قصيدة خلف بن هذال قصايد خلف بن هذال اشعار خلف بن هذال قصيده في خلف بن هذال قصيدة خلف بن هذال

راية الإسلام مرفوعة

على هذا المكان ومن رعاه ومن تربع فيه

سلام وراية الاسلام فوق الراس مرفوعه

ترف بكل عز وكل مجد وضمها بيديه

امام المسلمين وكلمته بالكون مسموعه

أخص القايد الاعلى فهد درع الوطن حاميه

من العدوان ما عاثت فلول الشرك بربوعه

ملكنا اللي نحبه ثم نحبه والغلا نغليه

على دربه نسير ونستنير الدرب بسموعه

ملكنا اللي يشرف حاضره ومشرفٍ ماضيه

يسجل له مدى التاريخ للتاريخ موسوعه

ملكنا اللي فتح قلبه لنا يالله لنا تحييه

فريدات الخصايل في مقر العز مجموعه

يصون مقدسات وبالثبات مخططه ماشيه

عسى أوطانه لبراق الحيا بالرجع مرجوعه

تمتعنا بعهده بالرخاء والخير والترفيه

شربنا الماء قراح ومدنا وامتد ينبوعه

ليا صّدر قرار يتم وبريشة قلم يمضيه

يورّد جاري التنفيذ والاوراق مدفوعه

يوجه ما يوجَّه منفرد بالراي والتوجيه

يحلّ اوضاع غيره ما ابتحل في حل موضوعه

ليا منّه تنهّض زلزل الغبرا تحت رجليه

يامكبر هيبته والارض تستكلم تحت طوعه

سعوديٍ ملا الكرسي صحيح ومنصبه ماليه

ليا زمجر وطالع بالسباع تخر مفجوعه

تليق به القياده والسياده والامن مضفيه

على شبه الجزيرة ساد تشريعه ومشروعه

بلاده ما يقارب ربع قرن بساعده يبنيه

ولايَتبع فهد يُتبع فهد وخطاه متبوعه

يعود الراي لاهل الراي واخذ الراي من راعيه

يعد ارياه مفتوله ومثنيه ومربوعه

بتوع ليا مضى يمضي بسيف العدل ما يثنيه

ليا عدوا قواطيع السيوف ابتر وقاطوعه

ليا اشتد الخصيم بخصمته من حكمته ينهيه

ينوخ للحقوق وتصبح الحقاد مرجوعه

جبل راسي ومن طبع الجبل ما يحترك راسيه

ذرى المفزوع واللي طار عنها الستر مفجوعه

جنودك يافهد شعبك لياطق الحدى حاديه

فداك الامن يفداك الحرس والجيش وفروعه

عليك براس الافعى ما دفق سمه وكيف وليه

يروّجها الغبي واللي ثقتنا منه منزوعه

من الضربه يطيح من اوله والحق على تاليه

قبل فتك الافاعي خلها في البيض مخلوعه

عصابه يا بوفيصل بثت التشويش والتشويه

على ارضك ما لها بيعه ومن بيعتك مخلوعه

على يمناك اخوك اللي مناظيم السرب تتليه

على اكتافه كبار الواجبات اليوم موضوعه

تصدى من تعدى ويتحدى والوطن يعنيه

تعبّر كلمةٍ في نشرة الاخبار مذيوعه

صدق راعي المثل لاركبت حر ارقد ولا توصيه

ولو حددت له رحلة شهر ياتيك باسبوعه

نرحب في ولي العهد ونحييه وتحييه

جماهير تردد له بيوت الشعر مبدوعه

يامرحبا واهلين يارجل الوطن ذاويه

بعد هذا الزعيم انت الوطن وحماه ودروعه

علينا عهد لك ياسيدي والعهد ما نصخيه

عواتقنا قلايدها العهد بايمان مقطوعه

معك سلطان حماي الحدود ليا احتمى صاليه

يجيب لك القلايع من يدين القوم مقلوعه

يسلم ثالث الاثنين ويعافيه ويدوّيه

ابوخالد له الهامات بالتقدير مخضوعه

على الارهاب شنوا حرب شعوا واقطعوا طاريه

تموت الشجرة اللي من عروق الجذع مقطوعه

على من روّع الصيام خزي ولعنة تخزيه

عسى من راعهم رب الفلق يبلاه ويروعه

تموت اطفال وتموت النسا فعل طغى طاغيه

بكل الوصف وحش مفترس ويغير بفزوعه

جريمة ما تشبه بالجرايم يصعب التشبيه

عقول للحدث ما استوعبت خرقا ومصدوعه

كلام للبعيد وللقريب يسمعه باذنيه

لعله يستفيد ويستقر العلم باسموعه

نجابه طغمة بان الردى منها ولاتخفيه

هذا والله هو الارهاب مهما يختلف نوعه

خذت عدوى وجتنا بالوبا من تلمسه تعديه

كفى الله شرها وبقدرة الرحمن مقلوعه

ملغمة المصاحف ما لها بين الرجال وجيه

هبت والله وجيه للهوى وابليس مركوعه




يا لله بمانك من النكبات تامنا
والدار بحماك تمنها وتامنها
لأوامر القائد الا على تمثلنا
أرواحنا في سبيل الله نعربنها
بقيادة الفهد شلنا الصوت وأذنا
على المنابر تلج ابنا مآذنها
وإن كان صاح الفهد صاحت قبايلنا
بالصيحة اللي جميع الكون يذعنها
صيحة ندى والفدا فن ولنا فنا
فينا فنون المعارك ونتفننها
وإليا نخانا ولي العهد ثمنا
النخوة اللي على الوقفة نثمنها
حوله ومن حول من حوله تكونا
جزمه ولزمه وضربات نعينها
وإلى اعتزى النائب الثاني تزهلنا
لمصامخ المعتدين وقصف أماكنها
والمملكة في حمانا حيث ماكنا
بالدم نسقي ثراها وانتحضنها
فرض علينا وعهد قد مضى منا
إنرد بالنار هجمات العدا عنها
صنا المشاعر عن أشرار العدا صنا
عنها الشوارب إلى فتلت نحسنها
مكة وطيبة لنا والنا وغضب النا
ترسانة الدين للعالم نترسنها
على الجزيرة بحزم وعزم هيمنا
تفخر بنا فايسر العربان وايمنها
بالعدل والعرف والحكمة تسلطنا
نترك كثير الامور ونأخذ احسنها
لاهانت بلاد اخونوره ولا هنا
الجوخه اللي لبسنا من بطاينها
دار ربتنا وضمتنا وفضلنا
الموت فيها ولا نجس يدرنها
دار على خدها الطاهر تمكنا
فيها ومن فوقها نحفظ توازنها
يا دار طير السعد والعز لك غنى
حلو الأناشيد بأصوته يلحنها
يا دار ما تقتحمك الأنس والجنا
دونك عيال تفادي عن مواطنها
ذباحة الحيل وأهل الهيل والبنا
نطاحة القوم حماية ظعاينها
في سوق جاتك ماهوب بسوق هونا
تحمى علمها وإلى ماتت يكفنها
إن دندنت طبلة الحراب دندنا
بآيات حق على وبلال دندنها
كم من حريب تورط في حبايلنا
حبايل من اسلوب الحرب نتقنها
جاك . امتنكس ويخسر من يراهنا
مثل الذبيحة بأسافلها نكر عنها
واليادعا من يشيل الحمل له شلنا
ارقابنا في حياض الموت ترسنها
وحنا على جبهة الغازي تكامنا
حاضر بحاضر عدانا ما نعاينها
وحنا ليا عدت فعول العرب حنا
انساند العرب وندعم تضامنها
وحنا اليا انحلت الآسرة تعاونا
وقمنا على جمعها حتى نحصنها
وحنا ليا اشتدت الأزمة توصلنا
على حلول العقود اللي تهونها
وحنا ليا جاتنا الغلطة تحملنا
الاوله نباع الغلطه ونعلنها
وأن جاتنا الثانية .. لا ماتماهنا
بالسابقة نسحب الأخرى ونقرنها
وراعي الغلط معقول ومثنى
يلقي الحقايق وبعيونه يعاينها
نسمع بنبح الكلاب ولا تجننا
الكلب له حربه بكره نسننها
من دون صهيون .. بذتنا صهاينا
تكفر بالإسلام وتركز كماينها
الله يا الأنذال يقلع رمسكم عنا
اطماعكم عندنا بانت بواينها
مع منكرين الصنيع أمست محاسنا
سيات تحكي به العدوان بألسنها
واليا تضايق غريب الدار يزينا
تدمغ له الروس وأن طالت نطمنها
لوهي تلين الجبال الصم مالنا
على الحقوق ارتكينا في ممكنها
يا شيخ جابر لك الله ما تهاونا
الفهد يأكد لك العودة ويضمنها
ياشيخ والله زعلك اليوم مزعلنا
والمهزلة والمهونة مانواطنها
ابشر بنصر يشيد فوق ويبني
بأيدي رجال محكحكة معادنها
ترجع لدارك وهذي من صمايلنا
خطوة وسطوة وتاريخ يدونها
ما دام معك الفهد لا يلحقك ظنا
أبشاية الله كويتك لزم تسكنها
والقصر دسمان تجلس به وتتهنى
لابد من فرحة تطفي غباينها
صدام .. لا تحسب أن الحرب يجهلنا
حنا هل الحرب والكلمة نبرهنها
بالغش يال*** والخدعة مباطنا
تطوي سيورك على الفتنة وتدهنها
بمعاملات اليهود .. اثرك تعاملنا
تطمع بجارتك يالخاين وتطعنها
سلب النسا وانتهاك العرض غابنا
اعمال سوء لك الشيطان زينها
مخزي ومذنب ولا تقدر تقابلنا
تجمع فرايسك يا لحصني وتدفنها
صبحت معروفنا وامسيت خاينا
بغداد تلعنك يالفاجر وتلعنها
جاني وفي المجتمع منبوذ ومجنا
شعبك بري منك والنخوة بري منها
كفك ملطخ بدم الشعب ومحنا
ما عاد تنظف يمينك لو تصوبنها
حنا حميناك يوم اعلنت واعلنا
بالحرب جتك أسلحتنا من مخازنها
بالمعركة لك ثمان اسنين مشغلنا
ولك القوافل مداومة مكاينها
هذا جزى ما فعلنا من جمايلنا
تحشد علينا جنودك وانت خاينها
لك يوم محتوم تصغر به وتتمنى
ما كنت فوق الوجود ولك نقننها
عليك باسم الله اكبر من تضامنا
بالأرض سبع الفواسق وانت ثامنها
ياشعب دجلة ترى موطنك موطنا
لا ترخص الروح للمجرم وترهنها
احسن تقولون : سل السيف واقتلنا
في حكم مجنون لا يأمر ولا ينهى
الواجب انك على وصلك تواصلنا
ازحف على طغمة الطاغوت واطحنها
والياقمعـتوه لا عرج ولا ثنى
نقص على ظاهر الدنيا وباطنها