البارت 25


بيت بوعبدالله
الدمام

بوعبدالله : اجل ماعطوك خبر للحين ؟
عبدالله : يبا .. تعرف الظروف اللي يمرون فيها .. مدري . .احس مب وقته
بوعبدالله : الحمدلله الحين بوراشد حالته احسن من اول .. افتح الموضوع مع راشد
عبدالله اللي خايف من الاجابه .. وحاس ان نور مب موافقه .. عشان جذي يحاول يطول الموضوع ومايسأل راشد : ان شالله
بوعبدالله : طيب اليوم بعد صلاة العصر خذني ابي ازور بوراشد وعقب نمر انا وانتا بوضاحي من زمان ماشفته
عبدالله : خلص يبا اللي تشوفه
وهو في قلبه مستانس انه بيشوف نور .. صارله اسبوع ماشافها ولو من بعييد .. حتى موضي دايم تسأل عنها


في المستشفى
راشد يكلم الدكتور اللي طمنه عن حالة بوراشد وقاله انهم يقدرون يستكملون العلاج بالكويت .. ووصاه على اختصاصي هناك بيفيده وايد

راشد : خلص يبا الدكتور يقول كلها اسبوع وترد الكويت ..
بوراشد براحه : الله يطمن قلبك ياوليدي .. والله ريحيتني
راشد : هههه ها بوراشد مليت منا ؟
بوراشد : الا مليت من قعده المستشفيات .. ولهت على البيت
راشد : بس البيت !!
بوراشد: وعلى ام راشد والعيال وبوخالد .. على ربعي والدوام
راشد بابتسامه : اقولك شي .. الصراحه انا حاسدك ههه
ماشالله تدري يايبا من اول مايينا وهالشهرين اللي تميت فيهم بالمستشفى .. تلفوني ماسكت .. الكل يدق علي يسأل عنك .. والله عندك معارف وايد ومسؤلين كبار تفاجأت باتصالاتهم وكلهم يبوني ابلغهم متى بترد الكويت
بوراشد : هههه الله يهديك ياراشد .. اذا انت تحسدني على هالشي .. فانا احسدك على اشيا كثيرة ..ياليت اخوانك يحبوني زي مايحبونك
راشد حس انه ابوه فاقد شي .. ويمكن حب هالعالم كله له مايعوضه عن حب عياله له : يبا .. يوم طحت بالمستشفى بالكويت ..تدري هشام شنو قالي ..!!
قال اول مرة احس اني احب ابوي حييل .. ودي اسوي أي شي عشان يرد مثل اول اوحسن
بوراشد ماتتصورون شعوره بهالكلمه .. كانت سعاده وفرح ماينوصفون
بوراشد : هو قال جذي !!
راشد يبتسم : يبا .. لاتتصور انك مب غالي علينا
بوراشد سكت شوي عقب قال : راشد .. انا ادري اني مب القدوة اللي لازم تقتدي فيها .. واعرف بعد اني مااصلح اكون ابو .. بس انا ابيكم تصيرون احسن مني .. وخصوصا انت ياراشد
راشد : ليش تقول هالكلام يايبا .. انت قدوتنا وسندنا وعزوتنا بعد
بوراشد : عمرك شفتنا نقول عن مدمن المخدرات انه قدوة لعياله
راشد باستغراب : لا
بوراشد : شلون تبينا نقول عن ريال فاتح له شقه لل
ماقدر بوراشد يكمل هالكلمه .. حس انه مغصوص فيها .. شنو بيقول لولده .. بشنو بيواجهه فيه .. مايدري اصلا ليش فتح هالموضوع .. بس كل اللي حسه انه راشد اقرب له من روحه ووده يقوله كل شي
راشد : لاتكمل يبا .. انا عارف هالموضوع من زمان
بوراشد انصدم : تدري !!
راشد : تذكر يوم خطبتلي سلوى بنت خاله خالد ولد عمي .. تذكر وقتها كنت صغير .. يومها انتا طردتني من البيت لاني رفضت اتزوجها وكنت ماادري وين اروح .. احوس بالشوارع .. شفت سيارتك واقفه عند وحده من العمارات
ماادري شللي خلاني اتم بالسيارة الين انتا ماطلعت ووو .. كانت معاك وحده .. و
بوراشد : خلص ياراشد لاتكمل ..
راشد حس انه كسر بأبوه : يبا .. مااقصد اضايقك بس .. انا اسف
بوراشد : والله ياراشد اني من عقب اللي صار لاختك بطلت كل شي .. حسيت اني مسؤل عن كل اللي مرت فيه نور
راشد سكت .. كلام ابوه صح ..
بوراشد وهو يناظر ولده بخيبه : اكييد من داخلك تلوم حظك اللي عطاك ابو مثلي
راشد : يبا .. الحين بس افتخر ان عندي ابو مثلك
بوراشد يبتسم ويحظن ولده بقوة .. يحظنه وكأنه كان فاقد شعور الابوه من زماان
راشد وهو يضحك : اول مرة نتفق على شي ههههه
بوراشد : هههه وبيدوم هالاتفاق ..
راشد يبتعد عن ابوه شوي : زين انا بروح اييب نور لانها ذبحتني تلفونات
بوراشد: على طاري نور .. ترى هي موافقه على عبدالله
راشد باستغراب : شلون ؟
بوراشد : انا اقنعتها .. عبدالله خوش ريال والنعم فيه وانا ابي اطمن عليها وقعدتها من غير زواج جذي مقلقتني
راشد : كلامك عدل يبا .. اهم شي تكون اهي مقتنعه .. وبيني بينك انا كنت متحمس لهالزواج اكثر منك .. عبدالله ريال زين وبنضمن بنتنا بتكون مرتاحه عنده
بوراشد : زين يله روح ييب نور خل اشوفها وعقب خذها وودها السوق مسكينه من اول مايات ماطلعت الا مرتين ولا ثلاث
راشد مرتاح من الخاطر من التغير اللي صار لابوه .. تذكر كلام هشام يوم قاله يمكن يجي يوم ابوي يتغير فيه .. وقتها ماصدقه واعتبره خيال ..
راشد : صار يبا .. خالتي ليلى دقت علي وقالتلي اييب نور عندها واهم بيطلعون يميع
ويرن تلفون راشد ..
المتصل نور
نور : انتا وينك ؟
راشد : اووو زين والله ياي اخذج
نور : يله ترى مليت مابقى فلم بالتلفزيون ماشفته .. حتى التنظيف خليتهم يرتبون الشقه ثلاث مرات
راشد : هههههههه زين يالمطفوقه .. كاني ياي
نور : هههه يله
راشد وهو عنده خط ثاني : نوروه يله باي عندي خط
نور : اوكي بيباي
راشد يرد على الخط الثاني . . المتصل كان عبدالله
راشد : هلا والله عبدالله
عبدالله : هلا راشد .. كيفك .. وش اخبار عمي وو الاهل !!
راشد : بخير عساك بخير وانت شلونك .؟ ومضاوي شخبارها ولهنا عليها يامعود ؟
عبدالله : ههههه .. كلنا بخير يالغالي .. شبغيت اقوللك .. انا جايب ابوي اليوم بعد صلاه العصر المستشفى
راشد : حياكم الله حبيبي .. أي وقت تيون فيه
عبدالله اللي يبي يعرف اذا نور بتكون موجوده ولا لا : اخاف نزعج الاهل
راشد فهم عبدالله شنو يبي : مافيها ازعاج حبيبي .. انا باخذ نور بوديها عند خالتي ليلى وبتم هي هناك
عبدالله بفضول : عندك خاله هنا ؟
راشد : ايه اخت امي من ابوها .. وطول الوقت نور عندها
عبدالله بخيبه : يعني نجي بدري شوي معليه ؟
راشد : هههههههه عبود .. شتبي ؟
عبدالله : هههههه مابي شي .. بس يااخوك مدري اذا الكلام بهالموضوع مناسب ولا لا ؟
راشد يبتسم : أي موضوع ؟
عبدالله : موضوعي انا .. يعني بس لو اعرف اذا الاهل موافقين ..
راشد بخبث : ليش !!
عبدالله : عشان نرتاح هههه
راشد : تطمن الاهل موافقين .. بس انطر هالاسبوع بنرد فيه الكويت الدكتور طمنا عن حاله الوالد وبالكويت نتفق على كل شي
عبدالله اللي للحين ماصدق الكلمه اللي سمعها .. ماسمع عقبها ولا شيي .. الاهل موافقين !!
معقوله نور وافقت !! معقوله الحلم اللي كنت استناه سنين .. راح يتحقق .. الحمدلله يارب .. الحمدلله انه السعاده بتنفتح لي من جديد .. يااه يانور .. مين بيصدق انك بتكونين لي .. لي انا بس .. ومافيه أي قوة بالدنيا بتاخذك مني
راشد : عبوود .. !!
عبدالله : هلا معك
راشد : ويي انت حالتك ماتسر
عبدالله : شهرين الله يهداكم .. وربي قاعد على اعصابي
راشد : طيب لاتطولون اليوم .. تعال مبجر ..
عبدالله اللي الدنيا موشايلته من الفرحه : ان شالله .. انت تامر
راشد اللي يضحك من وناسه عبدالله : طيب .. مع السلامه
عبدالله : مع السلامه

سكر عبدالله من راشد وهو من فرحته مايدري شيسوي .. دق على سارة وخبرها بالموضوع اللي اهي بعد ماتوقعت ان نور توافق .. كانت من داخلها تحس انها ظلمتها حييل .. لكن موافقتها تحسسها بان نور نست الماضي ..
في الكويت
مر اسبوع و موعد وصول بوراشد من السفر
الكل كان في المطار .. يستقبله .. من صغير الين الكبير
هذا غير ربعه وموظفيه ..
كان المطار حافل .. ماشالله كان محبوب من الكل وعلاقاته كثيرة .. بس كان مايدري عن بيته لكن يمكن هالصدمه اللي مر فيها وعته وفتحت عيونه على اشيا هو كان غافل فيها .. وكنز غالي مايتعوض .. وهو راشد

في بيت بوراشد
الكل كان فرحان برجعته .. الديوانيه كانت مليانه من ناس مهمين واهل ورياييل .. الورد كان مالي البيت وام راشد كانت الدنيا مب شايلته من الوناسه .. رجعة حبيبها واللي لها بهالدنيا تسوى انها تفرح فيه مب يوم ..الا العمر كله
بيت بوخالد كانوا مسوين عزيمة كبيرة بعد جم يوم في الشاليه .. باختصار .. بوراشد كمل فرحه عايله فقدت السعاده من زمان

الساعه 12 ونص
الديوانييه
اغلب الريايل مشوا .. ومابقى غير بوخالد وخالد وهشام وريل ريم وبقيه رياييل العايله
بوخالد قاعد يم بوراشد ويكلمه بشويش : ها يااخوي .. وجنك ماخسرت شي بالبورصه .. واعتبر المليونين اللي راحوا بالاسهم رجعولك وزود
بوراشد :لا اوانااخوك .. صحيح اللي خسرته كله كان شقا عمري .. بس صدقني اني ربحت اشيا كثيرة .. ماتتعوض بفلوس الدنيا كلها
بوخالد مرتاح من علاقة راشد بابوه : انت مثل ماتعرف فلوس الورث للحينها بالبنك .. تقدر تاخذهم وتستثمرهم وانت ماشالله عندك معرفه طويله وخبره جبيرة .. استثمرهم بالعقار .. او حتى ابني الارض اللي نملكها بلندن
بوراشد : بوخالد الله يهداك .. نسيت اني املك للحين ضعف هالمبلغ . . مابي اورطك بشي يابوخالد .. ماشالله عندك ولدك اولى ان يكون مسؤل عن هالفلوس .. هذا حلالهم
بوخالد : لا .. العيال مايفهمون بالعقار شي .. انت اولى .. انشالله بس تشد حيلك هالشهرين .. اعطيك توكيل بكل شي .. نبي هالعايله ترد تلتحم من يد ويديد
بوراشد : ان شالله .. الله كريم
بوخالد : الا ماقلتلي شصار على موضوع نور .. عسى وافقت ؟
بوراشد : ابشرك وافقت .. وان شالله بيملجون هالشهر
بوخالد اللي ارتاح من الخاطر ... : الحمدلله .. مبرووك الله يوفقها ان شالله .. وعبدالله منه وفينا .. والقريب اولى من الغريب وانا اخوك
بوراشد : على قولتك .. الله يوفقهم ان شالله

في صاله الاستقبال
نور : يييي تعبت بروح اغير ملابسي .. تعتب من هالدراعه
ريم : ايواا ياواد انتا .. شهالزين يانور .. كلهذا عشان عبااادي
نور بضيق : شكو .!! اقولج لاتروحون بغير ملابسي وارد
ريم : تأخر الوقت حبيبتي .. وسعود نايم
نور : بشور وللي يرحم والديج .. مسكيها لاتنحاش ماني مطوله
ريم : هههههههههههه وااي هالببنت من ردت من الدمام ولسانها طايل
بشاير : الله يعينا اذا تزوجت .. بتاكلنا هههههه
نور : ههههه اسكتي انتي وياها ..
بشاير حاسه ان نور مرتاحه لكنها ماتحب تتكلم بموضوع عبدالله .. حتى انها يوم درت انها موافقه سكرت على الموضوع وقالت لها انها وافقت عشان ابوها بس .. معقوله للحين تكابر ..!! معليه يانور .. باجر بس ترتبطين فيه بيرد هالحب مرة ثانيه

راحت غيرت نور ملابسها .. ونزعت الساعه اللي يابها لها عبدالله بعيد ميلادها قبل سنتين .. ماكانت تبي تلبسها بس بشاير اصرت لانها تناسب الدراعه الفوشيا .. فما حبت تقولها انها من عبدالله وماتبي تلبسها لهالسبب

افتحت الدرج وحطت الساعه وطاحت عينها على مسباح ذهبي تمووت فيه .. مسكته بيدينها .. حست انها ضعيفه ياربي شسوي .. شلون وافقت اني ارتبط فيك ياعبدالله .. وليش مرتاحه الحين !! ليش مااحس بشعور الكره زي مااكنت احسه وانا مع فهد ..
رجعت المسباح مكانه .. ونزلت بعد ماغيرت ملابسها للبنات تحت توريهم الشغلات اللي شرتهم من اسواق الدمام


بعد فترة
بوعبدالله : الف مبروك يابوراشد
بوراشد : الله يبارك فيك .. تسلم
بوخالد : مبروكين .. وربي يبارك فيهم ان شالله
الكل يبارك لعبدالله .. حس انه رجع شاب من جديد .. تذكر امه لو كانت عايشه شلون بتفرح فيه وبنور .. تذكر نور شلون بتكون مستانسه بليله خططنا لها سنين .. يااااه يارب مايكون حلم
بوراشد : مااوصيك ياولدي .. ترى نور غاليه حطها بعيونك
عبدالله : لاتوصي ياعمي .. نور بعيوني وزود ..
راشد وهشام وخالد باركوا لعبدالله وكانوا مستانسين ومرتاحين غير فرحتهم بزواجها من فهد
راشد يكلم هشام : تدري احس الحين بس اني مرتاح ومطمن على نور
هشام : مو قلتلك هالريال احسه يشبهه نور ههههه
راشد : وانتا صاج .. شكثر بيقعدون هني ؟
هشام : عبدالله يقول بيتمون يومين عقب بيروحون الدمام ومن هناك بيروحون ماليزيا
راشد : ان شالله .. الله يوفقهم يارب
هشام : خلني اشوف نور .. جنه عبدالله بيدخل الحين
راشد : يله

في الجانب الاخر

بشاير من فتحه الباب : لاتدخل هشوم فيه حريم
هشام : فديت هالصوت .. ابي اشوف الكاشخه انا
بشاير استحت : يووز عني مو وقتك يله .. بيدش عبدالله الحين ؟
هشام وهو بخاطره يطفرها : ياويل قلبي على هالعيون .. بشور صكيتي على حليمه بولند
بشاير : هههههه انتا صاحي ولا شفيك
هشام يبتسم : ميصير اغازل مرتي يعني !!
بشاير بحيا : مب وقته طيب .. يله قولي
هشام بحب : احبج
بشاير : ييي هشووم .. قولي بيدش عبدالله الحين ؟
هشام : ههه ايه .. يله خلكم جاهزين ..
بشاير : طيب

دخل عبدالله وقعد شوي مع نور وعقب ركبوا السيارة اهم الاثنين وراحوا لفندق الرايه اللي كان حاجزه عبدالله من فترة .. وبيقعدون يومين عقب بيروحون الدمام .. موضي كانت عند سارة بهالفترة .. وهالشي ماكانت تدري عنه نور

بالسيارة
مشغل اغنيه لقيت روحي لنوال الكويتيه
عبدالله وهو بالسيارة والدنيا كلها مب شايلته : مبروك يااحلى نور بهالدنيا كلها
نور بشعور مب فاهمه شنهو : الله يبارك فيك
عبدالله : ماتتصورين فرحتي اليوم .. احس انه حلم يانور . وماصدقت متى بيتحقق
نور ومشاهد السنين الفاتت كلها صارت يدام عيونها .. ماتدري ليش تذكرت يوم ماقالها عبدالله ابوي خطبلي .. وبتزوج .. حست انها نفرت منه حييل .. كرهته .. حست بنها ذليله وكأنها فضله رضى فيها بعد ماتسكرت كل الابواب بويهه .. اهي تدري بقرارة نفسها انه يحبها .. بس يمكن لانها للحين ماطابت نفسها ورضت عنه بعد

ماتدري ليش تذكرت صفعه فهد لها لاول مرة بحياتها .. ماتدري ليش تذكرت كاسات الخمر وايام الامارات اللي عاشتهم بذل..
نور : عبدالله بقولك كلمه مانيب عايدتها مرة ثانيه .. لاتتصور اني رضيت فيك بنفسي .. انا رضيت لان هذي كانت رغبه ابوي .. وماكنت ابي اكسر بخاطره ولا ازعله مني
نور كانت تقول هالحجي وهي مغمضه عيونها المكحله .. كانت تصييح من الداخل .. ماتدري ليش تقسي عليه جذي .. ماتدري ليش هالمشاهد تيي دايم على بالها ..
التفت صوب الدريشه ماتبي تشوف اثر كلماتها القاسيه على ملامح عبدالله .. ولا بعد تبي تواجه نور القاسيه اللي الزمن خلاها تنسى عبدالله وتكلمه بكل جفا

في الطرف الثاني
صارت هالكلمه ترن في باله ... >> انا رضيت لان هذي رغبة ابوي <<
سكت بعد ماكان متفاعل وفي اوج وناسته .. وكأنه صفعه قويه الجمته عن الحديث .. كان وده يطير بنور ويضحك معها زي اول واكثر .. كان وده يقولها عن حياته شلون كانت كئيبه من غيرها .. شلون مرت هالسنين من عمره ما حس فيهم بطعم الراحه .. كان وده يصرخ باعلى صوته من غير لايخاف من احد .. احبج يانور .. وربي احبج .. بس الكلام اللي قالته خلته اشبهه بالمصدوم .. بعد ماكان بينه وبينها حواجز كثيرة القدر كان راسمها .. صارت هالحواجز هي من تحطها وهي من ترسمها ..

كان الطريج طوويل الين الفندق .. نور كانت ماسكه دموعها ماتبي تطلع بموقف الضعيفه ..
اما عبدالله فكان ينطر منها أي حرف .. أي كلمه تخبره فيهم انها ماتقصد الكلام اللي تقوله .. ينطر أي تعبير على هالويه اللي يمووت فيه يدل على انها مرتاحه

في الفندق
كان عبدالله حاجز سويت كامل .. بس كان فعلا سويت روعه .. الغرف فخمه والمكان راقي حيل
نور كانت لابسه فستان قصير لونه اوف وايت زي فستان نانسي وفيه كرستالات من فوق وعلى الاطراف مع تسريحه جنان ومكياج لبناني خفيف يناسب الحفله المحفوفه اللي سووها في بيت بوراشد
اما عبدالله فراح يشوف الشنط تحت
غيرت نور ملابسها ولبست فستان نوم عادي حييل .. بس هي طالعه جنان فيه
عبدالله والشنط معاه : نور ادخلي السيرفس بيدخلون الشنط
نور من غير لاترد عليه ادخلت الغرفه
عبدالله : thank you
وتوجه للغرفه
عبدالله : اسمحيلي بحط اغراضي هنا .. لكني بنام بالصاله اذا هالشي يريحك
نور من غير لاتشوفه خذت شنطتها ورتبت اغراضها
عبدالله تم يناظرها بحب .. كان وده هالليله تكون ليله عمره .. يااه شكثر كان ينطرها
نور : وين موضي ؟
عبدالله باستغراب : ببيت سارة .. لما نبي نروح الدمام بناخذها معنا
نور : معليه يبها باجر .. انا مقدر اتم من غير موضي
عبدالله : طيب .. تعشيتي !!
نور : مب يوعانه
عبدالله : نور .. شنو تبغيني اسويلك عشان ترضين .. انتي تدرين اني للحين احبك .. ولو مااحبك ماكنت انا وياك مع بعض ..
نور : عبدالله كفايه .. انا مكسورة .. مجروحه من الداخل مافيني ارجع طبيعيه زي اول .. مافيني انسى الماضي بهالسهوله ..
عبدالله بعصبيه : وش تبيني اسويلك طيب .. انا لوكان بيدي ماعيشتك بكل هذا .. انتي تدرين شكثر انا عانيت بعد .. خلينا نعيش من جديد .. وش اللي بيضرك .. !!
نور : لاتصرخ .. اطلع اصلا انتوا كلكم نفس بعض .. انت زي فهد ماتختلف عنه بولا شي
وقعدت بمكانها تصيح .. عبدالله ماعرف شون صرخ عليها .. حس بالذنب .. نور كلشي بحياته ويوم صارت له يقوم يعصب عليها جذي .. وقف متسمر مكانه .. وده يكفكف دموعها ويمسحها .. مايبي هالويه اللي طول عمره يمووت فيه يتوهج حزن وتبلله الدموع .. طلع و
قعد بالصاله رايح وراد .. مب عارف ينام .. الساعه 2 ونص ونور الغرفه للحين مفتوح عند نور .. معقوله للحين صاحيه !!
في الغرفه
كانت نور في نوبه بكاء .. وحوالينها مسباح عبدالله خذته وقطعته بس طلع منها .. تمت على السرير متاضيقه .. هي ماتدري ليش تسوي معه جذي .. بس ليش يصرخ عليها
خذت حبيبات المسباح الذهبي ودخلتهم بالخيط مرة ثانيه .. وربطته وحضنته بيدها وخذها النعاس ونامت بمكانها
عبدالله من بره يطق الباب بشويش
عبدالله : نور .. نور !!
تجرأ وفتح الباب .. ولقاها نايمه على السرير وبيدينها شي
قرب منها وشاف مسباحه الذهبي اللي خذته منه موضي عشان توريه نور ..
قرب من ايدينها اللي حاضنه فيهم المسباح .. وباسها حس روحه ضعيف يدام هالبنت .. مايدري ليش
غطاها بشويش وباسها على راسها وسكر الليت وراح الصاله ونام هناك
اليوم الثاني
الساعه 9 ونص
صحت نور بدري .. ويدينها توجعها .. كانت نايمه عليها غلط امس
انتبهت انها للحين ماسكه المسباح .. خذته وردته الدرج .. وعقب فتحت الباب بشويش تشوف عبدالله اذا صاحي ولا نايم
الهدوء عم الصاله .. وهالشي خلاها تتجرأ وتطلع
لقت واحد طويل وعريض نايم على الكنبه يدام التلفزيون واللحاف طايح منه ..
ماتدري ليش ياها الفضول انها تشوفه وهو نايم .. لاشعوريا قربت منه وطلت بويه بشويش
كان فعلا مستغرق بالنوم .. وباين عليه التعب ..
ضحكت على شكله شلون نايم بعمق ..
غطته باللحاف وعقب راحت سبحت على السريع وغيرت ملابسها ونطرته يقوم عشان يروح ييب موضي من بيت سارة

بعد ساعه
نور بالغرفه قاعده تسرح شعرها الاسود .. كان تحفه من الجمال .. رفعته بشكل سريع بس جذاب
وعبدالله اللي توه صحى من النوم واقف على الباب ومتنسد عليه من غير ماتحس هي عليه ويناظرها باعجاب
قرب شوي شوي .. نور وهي ماسكه المشط بيدينها وتشوف عبدالله من المرايا
حط ايده على شعرها .. وقرب منها وعقب قال : صباح الورد
نور لا اراديا اوقفت من مكانها .. وابتعدت عنه كانت مرتاحه بس ماتدري شللي خلاها تقوم .. صباح الخير .. لاتنسى تييب موضي اليوم ..
عبدالله بخيبه : انا اسف .. ان شالله بس اسبح واروح ايبها
نور بفضول : بتأخر ؟
عبدالله عجبه السؤال : يمكن
نور بفضول اكثر : شكثر يعني ؟
عبدالله : بتغدى عند سارة وعقب اجي مع موضي
سارة عازمتني انا وانتي على الغدا ..
نور .. جذي يعني .. هي عازمتني وموقايل لي : وليش ماقلتلي !!
عبدالله وهو يطلع فوطته : انتي مب طايقه اخوها .. ابتقبلين عزيمه الغدا !!
نور من غير لاتلتفت له : هي اللي عازمتني .. مب انت
عبدالله يقرب منها شوي : يعني اذا انا اللي عزمتج ماتجين !!
نور بعناد : اكيد مراح ايي
عبدالله ياخذ نفس : طيب انا بسبح واطلع القاج جاهزة !!
نور بقلبها وشو قالولك عني .. تبيني البس بربع ساعه يعني ..
وعلى السريع طلعت لها تنورة بيج مع توب ابيض وجكيت بيج جنان فيه قصات وكان روعه عليها .. حطت مكياج ناعم يناسب بيت سارة ولبست عباتها اللي كانت طالبتها تفصال من الامارات ..
طلع عبدالله بسرعه متعمد يبي يربكها ..
عبدالله : يلله انا انطرك باللوبي تحت
نور : بشويش .. للحين ماخلصت طيب
عبدالله يضحك من الداخل شلون هي محتاسه .. كان يدري انها مستحيل بتخلص بربع ساعه
عبدالله : حلوة يانور .. وربي حلوة
نور التفت له بغرور عقب قالت : مب محتاجه شهادتك
عبدالله تضايق .. على كل كلمه تنرفزة وتعصبه .. اهو شنو قال عشان تكلمه بهالاسلوب .. بس معليه بتحمل .. وبمسك اعصابي ..

بالسيارة
عبدالله كان ساكت .. مقهور وحاز بخاطره اللي قاعد تسويه نور .. بس يقول بقلبه كلشي يهون عشانج
نور مستغربه من هدوءه ..
نور : معليه تمر السوبر ماركت شوي ؟
عبدالله : ليه بغيتي شي ؟
نور : ايه ابي اشتري كم شغله لموضي
عبدالله كان مرتاح من الخاطر لشي واحد بنور . . وهو اهتمامها بموضي .. هالشي كان يخليه يرضى عنها رغم كل اللي تسويه .. هو نفسه نسى موضي . بس هي تذكرتها : طيب
نور وهي تشوف عبدالله طلع سجارة من العلبه واشعلها .. ودها تقوله ودها تاخذها منه وترميها .. بس تكابر
واخيرا قالت
نور : من متى تدخن ؟
عبدالله يبي يحنن قلبها عليه : من اول ماتركتك
نور : ماتدري ان التدخين يضر بصحتك !!
عبدالله ببرود : ادري
نور : طيب لاتدخن
عبدالله اللي قام يسعل ويكح : ...
نور سكتت .. بس عقبها مااقدرت تسكت : لاتدخن يدامي زين
عبدالله : لاتخافين على روحج .. مابيصير فيج شي
نور عصبت وتنرفزت .. هي كانت خايفه عليه بس ماحبت تقولها له عشان لايحس .. ليش يقول جذي يعني

في بيت سارة
سارة : هلا وغلا .. حيا الله المعاريس .. الف الف مبروك
تسلم على نور وعلى عبدالله
سارة : تو مانور البيت والله
عبدالله راح الديوانيه اما نور فتمت عند سارة ..
سارة : ها بشري .. شلون عبدالله معاج عسى ما اذاج بشي ؟
نور بابتسامه : الحمدلله
الا وين موضي ؟
سارة : تلعب مع العيال بره .. الحين بيون ..

وقعدوا على سوالف وجاي وقهوة عقب الغدا .. نور نست كلشي قالته سارة .. لكن سارة للحين تحس بتأنيب الضمير وهالشي خلاها تبين اهتمام زايد بنور ..
سارة : طيب خلو موضي هني .. وانتوا عقب ماتردون من ماليزيا خذوها ..
نور : شنقولين سارة .. اساسا البنت صغيرة .. مدري شلون عبدالله بيرضى يخليها ويسافر .. وبعدين شنو بيضرنا اذا اخذناها معانا ..
سارة اللي انصدمت من نور .. وحده بعمرها ماتفكر تاخذ معها ياهل بعمر موضي بتأذيها وماتخليها تتونس بشهر عسل مايتعوض
سارة : والله انتي عبدالله اتفقوا .. وموضي بنتكم
نور استانست من الخاطر من كلمه سارة .. موضي بنتكم .. وربي زي بنتي واعز : اكييد
موضي : خاله نور !!
نور : هلا وغلا .. وحشتيييني
موضي تمسكها من ايدينها : تعالي
نور تضحك : وين ؟
موضي تسحبها من ايدها : هنااك ..
نور قامت وياها وهي تضحك .. ودخلت غرفه
انصدمت .. كان عبدالله نازع دشداشته وقاعد بالمكسر والفنيله .. يطالع مباراة

نور استحت وماعرفت وين تروح .. موضي للحينها ماسكه ايدها ..
نور : اسفه .. موضي .. ماكنت ادري .. انا
عبدالله ضحك : شفيج ؟ههههه
نور ويهها قلب الوان : يله موضي نطلع
موضي : انا مع خاله نور بابا .. يله نلعب
عبدالله : فديت اللي تبي تلعب .. قولي لخاله اذا تلعب معانا !!
نور لحينها مرتبكه : لا انا بطلع مضاوي .. لعبي مع بابا وعقب تعالي نلعب بره
عبدالله : نور ..
نور التفت له : هلا
عبدالله : تبين نمشي !!
نور : على راحتك
عبدالله : طيب .. البس دشداشتي واجي
نور هزت راسها واطلعت ..
ماتدري ليش طلعت مبتسمه .. يمكن لانها اول مرة تشوف عبدالله بهالوضع .. حست بالتعب .. ودها تكون نور اللي عهدها بس مو بيدها .. كلما تحن له ويرجع حبه في داخلها يشعل .. تجمعت كل مشاهد البؤس بحياتها يدام عيونها ..


بيت بوراشد
ام راشد وفرح وبشاير وراشد بالصاله
ام راشد : رشود حبيبي .. قوم دق على نور شوفهم بيون اليوم الليل ولا لا ؟
راشد : يوو يماا ... شوي بس خل تخلص المباراة .. ماتشوفين ولدج شلون يشوت الكرة .. نبي هدف
ام راشد: انا ماادري شلون رضيت انه يلعب هالخرابيط ..
راشد : يمااا الرياضه مو خرابيط تقوي البدن .. ماتذكرين شكثر انا كنت العب
ام راشد : الا اذكر .. وعقب تركت الرياضه وقمت تشيل مدري وش تسمونهم حديد ..
راشد : هههه اثقال يماا ..
ام راشد : عاجبك جسمك جذي يعني ؟
راشد : اكييد .. كل الرضا .. وبعديه الرياضه بانواعها ماتضر . .اللي يضر اهو الرياضه القاسيه والادويه الابر
فرح : اوووف رشوود اسكت شوي ... ترى ماقمنا نركز
بشاير : ياويل قلبي طاح هشووم شوووفو ؟
راشد : هههه الا طيح الخصم .. شوفي اللاعب الثاني شلون قاعد يتلوى جنه سمجه
فرح : ايييييه صح
راشد : وين يقدرون يطيحون هشوم .. هههه
بشاير : اسمله عليه الرحمن الرحيم .. قول ماشالله
راشد : هههه ماشاالله ماقلنا شي ..
فرح : بشوور .. شوفي البنات اللي هني قاعدين يشجعون
بشاير بقهر : ادري بس لاتذكرني .. ماادري ليش مارحت الاستاد
فرح : شحقه !!
بشاير : اشوف اذا هشوم عيونه تروح هني ولا هناك .. عشان اشلعهم
راشد ملتفت بصدمه : حشى مو حريم .. وحوش اعوذ بالله
فرح : هههههههههههههه عدل عدل بشوور
ام راشد : اوووف انتوا بعدين معاكم .. صدعتوا راسنا بهالمباراة .. دقو على نور
فرح : انا بدق عطيني التلفون بشاير يمج
بشاير : هاج
فرح تدق على نور
نور : هلا وغلا .. بفرح قلبي ودنياي انتي
فرح : هلا نور شلونج شخبارج .. ترى امي اذتنا تسأل متى بتيين ؟
نور : ماادري يمكن اليوم بلليل على العشا بنيي
فرح : والله ؟
نور :ايه .. بشاير وهشام هني ؟
فرح : هشام عنده مباراة الحين بتخلص وبشاير هني
نور : فيه احد بيي بعد ؟
فرح : ايه بيت عمي
نور: خلص ان شالله مانتأخر
فرح : حيااج نور .. لاتتأخرين
نور : ان شالله .. امي يمج ؟
فرح : ايه . هاج ياها
وتكلم نور ام راشد
ام راشد : هلا ماما
نور : هلا يما .. شلونكم ؟
ام راشد : بخير ياقلبي .. انتي شلونج وشلون عبدالله ومضاوي
نور : كلهم بخير يماا .. ان شالله اليوم على العشا بنكون عندكم طيب
ام راشد : ان شالله يماا .. ابوج يسلم عليج .. اهوا نايم الحين بس يقعد اخليه يحاجيج
نور : طيب .. سلمي عليهم
ام راشد : وصل .. مع السلامه

سكرت نور من ام راشد وكانت بالسيارة في طريقهم للفندق .. موضي كانت نايمه ورى ..
عبدالله : ترى باجر طيارتنا بدري ..
نور من غير اهتمام : طيب
عبدالله : مب بخاطرج نطلع مكان اليوم ؟
نور : لا
عبدالله اخذ نفس وعقب طلع سجارة يبي يدخن
نور التفتت لها بسرعه واخذت منه السجاره .. ماتدري ليش سوت جذي .. يمكن رد قعل طبيعي او .. ماتدري
عبدالله طالعها باستغراب واعجاب .. ماتوقع تسويها ..
نور تداركت الامر : موضي نايمه .. لاتدخن مب زين
عبدالله بخيبه : وانا اللي عبالي خايفه علي
نور : مافيه شي يخليني اخاف عليك
عبدالله انصدم وناظرها بعين وعقب غمضها بالم وقال : مشكورة
نور كرهت روحها اكثر على الكلام اللي قاعده كل يوم تقوله ياه .. ماتصورت انها بتكون بهالقسوة


يتبع

توقعاتكم بالبارت 26