البارت 24


في المستشفى
عبدالله وراشد يكلمون الدكتور بره
نور عند بوراشد في غرفه المستشفى
الدكتور : don’t worry doctor rashed
راشد : thanks doctor

عبدالله : ها بشر شقالك !!
راشد : يقول ان الجلطة اللي سببتله الشلل ماكانت قويه وراح يبدى بالعلاج الطبيعي باجر ..
عبدالله : وبيطول العلاج الين مايمشي !!
راشد : اهوا قال ثلاث اشهر بالكثير .. اذا ابوي ساعدنا وتقبل العلاج
عبدالله : ان شالله كلها كم شهر ويرجع لنا بوراشد زي اول واحسن لاتحاتي
راشد : الله يسمع منك ان شالله
عبدالله : طيب انتو للحين مااكلتوا شي .. ترى ابوي موصيني عشاكم الليله عندنا
راشد : حبيبي ماتقصر .. بس تدري ابوي مانقدر نهده .. شوي واييب لنا عشا من بره .. خبرك انا انام عند ابوي ونور بوديها الفندق وعقب اتعشى ..
عبدالله : لا كذا وربي ازعل منك .. حياك انت والاهل .. تعشوا عندنا وعقب افراج
راشد : ههههههه والله
عبدالله : راشد ترى البيت بيتك وماله داعي اعزمك ولا احرص عليك
راشد انحرج وحس انه لازم يقبل بالعزيمه . عبدالله ماقصر معاهم وميصير يرده جذي : خلص اكلم الاهل واعطيك خبر
في غرفة بوراشد
نور كانت تناظر ويه ابوها اللي منسدح على فراش ابيض .. وتقول بقلبها
يبا . .ياليت تقدر تكلمني .. ابي اقولك اشيا كثيرة يبا .. ابي انام بحضنك الحنون واصييح
ابي ارجع نور الصغيرة اللي همها بس العابها .. ماتدل درب الحب ولا عذابه
آآآه يايبا .. ليه الاحزان تجي مرة وحده !!
ويدخل راشد
راشد : نور احاجيج .. عبدالله عازمنه على العشا عندهم .. ماادري استحيت اقوله لا . . وقلتله اكلم الاهل واقولك
نور : روح انتا انا بتم عند ابوي
راشد : احنا بنرد المستشفى مرة ثانيه .. فشله نور ابوعبدالله جم مرة عزمنه واحنا نتعذر . . ميصير اخاف يزعلون
نور : طيب انتا روح .. انا ليش اروح !!
راشد باستغراب : وليش ماتبين تروحين !
نور : بتم عند ابوي راشد . خلص انتا روح
راشد : فشله ترى ..
نور حست انها فشله شنو بيقولون عنها بس بعد ماتبي تشوفه .. مب غصب
راشد : شوفي اذا درى ابوي انج مارحتي راح يزعل نوروه .. عيب ترى
نور باستسلام : طيب

في بيت عبدالله بالدمام
المجلس
فراس : حياك الله ياراشد .. تفضل البيت بيتك
راشد : الله يسلمك .. يلتفت لابوعبدالله اللي كان قاعد مايقدر يقوم
راشد : شلونك عمي .. شخبارك ان شالله بخير
بوعبدالله : هلا ياولدي .. كذا صارلكم يومين من جيتوا ولا تمرون ولا تسألون !
راشد : والله تدري عمي .. ابوي والمستشفى وحوسه الدكاتره ..
بوعبدالله : طيب وهو الحين كيفه .. طمنا عن صحته ياولدي .. ترى ابوك غالي علينا مرة
راشد : احسن .. الحين يتكلم بس بشويش ..
بوعبدالله : اجل بكره من الصبح نجي انا وعبدالله نزوره ان شالله
راشد : ماله داعي عمي .. كفايه سؤالكم
بوعبدالله : وشو ماله داعي .. هذا بوراشد .. حنا مثل الاخوان.. هذا واجب ياولدي
راشد : طول عمرك راعي واجب عمي .. ماتقصر

في الطرف الثاني
اميرة زوجه فراس : وهو شلونه الحين ؟
نور : بخير الحمدلله .. الدكتور طمنا عن حاله ويقول بتحسن
اميرة : ان شالله .. حياكي الله وشلون شفتي الدمام .. عسى حبيتيها ؟
نور بابتسامه : والله مارحت مكان .. من المستشفى الين الفندق ومن الفندق الين المستشفى
اميرة بغرور : الا بتعجبك .. احلى من الكويت مليون مرة
نور انصدمت .. بس عقب قالت : اكيد كل مكان له جمال وحلاة وماشالله الدمام حلوة زي ماالكويت حلوة بعد
اميرة بقلبها .. يي فرق بينها وبين سارة .. تعرف وشلون تتحجى وتذكرت مرة قالت لسارة ان الكويت مب حلوة حر هبت بويهها وصرخت عليها
نور تبتسم : ماعندج غير صبا ؟
اميرة : ايه .. كفايه صبا صغيرة الحين
نور : لا حرام عليج يبيلها اخت ولا اخو بتونس معاهم
اميرة : اهي وموضي خوات .. كفايه
نور اللي اشتاقت لموضي : وينها صحيح !!
اميرة : يلعبون فوق ..
وتلتفت الين الدري : كاهم انزلوا
موضي من بعيد : خاله نور !!
نور زادت ابتسامتها اكثر : هلا وغلا
موضي تقرب من نور وتوبسها وعقب تقعد جنبها : وين لعبتي !!
نور : هههههه نسسيتها ! لج حق تزعلين
اميرة تبتسم : تدرين ان موضي ماتحب الغرب .. نادرا ماتجي عن حد من الحريم كذا
نور ماحبت كلام اميرة .. هي ماتحس انها غريبه على موضي .. تحس انها قطعه منها .. موضي جزء من عبدالله واي شي يكون من عبدالله نور لاشعوريا تتعلق فيه ..
نور : بس احنا اصدقاء من زمان .. صحيح مضاوي ؟
موضي وهي تضحك : اييه
اميرة استغربت تعلق موضي بنور .. صحيح هالبنت تنحب .. بس اللي يشوف نور شلون متعلقه فيها يقول انها تعرفها من زمان
اميرة : وهذي بنتي صبا
نور تشوف صبا اللي كانت ماتبتسم زي موضي ومتخبيه ورى امها : اهليين صبا .. السلام عليكم
صبا : ...
اميرة : روحي سلمي على خاله نور ماما
وتسلم صبا وعقب تقعد جنب امها
موضي : خاله نور .. ابغى اوريكي شي
وتركض الين المجلس وتدخل
عبدالله : هلا حبيبي
موضي وهي تحط يدينها بمخابي عبدالله
عبدالله : ههه شبغيتي
موضي بحروف البنت الصغيرة : ابغى ... مسباح
عبدالله اللي يعرف شكثر موضي تحب تلعب بمسباحه الذهبي : وش تبغين فيه !!
موضي : اعطيه خاله نور
عبدالله اختبص من سمع اسمها .. وهو يشوف راشد يشوفه
عبدالله : بعدين بابا .. روحي الحين
موضي باصرار : بابااا !!
ودخلت يدها في مخباه وخذت المسباح واركضت بسرعه
عبدالله كان من غير شعور .. وعقبها ضحك .. مايدري ليش بس هالبنت أي شي تسويه ولو كان غلط يخليه يضحك من الخاطر
راشد : ههههههه بنتك ماشالله عليها دمها عسل
عبدالله : ايه طالعه على ابوها ههه
والكل يضحك : ههههههههههههه

بعد العشا
راشد يكلم نور : يله انا بره
نور : طيب الحين اطلع
اميرة اللي حبت نور .. : والله تو الناس هذا احنا قاعدين
نور : لاا وين تأخر الوقت .. سهرناكم معانا
اميرة : لا سهرتونا ولا شي .. وبعدين لكم جيه ثانيه مب كذا تمشون بسرعه
نور : بعد قلبي .. ماقصرتوا
اميرة : انا اكلمك ان شالله وتجين انا وانتي نروح السوق تغيرين جو بدل جو هالمستشفيات
نور : ان شالله .. يله مع السلامه
اميرة : الله وياكي يالغلا

وطلعت نور هي وراشد اللي خذله سيارة تأجير من اول ماوصلو المطار
راشد : يحليلهم والله ناس طيبين
نور : ايه
راشد وهو يضحك : والله بو عبدالله طلع دمه خفيف طول القعده ضحك وسوالف
نور : ..
راشد : وانتي شسويتي ؟
نور : والله اميرة خوش مرة .. بس يعني لازم الواحد يعرف شلون يتحجى معاها
راشد : ههه ليش ؟
نور : مسكينه من عذرها سارة دايم تتشكى منها .. بس بيني وبينك البنت زينه بس نعرف شلون نتصرف معاها
راشد : كل انسان فيه بذره زينه وبذرة شينه .. والشاطر فينا اللي يقدر يبرز الزين في الشخص اللي يدامه
نور : صحيح .. كلامك
راشد : اما موضي بنت عبدالله هذي .. فلم فلم ثاااني ههههههه
نور تفاعلت مع موضوع موضي : ايييييه .. تينن
راشد : ههههه ايه ابله نور .. .
نور : هههههه
راشد : يله نزلي .. معاج مفتاح الغرفه صح ؟
نور : عند الرسبشن .. يله انت بترروح المستشفى ؟
راشد : ايه
نور : طيب .. باجر تعالي مبجر
راشد : طيب .. يله تصبحين على خير
نور : وانت من اهله

نزلت نور من السيارة ودخلت الفندق وراحت غرفتها
وهي تحس انه في شي بداخلها مرتاح .. لكن لا.. ماتبي هالراحه تستمر
لان سببها عبدالله .. ومستحيل ترضى ان الراحه هذي تتغلب عليها او حتى تخليها تفكر انها يمكن تعيش معه او تتقبله مرة ثانيه
مستحيل ياعبدالله .. انت الحين ولا شي بالنسبه لي .. كلشي انتهى بيني وبينك ولايمكن شي يرجع زي اول
تذكرت ايام فهد والعذاب اللي شافته معاه .. تذكرت السجن اللي كانت محبوسه فيه .. تذكرت كلام سارة
تذكرت قلبها المكسور اللي من عقبه مادل طريج الحب .. تذكرت كل الحزن اللي عاشتهم هالسنين
وعقب قالت .. انت سبب كلشي
غيرت ملابسها وعقب افتحت التلفزيون شوي .. وطلعت اغنيه .. عبد المجيد عبدالله .. والله ماكان الفراق اختياري
وانتبهت لشي بشنطتها .. يي هذا مسباح عبدالله .. الله يهديج ياموضي .. قلتلها رديه بس الظاهر حطته بجنطتي
خذت المسباح وتلاعبت فيه حن قلبها له .. قربته من خدها وقعدت بمكانها تبجي على اطلال الماضي وذكريات مب قادرة تنساها .. حست بالاستسلام .. بالضعف يدام أي شي ولو كان بسيط بس انه من ريحه عبدالله
والله ماكان الفراق اختياري
ولا عمري اخترت الفراق ولقيته
وانا اعشقك عشق المطر للصحاري
مهما قسى وقتك علي مانسيته
اليوم الثاني
نور كانت بالمستشفى جنب ابوها
وراشد عند الدكتور يسأله عن بعض الامور الطبيه

نور : همم يبا يلله .. اخر لقمه والله والله
ابوراشد : بس نور .. شبعت الحمدلله
نور: زين خلص مالي شغل الحين اذا يه راشد بقوله انك مااكلت
ابوراشد وهو يشوف نور : انتوا مالكم ذنب تتعبون روحكم عشاني ..
نور : لاتقول جذي يبا .. اذا احنا مانسويلك ولا نتعب عشانك .. انسوي ليمن عيل ؟؟
ابوراشد: لو كان هالابوا يستحق التضحيه
نور وعيونها تبرق انكسار : انتا اكثر ابو يستحق انه نضحيله ..
بوراشد : ...
نور : بابا .. احنا من غيرك مانسوى شي .. دخيلك هالحجي لاعاد اسمعه مرة ثانيه
بوراشد يبتسم : وين راشد ؟
راشد : مم عند الدكتور ..

بره الغرفه
عبدالله : تفضل يبا .. اكيد هو الحين ماعنده حد ..
ابوعبدالله : يله وانا ابوك ..
دخلوا الاثنين ..
ونور كانت داخل ..
بوراشد ماانتبه بسبب ضعف النظر .. اما عبدالله فتسمر مكانه وحس بالاحراج
نور وقفت على حيلها .. وطاحت عيونها بعيون عبدالله
تموا هالاثنين ثواني على هالحال .. وكل منهم في داخله اشيا كثيرة مب عارف لها تفسير
طلعت نور من الغرفه والدموع على وشك انها تنزل ..
عبدالله طلع وراها
عبدالله بتردد وبصوت واطي : .. نور
نور غمضت عيونها تحاول تزيح شعورها بالراحه بس تسمع اسمها ينطقه لسانه
ومن غير لاتلتفت : ..
عبدالله ماعرف شيقول ولا عرف ليش ناداها ولا ليش لحقها .. ماقدر يتحمل اكثر . . حس انه حروفه ماتطاوعه والكلام اختفى ..
عبدالله : ادخلي .. انا بتم بره انطر راشد
نور بقهر .. مين حاسب نفسك تقولي ادخل ولا اطلع ومن غير لاتلتفت له ادخلت الغرفه مرة ثانيه لانها حست انه لازم تدخل وقفتها بره مو عدله
عبدالله سند راسه للجدار وفي باله اميه فكرة وفكرة .. يالله يانور .. حتى المكان اللي انا فيه ماتبينه .. شكلي عرفت ردج قبل لايوصلني ..



مر شهرين وحال بوراشد في تحسن مستمر .. كان يمشي لكن بمساعده العكازات وطبعا جلسات العلاج الطبيعي الثلاثه باليوم كان لها مفعولها .. بوراشد استجاب للعلاج ولكنه تعالج بعد من شي ثاني .. في شي حسه هالشهرين اللي طاح فيهم عمره وحياته ماشعر فيه ..
راشد .. راشد مو ولده الكبير وذراعه اليمين وبس .. راشد ابو .. ابو لنور وفرح وهشام
كان يشوف لهفة عياله بس يحاجون راشد غير عن لهفتهم له .. كان يشوف شلون راشد يسهر الليل بالنهار ايام ماكانت حالته سيئه .. وهو شنو سواله .. !! شنو عطاه !! .. لو واحد مكان راشد مب ملزوم يتم معاي هالشهور وانا عاجز .. عاجز عن الابوه وعاجز عن المشي والحركه

في المستشفى
نور تدخل وابوها منسدح على فراشه : السلام عليكم .. ازايك يابا !!
بوراشد : هههه الحمدلله بخير .. وانتي شلونج ؟
نور : كلوو تمام .. ههه امس انا وراشد شفنا فلم مصري حلو يبا يضحك
بوراشد : الله يخليلكم راشد ان شالله
نور : ويخليك لنا بعد ..
بوراشد : انا خلص مابقى من عمري شي .. كلها جم سنه بنعيشها .. وراشد فيه البركه
نور : كلام يديد هذا !! .. بابا انتا بترد تمشي زي اول واحسن وراشد اخونا صحيح .. لكن انت ابونا اللي مانعوضك بشي
بوراشد : نور .. عشان خاطر ابوج .. وافقي على عبدالله
نور انصدمت ... ليش ابوي يقول جذي .. شياب طاري هالموضوع اللحين : يبا انت عارف رايي بهالموضوع
بوراشد : يابنيتي .. تركي لج كل هالسنين من غير سبب .. مابيه يتكرر .. واتركج بعد لكن بسبب اقوى مني ومنج
نور : ليش تقول هالكلام .. الله يعطيك طولة العمر
بوراشد : نور .. عبدالله خوش ريال واهله بعد زينين ومنه وفينه ... لاتزعليني عليج .. وافقي عشان ابوج
نور بتصيح .. وتقول بقلبها مابيه .. دخيلك يايبا لاتغصبوني : يبا انا !!
بوراشد : ابي اطمن عليج .. قبل ربج لاياخذ امانته .. ابي اطمن عليكم يانور
نور وهي تصيح : دخيلك يايبا لاتقول هالكلام .. خلص اللي تبيه يصير
بوراشد وهو يحضن بنته : الله يرضى عليج يابنيتي . . واشوفج مرتاحه بحياتج