السلام عليكم ورحمة الله وبركاته كيفكم يا أحلى عيون عرب في بالعالم؟ إن شاء الله كلكم بخير ومناح 
أعتقد إنه كلنا ملاحظين بمجتمعنا وهالأيام بالذات إنه قليل صاروا الإخوة بالذات يروحوا يزوروا اخواتهم وخاصة المتزوجات
إلا بس في المناسبات والأعياد وغير هيك قحط تام
هادي المشكلة ليش انوجدت؟
شو اللي خلاها تزيد؟
زمان كانت الناس تصل جيرانها وجيران جيرانها مش أهلها وبس !
طيب شو اللي بيخلي العالم تنقطع عن زيارة الأخوات والعمات وحتى الأخوة بينهم وبين بعض !
ليش القسوة بالشكل هادا على الأخوات اللي بيفرحوا بدرجة مش طبيعية لما اخوتهم يزوروهم؟
الناس اللي تغيرت ولا الدنيا ؟
.:.
هلأ فيه اللي بيقول أنا بخجل أروح وإيدي فاضية ! 
وفيه اللي بيقول فش عندي وقت ! 
وكمان فيه اللي بيقول أنا ما بطيق أقعد مع زوجها لأختي ! 
وفيه اللي مكسّل حتى يرفع سماعة التليفون ويسأل ! 
غير هيك فيه كمان اللي بيقول مهى كل يوم بتيجي عندنا وليش أنا أروح وما بيهمه انه يعملها قيمة قدام زوجها وأهله 
وفيه غيرهم وغيرهم .. إنتو من وجهة نظركم شو الحلول معهم هادول الناس؟ 
.:.
بتمنى كلنا نحكي من ناحية اجتماعية مش من ناحية دينية لأنه كلنا عارفين أنه (لا يدخل الجنة قاطع رحم) زي ما قال سيدنا محمد عليه أفضل الصلاة وأتم التسليم
وكما قال سبحانه وتعالى في كتابه العزيز:
( يَا أَيُّهَا النَّاسُ اتَّقُوا رَبَّكُمُ الَّذِي خَلَقَكُمْ مِنْ نَفْسٍ وَاحِدَةٍ وَخَلَقَ مِنْهَا زَوْجَهَا وَبَثَّ مِنْهُمَا رِجَالاً كَثِيراً وَنِسَاءً وَاتَّقُوا اللَّهَ الَّذِي تَسَاءَلُونَ بِهِ وَالْأَرْحَامَ إِنَّ اللَّهَ كَانَ عَلَيْكُمْ رَقِيباً)
.:.