البارت 18

بشاير اللي كانت تدور نور وتدق عليها لكن ماترد واخيرا شافتها بغرفه البوفيه
بشاير : نوروه انتي وينج .. عيزت وادق علييييي
وانصدمت بدموع نور وهي تراقب الدريشه وبيدينها تلفونها وتبجي
بشاير : نور .. نور شفيج شصاير ؟
نور اللي حضنت بشاير وتمت تبجي وهي تقول : شفته بشور .. شفته .. كان داخل مع الرياييل ..
بشاير امسكت نور من جتوفها : وشنو يعني شفتيه .. هالشي المفروض يخليج قويه مب بهالضعف اللي انتي فيه
نور .. اللي تسوينه هذا مو زين لج . . دموعج ماراح ترد شي .. كلشي انتهى مثل ماقلتي .. حاولي تنسينه
نور بصوت يقطع القلب : ياليت
بشاير وهي تسمع صوت رنه مسج من تلفون نور : اكييد اهوا
نور وهي تفتح المسج اللي كان فعلا من عبدالله وعقب ماقرته غمضت عينها بالم وبصورة تدل على تعب هالقلب الصغير بشاير اللي قلبها متقطع على نور .. واحضنتها بقوة ..
بشاير : انسي كلشي .. كلشي .. وامشي نروح نستانس
نور مشت مع بشاير جسد .. لكن روح وقلب ماقدرت الا تتركهم معاه
حاولت كثير انها تنساه .. لكن حبها له اكبر من مجرد شي ينسى .. لانها عاشت فيه وعاش فيها
البنت الجميله اللي ظهرت هالليله في العرس .. والكل كان حاط عينه عليها .. كانت مجرد ورده حلوة المظهر .. لكنها من الداخل تنزف .. وتنزف بقوة والم

مر على عرس ريم ثلاث اشهر .. وخلال هالاشهر .. تقدم هشام لبشاير وخطبها بعد ماتم الاتفاق على انه يكمل هالسنه وعقبها يتزوجون
راشد كلم امه عن شوق وامه فرحت من الخاطر .. لانها حست ان هالبنت دخلت قلبها وبنت ناس واهلها زينين
لكن ماتم الاتفاق رسمي .. مجرد كلام بين راشد وامه عنها الين مايخلص راشد سنه التدريب مالته اللي بدت من شهر
اما نور .. فبعد عرس ريم .. كثروا خطاطيبها .. لكنها في كل مرة تتعذر باي عذر .. كانت شايله فكرة الزواج من راسها .. او بالاصح فكرة كونها مع ريال .. رغم محاولات امها وتدخل اخوانها الا انها كانت مصرة على موقفها وتمت عايشه على امل وخيال عبدالله وذكراه بس بصمت
بشاير كانت رافضه خطبتها من هشام .. لمجرد الاستمتاع في تعذيبه .. ولو انها من الداخل عرفت انها تمووت فيه .. لكن طبعا مانست اللي سواه فيها .. عشان جذي .. ماوافقت على الخطبه الا بعد شهرين وكان وقتها هشام يحاول يرضيها باي طريقه
عبدالله ملج على مضاوي بنت بوضاحي ... والزواج بيتم بعد شهر حسب كلام ابو عبدالله
وطبعا اهوا مافكر يشوفها ولا حاول .. رغم محاولات سارة في كثير من المرات بانها تخليه يشوف صورتها لكن رفض عبدالله خلاها تعرف انه للحين مانسى نور .. لكنها بقلبها تقول .. مصيرك ياعبدالله بتنسى
ريم ومشعل .. اجمل زوجين في الدنيا

في بيت بوراشد
غرفة نور
هشام : زين .. ليش غيرت وقت محاضرتها ؟
نور : اوووف هشووم زهقتني .. قلتلك ماغيرتها .. اهيا دكتورها اعتذر مرتين .. وانا عرضت عليها ترد معاي لاني اخلص بهالوقت بس
هشام بضيق : ودكتورها ناوي يداوم طول هالكورس ؟
نور : ياااربي الله يعيني عليكم واحد بالبيت ووحده بالجامعه
هشام :زين نوروه .. اختي العزيزة
نور اللي هدت الكتاب من ايدها : نعم
هشام :شكثر تحبين اخوج؟
نور: ماعندي اسلفك ..
هشام :شدعوه انا اخذ من اختي فلوس .. افااا
نور :هاا شتبي ؟
هشام : مم يعني لوباجر تقولين لبشاير انج بتردينها ..
نور : محاضراتي تخلص قبلها بساعه
هشام : معليه قعدي نطريها .. ولا انتو مو رفيجات طفوله ؟
نور : ههههه نصااب وبعدين ؟
هشام : مم .. انا بيي اخذكم
نور : ماراح ترضى
هشام : عاد انتي لاتقولين لها اني انا اللي باخذكم .. قوليلها السايق
نور : نو .. ماتعودت اجذب عليها
هشاام : اوووف .. حراام عليكم خطيبتي وممنوع اشوفها يعني .. بالخش مثل الحراميه
نور : ههههههه هشووم اخاف تزفني .. ترى بشور مو هينه .. اخاف من لسانها والله تحقد علي
هشام : ماعليج .. انتي بس وافقي وخلي الباجي علي
نور : زين .. زين يله اطلع الحين خلني ادرس باجر عندي كويز
هشام : فديييت هالاخت .. يااربي انا شلون اعيش من غيرج
نور : يماا منك انت .. سكر الباب وراك

في بيت بوخالد
ريم : والله بتعجبك .. انتا روح شوفها وعقب احكم
خالد بقلبه .. يعني مافي امل يانور : ماادري ريم
حصه : خلنا نروح وان ماعجبتك سو اللي تبيه
خالد : ونور ؟
حصه بعصبيه : ردينا على نور .. يبا البنت ماتبي تتزوج ليش مو راضي تفهم ياخالد
خالد بيأس : خل ريم تسألها .. اخر مره
حصه : البنت قالتلي مابي خالد .. مابيه مو عاجبني ..
خالد بصدمه : هي قالت جذي
حصه : ايه .. اقص عليك انا ..!!
خالد : خلص سو اللي تبونه
وطلع من الصاله وهو متاضيج .. معقوله نور ماتبيني انا بالذات .. بس ماكان هذا ردها

ريم تكلم حصه باستغراب : ومتى كلمتي نور ؟
حصه ببرود وهي تصب لنفسها جاي : ماكلمتها
ريم : يعني تجذبين ؟
حصه : عشان اخوج
ريم : بس مب زين تتبلين على البنت .. حرام عليج
حصه : فكينا انتي الثانيه .. يعني شنو سبب رفض نور لخالد دامها ماتبيه اهوا بالذات
ريم بنبره حاده : لو ماتبيه اهوا بالذات جان مارفضت كل اللي تقدمولها من طرفي وطرف فاطمه
حصه : طيب .. رفضت خالد لا غيره .. ليش نخليه يتعلق بامل ضعيف ..
ريم : بس مو على حساب غيرنا .. مانجذب ياحصه ونتبلى على بنات الناس
حصه : وييييه .. سويتها جريمه وقصه ..
ريم : ويمكن خالد وافق رده فعل للكلمه اللي قلتيها
حصه : اووو .. خلصينا انتي الثانيه .. ودقي على فاطمه خلينا نحدد وقت نزور حماتها سميه
ريم قامت ولا علقت على كلام حصه .. : ودقت على فاطمه وكلمتها وعقب عطت التلفون لحصة و دقت على مشعل يي ياخذها


في الطرف الثاني
فاطمة : كلمتي خالد ؟
حصة : ايه وقال سو اللي تبونه
فاطمة : زين عيل متى تبينا نزورهم ؟
حصه : اول دقي وسأليها ..
فاطمة : ويييه .. من بيلاقي مثل اخوي خالد .. كامل والكامل وجهه سبحانه
بس الصج ينقال .. خلود الف بنت تتمناه
حصه : الا نور
فاطمه : البنات تارسين الديرة .. ونصيبهم مو لبعض
حصه : ادري .. بس اخوج يبيها .. تصدقين لليوم يقول لريم كلميها
فاطمة : تدرين .. !! ياكثر اللي شافوها بعرس ريم واخطبوها بس اهي ترفض
حصه : وشنو السبب عاد ؟
فاطمة : تقول تبي تكمل دراستها
حصه : وعمي شلون مطاوعها ؟
فاطمه : من صجج .. والله لو يدري عمي تلقينه ماخلاها .. بس الظاهر ان مرت عمي عايشه ماتقوله ان نور ترفض كل اللي تقدمولها
حصه : المهم .. خلينها من نور الحين .. نبي الخميس الياي نزورهم
فاطمه : خلص انا بكلمها واردلج خبر
حصه : صار .. يله سلمي عليهم .. مع السلامه
فاطمة : مع السلامه

في الدمام
المستشفى
الدكتور : انا الحين احذرك .. ترى صحتك في تدهور والتدخين هذا بيضر التنفس عندك
عبدالله : دكتور .. احس بحرقة واختناق اذا مادخنت
الدكتور : طبيعي لانك تخلص علبة كامله يوميا .. اخ عبدالله ترى حالتك الصحية ان ماحطيت بالك عليها ترى اهيا بخطر
عبدالله يضحك .. وعقب قال : طيب
وكتب الدكتور شويه مضادات للحرقه : بالسلامه

طلع عبدالله من الطبيب وتركي كان ناطره بره
عبدالله : قلتلك مافي شي انتا بس متخوف مدري من ايش ..!! امش يله
وهم يمشون
تركي : انا ياعبدالله .. وربي لو ماجريتك جر ماجييت هناا .. الصحه ماتتعوض
المهم شقال الدكتور ؟
عبدالله : عطاني مضادات للحرقه وقالي وقف تدخين
تركي : سمعت ..!!
عبدالله : ليت الفعل زي الكلام
تركي : والله محد خسران غيرك .. ياعبدالله الحبن بديت حياة جديده وبعد شهر بيكون لك زوجه وعايلة .. ان مااهتميت بصحتك عشان نفسك .. اهتم فيها عشان اهلك وزوجتك واصحابك واللي يحبونك
عبدالله : اللي يحبوني ماعادوا يبوني .. وشله اهتم بصحتي
تركي : لازم تنسى .. وتبدى حياة جديده
عبدالله سكت .. كلام تركي صحيح والكل يعيد عليه نفس الكلام .. ابوه .. فراس .. وسارة .. بس ليش هو مب قادر ينسى ..
تم طول الطريج ساكت .. حس ان ممر السمتشفى طول اكثر من اللازم .. تعب من التفكير ومن الواقع ومن الحرمان
تعب حتى من المستقبل اللي للحين مايدري وش هي بيكون حاله

رجع البيت
عبدالله : يله تركي تبي شي !!
تركي : ايه .. ابيك تهتم بصحتك .. وترد عبدالله اللي اعرفه .. مبسوط ويضحك رغم آلامه وحزنه كل الربع فاقدينك .. كلهم ينتظرون عبدالله الاولي ..
عبدالله ناظر تركي بنظره وعقب قال : تدري .. احس ربي ماجمعني باللي احبها عقاب لاني لعبت بقلوب كثير من البنات .. بس وربي ياتركي .. اني حبيتها من قلبي .. ولا عمري حبيت حد كثر ماحبيتها
مااحس ان حياتي لها طعم من غيرها .. الواحد ليبغى يتزوج الدنيا ماتوسعه من الفرحه .. الكل يباركله وهو مستانس
وانا احس الناس تعزيني .. وترثي حالتي من دونها
تركي ماعرف شيقول .. عبدالله كان صاج بكل كلمه قالها لكنه علق : الله يوفقك ان شالله .. ادعي ربك ينسيك ياعبدالله
عبدالله : اذا بدعي رب العالمين .. ابدعيه يجمعني فيها
تركي : عندك للحين امل ..!!
عبدالله : الين اخر نفس فيني .. فمان الله

اليوم الثاني
في الجامعه
نور : اما دكتورج هذا نكته نكته ههههه.. اول مرة اشوف دكتور شعر عربي ودمه خفيف هههه
بشاير : هههه والله موتنا من الضحك ..
نور : زين خل ادق على هشام .. اأأ اقصد السايق اشوفه وصل ولا لا
بشاير : هييي .. انتي قلتليلي بتعزميني على الغدا .. مو تحزرين فيني . .ترى انا مييته يووع
نور : ههههههه افاا علييج .. خليني ادق بس
وتدق نور على هشام
نور : الو .. مسا الخير محامينا
هشام : هلا هلا .. براعيه الصوت وباللي يمها
نور : احم احم .. يسلمو ههه .. اقولك السايق بره ؟
هشام : هاا . .ايي اخذكم الحين
نور اللي تسوي روحها ماتدري : وليش انتا ؟
هشام يلقنها شنو تقول : قولي ان سييارة البيت وقفت بالشارع
نور اللي تكرر اللي يقوله هشام : ويييه سيارتنا وقفت .. شلون نرد البيت الحين ؟
هشام : هههههههههههه وربي اموووووووت علييج يااحلى اخت .. ياايكم طيران
نور : لا اخاف بشاير تستحي .. هاا .. زين يله تعال باي

بشاير وهي فاتحه عيونها على الاخر .. : شنو يله تعال ؟؟!!
نور : بشوور شسوي سيارتنا واقفه .. تبينا نرد بتكسي ؟
بشاير : وليش هشام اللي يي ياخذنا .. ليش مو ابوج ؟
نور : هههه حلفي !!! متى ابوي اخذني من الجامعه ؟
بشاير بخجل : لا مابي .. شنو يقولون عنا البنات ؟
نور : مايقولون شي .. انتي مو بروحج انا معاج وبعدين هشام خطيبج ولا نسيتي ؟
بشاير : لا مانسيت ... بس للحين ماصار شي
نور : ششش بس لا تزيدين حجي وايد .. يله امشي نوقف عن الشمس الين مايي
بشاير بتردد : طيب .. ادق على امي اول
نور : اوكيه

بشاير تدق على امها اللي ماعارضت الفكرة .. وعقب عشر دقايق وصل هشام بسيارة الجييب
نوروبشاير وهم متجهين للسيارة
نور بخبث : ههه بشور شوفي البنات شلون يخزون باخوي فديته .. مزيون
بشاير بغيره : وييه .. ماعندهم سالفه مادري على شنو !!
نور : هههههههه انا ادري .. جيكر وشيفه
بشاير : انتي هيييي . .لاتقولين شيفه
نور : هههههههههه الحين توج تقولين ماعندهم سالفه
بشاير وهي تضحك : بس انا اللي اقول ههههه
نور : امبييي هذي بتدش معانا السيارة ..
بشاير بعصبيه : واخوج يخزها .. الحين ببط عيونه
نور : ههههههههههههههههه .. قاعد يخزج يالحوله ..
بشاير باحراج : لاتجذبين .. خلص ماني يايه
نور : يله فشلتينا الحين احد ينتبه علينا .. بطلي دلع

دخلت نور وشاير السيارة .. وسلمو
عقب قال هشام : شلونج بشاير ؟
بشاير من ورى : بخير الحمدلله
هشام : سامحينا السيارة كانت عطلانه واضطريت انا اييبكم
بشاير : معليه .. بس لوقايلتلي نور جان اخذت سيارتي وماتعبناكم
هشام : شدعوه تعبكم راحه .. احنا نتشرف والله

نور كانت منصدمه من هالانسجام الغير طبيعي .. وتقول بقلبها .. اول مرة مايتهاوشون فيها .. الحمدلله يارب
هشام قام حط اغنيه عبدالمجيد عبدالله .. اهتم فيني
وعقب قال : بشاير .. هالاغنيه شتذكرج فيه ..!!
نور ضحكت : احم احم نحن هناا ههههههههه
بشاير كانت منصدمه : عادي ..
وقامت ودزت مسج حق نور (( اخوج استخف وقعد .. اخاف مريض ولا فيه شي .. دخيلج مو طبيعي هذا مو هشام ))
نور قرت المسج وضحكت حييل ..
هشام : الحمدلله والشكر .. شفيج تضحكين ؟؟
نور : ماكو شي روميو .. خلك مندمج مع الاغنيه
هشام مااهتم لكلام نور .. لانه مايستحي منها وبعدين الفرصه ماتتكرر وعقب قال : ياليت نسمع ضحكات ناس اللي ترد الروح
بشاير هني انحرجت حييل ودزت لنور )) ودوني بيتنا .. اخوج باعها ))
نور تكلم هشام : هشووم شنو صار على خطبه راشد اخوي ؟
هشام : ماكو كلم امي واهي ناويه تكلم ابوي هاليومين ان شالله ويخطبونها رسمي لانه اهوا يبي يملج قريب
نور : اووو تطورات ماادري عنها
هشام : اييه .. بعد خالد بيخطبون له قريب يوم الخميس الياي
نور : والله ؟
هشام : اييه .. خبرج خلود كلشي اسويه لازم يسوي نفسي .. يغااار هالدب ..
نور : الله يوفقه يارب خالد خوش واحد
هشام : واشوفج وافقتي عليه
نور بضيق : شياب هالموضوع الحين
هشام : ماادري عنج .. انتي تقولين خوش واحد
نور : وانا صاجه
هشام : عيل ليش رفضتيه .. حسافه كنت ابيه يكون لج .. خلود مافيه منه
نور سكت وحست انها بتبجي .. ليش هشام يقول جذي .. اهي موبيدها .. ليش مايحس ان الموضوع اكبر مو موافقتها او رفضها .. تذكرت كلشي صار بعد رفضها لخالد .. وتمت ساكته وهي ملتفته صوب الددريشه
بشاير حست بنور .. وتقول بقلبها .. صج رياييل مايحسون وقامت دزت لها مسج (( ماعليج منه نور .. هشوم لسانه متبري منه ماتعرفينه ..!! ))
قرت المسج نور وسكتت
هشام : انتي شسالفه تلفونج كل شوي وصلج مسج ؟
نور وهي تبي تحره : بشور تبي تقولي اشيا ماتبيك تسمعها ..
هشام التفت الين ورى ورد عقب : عسى مو قاعده تحش فيني بس
نور : هههه بلى .. اصلا كل موضوعنا عليك
هشام : هيين انتوا الثنتين .. ان ماغديتكم فلافل ماكون هشام
بشاير : انا بروح بيتنا
هشام : لا لا مايصير وشنو تقولين علينا بعدين قليلين اصل مانغديج .. عيب
بشاير : نور بلييز مابي اتغدى .. ودوني البيت
نور : سمعت شقالت .. يله لا تسوي فيها حاتم الطائي
هشام : تامرين امر يانور .. جم نور احنا عندنا .. وحده ومطلعه الشيب براسي
نور ضحكت لان الحجي كان موجهه لبشاير والاثنينين في انسجام


رجعوا البيت
نور : والله شكلها متحلفه فيني
هشام :آآآآه ياحلوها وهي معصبه .. هذا اللي يحليها
نور : الحمدلله والشكر .. الله يتمم علينا العقل
هشام : نوروه ماتسمعين صوت عالي ..!!
نور : بلى .. صوت ابوي وامي .. من الصاله
هشام : شصاير ؟
نور :ماادري .. تعال خل نشوف
واتجهوا الاثنين للصاله ..
هشام : عسى ماشر .. شفيكم يما !!
ابو راشد : قول حق اخوك رشود هذا .. خل يشيل هالبنت من راسه احسن
هشام مو فاهم : شسالفه ..!! يما
ام راشد : اسأل ابوك .. من قلتله ان راشد يبي يتزوج بنت شاهين العيسى وهو حمقان ومعصب
هشام : ليش يبا .. ألبنت فيها شي ؟
ابوراشد : انا قلت لا .. يعني لا !!
نور منصدمه .. : معقوله انتا ابو .. شهالقساوة .. ليش دايم تفرق الناس وماتجمعهم مع اللي يحبونهم
تمت ماسكه هشام بقوه ودموعها تنزل بصمت .. ليش وشنو السبب ماتدري ..
دخل راشد فجأة .. ويه يركض صوب الصاله بعد ماسمع اصوات عاليه
راشد : شفيكم .. صوتكم واصل اخر الدنيا يبا ؟
ابوراشد : اسمعني انت .. البنت هذي شيلها من راسك ..
راشد منصدم : أي بنت ؟
بوراشد : بنت شاهين العيسى
راشد : لييش ؟
بوراشد : بس جذي .. ماكو سبب
راشد ناظر ابوه بنظرة غريبه وعقب قال : مايكفي عليك انك ابو بالاسم .. حتى هالشي ماتبينا نحسسك فيه .. انت حرام تكون ابو.. حراااااااااااااام
بوراشد وهو يطق راشد طرااق على خده : جب ..!!
راشد وهو حاط ايده على خده : طقني .. كفخني .. خلني اصحى .. يمكن اللي قاعد اشوفه حلم ماهو بحقيقه .. هدمت حياتنا واحد ورى الثاني .. ومادريت عنا لا واحنا صغار ولا واحنا كبار .. يتمتنا وانتا موجود .. والحين ياي تحرمنا واحد واحد .. من حياة ثانيه بعيده عنك .. انت شنو ..!! في قلب بهالقساوة
مو كفايه عليك مخبي بلاوي عن امي وعن اخوك .. مو كفايه عليك الصدمه اللي عيشتني فيها انا وهشام طول هالسنين .. صدمه معرفتنا بابونا الظابط .. اللي مخوف الكل وهو في الحقيقه يعيش حياة مع وح
هشاام : رااشد ..!!!
سكت راشد .. بس بعد مافرغ كل اللي بقلبه طول هالسنين .. بعد ماقال كل اللي كان لازم يقوله من سنين كثيرة ..
دمعت عيونه .. وطلع من البيت وهو في حاله مايعلم فيها الا رب العالمين

عم الهدوء المكان كله
بوراشد وهو يوجهه كلامه لهشام وام راشد : راشد مستحيل يتزوج بنت شاهين .. سمعتوني ..!!
وطلع اهو الثاني من البيت عقب ماقالهم انه مايبي يشوف راشد مرة ثانيه

مر شهر على ذيج السالفه وكان راشد ساكن في بيت عمه بوخالد والوضع للحينه متأزم بينه وبين ابوه
بوخالد يكلم راشد : اسمع بعد ثلاث ايام عرس عبدالله بالدمام .. وابو عبدالله محرص علينا نروح .. وانا ماودي نروح وانت ابوك للحينكم متزاعلين .. روح وانا عمك له واعتذرله واذا على سالفه الزواج انا بكلمه وان شالله بيوافق
راشد : عمي انتا ماتعرف ابوي .. تقدر تسأله شنو السبب .. خل يعطيني سبب واحد مقنع وانا مستعد اصرف النظر عنها
بوخالد : خلص اليوم ان شالله نروح انا وانت له في البيت وتعتذرله ونفهم منه سبب رفضه
راشد : ماراح يستقبلني
بوخالد : بس انا معاك هالمرة مو مثل المرات اللي فاتت
راشد : طيب . .بس اخر مره راح احاول فيها ياعمي
بوخالد : ان شالله بيصير كل الخير ياوليدي


في بيت بوراشد
ام راشد تكلم نور : روحي يماا شوفي كلشي زاهب بالديوانيه لان اخوج راشد وعمج وولد عمج بيون الحين
نور : يماا .. تتوقعين ابوي بيستقبله
ام راشد وهي ضايق خلقها : ان شالله .. وجود عمج معاه بيخليه يستقبلهم .. والله ماادري ليش تسوي جذي يابوراشد .. هذا اكبر عيالك وشايل اسمك .. وايدك اليمين .. طول عمره يمشي على شورك .. ليش تسوي جذي
نور اللي دنت يم امها وهي تمسح دموعها : لاتبجين يماا .. ان شالله بيصير كل خير
ام راشد : بس لو افهم ليش مايبي بنت شاهين .. شنو العيب فيها او في ابوها ؟
نور بقلبها .. : العيب مو بالبنت يما .. العيب في ابوي
نور تهدي امها .. : عمي بيتفاهم زين مع ابوي يما .. وكلشي بيرد طبيعي وراش بيرد البيت هني لا تبجين
ام راشد : ان شالله ..

راحت نور تجهز اللي وصته عليها امها .. وهي فكرها بعييد عن كلشي بيدينها ..
غيرت ملابسها ولبست حجابها وراحت المطبخ توصي الخدم يزهبون الجاي والقهوة

فرح توها نازله من غرفتها : نور شقاعده تسوين .. !! ووين بتروحين ؟
نور : ولا مكان .. بس عمي واخوي راشد بيون الحين
فرح بصدمه : والله .. !! وابوي ؟؟
نور : ماادري فرووح الله يستر
فرح : طيب وليش لابسه شيلتج ؟
نور : لان خالد ولد عمي بيي
فرح : زين .. انزل انا ؟
نور : لا امي قالتي اقولج لاتنزلين .. الين مااناديج انا ..
فرح : احسن بعد ..
نور : فرووحه .. اسمع تلفوني يرن .. روحي شوفي منو بلييز
فرح : زين
راحت فرح تشوف تلفون نور .. وعقب ياات وبيدها التلفون
فرح : هذي ريم تبيج
نور بوناسه ..: هلا وغلا بالريم .. زين سمعنا هالصوت انتي وينج ؟
ريم : ههههه موجوده يالغاليه .. بس انتي المختفيه
نور : أي والله .. تدرين كويزات وامتحانات ودوام متعب
ريم : ممم زين بغيت اسألج بتروحون عرس عبدالله بالدمام ؟
نور بصدمه شلتها عن النطق .. او بالاصح كانت غير مستوعبه الاسم اللي سمعته
ريم : الو .. نور ؟؟
نور : ه .. هلا .. معاج ..
ريم : بتروحون ؟
نور : ماادري .. خلينا الحين بسالفه راشد اخوي
ريم : تعالي شصار ؟؟ خلود قالي انه للحين مو راضي عمي يكلمه
نور بذهن مشتت : ايه .. اليوم ياي عمي واخوي .. وان شالله يصير خير
ريم : ان شالله .. طمنيني نور شنو بيصير .. ويارب يكون اليوم خير
نور : يارب
ريم : زين .. نوروه . . تتوقعين امج بتروح العرس ؟
نور وهي تغمض عيونها بالم : ماادري ريم
ريم : والله وناسه .. العرس بيكون الخميس ماعندج دوام .. والصراحه كلنا بنروح وحجزنا من قبل يومين ونقعد كلنا بنفس الفندق .. تعالي والله سفرة ماتتفوت
نور : ماادري .. يمكن مااقدر .. السبت عندي امتحان
ريم : شوفي الامتحان يمديج تدرسيله يلله نور
نور ماقدرت تنطق اكثر : ريم حبيبتي بعدين اكلمج .. يمكن عمي يه .. تبين شي ؟
ريم : لاسلامتج .. دقي عاد
نور : ان شالله .. مع السلامه
سكرت نور من ريم .. وهي بشبه صدمه وكملت تحضيرالقهوة وهي تبجي بهدووء وتمسح دموعها بهودء بعد
وفي كل دمعه تنزل من عينها واللي تقرر انها تكون اخر دموعها .. تجر وراها سيل طويل ماله نهايه

رن جرس البيت .. ودخلوا بوخالد وخالد وراشد وهشام وابوراشد كان بالديوانيه ومو باين على ويهه أي تعابير


يتبع