عيون العرب - ملتقى العالم العربي

العودة   عيون العرب - ملتقى العالم العربي > عيـون القصص والروايات > روايات طويلة > روايات كاملة / روايات مكتملة مميزة

روايات كاملة / روايات مكتملة مميزة يمكنك قراءة جميع الروايات الكاملة والمميزة هنا

 
 
LinkBack أدوات الموضوع انواع عرض الموضوع
  #1  
قديم 09-22-2008, 04:58 AM
 
Wink الخوف من الحب رواية خليجية ولا أروع




هيدي رواية خليجية ( سعودية ) حلوة كتير , رح انزل اول حلقة و بتشجيعكم رح كمل باقي الحلقات



ما تحرمونا من تواصلكم و ان شاء الله الرواية رح تعجبكم



خلونا نبدأ







عائلة صالح :-




بو محمد ( صالح) : رجل اعمال كبير عنده شركة داخل فيها شراكة مع اعز ربعه سالم



ام محمد ( لطيفة) : انسانة مسيطرة على عيالها و مع كذا طيبة و كلمتها لازم تمشي مهما كان



محمد: اكبر اولاد صالح و يده اليمين عمره 32 متزوج هدى و عنده اربع اطفال اكبرهم صالح 7 سنوات و بعده مهند 5 سنوات و بعده التوأم مرام و ماجد عمرهم 3 سنوات ... يتميز محمد بقلبه الكبير و هو حنون خصوصا على اخته سارة



عبدالله : عمره 28 متزوج مها وعندهم ولد فهد سنتين و نص ... ما رضي يشتغل مع ابوه و عنده اعمال حرة



سلمان : دلوع امه ... شاب صايع مهنته الدوران في الشوارع و المجمعات يدرس هندسة كيميائية بجامعة الملك فهد بالظهران ... مملوح و حلو ما بقي بنت بالخير و الشرقية الا و شبك معها عمره 22 سنة

سارة : اصغر عيال صالح قمة الانوثة و النعومة , تؤمن بقصص الحب مرة ... اخوانها مدلعينها خصوصا اخوها محمد الكبير و امها و ابوها مو مقصرين بعد ... عمرها 19 سنة ناجحة من سنة اولى جامعة تصميم داخلي بجامعة الملك فيصل


عايلة سالم :-

سالم ( بوعمر) : رجل اعمال كبير و رجل غني مرة ... صديق صالح من و هما صغار و دخل معاه شريك في احد شركاته ... انسان خلوق و كريم

ام عمر( فوزية) : على نياتها و طيبة لاقصى حد يعني مثل ما يقولون تحطها على الجرح و يبرى

عمر: اكبر عيال سالم عمره 31 زوجته توفت قبل 3 سنين و ماعنده منها الا بنت مي عمرها 6 سنوات و عايش عند جدتها فوزية

نورا : الاخت الكبيرة 29 سنة متزوجة من ولد عمتها و عندها حصة عمرها 5 سنين و هند عمرها 3 و هي حامل

عبد العزيز : الولد الثاني من عيال سالم خريج جامعة دنفر بكلورادواه ... افكاره شوي متحررة خصوصا بسبت دراسته بالخارج ... مسيطر و عنيد , عمره 27سنة


منيرة : صديقة سارة و تدرس معها بالجامعة

رهف : اخر العنقود متخرجة من ثالث ثانوي و محتارة ايش تدخل بالجامعة






الفصل الاول




الجزء الاول :-




سارة و الدموع مالية عيونها : يمه تكفين لو سمحتي مابي اروح مابي اطلع من البيت كذا والله حرام ... حرام اللي تسونه فيني



ام محمد: اقول بلا دلع و يللا جلسي هادية خلي المراه تعرف تحط لك مكياج و لا تفشليني قدام الناس



سارة : حتى عرس ما سوتوا لي و تبوني ما اتكلم والله حرام ... ما كاني بنتكم ... و قامت تصيح



فيفيان اللبنانية اللي تحط الميك آب : بس يا سارة تؤبريني ... ليه عم تعملي بحالك هيك ... انتي عروس زي الأمر ... خلص ما تبكي



سارة : انتي ايش لك يللا برى ما بي احد عندي خلاص انا ما راح اطلع يعني ما راح اطلع



ام محمد : اقول احترمي نفسك يا بنت لا تكلمي المراه كذا ... يللا عن الدلع لا انادي ابوك و اخوانك يشوفونك
تطلع ام محمد من الغرفة و هي معصبة و سارة مرمية على سريرها و هي ميتة من الصياح
ام محمد و هي طالعة تقابلها هدى و مها حريم عيالها
هدى : خالتي ايش فيك ليه معصبة
ام محمد : والله تعبت من هالبنت ما ادري ايش اسوي لها ... قاعدة تصيح و مو راضية للمراه تحط لها مكياج ... يا ليت تروحون و تتفاهمون معها



هدى : ان شاء الله خالتي لا تحاتين بنروح لها الحين ... يللا مها خلنا نكلم سارة



نزلت ام محمد تحت عشان تشوف اذا البوفيه وصل من المطعم او لا و تشوف الوضع اذا كان تمام عشان العشى اللي مسوينه بمناسبة زواج بنتها سارة ... و خروج سالم من المستشفى بالسلامه ...



مها و هي داخلة غرفة سارة : سوير الله الله كل هالدموع عشانك بتشتاقين لنا يالدبه



هدى راحت عند فيفيان و قالت لها تطلع برى شوي و بعد دقايق بتناديها ... و طلعت مع الثنتين اللي معها



سارة و صوتها كله صياح : والله اني بشتاق لكم ... انتي راضية يا مها على اللي صار ... ما كاني بنتهم كاني بضاعة يزوجونى كذا ... حتى الزواج دخلوا فيه المصالح ... والله حرام لا الله ولا رسوله يرضون بهالشي ... لازم ياخذون رأي البنت مو كذا زوجونى غصب



هدى : الله يهديك يا سارة ... و هذا انتي قلتيها زوجونى ... يعنى خلاص الزواج و تم ... ولا تبين تصيرين مطلقة



سارة : ايه عادي ولا اعيش مع واحد ما احبه ولا يحبني ... و تزوجنا عشان مصلحة الأسرة ...



مها : و مين قال انه ما يحبك او متزوجك عشان مصلحة



سارة : ليه يعني تظنون اني غبية أو انتوا تتغابون ... لي اسبوعين مملكة ولا عمره كلمنى كلمه ... ولا شفته الا يوم الملكه ... و ما شفته إلا ساعة , بعدين خرج و لم يعد ... شكله هو مغصوب مثلي



مها : الرجال ما ينغصب ... لا تفكرين كذا بس انتي تعرفين الظروف اللي مروا عليها بيت عمي سالم ... لولا مرض عمي و طيحته بالمستشفى ... ولا كان سوينا لك عرس كل اهل الخبر يتكلمون عنه ... بس الظروف هي اللي اجبرتنا



هدى : ان شاء الله يا سارة اذا رجعتي من شهر العسل بنسوي لك حفلة كبيرة و تعزمين فيها كل اللي تبين



سارة : ليه حفلة تبوني احتفل بانتحاري !!!



هدى : الله انتحار مرة وحدة ... حرام يا سارة والله عبد العزيز نعم الرجل و محمد دايم يمدحه لي ... رجال بمعنى الكلمة



مها و هي تغمز : و يقولون حلو و طويل



سارا : تراني شفته مو لازم تقولي لي شكله أعرفه ... ولا نسيتي اني صديقة اخته ... و اصلا هو عصبي و نذل مع خواته .. .منور دايم تشتكي منه يقولون هو غير عن عمر ... دايم يخرب عليهم الطلعات و يعصب مرة و يتهاوش كثير معهم



هدى : اقول بلا حركات بزاره تراك كبرتى



سارة : والله مو كبيرة ولا وحدة من صديقاتي تزوجت الا انا ... لا و بالغصب بعد ... و رجعت تصيح مرة ثانية



مها و هي تجلس جنب سارة و تضمها لها : خلاص يا حبيبتى ... ان شاء الله بتستانسين بعد الزواج و تضحكين على حركاتك الحين



سارة و كلامها مو واضح من الصياح : بس انا ما احبه ما احبه



هدى : والله ما خرب عقلك الا هالأفلام الرومانسية اللي تشوفينها و القصص اللي تقرينها .. .ولا حنا ايش لنا بالحب اللي قبل الزواج ... ترانا مو غرب حنا عرب لا تنسين ... والله دلع
و تطلع من الغرفة ... ما جلست إلا مها بحكم انها تعتبر أقرب بالسن من هدى لسارة ... حاولت تهدي سارة



مها : خلاص حبيبتي ولا يصير خاطرك إلا طيب بس انتي لا تصيحين



سارة : يعني ما رح تزوجوني



مها : الله يهديك يا سوير انتي خلاص تزوجتيه و لا ناسية



سارة : شلون انسى بس عادي خلوني متزوجته بس ما بي اطلع من البيت ما بي اروح معه و اجلس معه بروحي ... ترى ما عمري جلست معه وحدنا حتى بالملكة كان سلمان معنا



مها : هههههههه ايش هالكلام ... نشوف بعد ايش بتسوين بتكونين انتي اللي تبين تجلسون وحدكم



سارة و هي لا زالت تصيح : والله لا والله لا



مها : خلاص سوير والله قطعتي قلبي هالدموع ما رح تنفعك بشي يللا قومي غسلي وجهك و خلي البنت تدخل و تسوي لك الميك آب لا تنسين منور بتجي بدري ... و فشيلة تشوفك كذا



سارة : اصلا منور تدري اني ما ابيه



مها : ويه فشيلة انتي قايلة لها انك مجبورة على اخوها ؟؟؟



سارة : ايه ولا انتي ناسية انها صديقتى مرة



مها : لا بس مو كل شي تقولينه لها خصوصا هالشي



سارة : لا عادي خلها تعرف اني ما اطيق اخوها



مها : و ايش قالت لك



سارة : مو لازم احبه اهم شي اني بكون معها ببيت واحد



مها : ليه انتي بتعيشين معهم بالبيت



سارة : ما ادري والله ما ادري



الا ينفتح الباب و طلع لهم راس منيره و هي تقول بصوت عالي : انا جيييييييييييييييييييييييييت




مها : هلا منور



منيرة يوم شافت عيون سارة منتفخة من الصياح دخلت على طول و هي تقول : سوير ايش فيك



سارة رجعت تصيح مرة ثانية و غطت وجهها بإيدينها



مها : رجعنا للسنفونية



منيرة : مها سارة ايش فيها



مها و هي متفشلة : والله ما ادري عنها شوفيها انتي



و لفت على سارة : يللا سارة انا بنزل اشوف خالتي ايش تبي و بنادي لك سوزي تدخل بعد عشر دقايق ... لكم بس عشر دقايق تتكلمون فيها



و طلعت مها و هي طالعة قالت لمنيرة اللي واقفة و مو عارفة ايش تسوي : منور حبيبتي احد جا معك



منيرة انتبهت لمها : هاه لا بس انا جابني عمر ... اهلي بيجون بعد صلاة العشاء



مها : ان شاء الله يللا عن اذنكم



و طلعت مها و سكرت الباب



منيرة و هي مترددة ما تعرف ايش تقول : سارة ...



سارة لا زالت تصيح ولا تكلمت



منيرة : سوير خلاااااص ... ما يصير تسوين كذا



سارة : منور انتي اقرب وحدة مني ... انتي اللي تعرفين اسراري و تعرفين احلامي ... انا احلامي تحطمت



منيرة : سارة ... لا تعيشين خيال ... انتي عارفة ان احلامك ما تتحقق الا بالافلام ... والا احنا متى صار عندنا حب قبل الزواج ... بذمتك اخوانك محمد و عبدالله كانوا يعرفون زوجاتهم قبل الزواج ؟؟؟



سارة : ايه مها بنت خالتي ... و هدى بنت صديقة امي



منيرة : يا ذكية انا قصدي كانوا يحبونهم ... امي و ابوك اخوي عمر و اختي نورا ... كلهم تزوجوا مثل كل الناس ليه انتي تبين تصيرين غير ... قال تبي تتزوج واحد تحبه



سارة : بس حنا بالقرن الواحد و العشرين



منيرة : يووووووووه هالبنت بتذبحنا ... ياختى حنا مسلمين ما عندنا تعارف قبل الزواج



سارة : انا ما قلت ابي اتعرف



منيرة : اجل شلون بتحبين



سارة : يعنى احب واحد من غير ما اكلمه



منيره: لا والله ضحكتينى ... اقول جب ترى عطيتك وجه ولا تنسين انك الحين حرم اخوي ... ( و تغمز لها )



سارة : لا تذكريني تكفين



منيرة : لا جد ازعل منك بعدين ... ترى اخوي طيب و يهبل



سارة : مو كلامك هذا قبل لا يتزوجني



منيرة : هههههه الله يهديك يا سارة هذا اول كنت بزر



سارة : لا والله قبل شهر كنتي بزر هاه



منيرة : سوير يللا بس والا هالجزمة على راسك بروح انادي سوزي عشان تعدل هالخشة عله عسى تطلعين حلوة ... ابيك تخبلين اخوي عليك اليوم



سارة : اخوك كانه ما شافني ... شافنى ولا حتى عبرني



منيرة : سارة لا تقولين كذا انتي ادرى بحالنا ذاك الاسبوعين ... و تدرين ايش صار لابوي الله يطول لنا بعمره



سارة : آمين ... والله اني احب عمي سالم ... والا لو ما احبه كان سويت علوم



منيرة : هههههههه اكثر من اللي سويته



سارة : بس ليه الحين ... خلوني اتعود على اني متزوجة اول



منيرة : انتي تدرين رغبت الوالد و ان شاء الله اذا رجعتي انسوي لك حفلة ... ابوي يبي يشوف عبد العزيز متزوج بأقرب فرصة ... لولا مرض ابوي كان سوينا لكم زواج بس ما دمنا ما رح نسوي ... ليه ما تتزوجون ايش يمنعكم



سارة : الله يعين ... الا تعالي انا وين بسافر



منيرة : هههههههه شف عروس ما تعرف وين بتروح بشهر عسلها و هي بتسافر هالليلة



سارة : والله ما اعرف مين يقول لي يعنى ... اخوك ؟؟؟



منيرة و هي متفشلة من اخوها لأنه ابد ما كلم صديقتها ولا جا يشوفها من اول ما ملك عليها : سارة قلت لك اعذري عزيز والله كان عنده ضغط ... يللا غسلي وجهك و انا بروح انادي سوزي ... لا تنسين اني بتمكيج بعد هنا



سارة : ان شاء الله ... و قامت للحمام تغسل وجهها ...


جلست منيرة على الكرسي و هي تفكر باخوها و شوي تذبحه و تذكر كيف استغربت يوم عرفت ان ابوها خطب صديقتها سارة و بنت اعز ربع ابوها لولده عبد العزيز اللي مفهم العايلة انه مستحيل يتزوج خصوصا بعد ما شاف ايش صار لاخوه عمر يوم توفت زوجته فاطمة ... عمر كان متزوج و عايش مع زوجته قصة حب ولا اروع ... و بعد خمس سنوات قدر الله ان فاطمه تموت بحادث و تركت عمر و بنتها مي 3 سنوات وحدهم ...عمر تحطم بعد وفاة زوجته ... و تبدل ذاك الاخ اللي كان دايم يضحك ... حتى بعد مرور 3 سنوات من وفاة فاطمة ... عمر ما رجع مثل اول و هذا اللي مقطع قلب امه و اخواته عليه ... ولأن عبد العزيز اقرب الاخوان لعمر ... هو اكثر واحد كان حاس به ... و ماخذ عهد بينه و بين نفسه ان قلبه رح يكون ملكه هو وحده و مستحيل يسلمه لانسانة ممكن تروح عنه و تاخذ قلبه معها مثل ما صار لعمر اخوه ... يوم خطب ابوه سارة بنت صالح له ... بالبداية عارض لانهم خطبوها وهو مسافر ولا اخذوا رايه ... بعدين احترم ابوه اللي كان قصده يقوي علاقته بصديقه و تكون بينهم علاقة نسب مو بس صداقة خصوصا انه كبر و ما يضمن ان الشراكة تتم بين العيلتين بعد ما يتوفى ... فحب يزيد العلاقة بالزواج ... و صالح اللي وافق لانه مايبي يرد صديقه و يخاف انه اذا رده تنقطع روابط الصداقة اللي بينهم مع انها مرة قوية فاجبر بنته انها تتزوج من ولد صديقه ... و في يوم الملكة بعد ما رجعت عايلة بو عمر لبيتها طاح عليهم سالم مريض ... لأنه من فترة كان يحس بشي بس ما حب يروح للمستشفى و مع ربشت الملكة تعب و طاح ... و بالمستشفى لحقوا عليه بسرعة و هذا اللي خلى عبد العزيز ما يطول في بيت زوجته ... شخصوا حالة سالم ان قلبه ضعيف و المفروض ما يجهد نفسه ... سالم خاف ان هالشي يأجل الزواج ... فأصر انهم يتزوجون اول ما يرجع البيت ... و بالفعل بعد اسبوعين من الملكة رجع سالم لبيته و صالح قرر يسوي له عشى كبير ... فقال سالم ان العشى رح يكون عشان سلامته و عشان زواج ولده بعد ... محد قدر يعارضه او يقول شي بسبب حالته و انهم ما يبونه ينفعل ... و تم اللي يبيه ...



و في بيت سالم ... الكل خايف و ماهب عارف ايش يسوي لان عبد العزيز للحين ما يدرون وينه من طلع الصبح و الحين اذن المغرب و هو ما رجع البيت و لا حتى رد على جواله ... ما بقى الا ساعتين و يروحون بنت بو محمد ... والعريس ما يدرون عنه ... فوزية و نورا بنتها جالسين بالصالة و هم لابسين و جاهزين مع سالم ...



ام عمر : الله يهديك يا سالم مو زين عليك الإنفعال ان شاء الله عبد العزيز جاي و الغايب عذره معه



نورا: ايه يا ابوي ما يصير كذا تعرف ان الدكتور موصيك ما تنفعل او تجهد نفسك



سالم : بس هالشي ما يصير الولد لين الحين ما ندري عنه ... او وينه ... والحين عمر وين في



فوزية : عمر اخذ منيرة و نزلها بيت صالح و راح يدور على اخوه و ان شاء الله بيرجعون اثنينهم



سالم : الحين انتوا متى آخر مرة دقيتوا على عبد العزيز



نورا : يبه جواله مقفل ... يمكن ما عنده بطارية ... ان شاء الله بيجي



و تنزل رهف و هي تصرخ : نورا عيالك طفروا بي ... زهقوني تبين تلبسينهم ... روحي لبسيهم او خلي ماريا تلبسهم ... تراني مو بيبي ستر



فوزية : الله يهديك يا رهف ... ما تشوفين بطن اختك ايش كبره ... ما فيها شدة على عيالها ... و تعرفينها ما تواطن الشغالة تلبس عيالها



رهف : و علي انا الشغل



نورا ساكتة و هي تبتسم مسلمه امرها لامها ... سالم و هو معصب : اقول رهف فارقي عن وجهي والله انك فاضية حنا في مشكلة اخوك و انتي تتكلمين عن هالبزارين



رهف و يدها على قلبها : ليه ايش فيه اخوي ... اي واحد فيهم عمر او عبد العزيز



نورا : لا ما فيهم شي بس ما ندري وينه عبد العزيز ... اقول رهف وينهم بناتي خليهم ينزلون انا بلبسهم ما احتاج لخدماتك مشكورة



رهف : ايه احسن فكيني منهم كافيتنى مي



فوزية : يا حياتى مي ما شفتها اليوم وين هي ؟



رهف : لا تخافين فوق ما بقي بدلة الا جربتها تقولين هي العروس مو سارة ... و منور الدبة راحت و خلت الشغل كله علي



سالم : لا هي راحت تجلس مع سارة ... و أخيرا هالبنت بتجي عندنا والله اني احبها من يوم كان يجيبها أبوها بالشركة عندنا ... بس ان شاء الله عبد العزيز ما يخرب شي



نورا و رهف : يبه و حنا وين رحنا



سالم : ههههه انتوا الأساس بس حتى سوير غالية والا نسيتوا هي بنت مين ؟؟؟



نورا : والله يا بوي انا ابي اعرف عمي صالح ايش مسوي لك عشان تحبه هالكثر



فوزية : انا من اول ما اخذت ابوك و هو ما يكلمني الا عن صالح



سالم : هذي عشرة عمر ... صالح مو صديقي و شريكي بس ... صالح اخوي اللي الله ما رزقنى به ... انا من وعيت على الدنيا و انا مع عمكم صالح



رهف و هي تبتسم : الله يخليكم لبعض




نورا : ها رهوف بتلبسين عيالي او البسهم انا ؟



رهف و هي تشوف بطن نورا المنتفخ بعصبية : امرنا لله ننتظر هالحلو يطلع عشان نفتك من الشقى اللي انا فيه



نورا : الله اكبر صار شقى هذا و انتي بعد ما ترضين تسوين كل شي ... الله يخلي منور لي



رهف : اقول لا تنسين ما راح ينفعك اليوم الا انا



نورا : ههههههههه طيب لا تمنين



سالم : اقول نورا جربي تدقين على اخوك



نورا : طيب



في الكونيش عند جسر الملك فهد ... في مكان فاضى ما فيه احد الا واحد جالس على الشاطئ و حاط الشماغ على كتفه و يتأمل البحر ... كان قاعد يفكر ... ايش بتكون حياتي ... بقى ساعات و بعيش مع انسانة ما اعرفها ولا قد شفتها الا مرة وحدة صح ان هالانسانة الحين هي زوجتي على سنة الله و رسوله قدام الناس كلهم ... بس انا ابدا ما احس اني متزوج ولا مأيد هذا الزواج ... انا ما انكر انها سحرتني بجمالها و ببراءتها ما توقعتها كذا ... بس هي صغيرة هي كبر اختي منيرة ... حرام والله يزوجونها وهي بها العمر ... اهلها كيف وافقوا ... كيف هي وافقت ... بس صح عمي صالح مستحيل يرفض طلب من ابوي مهما صار ... سارة ... اه ه ه يا سارة مين انتي ... و مين انا بالنسبه لك ... يا ترى هي فرحانة انها بتتزوجنى ... او هي مجبورة مثلي على الزواج ... بس انا مو مجبور ... انا راضي بالزواج ... يووووووووه انا ايش قاعد اقول خلاص كل شي تم ... يا ترى هي طبعها مثل طبع اختى ... يعنى دلوعة و على اتفه شي تصيح ... انا اكره ما عندي منور او رهف يصيحون ... يوه اذا صاحت ذي ... ايش اسوي اجطلها مثل ما اسوي بخواتى ... والا اراضيها مثل ما يسوي عمر ... والله بلشه الله يهديك يا ابوي ...



فجأه سمع صوت سيارة وراه ... التفت الا شاف بي ام سودة ... هذا ايش جابه الحين



شاف الساعة كانت 4 و نص العصر ... يوووووه تأخر الوقت من متى و انا هنا ...



وقفت السيارة و نزل منها واحد طويل و حلو له دقن خفيف و لابس ثوب بس ... قرب من وين جالس عبد العزيز على الارض و جلس جنبه ... و قام يتأمل البحر و هو ساكت ...



عبد العزيز و هو يشوف البحر : ايش دراك اني هنا ...



عمر و هو بعد مو ملتفت على اخوه : انت تدري اني اعرف انك تحب تجلس هنا بروحك اذا كنت مهموم او متضايق



عبد العزيز و لا زالت عيونه على البحر : انت قلتها اجلس بروحي ... يعنى ليه جاي



عمر : والله ما اظن ان هالمكان ملكك عشان ما ترضى لي اجلس هنا



عبد العزيز و هو يقوم : اوكي تمام خلاص بترك لك المكان فأمان الله



عمر يمسك يد اخوه : هيه وين تعال ... بل انت على طول تعصب ... عزيز ايش فيك ... ناسي انا مين



عبد العزيز : اااااااه يا عمر والله لو تدري بالصراع اللي فينى الحين



عمر : هذا و انت خلاص تزوجت يوم المكلة ما سويت كذا... تسوي الحين ... ليه انت ما ارتحت معها ؟



عبد العزيز : شلون ارتاح او ما ارتاح و انا عمري ما كلمتها



عمر و هو فاتح عيونه : شلووووووووووووووون



عبد العزيز : اللي سمعته ما كلمتها و لا مره و لا شفتها الا يوم الملكة



عمر : و ليه لك اسبوعين مملك



عبد العزيز : انت ادرى بالظروف اللي مرينا فيها



عمر : لا والله عذر اقبح من ذنب ... الله يعينك يا سارة و يصبرك على اخوي



عبد العزيز : هيه انت ايش الله يعينها ... محد قال لها ترضى تتزوجنى



عمر : افا يا عزيز ما يصير تقول هالكلام البنت مو ذنبها هالشي و انت لا تضايق ابوي ترى مو ناقص ...



عبد العزيز : بس انا ما بي اتزوج ... ( و بصوت عالي ) يا نااااااااااااااااااس ما بي اتزوج



عمر : و ليه فهمني



عبد العزيز و من غير ما يحس : ما بي اتزوج وا حبها و تتركني مثل ما تركتك فاطمة



عمر و هو منزل راسه : الله يرحمها



عبد العزيز حس بنفسه : والله آسف يا اخوي مو قصدي اعذرني



عمر : مسموح ... من ما يجوز تقول كذا اللي صار لي قضاء و قدر و ما يصير تربط نفسك بي



عبد العزيز : خلاص هالشي صار و تم و اللي يبيه الوالد بيصير بس حب مستحيل احبها



عمر : الله يهديك بس يللا قوم ابوي معصب بالبيت و قال لي ادورك يقول من الصبح يدق و انت ما ترد ...



عبد العزيز : ايه مقفل الجوال ...



عمر : يللا قوم ... من قدك الليلة بتسافر ... حنا شغل و كرف



عبد العزيز : لا والله مستعد اشتغل 12 ساعة بس ما بي هالسفرة



عمر : يللا قوم بس ... قال ما يبي يسافر ... يا اخوي شهر العسل احلى شي بالزواج حتى اسالني انا ... خصوصا ان المراه تكون توها تستحي ...
عبد العزيز : الله يكون بالعون والله مو عارف شلون اتصرف و ايش اقول ...




عمر : الله الله ... الاخ مرتبك



عبد العزيز : هيه تراني ما اعرفها اكيد برتبك



عمر : و ذنب مين هذا كان عندك اسبوعين تقدر على الاقل تتعرف عليها



عبد العزيز : انا بطلب من الوالد انه يأجل الزواج



عمر : و السفر ؟



عبد العزيز : عادي نلغيه



عمر : اقول ترى بسطرك كف والله انك ماصخ ... يللا قوم
و يدق جوال عمر ...




عمر : هذا البيت يللا بقول لهم انك ما عندك بطارية و انت ترتب بعض الأمور فاهم



عبد العزيز : تم



عمر يرد على التليفون : الو



نورا : هلا والله عمر شخبارك يا بو مي



عمر : بخير الله يسلمك شخباركم انتوا



نورا : اقول عمر عبد العزيز لقيته



عمر : ايه هذا هو جنبي



نورا : وين كان ترى امي خايفة مرة و ابوي معصب ... توه قايل لي ادق عليه و شفت جواله مغلق



عمر : لا ما عنده بطارية و الشاحن مو بالسيارة ... كان عنده كذا غرض و خلصهم و هذا حنا راجعين البيت



نورا : احلف خلني اكلمه عشان اتأكد



عمر : اقول استحي على وجهك رجال ايش كبري و ايش عرضي تبيني اكذب عليك



نورا : والله سوري مو قصدي يا بو مي بس تدري



عمر : المهم شخبارها مي ان شاء الله عدلتوها ابيها تكون احلى من في العشا



عبد العزيز و هو يدز عمر : ما رح تكون احلى من حرمتي



عمر و هو يضحك : هذا اللي ما يبي و ما ادري ويش و الحين يدافع عنها



عبد العزيز : لا تصدق بس تدري بنتك شيفة و مستحيل تكون احلى وحدة



عمر : اقول جب ... الشرهة مو عليك الشرهة على اللي عطاك وجه ... مي تسوي عشرة من امثالك فاهم



عبد العزيز : هههههههههههههه يالله انا راجع و قام و راح لسيارته و راح عمر بعد لسيارته و تذكر ان نورا لا زالت على التليفون



نورا: الوووووووووووووووو عمر وينك



عمر: ههههههههههههه هلا انا معك



نورا : لا احلف بس ... لي ساعه ابنبع ولا احد يرد علي تراك بتخسر ابوي



عمر : لا الخير واجد لا تخافين



نورا : وين رحت ؟



عمر : هذا عزوي يقول ان حرمته بتكون احلى من ميونة قلبي




نورا و هي فاتحة عيونها و تصارخ : احلففففففففففففففففففففف



عمر : وجع فقعتي اذني ... و ليه اكذب تراك مصختيها اليوم كل دقيقة مكذبتني



نورا : لا بس مستغربة ... عزيز يتغزل باحد ... مو خابرته يعرف يفرق بين الغزال و القرد



عمر : اقول ضفي وجهك بس يللا ما احب اتكلم و انا اسوق ربع ساعة و واصلين البيت ... و لا تنسون تجهزون عروستي عشان اخذها معي



نورا : الله يخليها لك و يخليك لها يللا مع السلامه بروح ابشر اهلي



عمر : مع السلامه




سكر التليفون و هو مبتسم ... و اخيرا بيدخل بيتهم الفرح ... صدق ان عبد العزيز مو موافق على هالشي ... بس هو حاس ان دخول سارة لبيتهم بيكون فاتحة خير للكل
  #2  
قديم 09-22-2008, 05:05 AM
 
رد: الخوف من الحب ... رواية خليجية ولا أروع

يللا بدي شوف الردود عشان أكمل الرواية لأنها عم تتعبني لما أعدلها ما بدي تعبي يكون على الفاضي و ما حدا يقرأها اوكي ؟ :88:
  #3  
قديم 09-22-2008, 01:09 PM
 
رد: الخوف من الحب ... رواية خليجية ولا أروع

جزاك الله خيرا
ومعذرة عدلت في اللون لأنه متعب للنظر
  #4  
قديم 09-22-2008, 04:51 PM
 
رد: الخوف من الحب ... رواية خليجية ولا أروع

مرسي إلك تعبتك معي
  #5  
قديم 09-22-2008, 05:01 PM
 
رد: الخوف من الحب ... رواية خليجية ولا أروع

مشكورة حبيبتي حلوة كتير متل إلي كتبتها
 

مواقع النشر (المفضلة)

أدوات الموضوع
انواع عرض الموضوع

تعليمات المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code is متاحة
كود [IMG] متاحة
كود HTML معطلة
Trackbacks are متاحة
Pingbacks are متاحة
Refbacks are متاحة


المواضيع المتشابهه
الموضوع كاتب الموضوع المنتدى مشاركات آخر مشاركة
انواع مرض الفوبيا غصن الشوق صحة و صيدلة 1 11-06-2008 10:38 PM
تعريف الخوف تئلمت بس تعلمت علم النفس 1 04-03-2008 01:33 PM
انواع الخوف وكيفية التغلب عليه شذى الشام علم النفس 7 12-14-2007 10:30 PM
الخوف عند الأطفال dark girl أرشيف المواضيع الغير مكتمله او المكرره او المنقوله و المخالفه 3 02-06-2007 01:12 AM
! ஜ .¸¸ ﬗm الفوبيا ( الخوف)... mﬗ ¸¸. ஜ فرسكا صحة و صيدلة 3 08-15-2006 08:55 AM


الساعة الآن 04:42 PM.


Powered by vBulletin®
Copyright ©2000 - 2024, vBulletin Solutions, Inc.

شات الشلة
Powered by: vBulletin Copyright ©2000 - 2006, Jelsoft Enterprises Ltd.
جميع الحقوق محفوظة لعيون العرب
2003 - 2011