][ALIGN=CENTER][TABLETEXT="width:70%;background-image:url('http://up.arabseyes.com/uploads2013/01_05_1714936484337918.jpg');"][CELL="filter:;"][ALIGN=center]



رن جرس اخر حصة، طلع الديكتاتور -استاذ الرياضيات- من الصف، ما لقيت الا كل التلاميذ اخذو نفس، المساكين من خوفهم منو ما كانو مسترجيين يتنفسو، وانا متلهم اكيد، اطلعت بنوال عم ترجع كتاب الرياضيات عالشنطة وكأن في شي شاغل بالها حزينة، رجعت كتابي كمان وسألتها:
"رايحة اليوم كمان عالمكتبة؟..."

طلعت فيني وابتسمتلي وقالت:
"لا شكلي خلصت بحثي...
يمكن معاش روح ابدا...
صار فينا نرجع كل يوم سوا عالبيت..."

سكرت شنطتي ولبستها وقلتلها:
"في موضوع مهم بدي احكيه معك عالطريق..."

اطلعت فيني مصدومة وقالتلي:
"شو هو؟..."

برمت وجي لعند قمر الليل وقلتلها:
"مش هون، لما ننزل عالملعب..."

اخذت ايد الشنطة وحطتها عكتفها، مسكتلي ايدي واسرعت لوصلنا عالملعب وقالت بحماس:
"شو في؟... شو بدك تقوليلي؟..."

حاولت ابتسم وانا عم خبرها وجبرت حالي على الكلام لان فجأة تقل لساني ومعاش عرفت كيف حكيت بس بالاخر قدرت خبرها:
"مبارح... ايمن..."

- بحماس:
ايه؟

- طلبت مني خبرك انو هو معجب فيكي...
وحابب يعرف حقيقة مشاعرك تجاهو...

- ابتسامة بعرض وجها ظهرت فجأة وتقلي:
"عنجد!..."

وتقعد تنطنط من الفرحة وتعبطني وترجع تطلع فيني وترجع تنطنط وانا بصعوبة عم حاول جاريها بابتسامة لان رفضها لايمن كان اخر امل الي، هلاء معاش عندي امل ابدا

ومعاش عارفة اديش رح اقدر اصمد بلا ما ابكي، مش عارفة ليش هيك عم يصير معي، عاساس كنت متقبلة فكرة اني مبسوطة لصديقتي، بس مدري ليش هيك قلبت فجأة

طلبت منها تروح لعند القمر حتى تختفي من وجي واقدر اخذ راحتي بالبكا، راحت لعندو مستحية وانا مشيت مكتئبة لحد ما وصلت لمطرح مكشوف السما فوقي، بيقولو انو البكا تحت الشتا حلو لان ما حدا بيكشفلك دموعك، شكلي رح جرب هالشعور لاول مرة،

وقفت تحت السما، رفعت راسي وسمحت لدموعي ينزلو، الدموع ما خيبوني، عالسريع استرسلو بالنزول وبطلو يوقفو، بس مدري ليش مش حاسة بقطرات الشتا عوجي؟ فتحت عيوني للاقي فوقي شمسية، طلعت على صاحب الشمسية للقيه وقح البرية، دفشتو معصبة وقلتلو:
"مش ناوي تحل عني
مطرح ما بروح بتلحقني..."

- خوفا عليك من المرض، قلتيلي قبل مرة انك ما بتمرضي من الشتا بس وقتها غبتي 3 ايام عن المدرسة...

- ما خصك فيني...
ما حدا وكلك تحميني...

اطلع الوقح بنوال ماشية حد قمر الليل مبتسمة ومستحية ورايحين ليطلعو من المدرسة، قال الوقح

- شكلها رفيقتك رايحة مع قمر الليل...
حتضلك بلا مرافق...
اذا بدك بوصلك انا...

- بفضل امشي لحالي على اني امشي معك...

- هممم... اوك...
بس حبيت هنيكي على قوة قلبك...
عملتي الي كان لازم تعمليه
لو كنت محلك ما كنت قدرت اعملها للشغلة

فجاة رجعو نزلو دموعي شلال، طلعلي محرمة من جيبتو وعطاني اياها رجع قلي:
"انسيه بكرا بتلاقي افضل منو..."

اخذت المحرمة ومسحت فيها دموعي وقلت:
"لا...
انا ما رح اتزوج بحياتي..."

سكت هو كأن اقتنع بكلامي عن غير عادة بينما كملت انا البكا، ضلينا ساكتين لحد ما قلي:

" امشي خليني وصلك عالبيت"

ضليت واقفة مكاني فحاوط كتافي بيدو ومشاني معو لبرا، مشينا ومشينا وتنينا ساكتين، اتفرج عالبنات الضاهرة مع شباب عالطريق واقعد احسدهم، كأنو هو حس علي، شدني لعندو بيدو الي محاوط كتافي وقلي:
"لو حدا شافنا هيك شو بيفكر عننا..."

عصبت منو وشلت ايدو عني فقلي:
"مش كل تنين تشوفيهم ماشيين مع بعضهم بيكونو مبسوطين...
في منهم يمكن يكونو مقهورين اكتر منك،
بس الله باعتلهم حدا حلو وحنون متلي ليحميهم من الشتا والمرض"

زئرتو نظرة لئيمة بس ما اهتملها، طلعت بوجوه الماشيين،
بالفعل...
مش الكل مبسوطين
شكلي ما كنت اعرف شي عن تعابير العالم،
قمر الليل فكرته معجب فيني بس كنت غلطانة
وهول العالم الي حولي فكرتهم مبسوطين وطلعت غلطانة
مين بعد؟
تطلعت فيه مستغربة، ديما كنت مفكرته بيكرهني دون سبب، معقول يكون...
لا لا مستحيل

اطلع فيني مزعوج وقلي:
"فيني افهم اي فكرة سخيفة عم تتحرك بمخك؟..."

بعدت وجي عنو بحرج وقلتلو:
"انسى... ولا شي..."

لسبب من الاسباب بحس هالزلمة عايش بعقلي، انا متأكدة انو فهم على نظراتي هلاء بس حابب احكيلو بنفسي كالعادة، بعدت عنه شوي احلى ما يكون قرب المسافة هو سبب ارسال المعلومات العقلية فاطلع فيي مزعوج:
"فيي افهم شو عم يصير معك؟..."

شكلني من ايدي وقربني لعندو وقلي:
"ما باكل بشر انا..."

انا احمرو خدودي ساعتها واظن ما كنت بحاجة لجاكيت لان عالخجل دفيت كفاية، ومشينا بهدوء لحد ما وصل عبيته وقلي:
"يلا روحي كملي عبيتك لحالك انا وصلت..."


سكر الشمسية وفات عبناية وتركني بنص الطريق، طلعت بالشارع ادامي ورجعت اطلعت فيه اختفى جوا البناية، عصبت منو والحقتو عالدرج وصرخت:
"بدك تعمل جميل لحدا عالاقل كملو للاخر..."

سكتت لما شفتو قاعد عوحدة من الادراج وساند عالحيط مسكر ايدو على صدرو ورافع راسو ساندو عالحيط كأن عندو هم كبير مدري شو قصتو، ومجرد ما سمع صوتي طلع فيني مصدوم، فووت الشي الي بيدو من قبة كنزتو ليخبيه كأنه سنسال او شي هيك، ووقف وطلع عالدرج عالسريع، فجاة وقف ورجع لعندي عطاني الشمسية وقلي كأنو عم يحاول يكون عطبيعتو:
"يترجعيلي اياها بكرا الصبح
بيكفي اخذتيلي نص المحارم..."

اخذت الشمسية منو مصدومة من تصرفو بينما هو طلع عالبناية بلا ما يزيد ولا كلمة، طلعت انا من البناية فتحت الشمسية وانا عم فكر وحلل تصرف هالزلمة، مدري شو صرلو فجاة، كان طبيعي بكل الطريق ليش هيك تغيير، بالتفكير بالامر، لا ما كان طبيعي، كان كل الطريق ساكت وما يحكي الا للضرورة، مع ان بالعادة انا بكون بدي خليه يسكت وهو بيضل يحكي...

فجأة لفت نظري بواجهة واحد من المحلات صبغة شعر اشقر، البنت الي بالعلبة كأنها نوال، طلعت فيه وشردت:
"لو اني شقرا كان انعجب فيني قمر الليل بدل نوال؟...
هيدا الشي الوحيد الي بتتفوق هي فيه علي...
يعني طلع قمر الليل بيحب الشقار..."

فتت عالمحل واشتريت الصبغة وكملت طريقي عالبيت، لما وصلت حطيت شمسية الاستاذ بالمكان المخصص للشمسيات، وفتت عغرفتي لاكتب بدفتر ذكرياتي الاحداث الغريبة الي صارت معي اليوم...




[/ALIGN][/CELL][/TABLETEXT][/ALIGN]]

__________________