كلام الحالمة وتجربتها صحيحة شيري , اسمعي منها ومني لأني بوافقها وياما شفت تجارب , يمكن ما عشتها لكن ذقتها مع من ذاقها لحظة بلحظة واليوم بيضحكوا على أمس وحتى بيندموا.
بالنسبة للحب , نعم تضحية ولكن مو بأي معنى ورح فهمك رأيي يا روحي :
الحب تضحية بمعنى تنكسري شوي انتي والطرف التاني , يعني مو بمعنى تضحي بشكل أعمى , لا , ضحي بأنك تتنازلي شوي عن عندك وقراراتك الطائشة وتعلمي تناقشي الطرف الآخر , يعني انتي بتدخلي الحب مفتكرة كلمتك رح تمشي لكن نسيتي انو التاني كمان هيك وعندو آرائه الخاصة وطباعه , وتوافق الطباع أمر مر , وليس صعب بس , مر بكل معنى الكلمة اذا ما عرفتي بكل حكمة تعالجيه.شوي منك وشوي منه وتصير العلاقة ناجحة
لكن انتبهي أنك ممكن تضحي بكتير شغلات , بالزواج انتي عم تضحي بعزوبيتك وبحريتك الشخصية لأنو كلمة حرية شخصية تكون انلغت بالزواج وصارت حياة مشتركة وكل شي مشترك , طبعن مع بقاء حرية خاصة وخطوط حمراء لا يتجاوزها أحد الطرفين
أنتي بتضحي بنومك لما بتفكري بالحبيب , وممكن تضحي بأكلك وتركيزك لما تنشغلي فيه , أنتي ممكن تضحي بوقتك وانتي قاعدة معاه وبمشاريعك لما يطلب منك تتفرغي له , وممكن تضحي بستايلك مع الحمل , وممكن براحة البال والهدوء مع الطفل , أنا عم بعطيكي كل انواع التضحية اللي بالعقل مو تضحي بالدم والعذاب لنو هاد كلام تافه مو فاضي ومو مقبول.
التضحية مو يعني تفني نفسك بسبيل نفس أخرى , فلا نفس اعلى من نفس ولا تطغى نفس على أخرى , التضحية هي يعني التنازل ولكن بحدود وإلا كانوا سموها فناء مو تضحية.التضحية يعني تتركي شوي من اللي بتحبيه لشي بتحبيه أكتر , يعني الأولوية والتفضيل.بس أهم شي تنتبهي أنو كيف وايمتا وكم وبشو تضحي ومع مين ولمين وان كان بيستاهل , الأهم ما تضحي بغباء بل بعقل فقولي لنفسك " هل ما أدفعه = ما سأكسبه؟" لأنو طبيعي تكون حتى التضحية موازنة مو أكثر.وازني ولا تخلي الميزان يرجح كفة عن كفة لأنو هاد بيكون غباء وضياع , توازن الكفة هو دليل سلامة تضحيتك وسلامة تفكيرك.
ما حدا بالكون يستاهل دمعك وهي بالغلط بيسموها تضحية وهي أقرب للغباء , التضحية هي ما ذكرت لكي , وما ذكر بالعقل والمنطق.
أتمنى حبيبتي أكون جاوبتك وتنتفعي يا رب.