صباحكم / مسائكم
ورد معطر .. بشذى المحبه..
حابه اتكلم عن موضوع انتحال الشخصيات بالنت .. واتلاعب بسمعة واعراض الناس وطرحه للنقاش
اعتقد الموضوع واضح ومايحتاج اي مقدمات ..
بس راح اذكر قصتين حقيقيتين
وهم يمثلون المقصد من الموضوع .. المراد مناقشته


القصه الاولى


فتاه محترمه من عائله كريمه معروفه ولها مكانتها .. وكل الناس تشهد باخلاقهاالعاليه
تحظى بالثقه التامه من المقربين لها .. وكانت دائماً قد هذهِ الثقه ولم تخذلهم بيوم
في يوم من الايام .. وهي جالسه مع اهلها .. رن جوالها .. كانت وحده من صديقاتها
يادوب قالت: آلووو ..
قالت لها صديقتها بدون مقدمات .. فلآنه ادخلي النت الحين ضروري
البنت بداخلها تقول سلامات !! شسالفه؟! << ياغافلين لكم الله
ادخلت النت وادخلت المسن ..
قالت لها صديقتها: فلآنه تعرفين هالايميل ؟!
البنت : اممم لحظه مو متأكده .. شيكت على الايميلات الي عندها ..
وردت عليها .. ايه اعرف صاحبة الايميل بس من زمان عنها ماتدخل .. وماكلمتها من زمان ليه؟
صديقتها : انتي تعرفين البنت يعني ؟
البنت : ايه اعرفها كانت زميلتي بالمدرسه .. ليه ؟
صديقتها : بينج وبينها كراهيه ؟ زعل ؟ اي شي يعني ؟
البنت : لا والله مابيني وبينها الاكل خير .. فلانه ماصارت وش صاير ؟
صديقتها : بقولج شي والله مايتصدق .. بس البنت هذي متقمصه شخصيتج .. بالنت .. وتسولف مع الكل على انها فلانه بنت فلان .. ومو كذا حتى بالمعلومات الي بالايميل
مسجله بالبيانات .. فلانه بنت فلان الفلاني .. يعني من ترسل لحد وهو مايعرفها .. يفكرها انتي .. والله العالم من معاها باميلها .. وعلى فكره ترى هي موجوده الحين
البنت :وهي ب حالة صدمه وانبهار .. سكوت .. موجوده ؟! بس عندي مو جوده ؟ معقوله هي ؟ وليه منتحله شخصيتي ؟!
الصديقه : والله مدري شهالصدفه الي خلتني اضيفها .. وانا من ضفتها شاكه .. كل البيانات الي تعطيني اياها لي سالتها اساله شخصيه .. تكون مطابقه لج .. بس يوم جاني ايميل منها ومكتوب الاسم والله استغربت
وقلت السالفه فيها خلل .. وقلت اتاكد .. ويوم طلعتي تعرفينها تاكدت انها متعمده تاخذ شخصيتج ..بس ليه مدري .. وعلى فكره ترى الي فهمته من كلامي معاها .. ان عندها شباب من المنتدى بالمسن ..
البنت : << وهي منبهره بكل الكلام واللي يصير .. فلانه لو سمحتي ممكن اتضيفيني محادثه جماعيه ؟!
صديقتها : اوكي
البنت : << ادخلت المحادثه .. بكل برود .. السلام عليكم يافلانه؟
البنت المنتحله الشخصيه : .. وعليكم السلام هلا والله عارفه اسمي ؟ بس ماتشرفت باسم الكريمه ؟
البنت : شدعوه يافلانه؟ شوفي الاميل وانتي يمكن تذكريني
البنت المنتحله الشخصيه : سكوووووووووت وفصلت المحادثه وطلعت من المسن بكبره
البنت : على طول دقت رقم البنت هذي وهاوشتها وسفلت فيها .. بس تبي تعرف ليه سوت فيها كذا .. وانها لو انها عدوتها ماسوت كذا وتلاعبت بسمعتها بهالطريقه الرخيصه
ومن صراخ البنت جوها خواتها حريم خوانها .. متعجبين ليه تصرخ وتهاوش ؟ وشاله الدنيا ؟
سكرت السماعه وتلبس عباتها بتروح البيت البنت تبرد الباقي من حرتها << الاهل بحالت تعجب شسالفه ؟ البنت قالت لهم السالفه وهي فيها حره وصدمه .. وتبكي ان شلون فلانه الي كانت عادتها صديقه تسوي كذا ؟
هدوها ومنعوها تطلع .. وقالوا لها لاتسوين فضيحه انتي بغنى عنها .. واللي يبوق مايخاف يافلانه .. والشمس عمرها مايغطيها منخل والكل عارفج وعارف اخلاقج .. وبعدين لو دروا خوانج بالسالفه .. انتي الي بتروحين فيها مو هي
ليه سوت فلانه كذا الا اكيد في شي ومن هالكلام .. ردت البنت .. وانا مو ذابحني ان اهلي وخواني عمرهم ماكانت فيهم الشينه .. والحين تجيهم من شي انا ماسويته ومالي دخل فيه ؟
لو صار بيوم وحد تكلم بمجلس فلانه بنت فلان .. اعرفها ومعاي بالمسن او اكلمها وانا والله مالي بهالسوالف .. شيكون موقفي ؟ او الموقف الي ينحطون اخواني فيه ؟
المهم سكتوا وهدوها .. ومن هالكلام .. بس البنت البنت ماسكتت .. وكلمة اهل البنت وقالت لهم عن سالفة بنتهم .. وطبعا اهلها تصرفوا معاها


سبحان الله الدنيا صغيره .. كيف ربي ردا صديقة هالبنت تضيف هالانسانه المنتحله الشخصيه .. وربي يكشفها على حقيتها .. وينبه هالبنت من هالانسانه وانها توضح الصوره .. قبل لايصير شي هي بغنى عنهوماتدري عنه بالاساس .. وتنظلم بسبته


القصه الثانيه


عضو وعضوه تربطهم اخوه بمنتدى .. وماتعدى حدود المنتدى
ارسل لها هذا العضو بيوم .. فلانه ممكن اضيفج ؟ وترى ماقصدي شي من هالاضافه .. وانتي اخت عزيزه
ردت العضوه .. وانت اخو غالي بس اسمح لي الشيخ .. خلنا اخوان بحدود المنتدى
رد عليها .. ابشري .. وانتي اخت غاليه .. واتمنى ماتاخذين بخاطرج من الطلب .. وانسيه
وانتهى الموضوع .. ومافتكرت العضوه .. وكانوا يتعاملون بشكل طبيعي
بعدها باسبوع .. تفاجأت البنت .. باضافه جايتها بالايميل .. والايميل نفسه اسم العضو ؟!!!!!!!!
اقبلت الاضافه ..
العضوه : من ؟
الشخص المضاف : ماعرفتيني يافلانه ؟
العضوه : معقوله انت فلان ؟
الشخص المضاف : ايه انا فلان
العضوه : من وين جبت الايميل ؟ وباي حق تضيفني ؟
الشخص المضاف : الي يبي شي يجيبه .. بحق اني ابي اتعرف عليج
العضوه : في داخلها مستغربه من هالاسلوب معقوله هذا فلان ؟ ماصدق .. فلان بغاية الاحترام والادب .. ومستحيل يحط نفسه بهالموقف او يتصرف هالتصرف
قالت لو سمحت عطني بلوك ودليت .. لاني بسوي الشي نفسه
الشخص المستخدم : ومن انتي تعطيني بلوك ودليت .. ومن هالكلام
البنت : ؟؟؟؟؟؟؟ اوك
وعطته بلوك ودليت وهي بحالة ذهول
وارسلت للاداره .. وقالت الي صار .. عشان مايتعرف لها مره ثانيه
الاداره كانت حكيمه .. وقالت هاتي الايميل الي اضافج .. واحنا نشوف الموضوع
طبعا العضو هذا شخصيه معروفه بالمنتدى والكل يشهد باخلاقه واحترامه .. ومستحيل يجي منه مثل هالتصرف
باليوم الثاني وهي بالمدرسه .. جوها صديقاتها: هاه فلانه اخبار فلان ؟
العضوه :؟؟؟؟ << ماقالت لهم سالفة الاضافه ولا بيوم جابت طاريه قدامهم ؟! تقول بقلبها شسالفه ؟ وخاصه ان الاضافه كانت امس
قالت العضوه : شسالفه ؟
قاموا صديقاتها يضحكون .. وقالوا لها انها كانت لعبه منهم ومزحه .. ويبون يشوفون ردة فعلها .. لانهم يلاحظون فلان معجب فيها من خلال اردوده بالمنتدى ؟!
العضوه دمعت عينها .. : مزحه ؟ خليتوني اتبلى على العضو .. واشوه سمعته وتقولون مزحه ؟ شموقفي قدامه او قدام لاداره ؟
وقامت عنهم وتنتظر بس ترجع البيت .. وتكلم الاداره .. قبل لاتحنط بموقف لاتحسد عليه .. زود عن لاحراج الي حاسه فيه
المهم ارجعت وعلى طول قالت الي صارللاداره .. طبعا الاداره شدت عليها مع ان مالها ذنب بس راعوا موقفها واسئلوها ان كانوا صديقاتها موجودين بالمنتدى .. قالت لهم في وحده منهم موجوده ..
وتم توقيف عضويتها بدون اي نقاش .. لانها تقمصت شخصية عضو وبطريقه غير لائقه << والله الطرد شوي عليها
وعلى فكره سالفة الاضافه باسم فلان جات صدفه بعد سالفة طلبه للايميل منها ..
وهي ماقالت لهم عن طلبه .. ولا قد تكلمت عنه قدامهم .. لا كعضو حاله حال غيره
والعضوه طبعا ماعادت تدخل المنتدى لاحساسها بعظم الشي الي صار مع انها مظلومه حالها حال العضو الي ظلموه صديقاتها بفعلتهم


انتهت القصتين
القصه الاولى : ..انتحال اشخصيه معروفه بشخصها وليست رمزيه او نك من خلال شاشات .. والانتحال كان فيها متعمد من خلال الشبكه العنكبوتيه
القصه الثانيه : .. انتحال الشخصيه رمزيه .. بس معروفه بعالم النت المحيط فيه .. وكانت بغرض المزح السامج


يا هل تُرى لهالدرجه اصبحت سمعة واعراض الناس هينه .. وسهل التلاعب فيها بالنسبه للبعض ؟ سواء كانت بصوره مباشره او لا ؟!


على فكره .. اصحاب هالقصتين .. اعرفهم يعني مو قصص منقوله او من وحي الخيال ..
والمجال متروك لكم الان للتعليق والنقاش

الله الله في اعراض المسلمين
والله اختي لقد لعب الشيطان بشبابنا واصبح كل شيء عندهم مباح
اشكرك على تنبيهك
واتمنى الا يساعد موضوعك هذا في انتشار هذه الظاهرة
لانه وكما تعلمين مصائب قوم عند قوم فوائد

ربنا يستر

__________________
ما كان لله دام واتصل وما كان لغير الله انقطع وانفصل

يسلمو اخوي على المرور


انا طرحت الموضوع لاني بنت اخاف من اولاد الحرام اللي ما يفكرو في اعراض الناس

واتمنى نتناقش فيه ونوضح الابواب اللي ممكن تنفتح من وراه ممكن الضمير يصحى

ويفكرو الف مره قبل ما يتبلو على الناس ويطعنو في شرفهم وسمعتهم ويحطمو حياة عائله

كامله