((2))
حسيت بشي بشعري يتحرك انا نفسي موب طايقتها ووش ذا ..
بكل بساطه مديت يدي وضربت راسي .. سمعت حد يتأوه يالله متكسره مره رفعت عيني بس شفته تركي حتى الإبتسامه ماقدرت أطلعها وكاني بـ موت ..
يمكن أتمنى إني أموت قبل لجل أشوف امي وأبوي ..
بس ألحين أبي أعيش .. لـ تركي !
رجع وحط يده بشعري : الحمدلله على السلامه ..
أول شي سويته حركت يدي على بطني اتأكد إني ولدت .. وين راحت النفخه ..؟
ناظرته باستفهام .. قال : أقولك ولدتي وش تبين بعد .. " رفع حاجب " إلا إذا يمديني أنسدح فيه ..؟
غمضت عيوني أحس اني معرقهـ مرره وشعري لاصق في وجهي والحاله حاله ,؛
و.. الاخ مو فاهم إني حاسه نفسي قرف .!
تمتمت : إترك شعري مره .. قرف !
إبتسم : ممم هو أنا إحترمتك شوي وجاملت بس دامك قلتيها أحسن ..
رفعت عيني بـ تعب حتى إبتسامه ماإبتسمت ..
قال وهو مبتسم لي : ماتبين تشوفين وش جبتي ؟!
وديـ بس تعبانه .. يعني حتى عيوني أحركها بتعب .. هو كل الناس تحس كذا مثلي ..؟
هزيت راسي بـ لا .. مط الياء : لييييهـ ..؟
سكت فتره ثم كمل : قلت انتظرك وآخرها كذا ؟! " ناظر ساعته " يالظالمه حد ينوم فوق نومه أربع ساعات ؟!
غمضت عيوني بس سكت هو .. لأنه يحس !
سكتت فتره ثم قلت : أمك .. عرفت ؟!
سمعته يتمتم بـ سكون : لا ! قلت يمكن انك قايله لحد تقولين له قبل قلت ما يضرني شي ..
هزيت بـ إيه : أيه قل لمك لا تزعل !
سكتت فتره ثم كملت : وثمن فيصل .. " خنقتني العبره " تركي بموت !
ضغط على يدي يعني لا تقولين كذا .. تنهدت : تركي والله ماتحس هالمره ما أحس ان بي جسم إلا عشان أتألم فيه .. واللهـ بموت !
حط أصبعه على فمي : أشش .. " مسح على شعري " نامي وبس .. ولعاد تقولين كذا !
ظليت كذا فتره أول مره احس اني حياة إنسان ..
فيصل ماقصر ..!
إلا أني كنت عرافه يجي يوم ويتزوج وهذا شي حقه وحياته وهو بكيفه ..
وخالتي مشاعل .. عارفه انها متزوجه بس كانت أمي ..
وديـ أقولك ياتركي أنك شي غير .. شي مدري وشهو لكن أحس فيه ..!
فتحت عيوني : وش جبت ؟!
إبتسم : صباح الخير .. جبتي نهال !
سكتت ..! طول عمري توقعت أن بنتي يكون إسمها نهال بنت نايف جابر ..
زي أمي .. نهال بنت نايف جابر ..
هـ المره يعني صارت نهال بنت تركي بن ماجد عمران ؟!
زفرت بـ العبره وكأني أطلعها ساره نايف موب لك خلاص تركي هو رجلك لعاد تتذكرينه بـ شي ..
من جدك ساره تفكرين فيه وهو تركك ؟!
وراح لـ سلمى ؟! ساره هو مملك وانتي متزوجه .. وعندك بنت وزوج ..!
سمعته يقول : تعبانه ؟!
ضغطت على يده وهزيت راسي بـ أيهـ ..
أيه ياتركي أنا تعبانه وللأسف ما أقدر أقولك وش فيني ..
لأن اللي فيني من غيرك ..!
تركي من جد أنا متزوجتك ولا انا أحلم ..؟
ونهايه الحلم بـ صحى وأنا مادخلت المقلط .. ولا عرفت اهلي بالدمام ..؟
وعندي خالي ومرته وبنته يحبونني .. والأهم من كل ذاه نايفي أنا .. يبيني مايبي سلمى ..؟!
ليتهـ يكون حلم .. ليته بس !
لأني احس أني أبيك ياتركي وأبي نايف ..
لأن نايف حقيقة لي .. وأنت غصب عنك لي لأني أحبك ..
واللهـ إني مو انانيه وأبي كل شي لي .. بس في شي يقولي انتي لـ تركي .. وش يقولي انتي لـ نايف ..!
سمعته بـ هدوء : سآره وش فيك ؟!
إبتسمت : جب لي نهال بس ..
رفع حاجب لي : تراك ماجبتي نهال ..
ناظرته : إييش إييش ؟!
قال وهو ماشي للباب : جبتي ماجد ..
قلت بتعب : كيف ؟!
سمعته يتمتم : لا أمزح معك جبتي نهال موب ماجد ..
بـ تعب : تركي انا وش جبت ؟!
لف لي : إصبري شوي بجنن فيك .. عشان تعرفين منهو اللي بعد شهرين وشوي تقولين له .. انا طيب عشان كذا بخليك بعد ساعتين وشوي .. شفتي قد إيش أنا طيب ؟!
وراح .. هو أنا وش جبت ؟!
أنا احس انها نهال لأن أول كلمة قالها اني جبت نهال ..,
ظليت فتره لين شفته جاي ومعه نيرس المشكله فاتشه مالت عليك تركي لو كانت فلبينيه على الاقل أرحم لي رغم إني ما أحب أشوف فليبينيه وجع ..
أحس أني بصير مثل نجوى : ترركي إبتعد لاتصير جنبها ..
شفت وجهه يقلب ألوان .. وكانه إنحرج من البنت اللي ولا هامها ..
هــــه !!
موب بس عندنا بالخبر حتى هنا فيهـ !
حط إصبعه على فمه يعني أشش ..
هذا اللي احس فيه غيره على تركي ؟ يعني انا أحب تركي ؟!
رغم انه قدام عيوني بس ما أبيه جنبها كيفي رجلي وانا كيفي ..
لين وصل والحمدلله .. قال : شوفي قد إيش انا طيب خليتهم دقيقتين بس ..
مدري أي قوة اللي جاتني وقمت وأبي شوف وش جبت ..
أبي أشوف شي ملكي انا لأني حملته معي !
وقف بوجهي : لحظه إنتظري عشان تصير دقيقتين وشوي ..
كان ودي أفلق راس ذا البنت وجع .. يختي رجال وحرمته وش عندك انتي ..؟!
لين حطها بالوسط بيني وبينه وهو بجنبي وهنا أيقنت انها بنت كانت زي القمر .. بنتي أنا !!
كانت ترمش الظاهر توها بتصحى .. لفيت له : تشوف ؟!
هز راسه بـ أيه .. شوي ورجعت ناظرته : زي عيونك .. ليه مو مثلي .. عشان عيونك أخضر .. حتى عيوني حلوة ..
رفع حاجب لي .. لين شفتها .. كانت نسخه أصليه من تركي بـ كل شي ..!
ناظرته بشهقه : تركي تشبهلك .. كيف ماتشبهلي وهي بنت ؟!
ضغط على يدي وتمتم : وش قصدك وجهي وجه بنت ؟ فضحتينا تراك جبتي ولد ..!
ولد ..؟!
يعني انا جبت ولد .. وإسمه ماجد بن تركي ؟!
ناظرته بنفاذ صبر : بالله تركي أنا وش جبت .. " بدلع أحس أنه موب لايق خخ " تعبت أفكر ..!
قال وهو يناظره مدري يناظرها : بالله سآره يشبهلي يعني ماجد ولو تشبهلك كانت نهال ..
بـ ظهر إصبعيني حركتهم على خده وتحسست شعره .. هذا اللي كان في بطني ؟!
رفعت عيني للنيرس كانت واقفه على راسي ..
سمعتها تهذر وتركي يناظرها يالله ودي أفلع راسها بأقرب زهريه عشان تحترم وجودي ..,
شوي وشفتها طلعت .. زفرت : أوف واخيرا حست على دمها وطلعت ..
إبتسم وهو يناظر جواله : لحظهـ ! أدق لمي أقولها عشان تحبني اكثر منك .. أنا اللي قلت لها عن حملك وانا أقولها عن ولادتك ..
ناظرته .. وقسسم بالله بزر ..
بالله وشهوله تحبني اكثر وهو ولدها ..؟!
نص إبتسامه : حط عام ..
هز بـ إيه !
وانا أسمع الرّنات وقلبي يطرق ليه كذا مدري .. اترقب وش بتقول عمتي ..
سمعتها : هلا وغلا من قدي تركي بنفسه داق لي ..؟
نعــم ؟
وأنا أقول وراه أيام زمان كله جنب أمه آخرها هي اللي تخليه غصب خخخ ..؟!
همهمه من فمه ثم قال : ممم شلونك يمه ..؟
صوتها بـ حنان : بخير يا امي بخير .. وش فيه صوتك كذا ضعيف ؟ تعبان ؟!
بغيت انقز لها وأقول وأنا وش وظيفتي لا ماعرفت متى يتعب ..؟!
ناظرني : لا .. بس سآره بجنبي وتبيك فتحته عام !
قلت : شلونك يمه ؟!
عمتي : أهلين .. هلا والله .. الحمدلله انتي يمه وش أخبارك عساك موب تعبانه بس ؟!
حطيت يدي على فمه : يمه أنا ولدت ..
فتح عينه لي وضرب كتفي بخفه : يمه انا بقولك ..
عمتي : إيه يمه تراني ماسمعت وش قالت بنت خالك مدري وش به الخط .. قل وش قالت ؟!
رقّص حاجبينه لي : سارتي ولدت ..
كتمت ضحكتي عمتي تعامله كنه بزر لين سمعتها تضحك ..
ومخربطه ومدري إيش والحاله حاله خخ ..
شوي وقالت : جبها .. بقولها كلمتين ..
أعطاني هو وشلت السبيكر .. قلت : أيوة ..
عمتي : يمه ساره اول الحمدلله على سلامتك مهما كان وش جبتي .. وشي ثاني يمه لا تزعلين عشان قبل شوي والله إني سمعتها منك ..
فطست ضحك : أدري .. ههه من جدك عمتي حاسبتني بزر مثل تركي ؟!
ماكان منتبه لي وبين ايدينه ماجد .. عمتي : أشش لا يسمعك بس .. وبعدين تراك بزر اكثر منه ..
شهقت : وأنا دوبني وآلده وبزر ؟!
عمتي : أجل تومان جيري ؟!
سكتت فتره أتذكر وفطست ضحك : يمه !
سمعت صوتها موب واضح : إيه أظني فيذا .. قم ننزل ..
قلت : عمتي ؟!
فتره ساكته لين سمعتها : يمه أنتي أي غرفه ؟!
فتحت عيني مسرع ماوصلوا ؟!
قلت : غرفه ممم " بديت أتلفت على الجدارن .. لين لقيت على السرير " ميه وسبعه ..,
قفلت مني شوي وشفتها داخله والحاله حاله بين ايدينها شفت تركي على طول غطى وجه ماجد ..؟!
جلست عمتي بعد ماحطت الورد ..
الله ! اول مره حد يهديني كذا يعني ورد كبير ..
بس والله ورده واحده من تركي تساوي كل ذاه ..,؛
أحلا سوير صرتي رومانسيه خخ ..!!
وبدت تحط الأغراض ومدري إيش .. لين جات لي ولمت علي وباستني ..
وسلمت على تركي .. جلست ثواني وجاء عمي معها ..
قالت : الحمدلله على سلامتك .. وطلعتي منها ..
إبتسمت بس .. صح طلعت منها .. بس أمي ماطلعت منها !
قالت : هاه وش جبتي ؟!
تركي : وانا يمه مالي الحمدلله على السلامه عشان سارتي ؟!
ابتسمت له : الحمدلله على سلامة سارتك .. وش جبتي مره منتظره ..
كنت بتكلم بس ناظرني تركي وقال : نهال يمه .. نهال !
عمي : الحمدلله على السلامه بنت اخوي .. وانت مالك الحمدلله على السلامه ..
قلت بسرعه : خلاص خذ الحمدلله على السلامه اللي قالها لي ..
ناظره فتره ثم قال : أنت ما أحبك لا تشوف بنتي ..
كتمت ضحكتي والله وربي ذا بزر .. ناظرني عمي : لا تكتمينها عادي ..
كشفت عن ماجد وحطيته عند عمتي أما تركي ناظرني كنه يقولي لا تقولين لها .. ووقف وبيده جواله يمكن بيدق على فيصل أخوي .. زي ماقلت له ..,
ظلت تناظر مجود وتمسح على راسه .. مسرع مانام ..
هـه ! هو أصلن صحى كلها رمشتين عشانه عرف إن اللي بتشوفه أمه وأبوهـ ..,؛
باست راسه وظلت فتره عيونها متعلقه فيه حسيتها عرفت مدري ليه ..
بس ناظرتني : صحت ؟!
هزيت إيه : قبل شوي ورجعت .. بسرعه مامداني ..
عمتي : تشوف ياعمر وش بها حفيدتي ؟!
عرفت شي واحد .. اننا كلنا بزران وقت الفرحه ..!
يمكن تركي فعلن بزر ومتدلع ومايع رغم اني ماأرضى حد يقوله لكن هذي حقيقه ..
ألحين أوكي أعتدل بس بعض الحركات العفويه ما تروح ..,
عمتي وعمي أشكالهم من الفرحه ..
وكأنهم ماقد شافوا برز رغم ان قبل ماجد .. نجود ومحمد ..!
تصرفات عمتي كانت فعلن تدل على انها بزر .. كلنا بزران وقت الفرحه ..,
ظلينا فتره لين جاء فيصل ونجيو ومحمد ولين الكل تجمع بـ الغرفه ملتفين حول ولدي انا ..!
نهى : يالله تركي هاذي بنتك ؟!
قال : وش رايك يعني ؟!
نجوى : أبيها سوير لـ ولدي محمد .. بن خالها وبن عمتها .. أولى !
فيصل : أيه اكيد .. بنت اختي !
نوره : شوفي يمه بتفتح عيونها شوي كيف ترمش ..
ثامر : دام من اولها كذا كل حركه سويتوا لها حفله " ناظرني " أبشري يابنت عمي بنتك دلوعه ..
نجوى : شوفي نوير وش تسوي تبي تفك من اللفه ..
سمعت تركي بسرعه : لا .. أقصد ممم دوبها النيرس تقول لا تشيلون اللفه تبرد ..
عمتي : إيه دامه كذا خلها ..
نهى مطت شفايفها : يمه حتى نجود تسوي كذا ..
تركي : ودي أفلق راسك مدري ليه .. ألحين بنتي انا نفس نجود بنتك .. معليه نهى شوي " رقّص حاجبه " نهال تركي ماجد .. خطين تحت ماجد ..
نهى ناظرتني وابتسمت : بسكت عنك إحترام لـ بنت خالي وبنتها ..
نوره تهز نهى وعيونها على مجود : شوفي عيونها ..
سامر : الله مره حلوة الله يخليها ..
رفع عمي عيونه لي : ماتشبهلك ..؟!
فيصل ظل فتره يناظر لا شكله يفهم .. رفع عينه لتركي : بالله ! أحس انها تشبهلك نسخه أصليه مُصغره ..
عض تركي على شفته السلى وهو ساكت .. كمل فيصل : أقولك متاكد أنها بنت اختي معك ولا جبتها بلحالك ؟!
تمتم لي بصوت محد يسمعه : خل اخوك يطس احسن وقسما ...
قاطعته بهمس : محد قالك تقول بنت !
ثامر : هـ الحين ذا البنت بنت تركي وساره ؟!
ناظره سامر : إيه بالله مشكله ..!
عمي وباقي عيونه على مجود : أيه أثبتوا أنكم عيالي .. نفس الإحساس .. هـ الحين ساره البزر وتركي البزر يجيبون نهال البزر ؟!
نجوى : صح مشكله !
كتمت نهى ضحكتها : ما اتخيل شكلك تركي وهي بيدينك ..
نجوى هزتها : لا انتي بس تخيلي شكلها بيدين ساره خخ توحفه !
فيصل : عشان تثبت انها بنت تركي نسخه أصليه .. الشكل لا كبرت خخخ !
ناظرت تركي .. وقلت : طسسوا بس وجيبوا ولدي ..
سمعت ضحكة فيصل : كسرتي خاطري أختي حبيبتي .. ترقع وجهها عشان لايقولون البنت تشبه لبوها !
شفت نجوى ضحكت ونهى مابان لانها متلثمه بس صوت كتم الضحكه باين !
سحبت شهادة الميلاد ورميتها على فيصل : مالت عليك ياوجع شف هاه .. ماجد بن تركي ..!
أول مره عمتي ترفع عينها رغم أنها كانت رافضه تسمع أو تشوف غير ماجد أو نهال زي ماكنت تتوقع ..
قالت : إييش ؟!
قلت بثقه : أيه عمتي شوفي هاه والله ماجد موب نهال ..
لما توجهت كل الانظار لتركي ولي .. قال : كيفي أنا !
صح .. للمره الثانيه كيفه هو .. أكثر بكثير من كيفي أنا .. لأنه الرجال !
سمعت عمتي : ماجد .. بن .. تركي .. بن .. ماجد .. عمران !
وإبتسمت بان لي من صوتها العبره ..
هو كل الناس تحس مثل اللي أحسه ؟! بـ عمتي ...؟
أول مرهـ بـ محمد ولد أخوي .. وهـ المرهـ بـ ولدي !
وكانها تحسب عدد الغالين اللي ماتوا !
تقول هذا بدال اخوي وهذا بدال رجلي .. وسبحان الله نفس الأسامي ..
كنت بنقز لها واقول تكفين ياعمه !
قولي لي .. هو محمد ولد أخوي يشبه لبوي نفس مايشبه لفيصل ؟!
عمتي .. هو ماجد ولدي يشبه لـ رجلك زي مايشبه لـ تركي ؟!
هو أبوي لو كان فيه بيقول لـ بن فيصل يشبهلي ولا بيقول يشبه لبوه ؟!
ولا أبو تركي بيقول لـ ولده حفيدي يشبهلي ولا بيقول يشبهلك ..؟
هم ماتوا صح ادري بس .. الله عوضنا فيهم ..
ولا أدري هم يشبهون لهم ولا لا ..؟!
بوسه واحده من عمتي على جبين مجود ولدي وهي تتمتم يمكن مايفهم حركة شفاها غير تركي لانه ولدها ..,
ثم انا لأني احس باللي تحس فيه .. بنات زي بعض !
حركة شفاها .. " ياماجد شف ذا بن تركي ولدك .! " ..
*
*
لما مضت أول يومين أيقنت أن محد من اهل الخبر بيزورني ..
دقيت على خالي .. يمكن ماعرف ..؟
ألين رد .. قال : نعم ؟!
أبتسمت الحمدلله محد معي بالغرفه عمتي راحت تنام ..
قلت : مم شخبارك خالي ؟!
رد : الحمدلله .. " وكرر " نعـم ؟!
قلت : هو .. خالي انت ماعرفت إني ولدت ؟!
سكت فتره ثم قال : ولدتي ؟!
صوته كان مره مقهور وده يفلقني .. بغيت أصيح عليه هو الوحيد اللي أحس أبي أتقرب له مهما يصير ..
قلت : أيه خالي .. انا ولدت ..قبل يومين ..
سمعته : إيه عندي خبر ..
طآيب .. وزيارة المريض موب واجبه ؟!
وصلة الرحم موب واجبه ؟! ومشاركة المسلمين الفرحه موب واجبه ؟!
وجبر الخواطر موب واجبه ؟! لو بـ كلمة مبروك ؟!
والله راضيه لا تقوللي الحمدلله على السلامه .. بس قل مبروك ماتكلفك شي والله !
بلعت العبره بس ماقدرت اكتم الشهقه ..
لين قال : وش جبتي ؟!
بحد ذاته سؤاله نساني وش كنت مرتبه أقول ..
خالي .. هو الوحيد اللي ما أقدر امزح معه بـ كذبه تدوم لـ خمس ثواني ..,
قلت بلهفه : جبت ماجد .. جبت ولد ياخالي ..
بحدة رد علي : ليه ولد ؟!
هزيت كتوفي كانه قبالي : مدري .. هو كذا ..!
سكتت فتره ثم قلت : بس .. توصي شي ؟!
سمعته : لا .. بس خذي ام نايف قوليلها وش جبتي بس ..
هو من جده خالي ؟!
على طول قلت : شخبارك مرت خالي ..؟
سمعتها : الحمدلله وانتي ؟!
إبتسمت : الحمدلله .. مرت خالي انا جبت ماجد ..
سمعتها مستنكره : ماجد ؟!
قلت : إيه ماجد بن تركي .. مره حلو !
مرت خالي : أهاا !! زين الحمدلله على سلامتك ..
إبتسمت : الله يسلمك ويخليك ..
سكتت فتره ثم قلت : بقفل تبين شي ..؟
كانت فتره ساكته ثم قالت : لا .. بس مشاعل بجنبي خذيها تبيك ..
مشـــاعل ..؟!
لي فتره أصلن ما كلمتها ولا درت عني أصلن ..
خالتي مشاعل : يوه سوير والله لك وحشه .. وجع مالت عليك لا ودوبك تقولين ولدتي ؟!
ضحكت : والله آسفه بس مره كلها يومين ..
سكتت فتره : ساره تدرين انا وين ؟!
دق قلبي .. الله يستر ! ..
قلت بـ بطئ خايفه من الاجابه : لا .. هو .. أنتي .. وين ؟!
خالتي : ساره انا بالمطار .!
سكتت فتره استوعب وش قالت .. ثم قلت باستفهام : لييه ؟!
خالتي مشاعل : حبيبتي هو انتي مادريتي ؟! أنعزلتي عننا أول مارحتي للدمام وهـ الحين يومك تزوجتي ماتدرين عن اخبارنا ولا ندري عن اخبارك ؟!
وش فيها خالتي ؟!
ليه الكل يعاتبني انا ؟! وهم ؟!
طايب انا غلطانه وما سألت لهالدرجه مرتاحين مني مايسألون ؟!
طايب انا هـ الحين داقه لهم وبنفسي أقولهم رغم انه شي موب واجب علي ..!
قلت : هو أنتي وين رايحه ..؟!
خالتي مشاعل : موب معقول ياساره ماقالك فيصل .. بنقز لـ الغربيه مع عبد الله انتقل هناك ..
سكتت .. لأني أصلا ما أعرف وش يقولون .. ولا أعرف أقول شي !
إنربط لساني على كلمة واحده .. وقلتها : وين فيه بالغربيه ؟!
خالتي مشاعل : جدهـ يا ساره .. جدهـ !
سكتت فتره ثم قلت : الله يوفقكم .. ممم توصين شي ؟!
خالتي : سلامتك حبيبتي .. وانتي توصين على شي من جده ..؟!
إبتسمت .. ليه هي الوحيده اللي تسألني ؟!
وترد لي السؤال .. تبين شي ..؟! توصين على شي ..؟!
قلت : سلامتك ..
قفلت منها وناظرت الساعه كانت ثمان وربع ..
إبتسمت بس ياطول الوقت اللي يكون فيه تركي موب معي ..!
*
*
*