الجزء الرابع
* 4 *
الظهر
طلعت من المدرسة مع صالح وابراهيم وماجد ولما مرينا على سيارة صالح
انا = صالح اشوفك موقف سيارتك بمكان سيارة خالد
صالح بغرور = وصار مكان سيارتي عندك مانع
التفتنا انا وابراهيم لبعض وحنا فاهمين حركات صالح
ابراهيم = بس انت ماصرت توقفها قدام بيت ابو عبدالله إلا يوم جا خالد
صالح = كيفي ( والتفت لي ) وانت لا تخلي خالد يوقف سيارته قدام بيتك
انا = والله متى ماصار المكان مكان ابوك تعال تكلم
صالح بعصبية = كذا يعني
ابراهيم = هدوا العب شباب
دخل ابو عبد الله الحارة بسيارته ولما مر من عندنا قالّي انه يبيني
وبعدها دخل سيارته لكراج بيته ,,, وطلع من بيته يحتريني ,,, رحت له
وصالح وابراهيم راحوا بيتوهم
انا = السلام عليكم ,,, آمر ياعم
ابو عبد الله = وعليكم السلام ,,, خالد وانا عمك وشلون وضعكم محتاجين
شي .؟
نزلت راسي ,,, الحال صعب طلبات البيت واخواني كثيرة وماباقي من قيمه
المكدة الاخيرة الا 80 ريال
انا = ابد ياعم مانحتاج شي انا معي الي يسد والحمد الله الحال مستور
ابو عبدالله = خالد لقيت لك وظيفة
رفعت راسي له بلهفة
انا بفرح = والله ,,, وين .؟
ابو عبد الله = بس فيه مشكلة وماعتقد ياولدي بترضى فيها
انا مستغرب = مشكلة وش ياعم .؟
ابو عبدالله = الوظيفة تناسبك ومثل ماتبي ماهي وظيفة ليلية بس المشكلة
الوظيفة ماهي داخل المدينة
انا بخيبة أمل = ماهي بداخل المدينة ,,, اجل وين .؟
ابو عبدالله = بقرية تبعد من هنا 100 كيلو يعني تحتاج سفر كل يوم او
تاخذ اخوانك وتسكنون بالقرية
انا = من وين اسكن ,,, وانا اجار بيتي هذا مادفعته
ابو عبد الله بابتسامه = بس كذا ,,, مستعد ادفعه عنك انت ولدي واعزك
انا متضايق = تسلم ياعم ماتقصر بس مابي اتعبك ولأسف ماقدر اسافر يوميا
صعب ياعم صعب غير كذا ماعندي سياره وغير كذا بعد ماقدر استاجر وغير كذا
بعد من عنده اترك اختي صعب والله صعب
دخل خالد الحارة بسيارته ,,, ولأن صالح موقف سيارته قدام بيت ابو عبد
الله وقف خالد سيارته قدام بيتي وجا ,,, استغربت مشيته يجر رجليه جر
,,, واضح عليه التعب ,,, الشماغ بيده والعقال حاطه براسه ,,, وصل
عندنا
خالد بهمس = السلام عليكم
انا وابو عبد الله = وعليكم السلام
ابو عبد الله = خالد يابوك فيك شي .؟
خالد وهو يحط يده على راسه = صداع خفيف ,,, ليش تأخرت ياخال
ابو عبد الله = تعطلت علي السيارة اليوم واحتريتهم يصلحونها
خالد = وليه ماتصلت علي اجيك
ابو عبد الله بابتسامه = الله يرضى عليك مابغيت اشغلك عن مدرستك وبعدين
شكلك تعبان ياولدي ,,, ماكلك دواك .؟
خالد بملل = لا نسيت ,,, خلونا ندخل ,,, الشمس حاره
انا = آآآ ,,, مع السلامة ,,, لازم امشي
ابو عبدالله = لا لا لا مافيه مشي ,,, اليوم غداك عندي
انا = تسلم ياعم بس لازم اجيب سلمى ومعاذ واكيد يحتروني الحين
ابوعبدالله = رح وصلهم بيتك وتعال لا تتعذر ,,, اليوم عيالي بيتغدون
معي ,,, يالله وانا عمك احتريك
مصر ,,, رحت البيت وعلمت خلود اني معزوم وبعدها جبت سلمى ومعاذ
للبيت ,,, ورحت لبيت ابو عبد الله,,, طبعا الباب كان مفتوح يحتروني ,,,
دخلت المجلس وماكان فيه إلا خالد ,,, وكان لابس بنطلون ,,, ذا مايصبر
عن البناطيل ,,, كان منسدح على الكنب ولما دخلت اعتدل وجلس
خالد = هلا خالد ,,, وش فيك تأخرت
انا = جبت سلمى ومعاذ ,,, وين خالك .؟
قام خالد بتعب وجلس بجنبي
خالد = خالد خالي عرف ان مرته نقلت غرفتي للملحق وعصب وراح لها ,,,
الله يستر اخاف تصير مشكلة بينه وبينها والسبب انا ( تنهد وكمل ) ودي
اطلع ماني مرتاح هنا
انا = تطلع تروح وين .؟
خالد = أي مكان ,,, استاجر بيت شقة ان شاء الله غرفة في فندق أي شي ,,,
المهم اطلع
انا = خالد للمرة الثانية اسألك وش الي حادك تدرس هنا.؟
طالعني بألم وتعب وطوّل وهو يطالعني كنه يبي يقول شي ومتردد بعدها غمض
عيونه ونزل راسه
انا = لو انك بجامعة قلنا ماقبلته جامعات الرياض لكن تترك اهلك وبيتك
وتدرس هنا وانت الى الحين في الثانوي ,,, ( وحاولت اترجاه يقول الي في
خاطره ) خالد فيك شي قلّي.؟
مازال منزل راسه وساكت
انا = طيب معاملة ام عبد الله قاسية معك .؟
خالد بحزن = اول ماجيت لا ,,, كانت فرحانه فيني وتعاملني زي ولدها ,,,
لكن صالح دايم وهو مطيح عندنا واكثر الاحيان نتهاوش قدامها وطبعا لأن
صالح ولد اخوها تدافع عنه ,,, لين هه زي ماتشوف كرهتني
دخل ابو عبدالله معصب وجلس والتفت على خالد
ابو عبدالله = خالد غرفتك الاولى ترجعلها وانا بجيب عمال ينقلون اثاثها
لك وانت الي داخل وهي الي برا
التفت خالد لي مرتبك ثم التفت على خاله
خالد مرتبك = لا ياخال انا مرتاح هنا وبع
قاطعه ابو عبدالله معصب
ابو عبدالله = قلت لك ترجعلها ,,, ولدي انا يختار أحسن غرفة ويجي فيها
واذا ماعجبها تروح بيت اخوها
افا شكله واصلة حده
خالد مرتبك = لا وش دعوى ياخال ماتوصل لهدرجة انا صدقني ابي الملحق
عشان هذا شسمه ,,, عشان آآآآ ,,, عشان خالد
وأشر لي
انا منصدم = أنا .؟
ضربني بكوعه ,,, التفت لي ابو عبدالله مستغرب
ابو عبدالله = عشان خالد .؟
خالد مرتبك = ايه عشان خالد اقدر ادخله غرفتي ,,, الحين لوغرفتي داخل
البيت ماقدرت ادخل خالد للغرفة ,,, احسن تصير غرفتي بالملحق يعني من
باب ال على غرفتي على طول ( والتفت لي ) صح خالد .؟
ابو عبد الله = يعني انت مرتاح كذا
خالد = ايه
ابو عبد الله = أكيد تبي الملحق .؟
خالد = ايه
ابو عبدالله = زي ماتبي ياولدي المهم راحتك ( والتفت لي وابتسم ) البيت
بيتك ياخالد ,,, وغرفة خالد غرفتك ,,, ماتدرون وش كثر فرحتي يوم اشوفكم
اصحاب ,,, الله يزيد المحبة بينكم ,,, اروح اجيب الغدا لكم
خالد = اجلس ياخال انا اروح عنك
ابو عبد الله = لا لا انت شكلك تعبان
وطلع ابو عبد الله ,,, التفت على خالد
انا بطرف عين = اجل عشاني ادخل غرفتك هاه
خالد = يارجال انقذت أسرة ,,, آآآآخخخ ياراسي ,,, الصداع كل شوي يزيد
ومسك راسه بين يديه ,,, الصراحة كبر بعيني هالخالد ,,, فعلا لا تحكم في
الناس باشكالهم ,,, احكم في الناس باخلاقهم وافعالهم ولا تنظر الى
اشكالهم ,,, اخ بس لو اعرف وش الي حاده يترك بيته في الرياض ويجي هنا
وحنا نتغدا مع ابو عبد الله جلس خالد بجنبي مرة ثانية
ابو عبد الله = خالد وجهك ماهو عاجبني ,,, بعد الغدا كل دواك ,,, لا
تنسى
خالد متضايق = انساه ياخال واصلا قضى امس اف
ابو عبدالله = قاضي من أمس وساكت ,,, ابي اعرف انت مهمل نفسك ليه ...
ياولدي اذا كنت ماتبي نفسك انا وامك نبيك الله يصلحك بس ,,, عطني اسم
علاجك اجيبه لك العصر
ابتسمت شكل خالد غالي بالحيل عند اهله وخاصة عند خاله
خالد = مايحتاج انا اروح بس الحين ابي انوم ( التفت لي ) خالد ذكرني
بعد الغدا اخذ رقم جوالك ,,, دايم انسى اخذه منك
وكمل اكله ,,, نزلت راسي يعني مايقولي الا قدام خاله
انا = ماعندي جوال
ابو عبد الله مستغرب = وجوالك وينه .؟
والله الاحراج ,,, اوريك ياخالد صبرك علي
انا بهمس = بعته
التفت خالد لي متفاجئ
ابو عبد الله مستغرب = ليه ياولدي ,,, محتاج شي
انا = لا بس ,,, آآآآ ,,, مليت منه وبعته
سكت عني ابو عبد الله ,,, وقرب خالد راسه لراسي وقال بهمس
خالد = بعت سيارتك والحين بعت جوالك بعد
قربت راسي له اكثر عشان ابو عبد الله مايسمع
انا = لا تتدخل في شي مايع***
خالد = وش الي خلاك تبيع جوالك وسيارتك .؟
انا = اذا جاوبتني اجاوبك .؟
خالد = اجاوبك عن وش .؟
انا = وش حادك تدرس هنا .؟
خالد = وش دخل هذي في هذي .؟
ابو عبد الله بابتسامه = يازينكم والله ,,, خلصوا غداكم ولاحقين على
السوالف
كملت اكلي منحرج من ابو عبدالله وقعدت اسولف معه بسوالف عامه اما خالد
فكان ساكت ,,, بعدها رجعت البيت
العصر جانا عمي ,,, وكنت جالس معه انا وخلود ومعاذ اما سالم وسلمى
يلعبون برا
خلود = عمي المطبخ محتاج اغراض وخالد مامعه شي
ابو مشعل = اوهو علينا ,,, متى افك منكم انا ,,, تحدّوني
ماجيكم والا وشلون ,,, وانت الى متى عاطل باطل ,,, اشتغل اشتغل لو فراش
بس اشتغل
انا = مامعي الا 80 هه شف
وطلعته قدامه ,,, التفت عمي لخلود
ابو مشعل بعصبية = روحي اكتبيلي الطلبات خلصيني
قامت خلود بسرعة وبعد 10 دقايق عطته ورقة الطلبات ,,, طلع عمي من
محفظته ميتين ريال ورماهن علي
ابو مشعل = خذ ,,, ادري انك ماتبي تشتغل ومعتمد علي ,,, بس من الحين
وطالع كل شي اعطيكياه محسوب على الدين الي على ابوك
وطلع معصب من البيت ,,, بكت خلود بصمت ,,, اخذت الميتين بصمت ورحت
غرفتي ,,, انا قادر اسد الدين عشان يزيد هذلي علي ,,, شسوات ياربي
شسوات
بعد صلاة العشا بساعة
خلود = خالد خلك مع معاذ يزعجني مايخليني انام
انا مستغرب = تنامين الحين .؟
خلود = ايه بنام شوي ,,, خلك مع معاذ
وراحت ,,, اخذت معاذ معي وطلعت فيه من البيت وكانوا برا صالح وابراهيم
وماجد طاقينها سوالف وسلمى وسالم يلعبون مع البزارين ,,, وصلت للشبا
ابراهيم = هلا خالد ,,, عطني عطني معاذ ( واخذ معاذ مني )
ماجد = ياحليله هات هات ( واخذ معاذ منه )
صالح = انتوا متأكدين انه ولد كنه بنت ههههههه
انا = هههههههه هذا من زود الجمال ههههههههه ,,, هات اخوي تضايق منك (
واخذت معاذ من ماجد )
طلع خالد من بيت ابو عبدالله وتوجه لسيارته قدام بيتي وركبها وشغلها
وكان بعيد عنا شوي ,,, رحت له وطليت عليه من عند دريشته ,,, وتفاجأت من
شكله ,,, وجهه شاحب والهالات واضحة ,,, ابتسم خالد وفتح الدريشة لي
خالد بابتسامه = هلا خالد ,,, ( وتوسعت ابتسامته ) هذا اخوك ,,, هاته
هاته ,,, شسمه .؟
انا = معاذ ( وعطيته معاذ )
خالد = وش فيك واقف ,,, اركب
درت حولين السيارة وركبت ,,, واول ماسكرت الباب ويجون سالم وسلمى
وقفوا عند خالد
سلمى = وين بتروحون .؟
سالم = بروح معكم
خالد = انا زعلان منكم ,,, ليه ماعلمتوني ان عندكم اخو حلو مثل معاذ
فتحت سلمى باب خالد وركبت بحضنه ,,, صار شكله مضحك سلمى ومعاذ بحضنه
باقي سالم ويمكن اجي انا معهم بعد هههههه
سلمى = انا زعلانة منك
انا = سلمى انزلي ,,, تعالي عندي
خالد بابتسامه = وليه زعلانة .؟
سلمى = انت تبي الملائكة مايدخلون بيتنا
ضحكت عليها وعلى شكل خالد انصدم مسكين
خالد مستغرب = انا .؟
سلمى = انت شريتلي عروسة والعروسة تخلي الملائكة مايدخلون بيتنا
خالد = من قالّك .؟
سلمى = خالد
التفت لي وهو يبتسم
خالد = انت .؟
هزيت راسي بإية
انا = المفروض تعلمها مو تشجعها
توسعت ابتسامة خالد وقعد يطالعني ,,, استغربت منه
انا = وش فيك تطالعني كذا .؟
التفت لسلمى
خالد = ولا يهمك سلومتي الحين نروح ونشتري لك لعبة غيرها ,,, اركب سالم
( عطاني معاذ وجت سلمى بيني وبينه )
انا بعصبية = تعال تعال وش تشتري ماتشتري ,,, لا تركب سالم
خالد = اش انت ولا كلمة كسرت نفس البنت ولازم نشتري لها وحدة غيرها
وبنشتري لمعاذ بعد ,,, اركب سالم
انا = ابشتري لها انا بنفسي ,,, لا تركب سالم
خالد يحذرني = خالد
انا احذره = خالد
ضحك خالد وركّب سالم من جهته
خالد = ههههههههههههههه والله انك ,,, يله سلمى سالم روحوا ورا
انا = انت ماتفهم ... قلت لك لا تشتري ,,, يله انزلوا انتوا يله
خالد = خالد وش فيك اعتبرها هديتي لهم وبالمرة نتمشى شوي بالسيارة
انا = وين كنت بتروح .؟
خالد = بروح للصيدلة علاجي خلص وبعدها نتمشى
سالم = يوه وش هذا .؟
التفت انا وخالد له مستغربين
انا وخالد = وش .؟
سلمى بعصبية = وين نجلس الحين .؟
خالد = هههههههههههههههه سامحينا عمتي ههههههههههههههههههه المرتبة
حوسه ... زيحوا ملابسي والكتب عنكم بجهة واجلسوا بالجهه الثانية
نفذوا سالم وسلمى كلامه ,,, وحرك خالد السيارة وقبل يمر من عند الشباب
,,, اعترض صالح طريق السيارة وقعد يشّر عشان يوقف ,,, وقف خالد السيارة
وجا صالح من عند دريشته وراه ابراهيم وجا ماجد من عندي ,,, قبل يتكلم
صالح على طول التفت خالد ورا
خالد = سالم عطني الدفتر هذا
عطاه سالم الدفتر وبسرعة شق خالد ربع ورقة ودخلها فمه ,,, انا وابراهيم
متنا ضحك عليه وسديت فم خالد بيدي ,,, وسحب ابراهيم صالح وهو يضحك
صالح بعصبية = وش تعني بحركتك هذي .؟
ابراهيم = ههههه هدوا العب شباب ,,, امش امش خالد ههههههههه
مشى خالد ,,, وابعدت يدي عن فمه وانا اضحك عليه
انا = ههههههههههههههههههه صرت تطلق قنابل عنقودية ههههههههههههههههه
تفل خالد الورقة برا السيارة
خالد = كرهني بعيشتي
وقفنا عند احد الصيدليات ونزل خالد وبعد خمس دقايق جا ومعه كيس العلاج
,,, ركب السيارة وعلى طول فتح الكيس واكل الحبوب مع الماء الصحة
انا = شكلك ماتصبر عنها
خالد بتنهيده = الحمد الله على كل حال ,,, بعد ماأغمى علي صرت احسن شوي
انا منصدم = اغمى عليك اليوم .؟
خالد = ايه قبل صلاة العصر بشوي
انا = ومتى قمت .؟
خالد = وهو يذن العشا ,,, على بال ماصحصحت قضيت الصلوات وطلعت على طول
انا = وتسوق وانت تعبان ,,, وقف وقف انا بسوق
مرينا محل الالعاب وتمشينا بالسيارة شوي وعلى الساعة 11 رجعنا لاني
ماقدر اسهر واجد واترك خلود لحالها غير كذا بكرة مدرسة
بعد يوم ,,, يوم الاثنين
جانا عمي العصر وجاب اغراض المطبخ الي طلبتهم خلود وطلع من دون
مايكلمنا
خلود = خالد شكل عمي زعل منا
انا = خليه يزعل
ومسكت سالم بالقوة عشان يحل واجباته وبعد ماخلص اطلقته
بعد العشا طلعت من البيت ابي اسولف مع أي احد ,,, بس الغريب ماشفت احد
من الشباب بال ,,, ماكان فيه الا الاطفال
رحت لسالم والمجموعة الي معه
انا = سالم شفت صالح او ابراهيم او خالد .؟
قال واحد من الاطفال بكبر سالم
= صالح وابراهيم راحوا بسيارة صالح
انا = وخالد .؟
= هذي هي سيارته ,,, بس مدري وينه
رحت عنهم ,,, خلني اطلع خالد من البيت يسولف معي ,,, ضربت جرس ابو عبد
الله وطلع لي خالد
خالد = هلا خالد حياك
انا = الله يحيك ,,, وش فيك حابس نفسك بالبيت ,,, اطلع خلنا نسولف
خالد = امم وش رايك بالمرة نروح لكوفي
انا = لا لا مايحتاج خالد ,,, الاه
وقاطعني
خالد = إلا إلا يحتاج بس اصبر ابدل ملابسي واجيب مفتاح السيارة
وراح ,,, دخلت البيت وعلمت خلود اني يمكن اتأخر وبعدها مريت سالم وسلمى
وآمرتهم يدخلون البيت على الساعة 9 وهددتهم اذا تأخروا اكثر
وقفت عند سيارة خالد احتريه ,,, وش فيه هذا تأخر ,,, بعد خمس دقايق جا
خالد ولابس بنطلون جنز أسود وفنيلة بيضا
انا = وش فيك تأخرت .؟
خالد = اتصلت علي أمي ,,, يله اركب
ركبت معه ولأن خالد الى الحين مايدل الاماكن زين دليته انا على كوفي
بعد ماخذنا مكاننا بالكوفي
انا = خالد فيه حاجة ابي اعرفها عنك و ياليت ماتزعل من سؤالي
نزل خالد الكوب بابتسامة وناظرني
خالد بابتسامه = صاير رسمي ,,, وشوله هالمقدمات ,,, قل وش تبي تعرف .؟
انا = ابوك .؟
تفاجأ خالد
خالد = ابوي ,,, وش فيه .؟
انا = ابي اعرف أي شي عن ابوك ,,, اسمحلي على هالسؤال ,,, آآآآ ,,,
ابوك حي .؟
طول وهو ساكت وسكت انا احتريه يتكلم
خالد = حي ,,, ( وكمل يشرب القهوة وهو ساكت )
انا = الله يطول بعمره لكم ,,, وش فيك لا يكون زعلت .؟
خالد = لا ابدا مازعلت ولا شي ,,, وش رايك نلعب بلياردو .؟
انا = لا خلنا نتمشى بالسيارة
خالد بابتسامه = فكرة حلوة ,,, يله
وقام ,,, مادري ليه حسيت انه زعل
قمت وطلعنا من الكوفي جت الساعة 12ونص في اليل وحنا نفرفر بالشوارع
,,,
جت فجأة سيارة ورانا وصارت تكبس وتضرب البوري علينا كأنها تبغانا نوقف
,,, التفت ورا وكانت السيارة هايلكس غمارتين جديدة فيها اربع شباب ,,,
التفت على خالد
انا = خالد السيارة الي ورانا تبغانا نوقف
خالد وهو يشوف المرايا الامامية = اشوفها ,,, ماعرف احد راعي هايلكس
,,, والسواق ماشوفه زين من الظلمة ,,, تعرفهم انت .؟
انا = لا ,,, وقف وقف شف وش يبي
وقف خالد على طرف الطريق ونزل ,,, التفت ورا ,,, وشفت السيارة الثانية
وقفت ورانا وأول مانزل السواق والراكب ,,, تراجع خالد على ورا ,,,
وبسرعة البرق ركب السيارة ومشى فيها بسرعة جنونية ,,, استغربت تصرفه
انا = خالد وش فيك ( والتفت ورا )
شفت الثنين رجعوا وركبوا بسرعة ولحقونا بنفس سرعة خالد ,,, شسالفة .؟
انا = خالد من هذولي .؟ ,,, وليش مشيت .؟ ,,, وش يبون .؟ ,,, خالد
كانت انفاسه سريعة وكأنه خايف ويتكلم بكلام مافهمت منه أي شي
خالد = لا ,,, لا ,,, الى متى ,,, الى متىىىىىى ,,, لا,,, برتاح
انا بخوف = خالد وش فيك .؟ ليش ماوقفت .؟ خالد لا تسرع ,,, خالد
خالد هد السرعة ,,, خالد يامجنون
التفت ورا ومازالت السيارة ورانا ,,, رجعت التفت لخالد
انا = خالد وقف ,,, وقف
خالد بصراخ = اسكت ( ورفع نظره للمراي الامامية ) الى الحين وراي ,,,
الى متى .؟ الى متى .؟ خالد وين اروح ,,, دلني ,,, دلني ,,, خالد
الطريق هذا وين يودي .؟
حاولت اميز الطريق وانا مازلت منصدم وخايف
انا بخوف = هذا طريق حايل ,,, ارجع
خالد وانفاسه سريعة = حايل .؟ ,,, وشلون اضيعهم عني ,,, ابي حارة ابي
سوق ابي أي شي ,,, خالد مادل شي ,,, دلني دلني
انا = خذ المخرج الي هناك وارجع
نفذ خالد كلامي ورجع ,,, الحمد الله اننا ماطلعنا من المدينة مرة ,,,
التفت ورا ومازالت السيارة ورانا لكن بعيدة شوي ,,, المشكلة مافيه
زحمة عشان يضيعوننا ,,, ناظرت خالد لقيته احيان يناظر المرايا الامامية
واحيان يناظر المرايا الجانبية ويرجع يطالع قدام
خالد = دلني وين اروح ,,, لا لا ,,, خ خ خالد وين
يودي الطريق هذا ,,, اب
قاطعته
انا = ورا المبنى هذاك لف يمين فيه سوق ادخله ولفلف لين تضيعهم (
والتفت ورا )
خالد = سوق ,,, اخ اخاف زحمة واصدم احد
انا بعصبية = زحمة بهالوقت ياغبي الساعة الحين 1و ربع ادخل ادخل بس
نفذ خالد كلامي ودخل السوق وقعد يلفلف
خالد = وينهم .؟ آآآآ هذا نفق مواقف سيارات ,,, ابدخله
انا = لا ,,, لاتدخل ,,, المواقف مغلقة الحين
خالد = وينهم ماشوفهم
انا = اكيد قريب ,,, اخاف يصادفونا خالد ,,, اطلع من السوق
بسرعه
خالد = وين الطريق الرئيسي .؟
دليته وطلعنا من السوق ,,, التفت ورا وماشفت سيارتهم ورجعت اطالع خالد
انا = خالد شسالفة ,,, من هذول .؟ شكلهم مصرين وانا اول مرة اشوفهم
الصراحة ,,, وانت مانت طبيعي ,,, قلّي وش يبون فيك .؟
كان مازالت انفاسه سريعة وكل شوي يناظر المرايا الامامية والجانبية
انا بعصبية = قلتلك راحوا ,,, بتكلم والا وشلون .؟
أخذ طريق الرجوع للبيت وهو ساكت ,,, عصبت انا
انا بصراخ = ليش ساكت .؟
غمض عيونه بقوة وفتحهن
خالد = بقول بس لا تعلي صوتك ( وكمل بضعف ) عورت راسي
استغربت تغير صوته ,,, وش فيه ذا ,,, طيب ياخالد صدقني لولا مرض راسك
كان ماسكت عنك ,,, ابسكت واشوف وش آخرتها معك
وصلنا وقف خالد سيارته قدام بيتي وطفا السيارة وصرنا 3 دقايق وحنا
ساكتين ,,, لكن هو مازال ماسك الدركسون وساكت ,,, احتريه يتكلم يقول شي
يفسر الي صار قبل شوي ,,, فجأة تكلم بصوت هامس
خالد = خالد تكفى خالي لا يدري
انا = اكيد
خالد = لا يدري احد حتى ابراهيم
انا = طبعا ,,, آآآآآ ,,, خالد من هذول .؟ وش يبون فيك .؟
خالد = تبي تعرف وش يبون فيني .؟
انا = ايه
تفاجأت فيه يرفع فنيلته من ورا ويعطيني ظهره المكشوف
خالد = تشوف .؟
ناظرت ظهره بس من الظلمة ماشفت شي مديت يدي وشغلت نور السيارة من داخل
انا مستغرب = وش اشوف .؟ حط يده ورا ظهره وأشر على مكان بظهره قريب من حزام بنطلونه ويميل لجنبه
اليمين ,,, انصدمت
انا = وش هذا خالد .؟
عدل فنيلته واجهني
خالد بتنهيدة = احرقوني بسجارة
انا بصدمة = وش .؟
منزل راسه ولا يرد
انا = ليه ,,, وش يبون منك
خالد = خالد انا ,,, آآآآآ ,,, ( وسكت )
انا = انت وش .؟
خالد = انا كنت ,,, آآآآ ,,, اقصد كنا نقعد لبعد الفجر و ,,, وكنا
مانخلي شي الا ونسويه ,,, انا ,,, آآآآ ,,, اقصد ,,, ا ,,, هم
انا = خالد وش فيك ,,, كمل انت وش .؟
التفت لي بسرعة ومسك يدي
خالد = خالد صدقني انا تبت ,,, تبت وعرفت طريق التوبة ,,, خالد انا ابي
ارتاح ,,, ابي انسى كل شي
انا = تبت عن وش .؟
خالد تركني ونزل راسه = تبت عن السهر معهم تبت عن سماع الاغاني تبت عن
التفحيط تبت عن المغازل تبت عن كل شي بس ابي ارتاح
انا = طيب الحمد الله هذا شي مفرح ,,, بس وش دخل هذا بالي صار قبل شوي
,,, من هذول وش يبون فيك .؟
خالد = انا كنت ادبر كل شي واوفر للسهرة كل شي ,,, ماخلي شي ناقص
انا = الى الحين مافهمت شي ,,, الشباب الي قبل شوي وش يبون منك بالضبط
.؟
خالد = يبون ارجع لهم
اها الحين فهمت
انا = يعني هم الحين يلاحقونك واحرقوك عشان تتراجع عن توبتك .؟
هز خالد راسه بإية
خالد = ايه ومو بس هذا .؟
انا = وش بعد .؟
خالد = الاستراحة الي كنا نسهر فيها لي ويبونها مني لأنها بعيدة عن
الانظار و ماكان يضايقنا فيها احد
انا = طيب ليه مابلغت عليهم .؟
خالد = بلغت ,,, بس كل مادخلوا السجن طلعوا منها مثل الشعرة من العجين
ولا يقعدون بالسجن اسبوع واحد
انا = كيف .؟
خالد = ابناء تجار وضباط ولهم واسطات في الشرطة
انا = يعني يقدرون يدبرون سهرتهم بنفسهم .؟
هز راسه بإيه
انا مستغرب = طيب وش يبون فيك اذا كانوا يقدرون يدبرون سهرتهم
ويستاجرون استراحة لهم .؟
خالد بتنهيدة = يقدرون يستاجرون بس اصحاب الاستراحات يطردونهم اذا
شافوا منهم شي ,,, استراحتي كانت لي وماكان احد يضايقنا ومكانها مناسب
وحلو هذا غير اني كنت اغني وصوتي يعجبهم ولا تحلو السهرة الا اذا كنت
موجود وفوق هذا كنت متفوق عليهم دراسيا وكانوا يحتاجوني في امور
كثيرة من ناحية الدراسة والسهرة ,,, بالمختصر مايستغنون عني
انا = ماظن صعبه عليهم ابناء تجار يقدرون يشترون استراحة و يسهرون
خالد = ابناء تجار مو هم الي تجار و بعضهم ابائهم لهم استراحة او شقة
بس باسم ابائهم ويستخدمونها عايلاتهم يعني ماهي دايم بتصير لهم
انا = وانت استراحتك باسمك .؟
هز خالد راسه بإية
حطيت يدي على ظهره وحاولت تكون يدي على مكان الجرح
انا = شكله عميق
خالد = ماوخرها بدر الا يوم طفت بظهري
انا = اسمه بدر .؟
خالد = ايه
انا = هو الي كان يسوق .؟
خالد = لا
انا = متى صار.؟
خالد = من شهر ,,, الى الحين الجرح يطلع منه دم وصديد
انا = وتوبتك .؟
خالد = من ثلاث شهور او اربع ماذكر زين
انا = هذا الي حادك تدرس هنا .؟
خالد بتنهيده = ايه ,,, أمي وخالي ارغموني اكمل الثانوي هنا ,,, خايفين
علي منهم
انا = وابوك ,,, وش محله من الاعراب .؟
التفت لي خالد وقعد يناظرني وبعدها نزل راسه
خالد = انا تعبان خالد ,,, انزل
انا بتنهيدة = مثل ماتبي ,,, وانا بعد تعبان ,,, مع السلامة
خالد = خالي لا يدري
انا = طبعا اطمئن ,,, مع السلامة
ونزلت ,,, دخلت البيت وتفاجأت بخلود تحتريني
انا = خلود .؟
خلود = خالد وين كنت .؟ جت الساعة 1ونص وانت ماجيت ,,, وين كنت .؟
انا = راح الوقت من دون مادري ,,, خلود تعبان وابي انام حاولي تقومني
بكرة
رحت لغرفتي حاولت انام لكن التفكير بخالد طير النوم عني ,,, يالله
ياخالد أثرك تورطت برفقاء سوء ولانت قادر تخلص نفسك منهم ,,, حسبي الله
عليهم وش يبون فيه ,,, الرجال تاب يطاردون وراه ليه ,,, ليه مايتركونه
بحاله ليه ,,, يارب احفظه بحفظك
اخذت اتقلب بفراشي ابي انام لكن عجزت ,,, خالد شاغل تفكيري