10-18-2016, 06:16 PM
|
| |
((2))
ظل يناظرني فتره تركي .. أرجوك .. وطي عيونك .. ولا قسما تنزل دموعي ..!
ولا كانه يفهم لغة عيوني .. ولا كأنه بيوم قراها وكآنت أسمه .. ولا كأنه بيوم عرف وش يعني لاصارت عيوني كذا .. هو يستهبل علي ؟! ولا يستهبل علي ؟!
الظاهر أنه يستهبل علي !!
إبتسمت له وخلاص أحس العبره خانقتني ..
قلت : خلك معي صريح .. متى ..
سكتت فتره وأخذت نفس : متى تبي تطلقني ؟!
فتح عيونه وجلس قبالي : نعـم ؟! عيدي أشوف وش تقولين ؟! وش ذا السؤال ؟!
زي المعصب .. زي اللي منقرف .. زي تركي بن عمة ساره !
طاحت دموعي : والله تركي ولا تحس أنك كذا جارحني .. عادي قلها ..
ظل فتره يناظرني .. قلت : عارفه أنك مابتستمر معي .. خلنا نكون واضحين .. زي ما أنت منت بمتحمل تواجدي ومنقرف مني .. أنا .. " مسحتها بظهر يدي " ما أطيقك أبد !
تركي : أيووهـ ! بنظرك يعني حنا كذا واضحين ؟!
هزيت راسي بـ إيه .. وكملت : لا تخاف مجود .. " رفعت عيني " مدري هو يبقى معي ولا معك ؟!
كملت بسرعه : ويعني لو كنت بنت خالك وش بيصير تنقلب الدنيا لو تطلقنا ..؟! عادي منت بآخر واحد مـ ...
قاطعني : سآره !
رفعت عيوني وطبقه الدموع ما تخليني اناظره تمام ..
هز كتوفي : أنتي وش فيك ؟!
أبعدت ايدينه : بعد اللي عرفته وسمعته .. ماظني انك بتبقى معي ..!
رفع حاجب : و.. وش اللي سمعته ؟!
تسألني أنا ؟!
رح ياتركي وأسأل نايف .. هو وش قالك بالضبط .. هو وصف لك كل شي ..؟!
ولا قالك .. نقاط رئيسيه وما مدآهـ إلا وأنت طلعت ؟!
صرخت بتعب : خلاص ! والله يكفي .. وش تبيني أعيدهـ ؟!
هزني : ساره أنتي وش فيك ؟! أييش سويت لك عشان تقولين كذا .. وغيرهـ .. وش اللي أنا سويته عشان تنقلبين كذا ؟! وش فيك ؟! والله لو تعطيني سبب يقنعني اللي تبينه يصير ..
قفلت فمي وبدت تطلع مني آهات صغيره .. ثم قلت : أنا اللي أنقلبت ولا أنت ..
فتح عينه : أنا ؟!
هزيت بـ إيه .. وكملت : تركي لا تقلب السالفه .. منت بطايقني ادري ولا أنا .. " طاحت دمعتي " أصلن أنت قرف !
ظل فتره يناظرني .. ثم زفر بهدوء .. تركي وطي عيونك أضعف قدامها !!
سمعته : بالله انتي أنهبلتي ؟! وش سمعت ووش عرفت ؟!
سكتت .. كمل : أما غريبهـ آنتي !
رفعت عيني له : اللي سمعته من .. " شهقت من البكا " من .. شسمهـ ..
ليـه ؟!
ليهـ موب قادره أقول .. نآيف ؟!
ليـه ؟!
هو لذآ آلدرجهـ الإسم صعب مررهـ ..؟
إبتسم لي : أيهـ .. شسمه ذا اللي شسمه ؟!
هزيته : تركي لا تستهبل علي ..
قاطعني : أنتي اللي مدري وش فيك .. كم يوم لك وأنتي كذا ؟! سكتت وقلت ياتركي متضايقه من شي .. يمكن انه فيك .. انت وش سويت .. قلبتها فوق تحت يسار ويمين .. والله ماسويت لك شي ؟!
ظليت أناظره أحثه أنه يكمل .. تركي : إلا إذا أنا قلت شي بدون قصد .. بس وش الشي اللي قلته يخليك تسوين كذا ؟!
ناظرته بحذر : يعني أنت .. وو .. أنا أقصد اني ما أنقلبت .. أنت اللي أنقلبت ..
فتح عينه : أسألك بالله ياساره وش اللي سويته ؟!
كتمت شهقتي : أنت .. يومك طلعت .. وبعدين انت رجعت .. كانت الساعه واحده .. وكنت أنا أرتب الملابس .. وأنت دخلت .. بس ماسلمت .. كنت تناظرني بـ قرف !
سمعته : لا تصيحين .. هـ الحيين أنا عشاني ماسلمت عليك يعني منقرف منك ؟! بالله ساره بزران حنا ؟!
ناظرته أنتظره يقولي وش قاله نايف بالضبط .. بس مارد !
تركي : طايب هاه .. السلام .. كذا حلو ؟!
بس دموعي تنزل ولا أسمع نفس لصوتي مكتوم .. زي كل مره !
مسحها : لا تصيحين وقفي خلاص .. هـ الحين كم صار لك عشان ماسلمت ..؟! طايب سلمي أنتي ..
سكتت أناظره باستفسار .. ثم قلت : حتى تصرفاتك .. تحلف ياتركي انك ماقلت لي لعاد تقولين أسمي ؟!
إبتسم لي : والله بزر أنتي .. ورجلك بزر مثلك تصدقين ؟!
شفته يضحك بقوه وأنا أمسح دموعي وبس اناظره .. كمل : يعني اللي يسمعك انتي ماقد بعدها قلتيه ..؟!
كمل يضحك ولا كأني قدامه أبكي ..,؛
قلت : أنت انقلبت إيه وأنا بعدك .. مو بس انت اللي تنقلب علي ..
تركي : يعني أنتي تبيني أطلقك عشان أنتي قلبتي وجهك ثم انا قلبت وجهي .. وعشاني ماسلمت عليك ؟!
ناظرته : أنت مستتفه الموضوع مره ..
زفر بضحكه : يعني بالله واحده صار لها فتره ماتكلم رجلها ورجلها شوي غبي وخربها يعني ياساره ماتهميني ولما يكلمها تقوله أنت قلبت وجهك علي وطلقني هـ الحين .. لعبهـ هي ؟!
سكت فتره ثم ضحك : لا والحلو بالسالفه مخططه وين بيروح مجود وكيف بيعيش ..
ناظرته فتره ثم قلت بحذر : أنت يومك طلعت .. طلعت مع مين ؟!
سكت فتره : متى ؟!
قلت : يوهـ تركي .. أنت رجعت من بدري ثمن دخلت للمقلط وبعدها ماشفتك إلا وأنت راجع لي بالغرفه .. انت طلعت مع مين ؟!
إبتسم لي : عادي يعني وش فييه .. تختلف لو أني طلعت مع أي أنسسان ؟!
قلت : لا أكيد قايلك شي وقلبك علي ..
حسيت به يشد على ايديني : وش يقلبني عليك الله يهديك .. محد يقلبني عليك ..
وكأني حسيت بالفرحه .. هو معقوله تركي الدمامي ماتأثر لـ كلام نايف ؟!
يعني نايف ماقدر يقلب حياتي ؟!
واللي صار زوبعهـ بسيطه مني انا .. في أعتقادي تركي اللي بداها ؟!
شديت عليه : طايب احلف ما أثر فيك كلامه ..؟
سمعته : منهو ذاهـ ؟! وأي كلام أصلن ؟!
ناظرته بشك : يعني هو أصلن أصلن أصلن ماقالك شي ؟!
إبتسم : أصلن أصلن أصلن !
أي شعور اللي أحسس بوهـ هـ آلحين ؟
غير ان آلروح رجعت للجسد .. غير أن تركي رجع ورجعت معه نبضاتي ؟!
غير أن تركي ما يعرف شي عن ماضي الخُبر ؟!
غير أن سارهـ رجعت .. تلم تركي معها !
همست له : مرهـ أحبك تركي .. أرجوك لو مهما تسمع .. مهما تعرف .. ماتنقلب حتى لو كان صحيح .. والله ما أقدر كذا .. حتى لو قلت لك طلقني عناد فيني لا تطلقني .. جننتني يابني آدم ..
شدني لهـ : مهبولا انتي أطلقك ؟! هو انا بالموت أخذتك بـ سهولهـ كذا ؟!
أبتعدت وأنا أبتسم له .. يمكن ظلمت نايف .. هـ المره بس .. لأن طول عمري احسن فيه الظن !
إبتسمت لتركي بحب .. إيه ياتركي أحبك ولعاد تروح عني .. حتى لو انقلبت ..
أحبهـ لأنه يحسسني اني مره غاليه عليه .. ولا وش قصده من أنه يقولي " بالموت أخذتك " ..؟
هز راسه : قومي أنتي تعبانه ..
ناظرته أستأذنه أرجع أشاركه مملكته .. هز راسهـ .. لأنه فهم لي !!
أنسدحت بـ أبتسامه .. قال : أيوهـ انسدحي ولا تروحين المستشفى .. قومي بشوف وش فييك ..
إبتسمت له : مافيني شي هاهـ .. زي الفل !
رفع حاجب .. ضحكت ..ظل فتره يناظرني لين سكتت وهديت من الضحك ..,
قلت : قلي ياتركي وش اللي يخليني أتعب غير أنك تتجاهلني وتخصرني ؟! ورضاي ماهو بـ شي صعب غير أني أشوفك راضي عني ..!
رمى نفسه وهو مغمض عيونه : ونهال وش سالفتها ؟! " فتح عيونه وناظرني " من جدك انتي ؟!
طاح وجهي : لا وش من جد .. مجود سألني وقلت له ..
ناظرني : وش سألك ..؟
قلت بلعانه وانا ألف وجهي : وش دخلك انت ؟!
لفني وهو مبتسم : جد وش سألك ؟!
هزيت كتوفي : سالفه طويله .. مالك فيها !
غمض عيونه : إلا أبي أسمعها .. أهذري لين الفجر مره أشتقت أسمعك ..
إبتسمت ومسويه فيها الدلوعه اللي مره خخ : أتعب كذا !
قال وهو قافل عيونه : أيووهـ .. كذا النبره مضبوط ..
إبتسمت وإعتدلت حطيت راسه على رجلي وأنا مبتسمه ..
وهمهمت له : همممم وش أقول ؟!
قال : عادي .. معقوله البنت ماتعرف وش تسولف ؟!
قلت : مدري يعني ما احس عندي شي أقوله !
سمعته بهدوء : غني !
سكتت فتره : ماني براشد على غفله ..
سمعته : وجع ما أحبه مرهـ ذا المخلوق .. ياكرهي له بس .. ثقيل دم مرهـ !
ما أرضى على راشد بس كمان اللي يقوله تركي .. فـ قلبت السيره : وش تبيني أغني ..؟
حسيته بينوم مره : اللي يجي منك حلو ..
سكتت بـ حيره مره وش أغني ؟!
وش الشي اللي يناسب مقام تركي .. وش الشي اللي يخليني اطلع بصوره حلوة ..
لما يقولون ساره غنت لتركي ؟!
همست لهـ : أنا والشوق .. يطول ليلي وأنت تغيب .. أنا والعين .. نسأل فين أغلا حبيب ..؟
إبتسمت وأنا أمسح على عيونه بـ سكون : أنا ألبي ينادي ليك .. وروحي .. تروح ليك .. يوقف بيآ الزمان .. وأستنى شوف عينيك !
غمض عيونك ياتركي كذا .. وأنا بقفلها على آخر شي ..
خلني أحلم أن مهما يقول نايف مستحيل تصدقهـ .. خلني أحلم انك معي بعد عشرين سنه جنب مجود اللي بيدينه بنت الحلال ..,
خلك كذآ !
خلني أقدر أناظرك على رآحتي زي ما أبي بدون ما أخجل وأوطي عيوني ..,؛
تمتمت لهـ بجوآتي .. أحبك يآتركي !
*
*
لما صحينا لصلاة الصبح كان مهلوس مره حبيبي والله ..
قلت له : تركي مابتقوم ؟!
تمتم لي : عادي الإثنين واحد ..!
إبتسمت : طآيب ؟!
تمتم : رضت خلاص ..
قلت أجاريه : ومنهي اللي رضت ؟!
على نفس الوضعيه : سارتي ..
إبتسمت : وسارتك زعلانه كانت ؟!
تمتم بـ اختصار : مدري وش بها ..
سكتت فتره .. وكأني متحمسه لـ السؤال اللي أبي أسأله مرهـ ..
يمكن لأني أبي أعرف الجواب من تركي بدون مايحس .. وكانها جات الفرصه ..
قلت : تركي وش يبي منك نايف ؟!
تمتم وهو يكرر الاسم : نايف ؟ نايف ؟ ممم نايف ؟!
لما بدا ينخفض صوته قلت بسرعه : نايف بن خال سارتك ؟!
سمعته : نايف خويي ؟! مايبي شي !
إبتسمت نص إبتسامه : لا .. تركي أقولك نايف بن خال سارتك ..
بسم الله كأنه مره شارب شي : ونايف بن خال سارتي نفسه .. لللا تصيرمهبول !
بلعت ريقي بجمود ملامحي .. نعـم ؟ وش يهلوس تركي خويه ؟!
قلت : طايب وش يبي منك ؟!
كان يتمتم بصوت واطي نكست راسي له وبهدوء قلت : إييش ؟!
رجع يتمتم بس ما أفهم له .. لاول مره في حياتي أحس ان تركي يتكلم وهو نايم .. يمكنه تعبان ؟!
شلحت طرف اللحاف .. ثم ابعدته وغطيته وقمت وتوضيت وصليت ..
أوقف .. وأركع .. وأسجد !
إيهـ أسجد لك يآملك .. يآعزيز .. يآ لطيف ..,
أبعد عن حياتي نايف ..!
*
*
*
رفعت عيني له : وش ذاهـ ؟!
إبتسم لي : رضوتك !
رفعت له حاجب بـ إبتسامه .. ربي لايغير علينا ..!
قال : بس طبعا فيهـ خبر موب حلو بالنسبه لك لكن مره روعه بالنسبه لي ..
سكتت .. وش الشي اللي ما أحبهـ وتركي يحبهـ ..؟!
كمل : مجود موب رايح معنا !
رقّص حاجبه .. وقفت ولفيت بسرعه .. وانا أقول : بالله !
سمعته كأنه يرجاني : سآره ..
لفيت له : بالله وين يروح ولدي ؟! ما أقدر فشله مع عمتي والله .. وبعدين حنا بـ أجازه خلها تستمتع باجازتها .. وش ذا الانانيه ؟!
ناظرني برجا .. قلت : فشله !
قال : واللي يقولك هي اللي قالت لي جبه عندي .. والله ساره شوي وتبوس رجلي حرام كذا ..
رفعت حاجب : أحلف طايب ؟!
رد بسرعه : وقسما !
قلت : صدقتك بس مافيه مجود لازم يروح معنا !
زفر بقهر : كنت واثق أنك مابترضين .. أجل أنتي بتجهزين ملابسه وملابسك وملابسي ..
وهز كتوفه : وإذا ماتبين خلاص مايروح مجود ..
إبتسمت له : مش بوزك غصب عنك يروح !
تمتم بسكون : أما بنت خال !
*
مرت الـ 24 ساعه بسرعه وصرت أنا وعيلتي الصغيره في الجو .. ومسرع ماوصلنا لـ بلاد الطليان !
أول مره أروحها ..
ههه أستغفر الله أنا من كم سنه بس اول مره أركب الطائره .. تقريبا من زواجي ..,
وصف وش كانت الطائره ووشلون جلست ومتى اكلت مالي خلق خلني شوي يصير عندي خصوصيه .. خخخ إيه حرمه سنعه سوير ماتطلع أسرار بيتها !
وصلنا الفندق ومجود خلقة كان نايم وتركي سدح نفسه بلبسه ونام ..
أخذت مجود وسدحته ورجعت لتركي تحممت بسرعه ولأني نمت طول ماكنا بالجو طلعت ورحت أجفف شعري ودي اكشخ شوي يعني ما أقول اني مهمله نفسي بس جد من طيب نفس تركي اللي ماقالي غيري شوي ..
لفيت أطرافه كان مره طويل ودي أقصه بس خله دامه معجب تركي ..
شوي بوصف لبسي وأحس نفسي كني بطلع خخ وجه فقر لا هو موب وجه فقر هو يعني أني ماتعودت ألبس كذا لأني ما أرتاح ..,
ممم لبست بدله كانت فوشيه مره حلوة ..
برمودا حلو على اطرافه فضيّه وبدي أبيض مميّل على الفضي وجاكيت كت قصير فوشي رهييب .. أصلن القماش نفسه كان روعه !
لبست كعب فضي ونزلت خصلات ورفعته رحت آخذ جوله بس كذا مزاج ..
بعدين صحى تركي أحلى الأيام فعلن لما أعيش مع تركي !
باختصار كنت أعوض لفتره اللي عشتها بدون تركي رغم انها مره قليله بس أحسها مره طويله وثقيلة دم مره ..
وعموما ..!
مجود .. كان مبسوط لانه معي انا وتركي وماخذ راحته بما ان محد فيه مانعرفه ..
تدلع كثير .. وسهر معنا كثير .. ونام بحضني كثير .. ولمّه تركي كثير .. وأقلقني عليه كم مره !
وتركي .. أفعاله كانت تدل أنه مرتاح معي .. ودي أقوله عشان ما أخاف مره ثانيه بس أستحي من عيون تركي .. وش أحسس فيه وأنا أقولها له .. دام الماضي إندفن بنفسه .. ليه انا أسوي نفسي المدري أيش وأرجع أحييه من جديد ؟!
تركي ...
كان ولا يزال شي حلو .. وما يتغير حتى مع تغير الطقس .. حتى مع تقلب المناخ !
أما أنا ..!
الشكرلله اللي خلاني أرتاح كذا .. كثير ماعندهم نص اللي عندي ..
أنا عندي أخو يحبني ويعزني ..
عنديـ عم طيوب وبين فتره والثانيه يدق يتطمن علي ..
وعندي عمة تحب راحتي وتحسسني انها مو بس تحبني عشاني زوجة تركي ولا ام ماجد .. لاني سآره !
و..عندي ولد يسوى كل الدنيا عندي بس لا منه ضحك .. مليان براءه !
عنديـ رجل .. ولا كل الرجال .. أعجز حتى انا وشلون ياربي أوصفه .. هو جماله ؟ هو دلاله ؟ هو براءته ؟!
وعندي بنات عمة وعيال عم .. يفتقدوني كثير ..,؛
و..عندي خالة .. ما أدري عنهآ من يوم ماراحت جدهـ !
وش آبي اكثر من كذا يارب .. الشكر لك !
اليوم .. كملنا ثلاثه أسابيع من وصلنا إلا يوم ..
أحسسها كذا مرت بسرعه ولا حسيت فيها أصلن .. طبعا اليوم مقررين نطلع كـ العاده يعني ..
ياسلام !
صايره أميره ماشاء الله علي خخ .. لولا مجود اللي فعلن ملك خخ ..
جد أما شايلته أو شايله تركي .. او إذا الإثنين مره تعبانين ..
غصب عنهم يبقون بالبيت لأن مجود ماله خلق يمشي خخخ ..
كيفهـ .. مو هو ولدي ؟ خله ياخذ راحته معي ..,
ناظرت الساعه كانت سبع إلا ثلث المغرب طلعت مع تركي وبين إيديني مجود مشينا للمصعد ... لكن ...!!
أووف .. من جد أحس أني مقهوره لا شفت المصعد كذا فيه احد خخ وكأنه باسمي خخ ..,؛
وعموما سميت بالرحمن ومشيت متجهه للدرج شفت تركي واقف عند المصعد ..
كتمت ضحكتي : حرام عليك والله ..
لف وهو مبتسم : وش عندك عادي .. يعني ننزل حنا على رجلينا وتعب .. وهم كذا بالراحه ؟! خلهم يتعطلون عند كل دور ..!
إبتسمت له وأن أمشي أراقب خطواتي : مررهـ وحشتني الدمام ..
همهم لي يعني كملي أسمعك .. قلت : يعني جد فيصل ونجوى ونهى ونوره حتى عيال عمي ..
سكت فتره ثم كملت : طبعن عمتي وعمي شي ضروري ..
دخل يده بجيبه : تكلمينهم ؟!
أفتشلت مرره .. يعني بقول شي أحس نفسي أصير مره خجوله لا صرت مع تركي لي فتره يعني لما مره مشتاقه لفيصل وله كذا يومين او ثلاثه ماكلمني أقول مقدمه طويله وعريضه وأذب بشويش اني أبي أكلمهم وتركي يفهمها .. وهـ الحين يسوي لي كذا صراحه طاح وجهي ..
قلت : أما ! لا خلني أشتاق لهم شوي ..
ناظرني فتره أحس وجهي احترق .. وطيته وأنا أقول : وش قصصدك ؟!
هز كتوفه : ماقصدت شي عادي .. إلا أنتي حساسه ..
إبتسمت له وأنا أسمع تمتمات من فم إنسان أحبه أحمله بيني ايديني ..
قلت بتعب : مجود ياروحي انت وش تبي انت قلي بس ؟!
سمعته بهدوء : تعبت وحنا نمشي ..
سمعت تركي : وقفي وقفي بس .. إيش قلت ؟! تعبت ؟! أنت قل قسما وانا بصدقك ..
مجود : قسما !
كتمت ضحكتي .. كمل تركي : هـ الحين امك شايلتك وانت ماشي كذا عادي طاير بالهوا وبعدين تعبت ..؟!
سمعت بكاه المميز المكتوم .. ضحك له تركي : ياخي أبكي زي الناس أفتح ثمك وخلني أسمع صافره مره قويه .. خلني أحس انك بزر سعودي !
سكت مجود .. نزّلته وحنيت له ظهري : شف بعييد مره على مانوصل للسلم أتحمل شوي ..
أول ماشفته برطم على طول شلته مايهون علي ..
شفت عيلة يطلعون وبيدهم أغراضهم الظاهر راجعين للسعوديه خخ احسب كل الناس سعوديين حالي حالهم ..
لا بس أشكالهم بالثوب .. طبعن مشوا قدامنا كانوا رجال وحرمة عادي .. شوي ووقفوا وكأنهم ينتظرون حد يمكن لقافه جد اناظر وأراقب بس عادي ..
شوي وشفت رجال يطلع ويمشي معهم .. يمكن الشي اللي خلاه يلتفت صوت كعبي ..
شهقت وشددت يدي اللي مشبوكه مع تركي ..
همست لما عرفت منهو : خالي ؟!
كنت أحسس اني بصيح .. سويت نفسي أبد ما شفته ومشيت بسرعه وأبي اتخطاهم ..
لين وقفني صوته : سـآره ؟!
لفيت .. والثلاثه يناظرون فيني .. أم نايف ونايف .. وخآلي !
بلعت ريقي لما حسيت بتركي يمشي تجاههم وخالي يمشي كنت أحس نفسي بصييح مرهـ !
أول صوت كان صوتي : شلونك خالي ؟!
كان قبالي .. موطي عيونه .. ومسوي كأنه مشغول بالي بيدينه ..
وهو غصصب عنه مايرفع عينه لأنه موب من محارمي وحتى لو كنا وين ماكنا .. نبقى سعوديين !
ناظرني بدون نفس : بخير ..
إبتسمت وأنا أكتم دموعي .. لفيت لمرت خالي بصوت هادي : شلونك مرت خالي ؟!
هزت راسها بـ أيه .. وياليتها طولتني بالحكي عشان ما أسلم على نآيف !
بلعت ريقي : وشلونك نآيف ؟!
كيف طلعت مني ؟! كيف أصلن قلت أسمه ؟! كييف ؟!
كيف فتحت الياء بدل ما أخليها ساكنه ؟!
كيف أسأله عن حالهـ .. وهو ما سأل عن حالي ؟!
كيف سألته .. كيف سمحت لنفسي أكلم رجال .. وأنا بجنب تركي شابكه يديني فيه ..!
رفع عينه ورفع معها حاجب : ماشي حالي .. وآنتي وش أخبارك ؟!
آلوحييد اللي سألني .. ليه ماصرت زي امك وأبوك وسكتت ؟!
هزيت راسي بـ إبتسامه ولا كانه صاير شي .. قلت : الحمدلله .. مره تمام !
خالي : وش عندك هنا ؟!
إبتسمت وأنا أكتم دمعتي .. بديت أرمش بسرعه .. طايب ليه تسأل ؟!
تسألني وكأنك ماتعرف ؟! بس تبيني اتكلم ؟!
أبتسمت وانا أهز كتوفي .. أنقذني تركي : عادي يعني !
رفع نايف عيونه لـ تركي وهو رافع حاجب وعيون خالي تراقبه ..
نايف بنص إبتسامه : كيف يعني عادي ؟
رفع تركي حاجبه زي نايف بالضبط : عادي يعني .. هو انت تبي تقرير متفصّل مرهـ وش صار ؟!
طاح وجهي .. هو تركي وش يهلوس ؟!
نايف بنص ابتسامه يعني سخريه : لا وش أسويبه .. خله لك ..
سمعت مرت خالي : ماجد ذاه ؟!
إبتسمت لها وعيون خالي / تركي / نايف .. كانت على مجود .. لفيت وجهه لها وهو يناظرني ..
قلت بابتسامه : ماما هذي مرت خالي .. قلها وشلونك ..
ناظرني فتره هزيت له راسي يعني إيه احثه يسلم .. همس بهدوء : وشلونك ؟!
إبتسمت : الحمدلله .. وانت وش أخبارك ؟ مبسوط ؟!
كنت مفجوعه أول مره بالحياه مرت خالي تكون كذا .. اما غريب ..!
هز مجود راسه بـ أيه .. هه يختصر !
لفيته لخالي وانا أقوله : وذاهـ .. خالي جاسم ..,
ناظره فتره وضغط على يدي .. نفس الإحساس يامجود .. إستمد قوتك من أبوك .. لأني منهارهـ !
مد مجود له يده : شلونك ؟!
مريّح نفسه على الآخر .. ماينطق أسماء خخ ..
ضغط خالي على يده وهز راسه بـ ايه .. ثم قال : وأنت ؟!
إبتسم له مجود .. لفيته لنايف اللي كان يناظره وهو مبتسم وكنهم أول مره يشوفون بزر ..
ناظرت مجود : وهذا نايف ولد خالي ..
وهذآ نايف .. اللي قد حكيت لك عنه بالقوه ..
وقد حكت لك عنه ضلوعي .. لما كنت بجوآتي ..!!
همس لي : ولد ذاه يعني ؟!
هزيت راسي بـ أيهـ .. عقد حاجبينه : وش أسمه ؟!
نص إبتسامه هو مجود حبيبي أنت متعمد تقول كذا .. ولا عفويه زي أي شي غيرهـ ؟!
كتمت عبرتي : نون .. ألف .. ياء .. وفيهـ ..
كان مره متدلع الاخ وماخذ راحته : مره طويل إسمه ..
رفع له نايف حاجب : بالله ! هاه قلها نايف عادي .. نايف .. نآ ..
مجود هز راسه بعناد لا .. خلصني يامجود وقلها ..
نايف : إلا تبي تقولها .. نايف ..
قلت بنفاذ صبر : قلها عادي .. شفني .. نايف ..,
مجود : نايف !
ناظرني : على فكره ترا طريقة النطق غلط مره .. خله يحفظه بطريقه حلوة ..
سكتت أناظره وانا ماسكه دمعتي ..
رفع لي حاجبه ونص إبتسامه على فمه .. وكانه يحكيلي قصه قد تناسيتها !
قال : يعني قوليها صح عشان يقولها صح ..
حاولت .. بس ماقدرت .. شدّيت على شفاهي .. بس ما طلعت البسمه ..
و..حاولت أنطق أسمه .. حاولت وأنا أناظره .. ولأن عيونه تعكس عيوني .. ذابت الحروف بوسط شفاي ..!
هزيت راسي وأنا أصرّف : ما أعطلكم ..
ناظرت تركي .. وهمس له باستفهام : نمشي ؟!
هز راسي لي وهو مبتسم .. تمتم لي : فكي يديني خلاص مره يألم ترا ..
ولا كانه قال ولا كأنه شكى لي ..؛
وليت ظهري وأنا محترمه تركي ومابكيت .. أصلن ليه أبكي عادي !
سمعت خالي : سارهـ !
لفيت وأنا مبتسمه : نعم خالي آمرني .. تبي شي ؟!
هز راسه بـ أيه : أبي مجود !
أبي مجود ...؟!
ما أبتعدت كثير .. لفيت له وأنا أكرر : أبي مجود ؟!
سكت يناظرني بنظراته اللي ترعبني .. قلت : كيف يعني ؟!
مرت خالي : أيه بالله أبيه .. حس البيت فاضي بدون مروى .. ليت لو ربي يرزقها ..؟!
رمشت بعيوني .. وأنا أسمع تركي : أجل عجلي بـ نايف !
رفعت عيوني لهـ .. أحكي له القصه اللي مايفهمها غيرهـ ..,
خالي : إيه خله يرجع معي للخبر ..!
كنت بصرخ فيه وأقوله لا .. كيف أصلن ياخذه ؟!
هو بزر .. مايفهم شي .. أدري انه هادئ ومايتحرك .. أدري انه بالموت لا طلعت منه كلمه .. بس كيف ؟!
بصراحه .. أخاف خالي يحرقهـ !
مسحت فمي بالمنديل اللي معي باضطراب .. وقلت وأنا أناظر تركي : مدري !
كنت أناظره برجا وكأني أقوله قل لا عشان محد يقدر ياخذ ولدي مني ..؛
إبتسم تركي : يضايقكم ..
ناظرته فتره ثم ناظرت خالي اللي هز نفي : ماعليك !
مرت خالي ناظرتني ومدت يدها له : تجي معي للخُبر ؟!
تشبث فيني .. خالي رفع حاجبه : والله لو أننا موب بشر ..؟
قلت بسرعه : الظاهر مابعد تعود .. إيه لامنه تعود جبته ..
أيه طلل !!
خالي هز راسه بـ أصرار : عادي يتعود ..
ناظرت تركي أستنجده .. ناظرني بمعنى أرتاحي ..
وين أرتاح وأنا أشوف خالي ياخذه من بين أيديني وأنا أعرف وش بيصير ؟!
قلت : لحظه أجل ..
رحت بسرعه أركض مايهمني أي شي متجهه بسرعه بشيل أغراض مجود ما أبيه يحتاج شي ..!
ما أبتعد شوي حتى تعثرت بالكعب .. جالي تركي : وش فييك ؟!
حرّك رجلي .. ونيت : يألم تركي مره ..
تركي : وش بتجيبين ؟! لمجود ؟!
هزيت راسي بـ أيه وأنا أقوم بصعوبه .. أما هو تلاشى عن عيوني ..
مشيت أناظر مجود اللي كان مبرطم وويبكي وهو قافل فمه بدون دموع ..
رفع له خالي حاجب : تتدلع ؟!
حسيت نفسي بصيح خلاص .. وأنا أشوف مجود كأنه يقولي تحطيني عندهـ وأنتي ماصدقتي أرتحتي ؟!
جاء تركي بشنطته الصغيره وأعطاها مرت خالي اللي لفت .. ومشوا وقلبي على مجود ..!
رحت بسرعه ووقفت ورى خالي وأنا أقوله : خالي !
غصب عن الكل يلف لالف خالي لي .. إبتسمت له وانا أحبس دمعتي ..
قلت : مجود .. هو بشرته بيضا ..
وسكتت موب عارفه انطقها بتواجد عيون نايف وعيون خالي ..
إبتسمت : أرجوك وغلا أغلا غالي .. والله مايصير فيه شي ..
رفع حاجب وكأنه موب فاهم : وش تقصدين ؟!
إبتسمت له ومررت طرف أصبعي على عيوني أمسح الدمعه قبل ماتطيح وانكسر ..
قلت : أبد بس قلت .. يمكن بالغلط .. أو .. يعني بالغلط يحترق !
ظل فتره يناظرني .. كنت خايفه مره ومشدده على يد تركي .. وكأني أطلب منه يخليني أقوى من كذا !
نايف وطي عيونك .. أو لا تناظرني ولا كأنك قلت شي ..!
رفع لي خالي حاجب بعدها ولفوا .. يمشون بطريق أنا أعرفه .. ومشوا !
كتمت شهقتي : مايحبني !
إبتسم لي تركي : وش فيك صرتي زي مجود .. طايب وخالك مايحبك .. خيير ؟!
ناظرته : أخاف على مجود .. أنت ماتخاف عليه ؟!
شدد على يدي : وش بيسوي له يعني ؟! عادي ..
ناظرته باعتراض : لا موب عادي .. أخاف يحترق وبعدين ولدي يخاف ويتعقد وينهبل ..
رفع لي حاجب : ويعني انتي اللي متعقده ومهبولا ؟!
سكتت ولا رديت .. هو مايحس وشلون لما يكون شي نار ويلسعهـ ..
ولا قد جرب إحسساس الذل والقهر .. و ماجرب يكتم الدمعه ويحبسها .. هو أصلن حس انه بـ يوم بيبكي ؟!
مسح لي دمعتي : لعاد تبكين خلاص .. لا تخافيني لو يصير فيه شي مممم .. ساره هو ولدي يعني لو صار فيه شي أنا مابرضى بس ما يحق لخالك أصلن ..
هزيت راسي بـ أيه .. وكأني أتطمن من كلام تركي ..,
مسكني وهو مبتسم : والله وناسهـ .. ليت لو كل مره خالك ياخذه ويفكني .. أوف أسبوع كامل !
أدري أنهـ يخفف عني كذا ..!
وأدري قد إييش تركي يحب مجود ..
بس مدري قد أيش خالي يحبه .. وهو أصلن يحبه ؟!
* |