عيون العرب - ملتقى العالم العربي - عرض مشاركة واحدة - مجلس عيون العرب " مجلسنا لمة محبتنا " الكل هون

ميّوم · #3 08-21-2019, 08:40 AM

-

يُعجبني ولا يُعجبني:
- في شي مو عاجبني حاليًا، كتير أوقات اشوف ناس تضرب حيوان سواء بسّة
أو كلب أيًا كان نوعه، يضربو الحيوان دا ويضحكو ويصوّرو.. كيف؟؟.. ليش؟..
كيف دا الشي يضحكهم؟.. هدي مخلوق من مخلوقات الله، ربّنا سوّاها ربّنا خلقهم
زي ما خلقنا!.. وإدا كلمناهم قالو دولا حيوانات ما عندهم مشاعر، أو يقولو خلونا
نحل قضايا الإنسان بعدين تعالو كلمونا عن الحيوان!.. كييييف تبونا نحل قضايا
الإنسان إدا انتو ما عندكم ذرّة رحمة للحيوان؟.. اسمو حيوان يعني ما ينطق، ما
يقدر يقول أن الشي دا يؤلمو، ما يقدر يقول ارحموني ترا يؤلمني دا الشي!..

لأنو ما يقدر ينطق سارو يشوفو نفسهم عليهم كأنهم كائنات غريبة!.. حيوانات
تعيش حالها حال نفسها يالله يالله تلاقي لها أكل في الشارع عشان تاكل حق
اليوم كلو حتى لو لقمة بس، في مرّة كانت في حارتنا بسة تموء تطلب
من الناس أكل مويا أي شي ، كانت طيبة جدًا ومن النوع إللي يجيك
ويتمسّح فيك، رحنا البقالة مع أبويا عشان نشتري لها لبن نحطو لها
في صحن وتشربو، رجعنا لقينا شباب – مو أطفال لا لا شباب كبار في العشرينات –
ماسكين البسة من ذيلها و يلعبو بيها كأنها مروحة والبسة تصرخ ولما جت
عضّت إللي ماسكها رموها بعيد وشاتوها للزبالة وقاعدين يقولو شوف الحيوانة
المعفنة تعض؟! ..

كنت بجيب العيد وأقول إيوا أكيد بتعض تباها تبوس يدك
بعد إللي سويتو فيها؟.. بس أبويا سكّتني ولين دحينَ حزينة ع البسة والله!.
المهم أن عشان نساعد الإنسانية لازم نساعد نفسنا ونزيد رحمتنا ع الحيوانات
إللي حالها حال نفسها، ربّنا حطّاها بيننا لأنها زينة لعيوننا، زينة لها مشاعر
ويحسو ويعيشو ع قد حالهم، مجرد يدافعو عن نفسهم لما نقرب منهم، نحط
لهم أكل ونروح، بعد شوية حنشوفها من بعيد بعد ما تطّمن إنو مافي أحد
حتاخد الأكل وتاكلو أو حتكتشفو إنو عندهم اطفال يكسّرو لهم الأكل عشان
يخلو لهم الأكل.. همفف .

- بالنسبة للي يعجبني إننا وصلنا في زمن الأغلبية واعي
حتى الصغار نلاقيهم فاهمين الصح والغلط، رغم إنو البعض
يخلط بين الحرية الشخصية والوقاحة لكن حيتعلّمو بعدين.

-
علّمتني الحياة:
في الواقع هنالك أمر أريد التحدّث عنه..
هواياتُك لا تسحب عليها، إيّـــــاك!.. كنت ما أجتهد
في دراستي زمان في الابتدائية، كل تفكيري كان لمّا أكبر أبا أسير رسامة،
كنت فعليًا أرسم رسم مو انمي، كنت أرسم كِدا الشخص
وهو قدامي، الرسم الحقيقي.

لكن أمي و أبويا قالولي أدرسي واجتهدي بدل ما ترسمي
وفي المستقبل ما بيفيدك شي إلا شهادتك، وكلامهم صحيح تقريبًا..
لكن الغلطة كانت منّي أنا، تركت الرسم لأكتر من 10 سنوات، عشان
أدرس و أتفرّغ للدراسة بدل ما أمارس هوايتي، حتى أوقات الفراغ
كنت أركّز ع الدراسة بس يعني في قاموسي ما كان عندي شي اسمو
وقت فراغ، كنت أحصّل أعلى الدرجات ومن الأوائل بس عشان الشهادة،
وكانت هدي أكبر غلطة في حياتي.. دحينَ أنا أبحث عن وظيفة بينما
غيري إللي ما أهتمّو بالدراسة ودرجاتهم متوسطة أشوفهم بالفعاليات
يبيعو أعمالهم من صنع أياديهم، من صُنع هواياتهم! ..

لو كنت أمارس هوايتي وأرسم و أتطوّر و أدرس في نفس الوقت
وأنظّم وقتي ما بين الشيئين دولا كنت دحينَ فاتحة مشروع وأستفيد
من هوايتي فعلًا ..
وقتها فهمت أن الحياة مو عبارة عن دراسة فحسب، ما تحتاج
شهادة فقط لأجل النجاح، إنّما خبرة وموهبة تمتلكها وتشيلها معاك،
وحتى بالتوضيف.. بيشوفو مهاراتك والشهادات إللي حصلت عليها
من خارج المدرسة وليس من المدرسة فحسب، يعني فكرة بناء
المستقبل بالدراسة فقط شيلوها من رأسكم، مارسو ما تحبون
بينما افعلو ما بوسعِكم لأجل الدراسة وارضوا بالنتيجة مهما كانت،
ولا تُهملوا هواياتكم إمكن هي مستقبلكم :" class="inlineimg" /> .

-
على أي حال كِدا اكون خلّصت ..
لي رجعة في هدي الغرفة الدافئة دفء النفس.. لحين
ذلك الوقت كونو بخير دائمًا وأبدًا.

#ميّوم < أعوذ بالله من ثرثرتي الكثيرة xd .

-