10-18-2016, 05:52 PM
|
| |
((2))
ناظرت ملابسي وشكلي بشكل عام بدلة فضي تنورة اطرافها موب متساويه وبلوزة كت مره نايس ..!
شعري مفتوح عادي ومرتب بدون أي شي فيه كحله وقلوس عاديين تماما ..
ابتسمت لشكلي والله خسرتني يانايف موب لجل شكلي وبس ..
مااتوقع تلقى اللي من جد تحبك وتخاف عليك لذا الدرجه .. مابقول مابتصونك بنت خالتك .. لكن مستحيل تقدر تعيش معك مثلي ..,؛
للأسف يانايف .. تركي طلع متقدم عليك بكثير ..!!
شكرن لأنك أعطيتني فرصه حقيقيه لجل أثبت بقناعه أن تركي فعلا يستحق أكثر مما تستحقه أنت !!
لبست عبايتي وتحجبت حملت شنطتي ونزلت بهدوء وطقات كعبي خفيفه وكلاسيكيه ..
وكأنها ترحب فيني لأني .. سآره العلي !
وصلت لبرا الحمدلله ماشفت تركي وطلعت الى سيارة عمي ياسلام جلست قدام واخيرا ياناس شوفوني تراني قدام خخخ !
والله اني هبلا من جد بس والله قهر مااصعد الا في المناسبات ..
وعموما احترمت نفسي ورميت الغطا يمكن عشاني اعرف ان تركي مابيسمح لي لو تزوجته ان اكشف فـ أحتفظ بكرامتي احسن ..
انتبهت لنظرات عمي وهو مبتسم .. وكأن الشي ذاه مرضيه وبقوة !
سمعت جوالي وكانت ريم على طول رديت ..
وقلت : وجع وش ذا الشوق يابت والله مسافه واكون عندك ..
ريم : مالت عليك تراك ماخذه بنفسك مقلب .. لا بس قلت اوصف لك البيت ماظني قد رحتي !
هزيت بـ ايه وكأنها قبالي ..!!
والله ريم كامله عقل واخلاق وتربيه وحلا ماشاء الله ياحظه مالك فيها ..,
أعطيت الجوال عمي : هذي ريم توصف لك !
فتح عينه وكأنه يقولي من متى طايحه الميانه بيني وبين ريم .. رديت على ريم ,؛
وقلت : اقول جيبي رجلك بس ..
واعطيته عمي اللي ارتاح نفسيا خخ ..
صدق عمي ليه مايتزوج بعد وفاة زوجته .. هو صحيح ماقد حكى لي او حكى قدامي عنها .. أو حتى احد من بنات عمتي او عيال عمي مايتكلمون ابد ..!
بصراحه حنيت اني اكون المحقق كونان واعرف وش صاير ..؟
معقول ماتت مقتوله .. أو يمكن صار لها شي حادث ..
خخ سوير بطلي هبل حنا موب في أوروبا .. لا ومن زين الفكره بعد مقتوله متأثره بالافلام مررهـ ..!
كان عمي هادي مره ومايناسب طبيعتي اللي تموت في شي اسمه هذرة فـ سكتت بملل مابي افكر في تركي خلني كذا افضل .. لأن التفكير بتركي ماله نهايه !
وصلت عند نجلا وانتظرنا شوي او مانتظرت على ما بديت ارتب شكلي جات هبه وكملنا بالضبط ..
ريم : بنات بقولكم شي والله ماحبيت اختار قبل أقولكم .. خالتي ام مالك تبي تخطب واحده منكم لولدها ..
فلوة شهقت وقالت جيهان : مالت عليك وانتي اللي تخطبين لرجلك ؟!
غصت ريم بالماي : ووجع لاتخليني اولد عليك يلا عاد .. عنده توأم ياحظي !
سكتوا فتره شوي وقالت فلوة : مدري !
ريم : نجلا وسما وضيا خلاص .. باقي هبه وجيهان وفلوة هاهـ ..؟
هبه : مدري أنتي تقولين أخو رجلك .. يعني مع احترامي لك دمامي تكرمين ..
كان ودي افلعها .. وش جانا من اهل الخبر مغير البلا ..
والله اهل الدمام بلسم وربي ..!
ريم : عن الغلط عاد ..
هبه : لا من جد يعني انا كمان استبعديني مستحيل آخذ دمامي ..
ناظرت ريم جيهان اللي فهمت على طول ..,
وقالت : أحس صعبه شوي زي ماتقول هبه .. بس يمكن مدري اذا اخلاقه حلوة ..
ريم بسرعه قاطعتها : أكيد حلوة وشدعوه انا والله مابي لكم الا الخير وبعدين اكيد من عيله محترمه ولا لو ماكان انا اصلن مااخذت اخوه .. والله انه طيب وحلو و " رقّصت حاجبينها " رومانسي !
ضحكت فلوة : بالله ريم ابيه ..
جيهان نطت : ايه صح فلوة يمكن لأني ابي شي مميز ..
سما : مثـل ؟ قصيمي مثلا ؟!
جيهان : مالت بس .. أقول ورا ماتكرمينا بسكوتك .. قصدي يعني مافيه مثله حد يشبهله يعني ..
سكتت افكر يعني ثامر ولد عمي لو خطب ممكن بنت ترفضه لجل كذا خخ ..؟
والله تفكير بايخ مره !
ضيا : أقول ليه مايكون لـ سوير بما انها اكبرنا ؟
سكتت فتره .. قالت ريم : هو صراحه امي اول واحده شافتها كانت سوير بس سوير بعد ماتبي دمامي !
بلعت ريقي شوي وقلت : لا ! هو أنا أبي دمامي ..
فلوة : خلاص اجل لك ..
ريم رمت المخده على فلوة : وش هو فستان شارينه وتتقاططون فيه ؟!
قلت : لحظه فلوة لا تفهميني غلط .. هو بصراحه انا " غمضت عيوني " أنخطبت وشكلي بوافق !
شرقت ريم للمرة الثانيه وقالت وهي تأشر علي : والله هاذي البنت تبي تموتني ..
ابتسمت نجلا : وعلى ..؟
بلعت ريقي الشي اللي مريحني ان محد يعرف تركي ..
قلت : تركي بن عمتي سلمى ..
ابتسموا وبس .. عدا ريم اللي قالت : بن عمتك ؟! ماغيره اللي ...
قاطعتها : ايوة !
شهقت بقوة : أما منتي بصاحيه من جد .. ولا مابي دمامي بعد ومالقيتي غير تركي ..؟
قلت بضيق : تركي مو سيئ يمكن أنا اللي كنت اشوفه سيئ !
نجلا : بالله ساره وش فيه بن عمتك .. ريم وش صاير ؟!
ريم وهي تناظرني : والله ولا أكذب من يوم سكنت بالدمام وهي كل يوم .. تهاوشت معه .. حتى احيانا بنص الشارع عادي تجي لهم قدامي .. وغير كذا لما قلت لها عن اخو مالك تقولي لا دمامي !!
هبه : لا ساره تكفين مانبيك تتطلقين ..
جيهان : وش تتطلق انتي مع وجهك .. أكيد ماتوافق !
قلت : وليه مااوافق بالله .. بن عمتي تراه وغير كذا .. مدري وش اقول يمكن أنا من جد تخيلته خلاص لي ..
ريم : صليتي استخارهـ ..؟
تنفست بقوة : مدري .. أقصد ايه الظهر .. بس مدري المشكله اني مرتاحه ..
سما : أجل توكلي على الله !
سكتت فتره مابي افكر فيذا الموضوع ابد ..
قلت أقلب السيرهـ : ايه على من رسى الرجال ..؟
هبه أشرت على فلوة . وجيهان قالت : فلوهـ !
ضيا : يالله بنات مااصدق من جد حنا خلاص اعرسنا ؟!
هبه : تكلمي عن نفسك حبيبتي .. انا بخلل عند أمي بالقوة !
ضحكت ريم بهدوء وهي حاطه يدها على بطنها ..
ريم : واللهـ أحبه يتحرك ..
نقزت ضيا ووراها نجلا وجيهان وهبه يتحسسونه !
اما انا ابتسمت ..!
هو بيجي يوم وأتحسس أنا ولا بظل كذا طول عمري ..؟!
الله يحفظ لك ياريم رجلك وبيتك ولا يفرقكم عن بعضكم .. اللهم آمين ولا يحرمه منكم !
*
*
ناظرت الساعه لما دق عمي كانت 11 ونص ياي مر الوقت بسرعه ..
طلعت بعد فتره مازينت غطاي .. وصعدت السيارة بهدوء ..
وقلت : تأخرت ..؟!
ابتسم لي عمي : لا عادي !
سكتنا فتره حرك عمي السياره وبدينا متجهين من الخبر للدمام .!
أذكر اول مره اتجهنا كنت متوترة مره .. وكأني كنت ادري انها نهاية الحبل بيني وبين نايف ..
زفرت بقوة وزفرت معه كل هم يارب تسهل !
عمي : وش فيك ؟!
وش فيك ....؟
وش فيك ....؟
وش فيك ....؟
صح انا وش فيني أصلن .. كل ذاهـ لجل تركي ؟!
كل ذاهـ عشان بس أفكر هو تركي يناسبني ولا لا ؟!
كل ذاهـ .. عشان افكر نايف متى يملك لجل املك قبله ..
كأني اقوله .. أقدر أعيش بدونك ؟!
هو أنا من جد أقدر اعيش بدونه .. ولا هو كلام أبي أثبته لنفسي ؟!
عمي : متضايقه لجل تركي ؟!
ناظرته بـ سكون ورجعت اناظر الطريق بهم ..
وقلت : مدري ! أحس أن ودي أقول ايه .. بس احس انه مو صدق !
عمي : حنا حياتنا مخططه بالقلم والمسطره وبدقه عجيبه .. أنتي من نفسك بتوافقين ..!
ناظرته بعجب من كلامه اول مره اسمع فيه بحياتي ..,؛
كمل : أكبر من في عيلة بني عمران كان ناصر بديهيه سريعه أكبر بنت بتكون له .. تشوفين هم متزوجين ؟ نجوى بنت عمتك كانت لـ ثاني أكبر واحد يقرب لها أخوك فيصل .. ونوير بنت اختي يمكن كانت لـ ثامر لانه اكبر من اخوه بكم دقيقه بس قضاء وصارت لـ سامر !
سكتت .. هو من جد حياتنا بالمسطره والقلم ؟ طايب وحبي لنايف وحب فيصل لمروى ؟ ايش كان ؟!
خربشات بسيطه على الهامش زي مايقولون ؟!
قلت : صح !! حتى نايف أخذ سلمى .. ومروى أخذت مشعل .. بس أنا ..!
عمي : ساره انا مااقولك الكلام ذاه لجل اقولك غصب عنك توافقين انا والله لو ماشفت تركي يناسبك والله ياساره انا من نفسي اقوله لا انت اقل منها .. ساره تركي كان الوحيد اللي كان يعيش حياته وهو يدور من البنت اللي تخططت بالمسطرة له .. يمكن انتي كمان بالخبر تدورين !!
سكتت افكر في كلامه ..
فعلا صحيح بس الغلط اني شبهت عليه بـ نايف !
كمل : أول ماجيتي أجزمت أنك له .. بس اللي خلاني اتراجع مشاكلك اليوميه معه .. لين ماجاء هو بنفسه وقالها ماتصدقين قديش فرحت له .. لانه بياخذك انتي !
سكتت فتره .. أجزمت ؟!
هو يعني حياتي مخططه بالدمام وانا احسبها مع نايف بالخبر ..؟
ولا حياتي كانت بالخبر .. ولما جيت هنا تغيرت ؟!
عمي : عمتك سلمى كانت لـ بن خالها ماجد .. وعمر كان لبنت عمه .. و
قاطعته : منهي بنت عمه .. مااعرفها !
ناظرني ولف يكمل يسوق : أول مره حد يسألني ..
أفتشلت بقوة : اها .. موب لازم تقوله اجل ..
عمي : لا عادي وش فيها .. بنت عمه خالد " ناظرني وابتسم " وإسمها خالده !
فتحت عيني أستغفر الله ! اول مره اسمع بذا الاسم وش خالدهـ ..؟
ابتسم : عادي خذي حقك في انك تستغربي .. بس ماتت خلاص معادها فيه !
ناظرته فتره هو حزين لو يقولها مبسوط لو أيش ..
عجزت أفهم ملامحه وعجزت استوعب نبرته وأحللها ..,؛
قلت بفضول : وشلون ماتت ؟!
عمي بدون مايناظرني : عادي وهي تولد بـ سامر ..
فتحت عيني : ولا تزوجت بعدها ..؟!
هز راسه بـ لا .. ثم قال : أختها .. أنوار !
سكتت فتره ..!
هو من جد كل ذاه يصير لـ عمي وانا حتى توني ادري ؟!
وشلون أصلن أخذ أختها ؟! قوى قلبها ؟!
قلت : ووينها فيه .. انوار ؟!
قال بدون اهتمام : طبيعي في بيت اهلها متطلقه !
قلت : غريب ! ماقد زرتهم ولا حد حكى لي عنهم أبد !
أبتسم وأخيرا .. فـ حبيت أقلب الموضوع : ايه ومنهو بعد عمر ؟!
كنت أقولها بـ بساطه .. قال : محمد أبوك !
رمشت عيني بسرعه ..
وكأني متشوقه أعرف منهو ذا الانسان اللي اسمه ابوي ولا أعرفه ..؟
أذني نفسها تشوقت تعرف منهو .. وكيف .. وليه ؟!
قلت : ايه ؟!
قال وبدون يناظرني : عادي تزوج امك ؟!
قلت بسرعه : تقربله ؟!
هز راسه بـ لا ..!
وسكتت فتره دامت يمكن ممم أربع دقايق ..,؛
وانا متحمسه مره عشان اسمع وشهو اللي بيقوله ..
حتى لو كان شي بسيط .. المهم أتعرف على هذا الانسان وبس !
عمي : الأفضل أنك تنسين .. وتفكرين بس في تركي ..
رجع لي الهم مره جديدة ,؛
صح مفترض اني ماافكر بغير تركي .. حتى لو كان أبوي !
*
*
وصلت البيت ودخلت اما عمي راح يقلّط سيارته ..
مسحت وجهي بيديني بتعب ..
مشيت بهدوء لقيت أنوارالمقلط اللي بعيد مرره شغاله ..
يمكن لو ماكان قلبي حاس انه تركي .. كان والله مارحت ولا حتى طليت ..
لاني عارفه مافيه غيري معه في ذا البيت ..
كنت أدور تركي بشويش بعيوني لين وصلت له وهو عاطيني قفاه ..
ابتسمت بهدوء وانا أسمعه ..
تركي : أسمع أنت بس .. يالله لحظه بس فرصه وحده اذا ماتستوعب الكلام اللي بقوله هالحين خله ليوم بكرا .. إيوة كذا ..
ابتسمت وانا اسمع تنفسه وهو ساكت ..
شوي وقال : يالله ! طايب بقولك .. انا قفلت معي وبروح انام وياجعلني ماقوم إلا وانت فاهم لو تصير معجزه بس !
كان ودي اروح للي يكلمه واقوله يشيخ افهم وفكنا ..
أبتسمت بس وانا اسمعه يضحك ..!
تركي : طايب .. تصبح على خير ..
قفل .. كان بيلف بس على طول مشيت بسرعه .. سمعته : بت !
توزيت ورا الباب رغم انه جنبه مباشرة .. ليه توزيت ؟ انا نفسي مدري !
يمكن انانيه ابي اسمعه واشوفه .. بس هو لا !
شفته يتلفت وهو عاقد حاجبينه .. شوي وسمعته يتمتم : يقالي بفكر من ذا البنت اللي بالعبايه ومافيه غيرها !
كتمت ضحكتي بس لانه يتمتم لنفسه .. ويقصدني ..!!
طلعت بسرعه وانا مبتسمه : ايه صح مافيه غيرها .. يمكن امك !
رفع حاجب لي .. ليه احييه متناقض مره ؟
ليه احس ان كل شي فيه حلو ..؟ ليه هالحين بالذات ؟!
قلت : عادي شفت النور مفتوح وصادف انك تقفل وانا بروح فوق ..
عقد حاجبينه لما شافني بعبايتي : هو انتي وين كنتي ..؟
رفعت حاجب : غريب ! خالك ماقالك ..؟ ولا انا يومني سمعته يكلم حد غيرك ..؟
سكت فتره ثم قال : اها .. اهم شي تقولينها وانتي نافشه ريشك علي زي كذا .. اللي مدري وش تحسين به !
قلت بعفويه : الحين انا اللي نافشه ريشي ؟ أنا اللي مغرورهـ عليك ؟! ولا انا اللي متناقضه ؟!
ماجاوبني الا بجمله بسيطه وهو متجه للسلم ..!
يقول : تصبحين على خير ..
راقبته بهدوء وهو يصعد ويسفهني ..
هو من جده انسان واحد ولا هو اثنين وانا مااحس ..؟
لما صعد اول أربع درجات ..
قلت : هو صدق حنا حياتنا مخططه بالقلم والمسطرهـ ..؟
ماتوقعته يلف وبنظره زي كذا متعجب من الجمله ..
قال : اييش ؟
هزيت راسي بـ ايه وانا عند باب المقلط ثونيي وشفته يرجع ويجي بوجهي ..
قال : قلت ايش ؟!
هزيت كتوفي : خالك عمر يقوله !
نص ابتسامه يتيمه على وجهه .. مدري وش الهدف منها !!
تركي : كل ذا الدنيا حياتها كذا .. لو تأملت شوي ..
عقدت حاجبيني .. كمل : لا تناظريني كذا ايه وانا عند ربي صادق ..
كنت متردده اقول اللي بخاطري .. بس قلته : بس انت ماكنت لي ..
هز كتوفه : يمكن اكون لك .. ويمكن مااكون لك .. هذا حسب تفكيرك انتي ورايك .. بس لو فكرتي بالعقل بس خط مستقيم مايلف يمين ولا شمال من الخبر للدمام !
رمشت بعيوني بـ مبزرة زي مايقول فيصل .. وناظرته ..
قلت : بس انت ماكنت تعرفني .. لولا اني دخلت لك .. ولا كنت اصلن متوقع اني انا ساره لو واحد بالميه !
تنفس بزفير : هو صح كلامك .. لولا بعض لقافة الحريم ماعرفتك ..
قاطعته : ماكانت لقافه اكثر مما كانت خوف على اخوي ..
رفع حاجب : اها .. يعني بالعقل تركي ذاه اللي كان بالمقلط موب ولد عمتي وكان واحد ابي اعرف منهو ؟
هزيت راسي بصدق : ايه .. واحد مااعرفه يصير لخوي خويه !
نفس وضعيته : ايه صح وانتي ماكنتي ساره .. " ناظرني " كنت مروى وصرتي ساره !
عضيت على شفتي بقوة ... هو ليه كذا ؟!
حرر شفتي : أقول لا تضيعينها !
هزيت بـ ايه : كنت مروى لأن ساره توها إنخلقت من يومين !
كنت مروى بنظر نايف أخته .. وتوني انخلقت ساره لـ تركي مو لأي احد غيرهـ !
رفع حاجب وبنبرة سخريه : ايه مروى .. وداخله لين خوي فيصل بن عمتها .. صح قالت لي انها مروى ..,
أصريت : ايه مروى ..
هز راسه باستفهام : وليه كانت مروى ؟!
قلت بسكون : لانك لو فكرت فيها بعقل مروى مابقى أي احد الا ويعرفها لانها ترتز بكل مكان .. لكن ساره هي اخت فيصل .. " ابتسمت له " حتى اهلها مايعرفونها !
ميّل راسه : ممم اها ..بس حلو خلاص عرفوها .. رغم انها كان مفترض انها تكون ساره وتقول انا ساره أخت فيصل بثقه لـ بن عمتها ..
قلت : وانا وش يعرفني انك بن عمتي ؟ ولا اصلن ان عندي عمه وعم ؟! انا من يومي بزر مااعرف الا خالي وخالتي وعيالهم صعبه صراحه اعرف اميّز ولد عمتي !
تركي : ابفهم شي هو ليه الكذب .. انا قلت لك تركي تقولين ساره .. وقلت ..
قاطعته : تراك قلت ثالث ثانوي ماقلت انك لك سنتين فيه ..
ورقصت حاجبيني له وكأني أقوله واحده بوحده ..
ابتسم : بس ماقلت انا ثامر !
قلت بقهر : انا كنت مروى .. وساره اليوم بس انولدت ..
قال بهدوء نبرته : ايوة اليوم انولدت .. وتكونت من ضلع تركي الأعوج !
من ضلع تركي الأعوج ..؟!
تركي ؟
يعني كأنه يقولي أنتي انخلقتي مني .. يعني لي !
ناظرته وبعيوني نفس الكلام اللي ترجمته قبل شوي .. رد علي : تلفين يمين .. ولا تلفين شمال .. تغرزين .. ماتبعدين عني !
ابتسمت لكلمته " تغرزين ! " ..
رفعت حاجب : تراني قلت لك بفكر ماقلت طايب !
ناظرني فتره ثم لف متجه للسلم مرة جديدة ..
وهو يقول : مااتوقع بتعترضين على حكمة ربي في انه خلقك مني .. فـ بقناعتك انتي بتقولين إيه !
صار يصعد على السلم وانا اقوله : كنت ابيك تعطيني جواب للي قاله عمي هو صحيح حنا بالقلم والمسطره ؟ مادريت انك بتعطيني سؤال مدري اسأل مين عنه .. هو أنا ياتركي من جد من ضلعك ؟!
ساكت عني ومطنش لين تلاشى عن عيوني ..,؛
كيف نكون بالقلم والمسطرة .. وحب فيصل لمروى ؟!
والمهم حبي لنايف اللي كان بيغير كل المخطط ..
اتفاجئ انه كان خربشات على الهامش ؟!
صح .. هي كانت خربشات .. حبي لنايف خربشات .. أنا بيدي مسحتها ,؛
يوم مستحت كتابي الكيميا !!
طايب .. هو من جد انا من تركي ؟! ربي خلقني منه ..؟!
وانا اللي عجزت القى اللي انا انخلقت منه وكان تركي ؟
تركي ؟
تركي بن عمتي .. اللي اكرهه ؟!
تركي كان ضامن الاجابه ويجزم اني بوافق .. ليه ؟!
معقول تركي يدري اني مو بس مخلوقه من ضلعه .. كلي انخلقت منه ..!
حتى اقل شي شرايينه !!
.: نهاية الجزء الثآلث وآلثلاآثون :. |