحانات وحوستها
خالد : خلص كلمي نور واتفقوا
ريم بتردد بس باقتناع : اوكيه
خالد بارتياح : يله انا ماشي .. ووسلمي على سومه رفيجتج خخخخخخخ وقوليلها اسم الله عليج من الموت
ريم : هههههههه والله ان قلت لها جذي راح تموت من الوناسه
خالد : هييي يالمينونه .. صج ناس فاصله يله باي

في بيت بوراشد

فرح : نور .. نوووووور

نور اللي كانت متابعه فلم محبتين الهندي .. مندمجه وهي تبجي : همم هاا شتبين
فرح : تلفونج يرن .. رقم بدون اسم
نور : اووف مو وقتج انتي
فرح : ترى دق ثلاث مرات .. ارد انا ؟
نور وهي متأثرة : ايي ردي
وبعد دقايق
فرح : نووره .. هذي ريم بنت عمي تبيج
قامت نور من مكانها وهي مالها خلق .. : اووف مو وقته تدق ابي اشوف شنو يصير بالفلم
خذت التلفون من فرح
نور : الو
ريم : الو السلام عليكم
نور : وعليكم السلام والرحمه هلا والله ريم شلونج
ريم : بخير عساج بخير ..ِشفيج شكلج كنتي تبجين
نور انحرجت : ههه لا ماكو شي بس محسوبتج احم احم .. كانت تشوف فلم هندي ومندمجه
ريم : هههههههههههههه اخاف اشواريا وانا ماادري
نور : هههههههههههههه
ريم : مم مادري انا قلت بعد جم يوم بروح السوق وخالدد قالي انكم كنتو تبي تروحون .. قلت شرايج نروح يميع
نور: ياليت والله .. تدرين الروحه مع هشوم تقصر العمر عالاقل احنا بنات وناخذ راحتنا
ريم : ههههه الحال من بعضو ياختي .. خلود العله يكرهني بعيشتي اذا وداني السوق
شوفي انا بعد يومين جذي اخلص امتحانات .. وان شالله عقبها نروح شرايج
نور : خلص على خير حبيبتي .. سملي على عمي وفاطة وحصة .. وموفقه بالامتحانات
ريم : وصل سلامج .. تسليمن .. يله روحي تابعي فلمج .. ههههه
نور : هههه طيب يله بيباي
ريم : باي
سكرت نور من ريم وهي مرتاحه .. ريم من يومها حبوبه .. بس اللي صار بعدنا عنها .. له فرصه تتحسن العلاقات مرة ثانيه
فرح : ها قولي شصار ؟
نور : ماكو اتفقنا نروح بعد يومين لان عندها امتحانات
فرح : انطر يومين بعد اووف .. يله شنسوي .. الا امي وينها ؟
نور : اعتقد راحت تزور بنت عم ابوي سارة . لانها ولدت
فرح : يحليلها امي ماتقعد بالبيت كلش
نور : يامعوده خليها تطلع تغير جو .. مسكينه كافي ان ماعندها لا اخت ولا اخو ولا اهل مثل الناس


بريطانيا
في المكتبه
راشد : عيسى .. تلقى الكتاب في اللاين الثاني .. رفوف الخشب اللي فوق
عيسى : اوكي .. بروح اييبه
راشد اللي قاعد يدور كتاب وحايس عليه
ومن الطاوله المقابلة لطاوله راشد وعيسى كان في بنتين كويتيات يخزون في راشد من اول ما يه المكتبه
راشد حس عليهم لكن مااتفت .. ويوم عيسى راح يدور الكتاب
تقدمت وحده منهم وكانت لابسه جيينز فاتح مع توب زهري وفوقه جكيت جينز فاتح .. وشعرها ناعم وهي بشكل عام كانت ناعمه وحلوة .. لكن جريئه
البنت : هاي
راشد باستغراب ولا مبالاة : هاي
البنت : الاخ خليجي ؟
راشد : أي نعم .. كويتي ..
البنت بابتسامه احلى : صج والله .. يعني من اهل ديرتي
راشد اللي كان يبي ينهي الحديث معاها وكاتفى بابتسامه
البنت : انتا تدرس هني
راشد : أي والله .. اسمحيلي .. عندي بحث ابي اخلصه ..
البنت وملامح الصدمه : أي اعتذر على الازعاج .. سوري .. بيباي
وهي تقول بقلبها .. ينحب .. صج انه بارد ومغرور .. بس ينحب

راشد اللي كان يبي يفتك منها .. راح لعيسى وقعد يدور معاه
عيسى : منو هذي اللي واقف تكلمها ؟
راشد : اسكت وحده بلشه .. يت تكلمني مااعرفها ولا تعرفني .. وشكلها كانت تبي تسولف .. انا دقرتها وانحشت ههه
عيسى : أي عدل انتا على هالكشخه اليوم .. معلوم بيغازلونك
راشد : ههههههههه .. أي كشخه يامعود
عيسى : بس تبي الصج .. حلوة
راشد : اهي حلوة حلوة .. بس ماتعجبني البنت الجريئه
عيسى : صح كلامك .. رشود كاهو الكتاب .. يله امش خل نخلص شغلنا مابقى وقت
راشد : يله
 

مواقع النشر (المفضلة)

أدوات الموضوع
انواع عرض الموضوع

تعليمات المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code is متاحة
كود [IMG] متاحة
كود HTML معطلة
Trackbacks are متاحة
Pingbacks are متاحة
Refbacks are متاحة


المواضيع المتشابهه
الموضوع كاتب الموضوع المنتدى مشاركات آخر مشاركة
سعوديه كافره !! لعنة الله عليها .. ستالايت أرشيف المواضيع الغير مكتمله او المكرره او المنقوله و المخالفه 19 05-27-2014 11:52 PM
غرور وكبرياء قصه سعوديه تئلمت بس تعلمت أرشيف المواضيع الغير مكتمله او المكرره او المنقوله و المخالفه 4 01-25-2009 06:44 AM
صور باربي كويتيه حلوة قطر أرشيف المواضيع الغير مكتمله او المكرره او المنقوله و المخالفه 5 09-10-2008 03:41 PM


الساعة الآن 07:39 AM.


Powered by vBulletin®
Copyright ©2000 - 2024, vBulletin Solutions, Inc.

شات الشلة
Powered by: vBulletin Copyright ©2000 - 2006, Jelsoft Enterprises Ltd.
جميع الحقوق محفوظة لعيون العرب
2003 - 2011