|
| |||||||
| أرشيف المواضيع الغير مكتمله او المكرره او المنقوله و المخالفه هنا توضع المواضيع الغير مكتملة او المكرره في المنتدى او المنقوله من مواقع اخرى دون تصرف ناقلها او المواضيع المخالفه. |
| | LinkBack | أدوات الموضوع | انواع عرض الموضوع |
|
#1
03-03-2007, 12:40 AM
| ||
| | ||
| يوميات مكرود :اب يوميات مكرود : أبو علي من قناة شهرزاد كتابات - ريم بغدادي بعد أن ضاقت السبل بأخينا العراقي المكرود وضاقت عليه أرض الله الواسعة ,نصحته زوجته الفاشلة مثله أن يتابع قناة شهرزاد اللبنانية ,فهي تظهر على شاشتها أحد العراقيين الناجحين الذين فتحت لهم أبواب الرزق وفتح الفال لكل من لا ينجب ولكل من ضاع ولده أو فاته قطار العمر عله يدل على من ضاع بلده ,اصبح صديقنا يحسب الساعات والدقايق لمشاهدة هذا البرنامج اليومي عسى أن يعالج مشكلته. وأبتدأ البرنامج, المذيعة الجميلة اللطيفة ذات اللهجة المثيرة تستمع الى المخرج بواسطة لاقطات الأذن ويظهر أبو علي منهمكاً في كتابة بعض الأرقام والأسماء ويشخبط حيناً ويغير الورقة حيناً ولا ينظر الى عين المذيعة الجميلة خوفاً من أن يلهيه جمالها عن تركيزه. المذيعه: الو …معانا أتيسال من مشاهد …. من العراق …شو أسمك ….تكرم عينك حبيب ألبي …. ايه مشكلتك بالزبط …هلاء بنشوف ابو علي شو بيئول . أبو علي يقول: أخويه انت أسمك مبين عليه مو حقيقي ….شنو مكرود أبن مكرودة …. عالعموم باباتي أسمعني …… أنت عندك تابعة …. وهاي التابعة أجتي عليك من العهد البائد وهسه هاي التابعة أستفحلت عدك … ويجوز راح تكتلك اذا تبقى هيجي وياك …… المكرود يقاطع: …شنو تابعة ….أكلك طلعت روحي وكل يوم خطف وقتل وعلس وأريد أروح للسويد وطز بالعراق ….. أبو علي يقول …. أسمعني مولانا …أنت أولاً لازم نعالج التابعة مالتك …وهاي علاجها بسيط ….ووراها يجيك رزق مو طبيعي …. هسه رزقك قليل …. وأقسم بذات الله أنت عمرك ما أرتاحيت …... ومن حرب لحرب ومن حصار لحصار ومن بلد لبلد ...ولذلك دائماً يصيرعندك تعب ودوخة براسك …وهذا التعب والدوخة يجنك مو من الله ... العياذ بالله ... هاي تجيك من الوضع الي يمر بيه البلد الي أنت بيه , قبل جم يوم أنخطف كرايبك مو ….. المكرود : اي خطفوه …. ابو علي : هذول الي خطفوه ما راح يكتلوه ….لا تكولي ليش ….. هسه أجاوبك ….هذوله اللي خطفوه هم عصابة مو حكومة ….لو حكومه جان كلتلك أنصبوله الفاتحه من هسه …. بس كرايبك هذا راح يرجع بعد ما تبيع امه الذهب والبيت وتحول فلوسه بالدولار وتنطيه للعصابة وراح يرجع بالسلامة ,بس من يرجع , أقرة عليه المعوذتين وسورة البقرة وخلي لا يبقى بالعراق , خلي يروح لسوريا الى أن الله يفرجها , بعد شنو عدك سؤال … المذيعة : ابو علي ما يصير هيك , لكل مشاهد سؤال معانا مستمعين كتير , ابو علي يرد : مو هذا خطية مشاكله هوايه : لخاطري خلي يحجي سؤال لاخ , المكرود يشكرأبو علي ويقول : وعدي مشكله اخرى , ما يجيني أطفال من زوجتي وصارلي وياها عشر سنين وأخاف أطلكها ما أعرف ليش , ابو علي يقول: مولانا دير بالك تطلكها لمرتك لان هاي أخوانها جانوا سابقاً بحزب البعث ويكتبون تقارير , وهسه صاروا بحزب الدعوة والمجلس الأعلى وبالميليشيات ويستعملون الدريل ,أنت جايز من روحك لو من روح أخوانك , ترة بس تطلكها بعد ما نشوفك الا بالنجف الأشرف , وثانياً أنت شتسوي تخلف جهال ,أنت أصلاً التابعة مالتك تكول أنت طايح حظ بشكل غير طبيعي ومسلوب الأراده وما بيدك شي , بس أني حنطيك دعاء تقراه وطلسم تكتبه وتشيله وياك حتى لا تنفجر عليك المفخخات وأذا أنفجرت عليك تصير برداً وسلاماً .... شكراً مولانا عالأتصال. المذيعة : شكراً لأتساليك أخ مكرود ونتمنى نشوفك مرة سانية بهالبرناميج , الو معاي أتيسال ساني : مين معي , أعتي اسمك للكونترول إزا ما بتحب يطلع اسمك عالشاشي. ابو علي : اليوم كل الأتصالات من العراق وكلها تريد تروح للسويد , مولانا… موجهاً كلامه للمشاهد … أنت والله ما أعرف شكولك , بس أنت عبالك نفس الشخص اللي أتصل بيه قبل شويه , لأن نفس التابعه ونفس والحظ الطايح بشكل غير طبيعي …كولي أنت مو مكرود , ولا تجذب ها ….لان التابعه هنا تكولي على كل شي , المشاهد: , لا حبيبي ابو علي , أني أول مرة اتصل , بس أني بيتنا بالأعظمية وأول مرة اشوف برنامجك وحبيت أتصل بيك ولو أنت شيعي من النجف اصلك بس شسوي , وأريد اشوف حظي وين صاير , ابو علي : أنت هم كرايبك مخطوف , بس أنت كرايبك راح تلكاه عالسده , اقره كل يوم سورة ياسين على روحه وروح دوروه تلكوه لو عالسدة لو بالطب العدلي, ومن تلكوه لا تاخذون الجثة ترة العلاسه ينتظرون الي ياخذها …. بس شوفوا الجثة وعوفوها وأحمدوا ربكم أنتوا تأكدتم أنو ميت …. وثانياً أنت شغلة السويد بالنسبة الك مضمونه بس شون راح توصل , التابعة تكول راح تتعذب هوايه بالجوازات وبالمطار ودير بالك من تروح للجوازات تتطلع جواز وكول لأبو الجوازات أنت طالع سياحه وترجع دير بالك تكوله راح أفلت ترة تنعلس مولانا ,بس أنت لو توصل للسويد لو توصل لمقبرة محمد السكران , ومن تروح للسويد أنسى العراق لان بعد مراح تشوفه بس بالستلايت, يلله عدك سؤال ثاني , المشاهد , أريد اسال بيا طريقة أطلع للسويد اذا ممكن , أبو علي : مولانا أنت شعبالك آني هنا فتاح فال … أني هنا أطلع الجني من المجنون وأحل عقدة المعقد , بس ما أكدر أحل مشكلتك لو أطلع العراقي من العراق ,وهاي الشغلة ثق وأعتقد ما يكدر عليها اقوى جني ,حتى جني المصباح يستصعبها , لو جان بيها مجال جان كلت لك روح لواحد اسمه صولاغ يسوي جوازات للعراقيين ويهربهم لأوربا بس هذا هسه الله فتحها عليه فرد فتحه وسواه وزير ,وأكو أحتمال باقي عده جم جواز مبقيهن لكرايبه , مولانا أخذ عائلتك وأطلع من الأعظمية وروح لسوريا ,تلكه هناك هواي قجقجيه هاي شغلتهم , وشكرا الك وسلمنا عالأعظمية. المذيعه: شكرأ لأتيسالك أخ عزماوي( عظماوي)… ونستقبل أتيسال آخر من مشاهد عراقي ايضاً … ابو علي شوف هذا شو بيحكي …. ما بفهم شو بيئول ….. المشاهد: … جوني ابو علي … من كوناحم( مسكين بالعربي) له كوردستاني عيراق …. جوني باشي …. ابو علي يقول : والله كاكا أني ما أعرف بس كلمتين علمتني اياهن التابعه مالتك وهي : بخير بين سه ر جاو… يعني الله بالخير عيوني …. أتفضل مولانا كاكا ….شنو مشكلتك …بس لا تكول أنت هم تريد تطلع من العراق ….. المشاهد ….كاكا أبو علي أني ميريد يطلع من عيراق … أني يريد يطلع روحي ويخلس من هالدنيا ….. ابو علي خير انشا الله … مو أنتو الأكراد مسيطرين ورئيس الجمهوريه منكم وصار عدكم اقليم ما يدخل بيه اي عربي …. بعد ليش تريد تطلع روحك …… المشاهد ….كاكا ابو علي أني كل كرايبي ساروا خارج العراق ….كلها تلعت من زمن صدام كافر ….واللي يجي من خارج عيراق هسه ويشترون أرازي بكوردستان زولة كاكا كلهم مو من عيراق ….زوله ما يعرفون شنو عيراق …. وآني تلعت روحي منهم لان صاروا يشترون حتى بينه ويكولون أحنا من كوردستان , ونريد أقليم كوردستان خارج عيراق…. كاكا أني تول عمري يحب عيراق ويحب بغداد ويحب سابون ركي بغداد …. آني يريد يموت قبل لا يصير كوردستان مو من عيراق , أريد منك لو تتلع روحي لو تتلعني من كوردستان, لان كوردستان روحي وعيراق الهوه اللي اشتمه من خشمي …. ابو علي : والله كاكا شغلتك صعبه , أنت التابعة مالتك نفس التابعه مال أخوك الشيعي والسني ,كاكا أطلع لسوريا وشوف أخوانك الشيعي والسني وأطلعوا سوية من سوريا للسويد , وأنسوا شي اسمه عراق , وأخذ لأولادك جنسية سويدية وعلمهم سويدي وسويلهم فضل ولا تعلمهم لا عربي ولا كردي , وسويهم سويد قلباً وقالباً وكول الهم ,كان يا مكان في قديم الزمان ,كان في بلد أسمه العراق ............... المذيعه : ألو … إنئطع الأتصال … ونشكرك أخ كاكا … ونتمنى نشوفك ونشوف كل العراقيين بالسويد بعد هالنصايح الحلوة من ابو علي .
__________________ إذا هلك كسرى فلا كسرى بعده العراق جمجمة العرب وكنز الرجال ومادة الامصار ورمح الله في الارض فاطمئنوا فإن رمح الله لا ينكسر |
| مواقع النشر (المفضلة) |
| |
المواضيع المتشابهه | ||||
| الموضوع | كاتب الموضوع | المنتدى | مشاركات | آخر مشاركة |
| يوميات زوجة | tayba06 | أرشيف المواضيع الغير مكتمله او المكرره او المنقوله و المخالفه | 2 | 03-02-2007 08:42 PM |
| يوميات رجل متزوج | رهينة الماضي | أرشيف المواضيع الغير مكتمله او المكرره او المنقوله و المخالفه | 12 | 02-28-2007 03:55 PM |
| يوميات رجل متزوج ( صوره )!! | أشجان الأزهار | أرشيف المواضيع الغير مكتمله او المكرره او المنقوله و المخالفه | 10 | 09-13-2006 08:40 PM |
| يوميات طالب راسب في الإمتحان | عثمان أبو الوليد | أرشيف المواضيع الغير مكتمله او المكرره او المنقوله و المخالفه | 0 | 07-24-2006 04:06 AM |
العرض العادي
