مشكور على كل حال
كلمات / عماد خالد حاج علي
مشكور ...
على كل حال..
بس كان تكون
واضح معاي..
ليه تستغل ظرفاً
حرج ..
وتغرس
سكاكين غدرك
في حشاي..
حتى
بهجة سنيني
وازهار ربيعي
عشان عيونك
أهديتها ليك
بكامل رضاي..
واحتضنتك
بين عصب
الوجع الخرافي..
تراتيل غرام..
وفي نور عيوني
نسجتك قوافي
وأبيات قصيد
في حضرتها
سكت الكلام..
وعشان البينا
أكبر بكتير
حسيتك
في دواخلي ..
عبق خمائل..
شدو أوتار..
يحتضن...
أسرار غناي..
محلك من الإعراب
في حياتي ..
إنك
إنت بيك كل السعادة
وعلي ضفافك ...
بترتاح أحزان آساي..
ما ياك إنت
أفراح العديل
إنت السمح ..
وإنت الأصيل..
مبتداي ومنتهاي ..
بالله عليك
كيف يكون
دا آخر جزاي..
وهبت ليك
من عمري
كل شمعاته المضيئة..
وكل لحظاته العطوفة..
وكل أيامه الحنونة ..
أزاهير صباحي
وافراح مساي..
وا آسفاً
على دمعاً
سكبتو
على شرف وجودك
في مدارات
حياتي ..
حسى بيزيد في
لوعتي....
وفي جراحات آساى..
وا آسفاً علي
كل خفقة حب بريئة
عشان خاطرك
نبضت في عروقي
واحتضنتها
شرايين دماي..
وفي الختام ..
أنا حا أسافر في بحار
جروحي ..
واعتزل كل
العوالم وكل المباهج
واكابد الأحزان براي..
6مارس2013