عيون العرب - ملتقى العالم العربي - معاناتي مع متزوجة....... ::18سنه ومافوق::

معاناتي مع متزوجة

18 سنه ومافوق

*قصه حقيقية وقعت لبرطم نملة شخصيا . في البداية لازم اتكلم عن نفسي .

ولد برطم نمله في احدى احياء الرياض القديمة بحي العطايف . ونشأت وترعرعت بحي عتيقه سيتي A_T_C وبعد بلوغي سن السابعة دخلت مدرسة النعمان بن بشير ( زول ) الابتدائية الحين صار مبنى المدرسة سوق تمر .

كنت اعتبر من اشطن واعنف وانذل الجيل الجديد لعتيقة سيتي . وقد انفجرت موهبتي الكروية مبكرا حيث توقع ابوسعيد لي مستقبلا باهرا في مركز الظهير الآيمن ( زامبروتا ) . وبعد دخولي المدرسة وانتهاء الاختبارات كنت متعود أني أصحى بدري وكان فيه خالي يسمونه عيال الحاره البحريني لان شنبه زي شنب حمود سلطان حارس البحرين قالتله امي رح جب شهادة برطم راح خالي البحريني بالهايلكس حقه الغمارتين ومركب شراع في الصندوق ( سفينة ) وانا رقيت عند الحمام فوق في السطح ادقلهم خبز يابس .

ما راح ربع ساعة الا واسمع حنت الهايلكس قلت مالي الا اطل مع بطن الحوي واسمع وش يقولون وكان يوم السبت وبتحديد الساعة العاشرة صباحا حاولت اني استرق السمع وبعدها صرخت عتيقة وأعينها تذرف الدمع حزنا على سقوط احد ابناءها المخلصين بمادتين .

قعدت أسبوع وأنا أتصفق ما فيه احد ما جلدني يا أحبس نفسي في غرفتي اللي بسطح (شغالة) واذا طلعت منها انطق ( معتقل ) حتى أتذكر اني جالس على زلفه الباب قاعد أكل عسكريم اللي فيمتو محطوط بأكياس ومثلج الا ويمر ابو الجيران ويتفل على وجهي وقالي ادخل ذاكر يا لبليد ( البليد = كسلان أو فاشل ) وامسح التفله وادخل البيت .

وبعد مرور اسبوعين على هالوضع جت خالتي وقالت للامي فيه وحده مصرية تدرس دروس خصوصية واسمها أم حمادة وكلمتها خالتي وقالت ماعندي مانع رحنا من بكره انا وامي وخالتي وخالي البحريني حتى اتذكر انهم مركبيني في الصندوق حق الهايلكس ( كلب ) يعاقبوني وشرحو لها الموضوع واتفقوا على السعر و أنا كنت اطالعها واتبسم لاني ماكنت متوقع انها حلوه ولحمه بنفس الوقت ( تشبه معالي زايد ) طلعنا وانا عرفت الطريق وجيتها من بكرة العصر وكنت لابس أحلى لبس عندي تكميله الهلال وكنادر ام شراع وفوقهم ثوب العيد وحاط شطرطون على يدي ( كابتن الفريق ) وصلت لشقه وطقيت الباب طلعلي واحد دب وأصلع ( الزنكلوني ) قلت شكلي غلطان توني جاي بنحاش الا وقالي انت اكيد برطم تفضل يبني ام حمادة تستناك . دخلت ولقيت القمر ينتظرني في الصالة وكانت لابسة كنبل ( روب ) واجلس جنبها وفتحت الكتب شوي الا وقعدت تسولف معاي وتسحبني بالكلام قعدت اتشكالها وقلتلها مافيه احد يحبني واهلي مايعطوني فلوس وقلتلها ان معاي عشرين بزر في الغرفة حتى اني القى عيال الجيران نايمين معنا ( ملجأ ) ولا عندي سرير وقلتلها اني اعرف ادقدق بالكوره ( فضيحه ) مع مرور الوقت ومع اكتسابي ثقتي بنفسي بسبب معاملة ام حماده الراقية الطخمه ( ياويلية ) بديت ابدع في المذاكرة واتذكر انها عطتني حاجه قالتلي احفظها واسمعها لك بعد اسبوع جيتها من بكرة وقلتلها ام حماده انا حفظت اللي قلتليلي علية قالتلي ياسلام عليك يابرطم انا احب الولد الشاطر اللي يسمع الكلام قلتلها وانا احب البنت المخربتها ( لانها كانت لابسه بنطلون ضيق ومطلعة نص الصدر ) .

مع مرور الآيام حست ام حماده أني متعلق فيها بدت تستغلني صرت كل ما اطلع منها توصيني علي شي وانا جاي يا ببسي يا تيم يا ككاو مثلثات ياكراش يابسكوت ابوميزان ياحلاو دنميت ( أرهابي ) ياحلاو صعو ياخبز شريك ( ينغط مع الشاهي ) شوي بديت اجيب اغراض من البيت عاد انا يدي خفيفة ( مشروع حرامي ) يابصل يا بطاطس يا صابون يا حمام (قطايف) يا شاهي تلقيمة وانا اقول عادي تستاهل صرت عبد عندها بعد ما اخلص مذاكرة أنظف الشقة وأقطع البصل وامسح الآرض واغسل ملابس زوجها الزنكلوني معاد اشوف من ريحة صنانه وانا ماشي تحت مقوله ( شبك الشين يجيك الزين ) جاني القولون زي الصالح من كثر ما اكل فول وفلافل صرت اسمع عبدالحليم وفريد الاطرش وام كلثوم شريت فنيلة حمراء لعيونها لانها كانت تشجع الزمالك قطعت العلاقة مع عيال الحارة ولا صرت اطب على بيوت الجيران لان البيوت أول متلاصقة ولا ارجم الزيود ولا ادق للحمام خبز بشرتي بدت تصفى وشعري بدى ينعم ( اما انت يا أليسا ) لاني صرت اتروش كل يوم ناقصني بنطلون جنزواصير ولد اشوام المهم امي ماكان يعجبها وضعي مع اني صاير مزيون ومؤدب بدت تخاف علي تحس ان ام حمادة ساحرتني اول ما اختبرت ونجحت راحت امي وخالتي وخالي البحريني ( العدوان الثلاثي ) وحاسبو ام حماده وقالولها لا عاد تدخلين برطم عندكم من دون ما ادري .

ودوني للبر علشاني ناجح ( ضب ) بعد ما رجعنا انا كنت افكر وشلون راح احتفل مع ام حماده بنجاحي اول ما اصبحت رحت لبيت ام حمادة وقعدت اطق عليها الباب محد فتحلي كل يوم اجيها مرتين ثلاث محد كان يفتحلي واجلس عند باب الشقة الا وطلعلي زوجها الزنكلوني قالي عاوز ايه قلتله ابغى ام حماده قالي سافرت لمصر ولا راح ترجع قلتله خلاص ماراح ترجع مره ثانيه قالي ايوه خنقتني العبرة قلت قلها ان برطم نجح وبجيكم في مصر اذا كبرت واصير ولدكم واترك القراوى رحت البيت وانا امشي في الشمس وامر بقالة واخذ شاني من القهر واشرب واصيح انواع الدموع والخشه حمراء ( سلقه ) وادخل البيت رقيت لغرفتي واطرد المبزره اللي فيها وصرت ما عاد أكل ولا اطلع ولا اكلم احد واذكر كان فيه عزيمة في البيت ازعاج من الزحمه نزلت سلمت وشربت مويه ( طرار ) قالو اقعد الحين بنحط العشاء قلتلهم ما اكل مع قراوى رقيت غرفتي اللي بسطح واشغل فريد الاطرش هو اللي كان باقيلي من ريحة الحبايب يوم راحو العالم جتني امي قالتلي ماتبي عشى قلت لا قالت ولا طحينيه وجبن رشوه قلت لها لا ولاتبي موز ( قرد ) قلت لها مابي شي مع مرور الآيام بديت اطلع شوي وكنت في البقالة الا ولقيت فيها ابوسعيد قالي ليه ماصرت تلعب كوره و بسجلك بنادي ومن هالكلام وأنا كنت احب الكوره بديت ارجع العب وماراح اسبوع الا ونفسيتي 100% ورجعت ارجم الزيود والكوريين ( الفلبينين نسميهم اول كوريين ) ورجعت ادق لحمام خبز واطب على بيوت الجيران وافطر معهم لحد ماصرت اشهب الهب .

ملاحظــــات :-

1- اعطني حظا وارمني في البر .

2- كبرت ورحت ادور ام حماده في مصر ودخلت Sun Set دريت ان ام حماده مقلب كبير.

3- ابو سعيد هذا واحد خال يحب الكورة وكان يطلع كل عصر ويجيب معه زمزميه فيها شاهي مر ويتفرج على اللي يلعبون .

4- مافيه احد عنده علاج لصلع غير الزراعة و السماد .

5- مشكلتنا مافيه احد كان يفهمنا و اهلينا اول ماكانو يعرفون يتعاملون الا بطق.

6- الصالح هذا واحد موهبة في الاستراحة كل ماقلنا له شي قال فيني قولون .

مع تحيات /

د / برطــــــم نــــــــــمــــــلة.

د = دبلوم .

هههههههههههههه

منقول من ايميلي