10-17-2016, 03:33 PM
|
| |
((2))
لفيت على وجهي لقيته نايف مااقول مابدى قلبي يدق من الخوف بس نايف احسن من خالي .. تنفست بقوه وجاء نايف وسحبني من يدي وظل ممسكها والمشكله بدون لفه او حجاب بس العبيه والكبوس ..
همست : اترك يدي ..!
ساكت ويناظرني .. هزيته : نايف اترك يدي لو سمحت ..
قال : مو تاركها أول تخبريني وين كنتي !!
ياذا البلشه .. قلت : مو قايله الا لما تفكني قسم يألمني ..
نايف : تكلمي أفكك ..
قلت : واذا ماقلت اش بتسوي ؟؟
هز كتوفه : بس بصاارخ ..
انا اعرف نايف مستحيل يسويها حنون لاقصى درجه فـ أنا متطمنه من ذي الناحية ..
قلت : مو متكلمه ويلا صارخ ..
سكت فتره ثم تركني واشر على مكان جنب الزرع : خلنا نروح هناك واحكيني وين كنتي ..
قلت بخوف : لانايف عيب ..!
قطب حاجبينه : وشهو عيبه ؟!
قلت : انا بنت عمتك وانت ولد خالي وجالسين بأنصاف الليول لا والأزيد لبسي وبذا المكياج ..
ابتسم : دامني اقدر اضبط نفسي وماارتكب جريمه في البنت اللي قبالي واضمن لك مايصير لها شي لو كنت معها بغرفة النوم .. عادي اجلس معك كيذا ..
ولع وجهي ذا مايستحي مثل اخته ؟!
جلست بهدوء ودخلت شعري داخل الكبوس بحيث مايبين شي ..
نايف : احكيني وين كنتي ؟!
همست : بس مو تخبر احد حتى فيصل مابيه يدري ..
هز راسه واشر لي ابدي بالحكي .. قلت : كنت في زفة ريم خويتي ..
قطب حاجبينه : زفتها ؟! اللي اعرفه انك رحتي مع عمتي لأنها مريضه ..
جلست فتره على مااستوعبت ان عمته هي نفسها خالتي .. واعيد واكرر انا ماافهم الا اذا قالوا خالتك ..
قلت : لا ذي خطه من خالتي علشان اروح .. على خالي ..
ابتسم : ماشاء الله ونقزتي من الجدار ؟!
طنشت كلامه : اصلا انت ليه صاحي ؟!
نايف : ايد بس دايم بالليل ماانوم ..
قلت : تصبح على خير بروح غرفتي ..
ابتعدت ودخلت البيت ورحت غرفتي شلت العدسات وقفلت باب غرفتي أخذت الروب ورحت اتحمم خلصت ولبست بيجاما صليت بعدين صلحت الفطور ونمت ..
*
*
*
ماصحيت الابعد اذان الظهر قمت وكل شي فيني يألمني مو قادرة امشي أكيد لأني بقيت البارح بطوله امشي بالكعب وارقص لا وراسي مصدع الله يستر بس .. صليت ونزلت صلحت الغذا ماقدرت اكلت بندول ونمت ياخوفي امرض وبكرة آخر يوم باذن الله لي مع سواليفي مع ذا التركي ..!
ابتسمت من داخلي وانا ادعي الله مايصير نذل ومايقول .. فعلا سؤال غريب " ليه ياتركي تحب فيصل ؟! مين يكون هوا بالنسبة لك ؟"ابد ماطرى على بالي اني اسأل مثل ذا السؤال يالله احس بلقافه لمعرفة الجواب .. بكل بساطه بيقول لأنه خويي .. طردت بسرعه ذي الافكار عني .. ونفضتها عن بالي ..
صحيت على أذان العصر حلو صلاتي ماتأخرت صليت ورحت لفيصل محتاجه اتكلم مع اي احد .. مشيت لغرفته كانت فاضيه ياكرهك يافيصل ماتدري اني محتاجتك .. قفلت النور ويوم جيت بطلع قابلته ..
فيصل : اش عندك بغرفتي ؟!
قلت : هيهيهي فيها كل ثروتك عاد .. جايه ادور عليك ..
قطب حاجبينه : ليش بالله ؟!
قلت : فيصلوه ياحمار انت ماتحس ؟ لي يومين ماشفتك وذا اليوم الثالث وانت ولا سألت اختك موجودة بالدنيا ولا لا ..
ضحك : اشغال والله!!
قلت بسخريه : ايه معذور مو لأن الوزير مايعطس الا ويعطيك قبلها بساعه خبر ولا المصانـ ...
قاطعني : صدق حماره الحين اش تبين انجزي ؟!
قلت : ياربيه على النفس لعلمك اخاص اني مو جايه اسولف معك وانك اذا عرفت السالفه انت اللي بتركض وراي فـ من باب الذوق ان تعدل اسلوبك ..
تكتف : وايش السالفه اللي بلاحقك لجلها ؟!
اعطيته ظهري وانا ماشيه : عن مروى بنت خالك ..
ومشيت لغرفتي فيني الضحكه جد .. صحيح ان مافيه اي سالفة بس حلو احرق اعصابه على مايعرف سكرت الباب واتجهت للمرايا .. شلت حجابي ووقفت اتأمل شعري صار طويل هه تذكرون مرة قلت لكم بخبركم عن سالفة شعري القصير ؟! وانا عند وعدي بس مو وقته الحن تعرفون .. رفعت اصبعي اناظره ماتغير يمكن بس شوي .. فتحت علبة المكياج جديدة لأول مرة استعملها وجلست اصبغ وجهي من الملل أوووف رحت للمسجله وفتحتها على اغنية الحل الصعب .. وبديت اغني معاها .. وانا ادندن انتبهت ان الاغنيه وقفت معقول خلصت ؟! التفت لقيت فيصل واقف جنب المسجله ومبرطم مثل الأطفال .. ماقدرت الا ابتسم حتى وهو زعلان يجنن مو حرام كل ذا الحلا والحنان على مروى ؟! لا والمشكله يحبها ..
قلت : خير اخ فيصل ؟!
فيصل : تو الناس صباح الفل تو منتبهه على صار لي ساعتين ادق على الطاوله وانتي عايشه جوك ولا كأني موجود أحكي مع الطوفه انا ؟؟
ضحكت : طيب افتح المسجله حلوه الاغنيه خلها تكمل ..
جلس على السرير : خبريني اش بها مروى وافتح لك المسجله .. وثانيا ايش السرقات هذي مابقى كتاب بغرفتي الا واخذتيه مابقى كاسيت ومسجله الا وتاخذينها .. ياخوفي تسرقيني بعد !
ضحكت : لا عاد اذا تبيهم اخذهم بس كاسيتات راشد لا والف لا اشتري لك غيرهم ولا تحلم ارجعهم
فيصل : تصدقين لو شفت راشد ذا قسم قلت له ارحم حال اختي ..
تحمست للفكره : ايه وقول له اموت عليه مهووسه فيه الا انجن على صوره صوته كل شي فيه حلو ويهبل ..
ابتسم : لا تموتين علينا .. بس مهما حاولتي تضيعين السالفه لا تحلمين مابي اطلع من هينا الا لما اعرف اش السالفه ؟!
قلت بنذاله : بس انا تعبانه وابي انوم ..
حط يده على خصره : لا والله !! احكيني اشوف ..
هزيت كتوفي : مافيه سالفه !
حسيته تنرفز شوي ويذبحني هه انا اوريك فيصلوه اجل انا تسفهني يومين ماتسأل عني ؟ هييييين !
قال بقهر : لا عاد مصختيها
قلت بابتسامه : حط عليها ملح ..
فيصل : ساروه لا تستهبلين ولا قسم برب الكعبه اللي فوقي انزل افضحك عند نايف قدام خالي ..
فيصلوه الحمار كله يهدد بس طيب امسك عليك شي ومااخليك بحالك غلطتي الوحيده اني ماخليته يحلف علشان مايقول ..
قلت : واقسم لك ان مافيه سالفة بس كنت احرق اعصابك لانك ياحمار طنشتني يومين ويوم جيت ابي اسولف معك نرفزتني ..
قطب حاجبينه وكأنه مو مستوعب وبعد شوي قام يلحقني بالغرفه وانا اصارخ لحظات حلوة موت ولما تعبت وقفت الهث وهو جنبي ..
قلت : فيصل حنا كبرنا اترك حركات البزران على جنب وشف قربت توصل لـ 22 وانت تراكض ؟!
فيصل : لاعاد يعني انتي اللي عمرك سنتين قريب تكملين العشرين .. بس الظاهر عقلك مابعد كبر ..
اتنرفزت وسكتت وجلست اناظره شكله جنان اكيد يشابه ابوي .. وانا ؟! اشابه امي ولا ايش ؟!
قلت : فيصل !!
جاوبني : هممممم ؟؟
رفعت راسي : اوصف لي شكل ...
ماقدرت انظق الاسم اكيد بتدمع عيني ومابي فيصل يشوف دموعي ..
فيصل : أوصف لك ؟! ايش ؟!
وطيت راسي : أوصف لي شكل .. أمي !!
انتبهت انه يناظرني : سارهـ !! ناظريني ..
رفعت عيني وانا ماسكه دمعتي وانا سكاته ..
فيصل : انتي كبرتي وماله داعي كل ذا انتي مو بزر علشان اذكرك ان ...
كملت وانا خانقتني العبره : ان امي ماعاد ترجع .. أدري بس اوصف لي شكلها حرام يعني ؟؟ ولا عيب ؟؟
وقف : لا مو عيب ولا حرام بس انتي كيذا تنكدين حياتك ..
قلت : هه اصلا بدون ماتوصف حياتي منكده .. فيصل بليز كمل .. ثانيا انا مااذكر شكلها كنت بزر ..
اسندت راسي وغمضت عيوني .. سمعت صوت الباب يتسكر أكيد طلع ليه مو راضي يخبرني عن شكلها ؟؟ ليش ؟؟ .. أمي فيها شي ؟ ناقصها شي ؟..
*
سمعت اذان المغرب صليت ونزلت رحت للمقلط وكالعاده نايف مع فيصل بس مروى وين ؟؟ أكيد بغرفتها .. جلست جنب فيصل
قلت : فيصلووه
مارد .. رجعت وقلت : فيصلووه ياحمار
فيصل : ماحمار الا اللي قايلها ..
قلت : أوووه تطور والله وقمت تعرف تتكلم !!
رجع سكت .. اش فيه الحمار مو راضي يتكلم معي بس هين انا اوريك هه صايره اهدد اليوم فيه ومااشوف سويت له شي بس انا لك ان ماخليتك تتكلم غصب عنك .. عناد السالفه يعني !!
قلت : تصدق طالع متغير ؟!
ساكت !! ..
انقهرت منه وقمت شوي وسمعت ضوت ضحكه التفت شفته فيصل ..
فيصل : ههه سارووه .. ههه حـ ههههه حلوة وانتي معصبه هههههه ..
كتمت ضحكتي ولفيت : احلف انت بس ..
ماعليه تبي تنرفزني اعلمك مين اكون طيب !!
ابتعدت عن المقلط ورحت المطبخ أوووه مروى !!
قلت : ماشاء الله مروى اش بتسوين ؟؟
ابتسمت : أحاول اصلح شي
قلت : طيب اش حاطه ببالك تسوين ؟!
هزت كتوفها : أممممم أي شي .. حلا .. لأأنه ابسط شيي ..
قلت : طيب أساعدك ولا مايحتاج تعرفين ؟!
قالت : لا مشكورة ...
عاد بالذات اليوم فاضيه .. صعدت غرفتي شوي وشفت فيصل سكت عنه ..
فيصل : اش فيك زعلانه ؟!
أخذت الروب ودخلت الحمام عزكم ربي مليت البانيو مويا باردة وانسدحت افكر .. شي شاغل بالي ذي الايام .. فيصل دايم يناظرني ويتأملني !! صاير شي ؟؟ أو نايف قاله شي ؟! أو حتى مروى وخالي ؟! والله مو عارفه كيف افكر ومن وين ابتدي .. دخلت راسي بالمويا ثواني وطلعته .. مرت في بالي صورة خالتي مشاعل !! معقول تشابهه امي ؟! كيف اني ماسألت خالتي مشاعل عن شكل امي ؟! أكيد تعرفها وحافظه شكلها ..
نهال !!
هذا اسم امي اللي ماانطقه الا في الاحلام .. ولا مرة قلت أمي أو يمه دوم أقول خالتي !! معقول ان الملجأ الوحيد هلو خالتي مشاعل ؟! طيب ليش ؟؟ ليش انا محرومه من امي وابوي ؟! استغفر الله بس انا اش اخربط ؟! انا مو بزر سنتين علشان افهم !! أنا من يوم انولدت ماشفت امي اشمعنى هذي الايام أحس اني محتاجه لها ؟! ناظرت الساعه ما مضى الا 35 دقيقه فقط نصف ساعه تقريبا وخمس دقايق !! أنتبهت من سرحاني على صوت طرق على الباب تذكرت اني ماقفلت باب غرفتي ..
قلت : خير ؟؟
سمعت صوت : قومي اطلعي بسرررعه ..
اتروعت : خير فيصل اش صاير ؟؟
فيصل : خالي يبيك بسرعه ويقول ان مانزلتي خلال خمس دقايق يذبحك ..
ارتجفت : طيب رح قله جايه ..
لبست الروب على عجله وانا افكر اش سويت ؟؟ لحظه ليكون تركي ؟! دق قلبي بقوة تعرفون اذا احد سوي شي خطير يخاف بسرعه .. طلعت للغرفه لبست برمودا زيتي وبلوزة بيج والحجاب الزيتي ونزلت تحت على طول للمقلط ..
قلت : فيصل وينه خالي ؟؟!
التفت لي : خير ان شاء الله اش تبين فيه ؟!
هذا اللي ناوي اذبحه الحين ..!
قلت : لاتستهبل علي قبل شوي طارق الباب ليش ؟!
قطب حاجبينه : أنـا ؟؟؟؟؟
تنرفزت : وينه خالي ؟!
هز كتوفه : من الظهر طالع ..!
رحت وجلست جنبه مو مستوعبه هل هو مقلب منه يبي يقهرني ولا ايش ؟!
قلت : فيصل فهمني اش صاير .. قبل شوي طرقت علي الباب ووقلت خالي يبيك ركز معي شوي !
فيصل : احلفي انتي بس .. ألحين اطق مشوار لغرفتك ؟! أصلا من يوم تركتك في الغرفه رجعت هنا .. " التفت لنايف " حتى اسألي نايف !!
ناظرت نايف .. قال : فيك شي سارة ؟!
مااخبي عليكم خفت بس تذكرت كلام خالتي انه عادي اذا انا خايفه من شي اتخيل ..
هزيت راسي : ابد بس كيذا ..
شوي ودخلت مروى .. على طول قاالت : تعالي افتحي لي الفرن ..
هه خيبه ماتعرف تصلح شي ابد .. هزيت راسي ورحت لها شغلت الفرن ورحت غرفتي شلت الحجاب واتجهت للمرايا أخذت البلسم وحطيت لي صار شعري حلو جاف على مبلول .. مشطت شعري وربطته وانسدحت على السرير أحس برعب ورجفه تسيطر على كل جسمي مدري ليه .. ابي انوم .. ناظرت الساعه يعني تقريبا أقل من خمس دقايق على اذان العشا .. رحت توضيت وانتظرت على سجادتي الين اذن صليت وحطيت المنبه على اربع الفجر ونمت ..
*
*
*
صحيت فعلا وصليت بعدين نزلت تحت جهزت الفطور وصلحت لي خبز مع جبن تستغربون مني الفطور خبز وجبن والغذا والعشا !! ليش مُصرة عليهم ..لأني احبهم أحب البساطه من الفطور اللي اصلحه كل يوم .. لما خلصت شربت عصير فراوله .. لمحت الاكواب اخذتهم وغسلتهم من جديد وجففتهم .. سمعت صوت تصفير التفت كان فيصل .. لفيت وكملت شغلي كان يهذر على راسي بس مالي خلق اتكلم الحين .. خلصت ورحت غرفتي وكان يتبعني انتبهت انه دخل وفتح الانوار غمضت عيوني بقوة ..
وقلت : فيصل قفل الانوار بليز ..
سك الباب وأخذ كرسي وحطه قبالي وجلس ..
فيصل : اش فيك ؟؟
قلت : فيصل ورحمة امك قفل الانوار تعبانه تفهم ؟؟ راسي مدوخ وابي انوم ..
فيصل : ساروه ياحماره قومي تنامين كثير انتي ..
تأففت : انت الحمار كل يوم جمعه تنام الصبح شكو اليوم جالس مافيه سهرة ولا ايش ؟! رح نم وانقلع عني ..
فيصل : قسم انك ماعندك ماعند جديتي ..
قلت : اسمع تبي تجلس هينا حياك ربي بس التزم الصمت ولا ماتبي الباب قدامك وتدله !!
وقف : شكلك رايحه فيها .. تصبحين على طراق ..
وطلع غمضت عيوني وانا مبتسمه عليه ربي لا يفرقنا عن بعض .. وان شاء الله مهما صار يظل بعين الا اخو في ذي الدنيا .. قفلت عيوني بقوة مابي افكر ابي اناام ..!
*
|