| الشعراء السعوديين يكتسحون شاعر المليون للحصول على البيرق.. وخصوصا في الحلقه الثالثه (الرياض) بالصور الجزء الثاني
       & زحف سعودي شعري كاسح للحصول على البيرق... شعر.. جزاله.. تمكن... حضور.. القاء.. شيلات... تنويع... تحطيم...حلقه كوكتيل ... وزياده حلاوت الحلقه في الي مانعرض منها ومر بسرعه.
&هالحلقه لوحدها كان ممكن تقسم لثلاث حلقات لو عرضت مقاطع اكبر للشعراء المميزين الي ماجابوا لهم غير ثلاث ابيات تقريبا... وللحين ماعرفنا طريقه اعداد الحلقه وش المقصود منه بالضبط وين تبي توصلنا... والي نركز عليه اكثر. مع الوقت راح نفهم ان شالله.
اللجنه
سلطان العميمي ماشفنا له انبراشات كثير هالمره.. لكن مازال شاد حيله ومجتهد يبحث عن الخلل في القصيده بحرص اكثر.
حمد السعيد ميزته الحلوه انه يحاول يظهر الشاعر بصوره حلوه اذا اعجبه او حس عنده شي يقدمه ماشافه الجمهور... يطلب منه شيله او ابيات ثانيه ... ولكن في نفس الوقت واضح اي قصيده فيها شطحات حداثيه مايجيزها بدون نقاش ويكشر عن انيابه.
الدكتور غسان كان هالمره افضل انصف شعراء بملاحظاته المتمكنه وفي الصميم..رفع الروح المعنويه لاكثر من شاعر... وعليه حركات حبك المقلب في هلال صح.
تركي المريخي احلى من الشعر كتابه...
بدر صفوق هاالمره اهدى ورايق... الا في لقطت الفراعنه يوم يقلب عيونه.. متى يخلص بس..
بس يبين عليه اذا اعجب بشاعريه شاعر يجيزه من قلب وبحماس زي الي يقول هذا شاعر يستحق انتبهوا له.
الشعراء المشاركين
هندي السلمي من بدايه ذكره لاسمه تحس انها اذا ماجاب قصيده جزله فما عنده شي... قصيده مستواها منخفض... مافيها جديد الا مجرد مشاركه.
غازي بستان الشمري شاعر اشاد فيه الكثير من قبل بشاعريته ووضحت جليه من اشاده اللجنه... الالقاء كان مختلف وفيه تفاعل.. ولكن ينقصه القبول والكاريزما... والدليل ان كثير مانتبه له ولاذكروه رغم شاعريته.
احمد صالح الغامدي شطحات حداثيه بحر ومراكب وشاطى يبي لك وقت لين تفهم موضوع القصيده.. وتفكك معانيها لين توضح لك الصوره... عشان كذا حمد السعيد ماجازت له القصيده قصيده تصنف جميله شعريا لكن لااتوقع تنافس وتبهر الجمهور على المسرح.
على محمد الزهراني رايق بابتسامه... مرر قصيدته بطريقه السهل الممتنع اخذ وقته في الالقاء ماستعجل.. حبك الابيات بصوره جميله وصور حلوه غير متكلفه وصعبت الفهم او غارقه في الرمزيه... ابدع وانصفه الدكتور غسان... لكن يحتاج قصيده اقوى من كذا اذا بينافس في المراحل القادمه.
عطالله العنزي شيطان الشعر..اسم رهيب يعطيك حافز تسمع بس بدا وضح ان شيطانه مسوي حادث واصل متكسر وحالته حاله.. طلع شيطان تايوان قطع غيار تجاري.
ماقصر بدر صفوق يوم يقوله توكل على الله وابعد عن الشياطين
فواز عبدالله الدهاسي القاء قديم من ايام الراديو مسيطر على الساحه الاعلاميه... رغم ان موضوع القصيده جميل بس تحتاج ابيات اقوى وقصيده متمكنه اكثر... القصيده مستواها اقل بكثير من موضوعها نصره الرسول(ص).
( منصور شبيب القحطاني... بندر سعيد الثبيتي... منصور على القحطاني... محمد اسحق... حمد اليامي... عبدالله فراج القحطاني... عبدالعزيز سعود السبيعي... معجب هادي الشهراني..)
اصوات جميله بابيات بسيطه وبعضها اقوى شوي ولكن مانقدر نحكم لانها مختصره اكثر من اللازم... في اكثر من مطوع يقدرون يسون فرقه انشاد راح يبدعون.
احمد العنزي ابو ربابه... عايش جوه فاصل ربابي حلو من باب التغيير... قصيده جميله ولكن لاتنافس وواضح انه عفس بعض الابيات اجبرته القافيه.
عبدالله بن سكات الرشيدي حير افكاري طفل واجه الدبابه... مدخل قوي وذكي لموضوع القصيده وهنا التمكن بالنسبه للموضوع والتطرق له ومضمون القصيده الي كثير من الشعراء يفتقدونه واولهم ناصر الفراعنه... تطرق للموضوع بتمكن واجاده واسلوب وفكر راقي.. جمل الابيات الصوت الجميل.. الابيات من قصيدته الثانيه.. كملت الجمال وابدع فيها.. واضح حسه العالي ومشاركته قضايا الامه باسلوب غير سطحي...
(انصفته اللجنه ولم ينصفه الجمهور)
بدر عبدالله الخالدي( الذيب) واضح انه كان ماسك خط بحماس وصل عن الفندق جنب الشاص وبنفس الحماس القى القصيده وعايش جوها من يوم مشى من الديره...ثقه جميله وتمكن من قصيدته... حتى لو تصنف تقليديه بتكون من اجمل القصايد التقليديه في البرنامج... حضور شاعر.... القاء قوي واضح... تماسك القصيده يجملها اكثر...ادهش اللجنه لان من شكله يبين صغير ولكن اجادته لقصيدته وطريقه التطرق للموضوع ابهرت اللجنه واجبرتهم يشيدون فيه...اعطى كل بيت حقه من التمكن وتسلسل قوي للقصيده... وردوده على اللجنه توضح شخصيته المتميزه بثقه.
سلطان سليمان العنزي حبكت القصيده رغم مدحها في البرنامج اجبرتهم على عرضها... يمتلك صوت قوي مختلف يعطي القصيده رزانه بس عكر جمال الالقاء بالكحه الممزوجه بضحكه تكررت اكثر من مره... انهى القصيده بجمال وحبك والقاء مميز... وهو المقطع الي كان يعرض في الاعلان... لو مشت القصيده بنفس وتيره الالقاء وبطريقه تصاعديه كانت تميزت اكثر... بدايه القصيده ونهايتها افضل مما بينهما.
يزيد عمر الكناني اول مارفع يده ورجع لوراء وطالع للسماء كانت بدايه غير مشجعه بس تدارك الوضع ومسك زمام الامور وتفاعل مع القصيده وخش جووو اعطى القصيده جماليه ابدع في التصوير بسلاسه... كان بيبالغ في الالقاء لكن تنبه ... قصيده جميله على سنه.. فيها تكثيف شعري في بعض الابيات اقوى من ابيات اخرى... ولكن اجاد وسجل حضور جميل لنفسه في هذا العمر.
نايف معلا العتيبي ( صوير وعوير)...في شعراء وقت مايلقي القصيده تحس انه في زاويه المسرح وماوده حد يشوفه... لكن مثل نايف تحس انه مالي مكانه ويملا المسرح... حضور طاغي.. القاء رهيب متمكن بقوه... صوت واضح... يعطي البيت حقه في الالقاء يوصله بافضل طريقه يوقف في اماكن ملفته تشد المتابع... يشد على ابيات تستحق... حتى لو الصور الشعريه قليله لكن موضوع القصيده لايحتمل صور شعريه رمزيه كثيره... ذكي في اختيار موضوع القصيده ابتعد عن الغزل والمدح والفخر الي تطرق لها اكثر الشعراء واخذ الهجاء والسخريه موضوع واجاد فيه.. بحيث طلعت قصيدته مختلفه وتلفت الانظار... قدر يكسب اعجاب الجميع اللجنه والجمهور وهنا الذكاء... سجل حضور قوي ينتظر الجميع يترقبونه بشوق كبير... والشي الاجمل ان عنده قصايد اقوى واجزل من هذه.
سيف محمد الجوفي على نياته تبين طيبته في ابياته... قصيده شعبيه يمنيه جميله ببساطتها... سجل له حضور يكفيه بقيه عمره الله يطول بعمره ويعطيه الصحه.
بدر سعيد السبيعي اول مادخل على اللجنه ىيدربي براسه حسيت انه مضيع وجاي يسال عن غرفه يحسبه استقبال الفندق... ولكن اول مافتك من خجله شوي ... ا نطلق وابدع... دائما الشي الجميل من شخص صغير في العمر يبهر اكثر ممايكون من شخص كبير عرف الدنيا صح واستفاد خبره اكبر... عشان كذا كانت اشاده اللجنه فيه كبيره... ولكن المبالغه يمكن تضره كثير... اذا اكتفى بهذا القدر وحسب انه وصل ويكفي... الشي الجميل ان عمره صغير مع الخبره والدراسه والثقافه اكثر راح يبدع اكثر وراح يقدم الكثير... وايضا يطور من القاءه اكثر بيحلووو اكثر...
قصيده تحمل معاني كبيره فيها عقلانيه واضحه... وهنا المفارقه المبدعه .... ولكن يحتاج الشغل اكثر على الصور الشعريه المبتكره... الله يوفقه له مستقبل ان شالله كبير اذا استمر بنفس التدفق والابداع.
(محمد الحويماني... صالح الحمود.... خلف الكريع العنزي.... عبدالله الحميد الرشيدي.... حامد مناور الرويلي ... بخيت الجهني... محمد الوسمي المطيري... طلال البجاد العتيبي..)
كوكبه اسماء شعريه مبهره اغلبها تتميز بالجزاله والحضور...من ثلاث ابيات سجلوا لهم حضور قوي يجعلنا نترقب باقي مشاركاتهم... رغم تفاوت الالقاء من شخص لاخر... تميز الحويماني بهدوءه وثقته... خلف الكريع لفت الانتباه بقوه بتمكنه وحضوره المميز.. ينتظرونه الكثير...
وكانهم جمعوا كل شعراء منتدى شعري مشهور في لقطه وحده.... ماراح نستغرب اذا شفنا كم شاعر منهم ضمن الشعراء ال48..... بالتوفيق للجميع...
حجرف العصيمي شاعر متمرس... واثق.. حضوره جميل... بدا القصيده بطريقه معتاده روتينيه ولكن مع الاستمرار بدات تتماسك اكثر وتوضح... قصيده جزله... متمكن... استحق الاشاده...وعنده الاكثر يقدمه.
رده رواد السفياني شاعر معروف من قبل رغم ابتعاده عن الاعلام فتره...قصيده قويه بمعانيها وصورها... فيها كثافه شعريه اعجبت بدر صفوق كثيرا والعميمي...الحضور والالقاء كان اقل من مستوى القصيده وجمالها... تحتاج القصيده القاء افضل من الي قدمه.
نزهان الشمري حضور جميل لشاعر سوري... اجاد في القاء القصيده بحماس في ابيات قويه جملت القصيده... مع ان بعضها تحتاج لوقفه عشان تنفهم اكثر...لكن وصلت شاعريته...اذا اخذ اعتبار الدول في اختيار الشعراء ال48 بيكون له حضور من بينهم لان يمكن هو الوحيد الي يمثل سوريا الى الان.
هلال المطيري شاعر معروف يتميز بهدوءه حتى في القاءه.. جزل بمعانيه يجيد السهل الممتنع بحرفنه... مع ان كنا نتوقع قصيدته تكون اقوى بحكم خبرته وتمرسه....كان ذوق في رده وبكل عفويه على المقلب... مع ان يحسب عليه ارتباكه ومفاجاته ... كثير من جمهور يعاتبه لانه ماناقش اللجنه... خبرته تشفع له يناقش... ولكن رضاه وتسليمه باالامر فسره البعض عدم ثقه... بس يمكن المفاجاه كانت اقوى ونسي وش يقول...جمهوره ينتظر منه اكثر واكثر اذا تاهل.
ابراهيم الرشود السبيعي الابيات الاولى مطلع القصيده روعه حلقت في العلالي لكن الابيات الي بعدها خففت شوي واقل شاعريه... ولكن القصيده بصوره عامه جميله... يمتلك صوت حلووو... مشروع فنان ناجح... بقي عليه بس ملحن... حمد السعيد يعرفه واشاد فيه وركز انه يظهر بصوره حلوه.
بعد قليل تركي المورقي
هذه الي استغربت منها طلع مكتوب بعد قليل تركي المورقي وبعدا جات لقطه لمجموعه من الشعراء كان من ضمنهم... مافهمت وش المقصد من كتابتها هل انتبهوا فقط لتركي المورقي والبقيه بس للمشاهده مع ان اكثرها اسماء مميزه... انتظرت تركي وماجابوه لوحده... عرضوا...
(بدر الظاهري... مستور صالح الذويبي...تركي المورقي... محمود خلف الشمري...عيضه محمد السفياني... فالح الايدا...عبدالله فيحان السميري..) منتدى المرقاب حاضر بقوه...
اسماء مميزه لها حضوره معروفين عبر المنتديات... صعب نحكم عليهم من المقاطع الي شفناها...
بندر محيا العتيبي قبل القصيده صوته شاعري.. دافي.. اعطى القصيده فخامه على جمالها وعذوبتها.... قمه العذوبه في كل بيت... قصيده متماسكه... متمكن في الالقاء... بشكل رهيب...واضح انه تعب على كل بيت.. كانت الابيات متسلسله مترابطه بقوه.. حبكه معلم محترف...واضج تعب على كل بيت اعطاه حقه من التمكن والقوه... ماقصر العميمي يوم يقول سمعت( خمسه وعشرين قصيده) كل بيت عن قصيده... هنا قوه التمكن والشاعريه والكثافه الشعريه والصور الشعريه الجماليه على اصولها... بعذوبه ورشاقه ورونق جميل قدم قصيده غايه في الروعه بالقاء الشعراء بحق وحقيقي... يستحق الاشاده... واعتقد ان بدر صفوق والعميمي ماراح يخلون شاعر مثله مايكون ضمن الشعراء ال48.... بدر صفوق اجازه من قلب وبقوه... والعميمي انصفه بقوه.
خلف مشعان العنزي يمتلك جماهيريه كبيره... كانوا ينتظرون منه قصيده جديده مختلفه تبهرهم قبل تبهر الي مايعرفونه... اعتقد انه وكانه واثق انه بيتاهل ضمن ال48 شاعر وقدم قصيده معروفه من قبل... ويخبي الاقوى للمراحل الجايه... لكن ماندري خوفك ان هالثقه الزايده تنقلب ضده... مع انه شاعر متمكن ويعرف كيف يكسب الجمهور... وقصائده جمالها على المسرح يعرف كيف يطرب الجمهور ويقدم قصايد قريبه منهم.... قصيده جميله وقويه... ولكن لان الكثير يعرفون ان عنده القدره على الافضل لم ترضي الكثيرين... ننتظر القادم مع خلف المشعان لو تاهل.
ناصر الفراعنه لانه شاعر كبير وله جماهيريه خطيره... ومتعصبه له لدرجه ماتقبل النقاش... نلومه اكثر من غيره... لانه يمتلك كل ادوات الشاعر المتمكن... وقادر على الابداع بمعنى الكلمه... ودائما نقول الشعر بالكيف وليس بالكم...باقل القليل ممكن تقول الكثير... ولكن بعض الاحيان بكثير الكثير ولاتقول الا القليل... مسكت معي فلسفه عاد هذه كيف جات وش معناها مادري بس حلفت مامسحها.
قصيده ناصر الفراعنه كانت استعراض مهارات... تركيز على البحر الطويل والنفس الطويل...
قصيده تطربك بمترادفات من الكلمات بغرابتها غرابه الالقاء تبهرك... وهذا الي ركز عليه الفراعنه اكثر... لكن لو مسكنا القصيده بيت بيت يختلف الوضع...
واضح ان الفراعنه ماركز كثير على عذوبه الشعر والكثافه الشعريه... والصور الشعريه المبتكره.. تركيزه اكثر على القافيه وطول الشطر اخذ منه وقت كبير...
في ابيات واضح انها كانت فقط جسر عبور عشان توصلك لبيت اقوى..
زهمني بدر الشمري الخامسه عصرا وقمت اجري جري... هنا واضح انه كان يسحب البيت ويجريبه معه عشان يربطه بلي بعده ربط يوصلك للباقي...(حر .. برد).. ( خير ..شر)... ( حلو .. مر)...جميله في الالقاء لكن توظيفها ماكان بالصوره المطلوبه...
اعتقد لو اللجنه ماتعرف ناصر وماكانت قدامها ورقه مكتوب فيها القصيده كان ابيات كثير مرت ماتقدر تستوعبها... تسمع الفراعنه لازم تكون في حاله استنفار مركز بكل حواسك وكانه يجري وتجري معه يله تلحقه...
ناصر الفراعنه قادر وكلنا نعرف انه لو يركز على موضوع القصيده بشكل اكبر ويعطي كل بيت حقه من القوه ويزيد جرعه العذوبه في القصيده ان تطلع قصيده روعه...
اعتقد لم يوفق في اختيار القصيده... اذا تاهل بيتاهل لانه ناصر الفراعنه الشاعر المعروف وصاحب الجماهيريه العريضه... اما اذا التقييم بيكون فقط على القصيده الي قدمت.. الوضع صعب...
واضح ان اللجنه اجازته بدون اشاده... اجازه عاديه... ولا سمعنا اي كلام حتى لو عادي.. فقط مرت اجيز واجيز واجيز فقط... هنا التساؤل...
مثلا لو نقارن بين قصيده بندر محيا وقصيده ناصر الفراعنه.. ونمسك كل بيت لوحده راح يوضح الفرق ويبين من ابدع اكثر في قصيدته...ويتضح الفرق بين القصيده المحبوكه بتماسك وتمكن... وبين القصيده المبهره في القاءها وغرابت كلاماتها وطريقتها.
ولكن بعد هذه كله وجود الفراعنه يضيف للبرنامج تشويق اكثر واثاره... اذا قدم قصيده بموضوع قوي وتمكن اكثر ومترابطه بشكل اكبر... على المسرح بهذا الالقاء الحماسي راح يشعللها..
وبالتوفيق للجميع تحياتي اخوكم ابوخالد |