الجزء الخامس :

الكويت .. في المجمع
ريم ونور وفرح يفترون من محل الى محل .. خذو شغلات حلوة بس فرح كان ذوقها صعب شوي .. وكان الحظ من نصيب نور .. لان جسمها يناسب عليه اغلب الشغلات ..

ريم تاخذ راي نوروفرح : شرايكم في هالجنطه .. حلوة صح ؟
نور: يي جناان والله
تلفون نور يرن : هذا هشام
نور : الو
هشام : الو هلا نور .. ها خلصتوا ؟
نور : لحظة ..
تسأل فرح وريم : هشام يسألكم خصتوا ولا لا ..
ريم تهمس لنور بشويش : قوليله بيعشونا
نور وهي تضحك : هشام .. بتعشونا ؟
هشام : واااي انتوا شنو .. لا بنرد البيت بسكم حوسه
نور : شوف اذا ماتبون تعشونا عيل ترى احنا للحين ماخلصنا
ريم تغمز لنور : عفييه
خالد من الطرف الثاني يقول لهشام : انا عازمكم على العشا خبرهم
هشام : اوو زيين هذا خالد عازمكم بعد شتبون .. ها نيي ناخذكم الحين ؟
نور: ايي يله تعالوا
هشام : اوكي باي
نور : باي

ربع ساعه وخالد وهشام وصلوا وخذوا البنات
في السيارة

هشام : يله شنو تفقتوا عليه ؟
ريم : ها نور يله قولوا ؟
نور : كيفكم والله .. انتوا تعرفون !!
خالد اللي يبي يبيض الويه مع نور وفي خاطره يوديهم مطعم كشخه شوي واكله حلو وهادي
خالد : خلص انا بوديكم على ذوقي .. موافقين ؟
هشام : انا اقول .. نعشيهم فلافل وشاورما شرايك ؟
البنات : ههههه لا مانبي
خالد : لا حرام اول مرة نطلعهم يميع لازم نكشخهم شوي
هشام : دام فلوسك زايده .. طيعني .. فلافل تشبعهم وعقب احنا نتعشى على كيفنا
البنات : يالبخيييييييل
وتموا يضحكون .. وهم مستانسين
الكل كان مستانس البنات وخالد وهشام .. نور وريم اللي من هالطلعه صارو قراب اكثر
هشام وخالد ارتاحوا من هالتقارب بين بنات العم
فرح تحاول تطلع من هدوءها وتختلط معاهم بالرغم انها للحين مو متأقلمه مع البقيه

وصلو المطعم
البنات قعدوا في جهه وخالد وهشام في الجهه المقابله
خالد اللي اول ماقعد يدام نور ماشال عينه عليها ..
وهو يقول بقلبه .. متى نقعد انا وياج يانور بروحنا ..!! ياليت مافي غيري وغيرج هني
هشام لاحظ هدوء خالد ورزانته غير المعهوده وفسرها على انه مستحي من بنات عمه ..

خالد : عندهم هني وجبه روعه جربوها
هشام : لا انا ابي رقم 13 شكلها لذيذ وغاليه بعد .. في خاطري اخسرك اليوم
خالد : هههه يفداك البوك وصاحبه شدعوه هشوم
هشام : ههههههه قول الله .. قد هالكلمة انتا ؟
خالد : وليييه .. شكلنا بنفلس

هههههههههههههههههههههه الكل يضحك

هشام يسأل نور وفرح : ها شنو اخترتوا ؟
فرح : انا ابي رقم 3 مع شيبس
نور : مم ماعرف زي خالد وريم
خالد اللي حس ان قلبه بيوقف من الوناسه .. ثاني مرة اسمع اسمي منها .. وين كنت عنج يانور ..!!

تعشوا عيال العم كلهم .. وطلعوا من المطعم وعزمهم هشام على ايس كريم بما انه مفلس .. وردوا البيت وهم مستانسين .. ريم اللي ارتاحت من الخاطر على نور وفرح .. وخالد اللي حس ان نور قلبت كيانه .. هدوءها ضحكتها ويهها الطفولي وجمالها الجذاب .. ماغابوا عن باله ولا لحظة .. كان وده لو يدق على هشام وترد اهيا عليه زي ذيج المرة .. وعلى هالافكار .. غرق في نوم عميق

بيت بو راشد في الصباح

نور : صباح الخير
ام راشد وهي قاعده على سفرة الريوق : هلا نور صباح النور .. تعالي يما اكلي شي
نور : مم ابي عصير يما .. ماعليج امر تعطيني
ام راشد : ان شاله .. هاج
نور : يما هذي بطاقه ابوي .. عطيه ياه اخاف اعطيه
ام راشد : اكيد بتخافين .. صارفين انتي واختج 200 دينار على ملابس وجنط ومكاياجات وخرابيط
نور : ويي يما لو تشوفين شنو شرينا بتقولين مو حسافه الفلوس .. خل تقوم فرح وتييب الاغراض وشوفي
ام راشد : اييه زين .. تبين تقصين علي هاا
نور : هههه ماعاش من يقص عليج الغاليه .. الا قوليلي رحتى حق سارة ؟
ام راشد : ايي والله رحت .. سكتي نوروه يازين ولدها ماشالله يتربى بعزهم ان شالله .
نور : يحليلها .. الله يخليه لهم .. شنو سموه ؟
ام راشد : ناصر على اسم عمها .. وتقول اخوها عبدالله يوصل اليوم الكويت .. قلت لابوج يعزمه على العشا في بيت عمج بوخالد بما انه الاكبر .. بيسون عشى ريايل جذي
نور : اهاا .. عيل خل ادق على ريم .. اكييد الحين حايسين يمكن يبون شي
ام راشد : زين والله صرتو تدقون على بعض .. شهالتطور .. من يوم طالعين السوق يميع والحين تدقين عليها
نور : أي والله يما .. ريم خوش بنيه تعرفينها انتي .. وبعدين احنا مابينه وبينها شي .. سالفه راشد صارت من زمان وانتهت .. ومهما يصير احنا بنات عم
ام راشد : عفيه يابنيتي هذا اللي هقيته منج .. عيل روحي دقي عليها وسأليها اذا محتاجين شي ..
نور اللي ارتاحت لكلام امهما : ان شالله
ام راشد : وبطريجج قعدي فرح وهشوم .. بسهم نوم
نور : (( فروم ماي اييز ))
ام راشد : شتهرجين انتي ..!!
نور : ههههه يما يعني من عيووووني
ام راشد : ههههههه جييل العجايب انتوا ..

راحت نور تقعد فرح وهشام
وعقب دقت على ريم
نور : الو
ريم : هلا باللي لافاني ياهلا به
نور : ههههههههههه ويي حايشج الطرب اليوم
ريم : ههه مو مني من الشغل اللي على راسي .. اليوم في عزيمه ريايل ببيتنا .. والاشراف علي احم احم .. تدرين الخدم مايعتمد عليهم بشي ..
نور : شدعوه من الصبح شتسوين ؟
ريم : الله يسلمج هذا خلودو .. عازم اخوج على الغدا وقاعده احوس ..
نور : هههههههههههههههه هشوم للحين نايم
ريم : حللفي .. شوفي ياويله ان مايه .. ولا ترى الاكل كله بوكله ياه غصب طيب
نور : ههههههههه لا يحشوك .. لا خلص برد اقعده مرة ثانيه
ريم : هههههههههه
نور : الا تعالي امي تقولج ماتبون مساعده شي ..
ريم : بعد قلبي خالتي حاسه فيني . .مو مثلج لا احساس ولا شعور
نور : ههه حرام عليج انا اللي ذكرتها والله
ريم : بعد قلبي .. دام انج عرضتي خدماتج .. عيل تعالي انتي وفرح
بيني وبينج مافي شغل لان بنطلب عشا من برى .. بس تعالي انا وياج نسولف ونستانس
نور : ممم خلص اقول لامي واعطيج خبر
ريم : صار
نور : يله روحي جابلي غداج ترى اخوي يوعان مافيه صبر ينطر
ريم : هههههههه اخاف صج .. لاتخليني اوكلهم توست وجبن الحين
نور: هههههه تسوينها بنت ابوج
ريم : ههههه والنعم فيني بنت الاجاويد على قوله خلود
نور : يله سي يو حبيبتي
ريم : ان شالله
نور : باي
ريم : باي

في مطار الكويت

علي : هلا عبدالله .. نورت الكويت والله
عبدالله : هلا فيك الغالي منورة باهلها .. ههه انا قلت ماتجيني نصور بيلهيك عنا وبجي بتكسي
علي : ههههههه شدعوه .. نصور مايلهينا عن خاله
عبدالله : انا حاس ان هالولد بياخذ الاضواء مني خخخخخ
علي : صدقت .. وشكله بيكبر ويتزوج وانتا خلك عزوبي الين ماتشيب
عبدالله : اووو .. حتى بالكويت .. اقول بومحمد .. فمان الله
علي : هههههههههه خلص خلص تعال وين رايح .. ماراح نفتح هالموضوع مرة ثانيه .. شكلك زهقان منه هاا .. عمي لوع جبدك ؟

عبدالله : اسكت .. منحاش منهم والسبه هالموضوع .. تقول قاعد على قلبهم والله .. الحمدلله اني اشتغل
علي : ههههههههههههه .. أي والله
عبدالله : تضحك يالدب هاا .. امش ولا ترى أخذ هديتي وهدية ابوي واردهم السعودية
علي : هههههههههه مانبي هدايا يامعود نبي شوفتكم بس .. والله وحشتونا
عبدالله : تسلم مايوحشك غالي والله ..
علي : يلله مشينا تلقى اختك تنطرنا الحين من اليوم وهي تحن علي
عبدالله : فديتها اختي . تحب اخوها وانتا شحارك.. اربع وعشرين ساعه معاها .. مو مثلي انا مااشوفها الا بالمناسبات
علي : اعوذ بالله من الحسد
عبدالله : هههههههههههههه يله مشينا


وصلوا عبدالله وعلي
سارة : هلا وغلا باللي نور الكويت والله
عبدالله : هلافيج الغاليه والله وحشتيني
وسلمو على بعض .. عبدالله شاف ناصر اللي فز قلبه عليه من اول ماشافه .. كان يشبهه ويشبهه امه حيل .. وقتها عبدالله تذكر امه وقلبه حن للقياها

سارة : شفته .. ماقلتلك يشبهك ..
عبدالله : أي والله عشان جذي مزيون ويهبل .. طالع على خاله فديت قلبه
علي : خاله المزيون صار شايب الحين
عبدالله : اسم الله علي من الشيب فال الله ولا فالك .. تصدق قبل جم يوم شفت شيبه براسي .. بغيت اجن الا شوي هههههه
علي : محسوبك .. شعره ملاه الشيب .. من الضيم والظلايم
سارة : جنه الحجي علي انا
علي : ههههه انتي .. فديتج انتي مافي احسن واحلى منج ومن قلبج >>> خايف من اخوها
عبدالله : ههههههههههههه علبالي بعد
علي : لا والله الا ام محمد .. مافي منها
سارة بحيا : عارفة ههههه
عبدالله : ايي يازين الثقه على بنات محمد ههههه
سارة : الا قولي بتمر عيال عم ابوي .. ابو خالد وبوراشد اليوم
عبدالله : مدري والله .. شرايج انتي .. شكلي بخليها لبكره
ساره : ام راشد كانت عندي اليوم يحليلها .. وخبرتها انك بتجي اليوم .. وقالت ابوراشد بيكلمه ويعزمه على العشا الليله
عبدالله : على خير .. اذا دق رحت .. وان مادق مريتهم بكره
هاج خذي ناصر .. الله يخليه لكم يتربى عزج وعز علي
سارة : الله يسلمك .. ونشوف عيالك يارب
عبدالله : الله كريم
علي : يلله عبدالله روح ارتاح بالغرفة اللي فوق انا اجيبلك الشنط .. ومايحتاج اقولك البيت بيتك
عبدالله : تسلم يابومحمد ..

بيت بوراشد
نور: يما .. ريم تقولي تعالي انتي وفرح شرايج اروح ..!!
ام راشد : خلص يما شوفي فرح اذا بتروح معاج .. لاتروحين مع السايق بروحج
نور : لا هشوم بيتغدى عندهم اهوا بيودينا
ام راشد : ويي عيل غداي انا منو ياكله
فرح واهي نازله
فرح : انا اكله .. نورو .. روحي انتي انا بتم ومع امي ..
نور : اوكيه .. عيل خل اروح اقول لهشام ينطرني

نور وهشام راحوا يتغدون بيت عمهم .. وتغدت ريم ونور بروحهم وهالشي ضيق خلق خالد لان ماشافها من اول مايت ولا قعد معاها ..

في غرفة ريم
ريم : وعاد من يوم ماشافته اسما في الكلية ياخذني واهيا تقولي اخوج مزيون حلو
نور : ههههههههههه ياحرام .. تولعت فيه هاا
ريم : هههه سكتي واخوي معطيها طاف وكله يدقرها ولا اكو فايده
نور : يحليلها .. عاد انتي اخوج شكله جدي ها
ريم : منو خلود ؟ ههههه منو قال ؟
نور : ماادري حسيته جذي . تدرين خالد علاقته وايد بهشام .. وعلى كثر مايون بيتنا نادر مانشوفه .. بس يمكن من الطلعه الاخيرة حسيته جدي
ريم : هههه لا اهوا مستحي منج ومن فرح تلقينه بس
نور : اهاا .. زين والله اخوج يستحي مو مثل هشوم .. لسانه متبري منه ههههه
ريم : اوو اخوج هشام عاد هذا نكته .. تدرين خلود دايم يقول انا من غير هشام مااعيش .. على قولته .. اهوا الماي اللي اشربه والهواا للي اتنفسه
نور : هههههههههههههههههه .. لا لا حب وغرام مانقدر جذي
ريم : هههههههههه يحليلهم .الله لا بفرقهم
نور : اميين
ريم : زين اقولج .. تدرين ليش عزيمة الريايل اليوم ؟
نور : ايي امي تقول عشان ولد عم ابوي ياي من السعوديه .. مم عبدالله اخو سارة عرفتيها ؟
ريم : اييي خالد يقولي .. عبدالله هذا عمره 33 سنه وللحين مو متزوج تخيلي ..!!
نور: ليش ؟
ريم : ماادري يقولون من امه توفت وهو عاف الزواج . . مع انه ابوه يحن عليه بس اهوا مايبي
نور : الله يوفقه ان شالله .. وانتي يالملقوفه .. اخوج اللي قايلج ولا انتي سائلته ؟
ريم : ههههه اهوا قالي انه ولد عم ابوي .. وانا ماصدقت خبر .. سؤال ورى سؤال ههههههه
نور : ههههههههههههه مو هينه انتي
ريم : ايييه .. تدرين مرة شفته .. ابيض وعنده شوارب سود ومزيون .. بس شكله رزه .. هذا اللي لمحته فيه
نور : هههه يما منج انتي ... عيل اكييد شفتيه لابس شماغ ..!!
ريم : اكيد سعودي بعد شنو ..
نور : يله قومي زين نصلي العصر ونشوف الخدم شنو قاعدين يسوون
ريم : أي والله اذن وماانتبهت .. يله قومي