 فاطِمةة الزَهرَاء.
بسم الله الرحمن الرحيم
اللهمّ صلّ وسلّم وبارك على سيدنا محمد وعلى آله وأصحابه أجمعين 
السّلام عليكم ورحمة الله وبركاته
عساكِ تكوني بخير يا رب 
قررت أغيّر شوي من المقدّمة
أوّل إشي تعليق على كلامك بعد الفصل بحب أحكيلك إنّك كاتبة رائعة وملتزمة بالمواعيد بحق بهنّيكِ جد ع متابعتكِ الكتابة وإنزال الفصول
يعني بالمختصر ما رح نلاقي مثلك بالعالم
وإن شاء الله أنا رح أتابعك للنهاية بس في حال ما ردّيت ع فصل بتكون الظروف منعتني بس تابعي إنزالك للفصول حتّى لو أنا مش موجودة، رح يكون في متابعين آخرين غيري إن شاء الله عمّا قريب يكونوا موجودين
وانتِ خليكِ حاطة ببالك مقدار الأشخاص القارئين اللي مو مسجلين بالمنتدى، لحد الآن أكثر من ألف شخص قرأها شايفة والله إنجاز، هاد كلّه بسبب روايتك المميزة صاحبة الأفكار الخطيرة يا خطيرة  والله مع كلّ فصل بتنزليه بستمتع بقراءته والشغف مصاحبني، بكون بستنى يوم الجمعة أو السبت بالذّات عشان أقرأ الفصل الجديد من روايتك، عشان هيك ما تخلّي نفسيتك تتحطّم أبدًا، فنفسيتك من نفسيتنا احنا القارئين، كوني متفائلة دائمًا، أنا معاكِ واحنا معاكِ كلنا بإمكانك تحكي مع أيّ حدا ليساعدك، ما تفكري بالأمور المحزنة وفكري بكلّ إشي جميل صار معك باليوم وابتسمي، ممكن يكون شيء بسيط مثل دخول الشمس لعينك مثلًا شيء بسيط بس حلو عند التفكير فيه المهم بحب أقرأ للشخص المتفائل وانتِ شفت فيكِ الشخص المتفائل، فما تيأسي
ما بعرف إذا كنت بقنع فيكِ أو لأ أو حتّى يمكن أنا مش فاهمة الموضوع منيح بس يلّا
نبدأ بالفصل الرائع المشعشع
يعني عنجد، بكلّ فصل تنزليه أستمتع بالقراءة جدًا، وكان بهذا الفصل كذلك ..
في البداية العنوان العنوان "منعطف جديد" رايحين يعني لطريق جديد ما علينا، دائمًا العنوان بختصر كتير شغلات موجودة بالفصل، وبحكي عن مدى الحماس اللي بنتظرني لحتّى أقرأ، وفعلًا تملّكني حماس كبير
"رأيكَ وقراركَ في هذه اللحظة مختلف كل الاختلاف عن تلك اللحظة.."
عنجد هااي العباارة، بكلّ لحظة أنا برأي وقرار جديد  بحب كتير العبارات اللي بتكتبيها قبل الفصل وبعد العنوان، جدًا معبّرة وبتتحدّث عن واقع
وهلأ بإمكاني أبدا بالفصل
يعني طلع حقيقة إنّه يراها وأضحكني تظاهر كاروكو بالغباء وقتها، أنا متأكدة إنّ كاان بعرف بس سأل سؤال غبي مثل كإنّه بحكي مش فاهم أو إيش صار وهيك فعليًا أنا كمان هيك بس بطريقة مختلفة بعمل حالي غبية بالكامل عن الموضوع عشان أريّح راسي من الأسئلة وهاي الأشياء اللي بتصير
ماهيرو اللي ما تظاهر بالغباء وحكى إنّه الأستاذ غوكيو كامل، بس هل هم بقصدوا بكامل إنّه بالغ !!
المهم كان اعتقادي صحيح إنّه منهم
طيّب هلأ كمان الغوكيو بتصير عينيهم يشعّوا بالظلام!! هاد الإشي بخليهم يقدروا ينظروا خلال الليل مثلًا، ذكّروني بالقطط
وصدقًا بحب لامبالاة كاروكو
حبّيت تشبيهك هون "جلس ماهيرو وتنهد بتعب كأنه كسّر أشجار غابةٍ كاملة محولًا خشبها إلى حطب" تشبيه عميق بتحدّث عن تعب سنين طوال
اسمه أتسوشي هلأ وكان سابقًا اسمه هالرَد طوّلت لحتّى استوعبت هااي الجملة
واعتقادي الثاني إنّه برتدي نظارات كان صحيح لا أكاد أصدّق
عجبتني هاي اللقطة لمّا حكى ماهيرو عن أساهي وكاروكو إنّه من الطبيعي يكونوا مغرورين ومتملكين في بعض الأحيان
حتّى هم بشوفونا كائنات غريبة حلو فكرة إنّه يمثّل كونه مكفوف ويحاول بعدها يعيش طبيعي بإنّه يشتغل أستاذ
وتعرّف ع الشبح قبل 7 سنوات، بس هلأ قبل حكيتِ إنه تعرف عليها قبل 7 سنوات وهي لاقوها ميتة بالقبو من 9 سنوات هذا يعني إنّه تعرّف عليها وهي شبح!! صحيح؟ بس هاد إشي غريب ")
عمره 280 !! ياااااه انصدمت بس عرفت وهم خالدين للألف عام، لسى وقتهم طويل والحمد لله هاد طلع ما بزيد من كثافة السّكان
وعنجد خليني أفكّر شوي، كيف قدرت الشرطة ترجع الآباء للغوكيو وبالآخر كلّ الشرطة كانوا ميتين تاني يوم، معقول هم هربوا لمكان بعيد بعد ما قتلوا الشرطة وما رجعوا .. راحوا يتخبّوا بمكان تاني لحتّى تهدى الأوضاع، ولا قاعدة بخبّص
المهم عجبتني اللقطة اللي رنّت فيها والدة ماهيرو عليه، المحادثة كانت مضحكة
ويا حرام الروح ملعونة طلعت وهلأ هي مقيّدة في القبو وما بتقدر تطلع منه !!
وصحيح هلأ هم بشو يفكروا عنجد، بعدم تصديقهم إنّه الأستاذ مثلهم ولا بطلاسم الكتاب أنا هلأ ما رح أعرف أنام من التفكير كماان، لازم ألاقي نتيجة أو حل
وكالعادة ضحكت كتير ع موقف ماهيرو لمّا حكى لكاروكو "دعك من هذا الآن وفكّر بموضوع أنّي سأبيتُ عندكَ الآن!" وإنّه انطرد لا والأحلى بحكيله كاروكو "جد لكَ مكانًا آخر"
وبالآخر بنام دائمًا ماهيرو ع السرير، فوق إنّه جاي ينام عنده بنام ع سريره كمان
هلأ الشقراء قصدك فيها أساهي ^_^ بس شو سر التعب والمرض الدائم لها بعد ذهاب كيوشي للعمل ويا حرام ما لاقت مفتاح البيت والحمد لله مفتاح الكتاب مو ضايع كان صارت مصيبة لو هيك، وبس راحت ع المخزن تدوّر ع المفتاح ووقعت هي والصندوق كنت رح أبكي، وليش ما حسّت بآلام السقطة معقول عشان ألمها اللي قبله ما خلّاها تحس فيه، ومين رح ييجي ينقذها، هل كالعادة كيوشي رح يحس بإشي غريب ويرجع ع البيت أو حدا تاني .. ما رح أقدر أستنى أسبوع لأعرف، يا الله تحمّست كتير والنار جواتي بتحرقني من الحماس هاد 
وطبعًا بعد ما خلصت قراءة يعطيكِ العافية، فعلًا فصل رائع الله يسعدك مثل ما أسعدني هاد الفصل ع أضعاف كثيرة
في أمان الله ورعايته ..
بانتظاركِ دائمًا وأبدًا
سبحانكَ اللهم وبحمدك، أشهد أن لا إله إلا أنتَ، أستغفركَ وأتوب إليكَ ..
__________________
🔸ابتَسِم ، مادامَ حُزنُكِ لايهُمُ الآخَرينْ 🌟
التعديل الأخير تم بواسطة X ; 10-11-2019 الساعة 07:33 PM |