عيون العرب - ملتقى العالم العربي

العودة   عيون العرب - ملتقى العالم العربي > عيـون القصص والروايات > روايات طويلة > روايات كاملة / روايات مكتملة مميزة

روايات كاملة / روايات مكتملة مميزة يمكنك قراءة جميع الروايات الكاملة والمميزة هنا

 
 
LinkBack أدوات الموضوع انواع عرض الموضوع
  #21  
قديم 07-04-2017, 08:32 AM
 
اقتباس:
المشاركة الأصلية كتبت بواسطة -Fire مشاهدة المشاركة
اخيراااااااً قررت فك الحجز
مع انو بكرا امتحان بس معي وقت س1

السلام عليكم و رحمة الله و بركاته
كيفك اونيتشان
ان شاء الله تمام
وهليكم السلام
الحمدلله منيحة
وانت


شسسسسمه
روايتك ابدااااع
بكل ما للكلمة من معنى و دون مجاملة
هي مرتي الاولى بقراءة رواية عامية
بس بصراحة فتحت نفسي
عال
انت اول مرة بتقري وانا اول مرة بكتب


طبعاً هالرد عن الفصل الاول و بس
لاني لسا ما قرأت اللي بعده لهيك سامحيني
ماشي مش رح اضربك

اول شي العنوان
بصراحة كتير حلو و معبر
انو شتاء الحياة هو ربيع حياة اريج
يعني لما الدنيا بتشتي و تمطر يكون عند اريج زهر
جد تشبيه جميل
وفقتي بأختيار العنوان " class="inlineimg" />
يب يب :" class="inlineimg" /> هذا بالضبط ما قصدته
الصراحة كنت خايفة العالم تلاقي العنوان مبهم شوي
بس الحمدلله طمنتيني


ننتقل لاسلوبك
كان من اجمل الاساليب للروي الذاتي
بحيث طلعتي مشاعر الشخصية بطريقة عفوية رهيييبة
جد حسيت حالي اندمجت جداااً مع كلامها
و خصوصاً لهجتها
الغريب اني سورية بس ما بحكي هيك
الا ان لهجتها جميلة جداً و كأنها عاطية على لبناني
بس بنكهة سورية
هيدا لان اللهجة اصلا لبنانية مش سوريا
بس اللهجتين كتير قراب لبعضهم


الاحداث كانت جميلة و ضحكت على ردات فعلها 😂
لما تلوت بوطها بالطين و لما فهم الشب كل كلامها بمذكراتها
حسيتها مصدومة او مصدقة حالها انو ألغازها مو مفهومة بينما هي كتير واضحة 😂
يب يب : nop:
مفكرة حالها ذكية كتير


متحمسة لاعرف شو سبب هاللقاء المقدر
و كيف راح يجتمعوا سوا مرة تانية " class="inlineimg" />
كملي القراءة بتعرفي


في شوية اغلاط املائية
لازم تتروي و انتي عم تكتبي و تراجعي الفصل منيح
للصراحة براجعو اكتر من مرة
بس ما الي حظ بهالمجال
بيضل في اخطاء بتهرب رغم كل شي


واصلي ابداعك
سيتم اللايك و التقييم و بدك تنتظري الاختام الجديدة حتى اختملك روايتك بما تستحق
لا تنسيني من الفصول القادمة
في امان الله و حفظه حب0

اوك ^^ سكرا لك
قريت التقييم
جميل ومحمس
وردك كمان قريته من زمان بس ما كان الي خلق رد

اوك ما رح انساكي من بقية الفصول
هلاء بتوصلك دعوة ^^
__________________
شكرا دودي عهدية العيد ميلاد الحلوة




هديتي لاني انشط روائية


  #22  
قديم 07-09-2017, 12:02 PM
 
[ALIGN=CENTER][TABLETEXT="width:70%;background-image:url('http://up.arabseyes.com/uploads2013/01_05_1714936484337918.jpg');"][CELL="filter:;"][ALIGN=center]



خلصت اخيرا من الشغل باخر خصلة، اطلعت بالمراية راضية عن منظري الجديد، شعري صار اشقر متل نوال وكيرلي عالخفيف متلها، تبسمت بحماس وانا عم فكر، لنشوف شو بتكون ردة فعل قمر الليل اليوم لما يشوفني، اكيد رح يدوب فيني، اذا كانت نوال ما بتتفوق علي الا بلون الشعر فالمفروض انا هلاء صرت احلى منها..."

طلعت بساعتي لأنصدم من الساعة، اسرعت لبرا غرفتي لاتوجه لبرا البيت، بس الشي الصادم والغير متوقع كان خيي الصغير، لقيتو حامل شمسية وقح البرية ونص عصياتها الي فوق مكسورين، ركضت لعندو وانا عم عييط عليه وفقعتو كف، المسكين من الصدمة ما اعترض حتى او بكى، بس ظل يطلع فيني مصدوم وانا بعدني بصرخ عليه لحد ما اجت امي لتشوف شو المشكلة، تطلعت بامي وقلتلها وانا معصبة:

"ليكي شو عمل بشمسية الاستاذ
هلاء كيف بدي رجعلو اياها؟
انا خلئة مش خالصة من لسانو..."

امي ما استوعبت شي من الكلام الي حكيتها اياه بسبب لون شعري، غضت السمع عن كلامي وبلشت تعيط علي لان صبغت شعري وانا بعدني صغيري مع اني بالسبعتعش، عصبت منها لانها ما راعت مشاعري وحملت الشمسية وطلعت من البيت، وكل الطريق وانا فكر كيف رح واجه الاستاذ بعد عملة خيي، وصلت لعند المكان الي بلتقي فيه مع نوال، حسيتها مصدومة من منظري الجديد، رجعت ابتسمتلي وقالتلي:
"نعيما الصبغة... "

هلائد كان تعليقها عالموضوع وبس، تضحكتلها انا ورديت عليها:

" الله ينعم عليك..."

مشينا عالمدرسة ساكتين لحد ما زهئت فحكيتلها عن الشي الي عملو خيي بالشمسية، تضحكت علي وقالتلي انو اخواتها الصغار بيعملو نفس فيها، كتير مرات بتكون مستعيرة غراض من رفقاتها وهيك بيحرجوها، للصراحة ما كان في داعي تخبرني بهالشي لاني وحدة من رفقاتها الي مرقو بهالتجربة، ولان عندي خي متل خواتها فما كنت عاتبها لاني بعرف اديش صعبة الشغلة،

واكيد لانها صديقتي الانتيم، بس بعد التفكير بهالامر، لامتى رح نضلنا اصدقاء وانا ناوية اخذ منها حبيبها، يا ترى لو بتعرف، شو بتكون ردة فعلها؟
مين رح تفضل؟ انا او هو؟...

اكيد رح نوصل عالمدرسة مأخرين بسبب تمشيطة شعري وناكلها عيطة من الناظرة كالعادة، الصراحة هاي صديقتي بتخلي ضميري يأنبني ديما، رغم انها عارفة انها رح تتأخر اذا نطرتني الا انها مصرة تنطرني، وهلاء بعد الي صار بيننا ضميري مأنبني اكتر، هي الصديقة والوفية بكل المواقف وانا الصديقة الشريرة الي ناوية اسرق حبيبها

عكل حال انا ما رح اجبروا يحبني، هو لحالو رح يشوفني وينعجب فيني اكتر منها وينساها ويرتبط فيني، غطيت وجيي بايدي لان التفكير بالشغلة سببلي وجع راس، وصلنا عالمدرسة القيت نظرة لجوا غرفة الاساتذة للاقي وقح البرية قاعد شارد وعم يدخن سيجارة، طلبت من نوال تسبقني عالصف لرجع الشمسية للوقح بس اصرت تبقى معي حتى تكون معي وقت واجه الموقف، فتنا مع بعض عالغرفة وحطيت ادامو الشمسية وقلتلو:

"اظن... انو... انا لازم..."

وقبل ما كمل جملتي اطلع بشعري مصدوم رجع اطلع فيني من فوق لتحت وقلي باحتقار:
"شو عاملة بحالك؟..."

تجاهلت نزرتو المقرفة وقلت بدلال:
"صبغت شعري اشقر...
حلو؟..."

اطلع بنوال وقلها:
"ارجعي عصفك بدي احكي مع اريج..."


تمسكت بيدها وقلتلو
"لا رح تضلها حدي
نحن اصدقاء منضل مع بعض بكل الظروف..."

اطلع فينا بمسخرة وقال:
اصدقاء؟...
ونعم الصديقة انت...

رجع اطلع بنوال وامرها ترجع عالصف، وللاسف نوال من النوع الي ما بتقدر تتمرد على استاذ، مهذبة درجة اولى، اخذ الاستاذ الشمسية من ايدي وحطها عجنب رجع قلي:
"بقدر افهم سبب موديل شعرك الجديد؟..."

هزيت كتافي عادي وانا عم قول:
"حب التغيير... "

- قصدك كرمال تتشبهي بنوال وقمر الليل يحط عينو فيكي...

- لا مش كرمال هيك

- اريج...
العالم حولك مش غباية
شو يعني تعملي شعرك نفس شعر رفيقتك
بعد ما طلبها الشاب الي بتحبيه؟

عصبت منو انا وعيطت بوجو:

-ما خصك ومعاش تتدخل فيني
هاي شمسيتك رجعتلك اياها وانا راجعة عصفي

- وبتظني ان صبغة شعر رح يخليه يغير رأيو
ويحبك بدل نوال

- على الاقل بقدر جرب
ما رح استسلم بسهولة...

- صدقيني...
مش رح تفرق معو

رفعت راسي بشموخ وقلت:
"بهالحالة رح تقل العيار وافتح كم زر من القميص..."

اسرع لعندي معصب رافع السبابة عم يهدد:
" اذا عملتي هالشي بطردك من المدرسة
من دون ما يعترض حدا
هالحركات بالمدرسة ممنوعة..."

- فاذا بعملها برات المدرسة وما الك معي

زم شفافو وغمض عيونو كأن عبالو يفقعني شي كف وماسك حالو غصب عنو، رجع قلي بعدما هدي شوي:
"ليش بتحبي تذلي حالك هيك ادام هالشاب
هو اختارها لانو بيحبها
مش لانها حلوة..."

- ما حبها من ولا شي
اكيد انعجب فيها قبل ما يحبها
ما اجا الحب فجاة يعني..."

- مش صحيح
ما انت اجمل منها
بس مش هالشي الي خلاه يحبها بدالك

- لكن شو الي خلاه يحبها

- رفيقتك عشرتها حلوة
قلبها طيب وبنت وفيه
بينما انت...
بظن ما في داعي خبرك
اذا رفيقتك هيك بترديلها اخلاصها
ما رح يتوقع تكوني معو افضل مما انتي معها"

صرخت:
- هيدا رايك انت
مش كل الناس بتفكر متلك

صرخ علي:
"اصطفلي
ما بعرف ليش بعدني بنصحك
وانت بكل مرة ما بتتسمعي وبالاخر بتطلعي ندمانة"

- انت ما نصحتني
انت بس قلت عني كلام بيجرح
بعدان لا ما بطلع ندمانة ولا رح اطلع ندمانة
هلاء بتشوف انو رح يحبني غصب وعنو وعنك وعن الكل

طلعت من غرفة المعلمين واسرعت لاهرب عصفي قبل ما يفتح الموضوع مرة تانية، وقبل ما فوت عصفي بتوقفني الناظرة
"بعدك هون نوال، من ساعة بعتك عالصف..."

رجعت اطلعت فيني منيح:
"انت مش نوال!... "

قربت لعندها :
"لا انا اريج
بتمنى ما تعلقي عالصبغة لاني اكتفيت
سمعت تعليقات من الصبح بيكفو لاسبوع...."

"المهم
ليش تأخرتي..."

- عجئة سير

- اولا، اليوم ما عم تشتي حتى يكون في عجئة
تانيا، انتو اتنينكم ما بتجو بالسيارة
خبرتني نوال انها كانت السبب بتأخيركم
بس بعد ما شفت شعرك عرفت مين كان السبب...
بتمنى ايام المدرسة ما تنشغلي بشعرك
وبكري لتجي لان الدروس بتروح عليك
والسنة عندك تقديم رسمي

هزيت راسي وانا عم وافق كلامها لسكتت وقالتلي:
"يلا ارجعي عصفك..."

مشيت من عندها وفتت عالصف، سلمت على معلمة الاجتماع ورحت قعدت بمقعدي حد نوال وطبيت راسي عالطبقة، اطلعت فيني نوال مستغربة وقالتلي:
"شو بك
شكلو الحوار بينك وبين الاستاذ ما بيبشر بالخير..."

- ما تفتحي السيرة
مش طايقة اسمع اسمو...

سكتت نوال ورجعت تتسمع لشرح الدرس بينما انا عقلي كان مشغول بشي واحد "صبغة شعري وردة فعل الي حواليي بسببها
كان ردة فعل قمر الليل او الاستاذ او الباقيين
الشغلة بلشت تضايقني وحابة ارجع
للون شعري الطبيعة من كثرة ما سمعت انتقادات
بس حابة اسمع رأي قمر الليل قبل..."


وجهت نظري لعندو للاقيه عم يطلع فيني بطريقة غريبة، اتمنى تكون اعجاب مش متل كل مرة اطلع غلطانة ومش عارفة فسر تعابير الي حولي

كانت الساعة مملة حتى اخير خلصت، مجرد ما رن الجرس وطلعت معلمة الاجتماع حتى اجتمعت البنات حولي وهني يعطوني رايهم بشعري، الاغلبية قالوا ان الاشقر ما لابقلي، الصراحة كلامهم كان محبط، كنت متحمسة كتير للون شعري الجديد، واخيرا اجى قمر الليل انضم النا، سلم علينا عالسريع رجع سلم على نوال بهدوء، نظرات وابتسامات وهول الحركات الغبية الي بتكون بين 2 بشعين بيحبو بعض، للاسف خطتي ما نجحت، هو حتى ما علق عشعري، للاسف، رح اضطر اسالو بنفسي، رسمت ابتسامة حلوة على وجي وبخجل:

- ايمن...

التفت لعندي ومجرد ما اطلع فيني بلشت تقوى نبضاتي، بلعت ريقي ورجعت حاولت اتشجع وقلت وانا عم العب بوحدة من خصل شعري:

- ما عطيتني رايك...

اطلع بشعري وهو عم يفكر رجع قلي:

- الشقار حلو
بس ما بحب التقليد...

رجع برم عند نوال وهو عم يقول بحنان:

- الاصلي ديما بيكون اجمل...

ابتسمت حتى ما اظهر ردة فعلي المنزعجة ادام بقية رفقاتي ورجعت سألتو:

- ليش شو الفرق بين التقليد والاصلي؟ تنينهم اشقر...

رجع برم لعندي وقلي مستغرب:

- انت بنت، المفروض تفهمي بهالشغلات اكتر مني...
شوفي حواجبك كيف لونهم غامق
طالعين توك ادام شعرك
وجك طالع غلط

تفكرت بكلامو شوي، لما ابتسمت بحزن عرف انو وصلتني الفكرة فرجع برم عند نوال وكملوا كلامهم المزعج بينما انا بس قعدت بطبقتي زعلانة من كلام قمر الليل، اخيرا اجا الدكتاتور واضطر الكل يرجع لمكانو، لاول مرة بفرح لما يجي، ما حدا بيسترجي بحصتو يزيح نظرو عن اللوح او الكتاب، كرمال هيك بقدر اضمن انو ما حدا رح يطلع بشعري ويتمسخر، بس للأسف الشغلة رح تكون لحصة وحدة بس، بقية الحصص ما بقدر اضمن بشو رح يتهامسوا البنات، والاضرب، انا صرت ابشع بعين قمر الليل، لازم ارجع للون شعري القديم، اليوم وانا راجعة عالبيت رح جيب صبغة جديدة

خلصت الحصص كلها اخيرا، اطلعت فيني نوال محرجة وقالتلي انها رح تضهر مع قمر الليل كرمال هيك ما رح تقدر تروح معي، ابتسمتلا وانا عم قلها انو عادي ما في مشكلة وراحت مطمئنة البال، راقبتها بحسرة وهي ماشية معو لبرا الصف، ديما كنت اتمنى كون مكانها، حاولت اتناسى وحملت حالي ومشيت، كانت الدنيا عم تشتي، تذكرت شمسية الاستاذ الي نزعها خيي، وعالسيرة شفت الاستاذ ماشي عم يطلع الشمسية وفتحها وانصدم من منظرها، شكلو لهلاء مش كاين فاتحها قبل، كأن حسني وراه وبرم مباشرة لعندي دون سابق انذار اطلع فيني معصب، غمضت عيوني متوترة، الشمسية معو من اول الصبح، ليش لهلاء لفتحها لما كنت انا حدو، قربت لعندو لاعتذر، خبرتو انو خيي الصغير هيك عمل وديما بيعمل فيني نفس الشي، ملامحو ما تغييرت، قلتلو حتى خفف من الجو المشحون:

"رح جبلك غيرها"

قال منزعج:

"بتعرفي اديش كان حقها هالشمسية؟...
كانت ضد الكسر من العواصف...
الها معي خمس سنين..."

زميت شفافي ورجعت اعتذرت، تأفف رجع اطلع فيني وقلي:
"كيف مشيت اوضاعك مع قمر الليل ولون شعرك الجديد"

تأففت بانزعاج وقلتلو:
"ما تجيب السيرة
بكرا رح ارجع للون شعري الطبيعي..."

ابتسم مبسوط وقلي:
"افضل...
طالعة مقرفة بهاللون..."

فقعتو بقس بكتفو وقلتلو:
"وحدك انت المقرف..."

حك كتفو وهو عم يضحك وقلي:
"كنت رح حب وصلك عالبيت، بس بتعرفي
شمسيتي نص عصاياتها مكسورة
يعني ما رح يساع تحتها الا شخص واحد
ما رح كون شهم واتنازل عنها متل مبارح
والا بكرا بلاقيكي كملتي تخريب باقي الي ضل زابط


قال كلامو المستفز وطلع بسرعة من المدرسة وانا عم صرخ عليه:
"مش انا الي نزعتها، قلتلك هيدا خيي..."

الوقح عمل حالو مش سامع وضل رايح، بس قبل ما يوصل عالقوع التفت لعندي مبتسم ابتسامة مزعجة ورجع اختفى ورا زاروبة، تلقائيا ابتسمت انا كمان وهزيت راسي وانا عم قول:

" من وين طالعلي هالزلمة
عاساس انا بحب الشمسيات
احب عقلبي امشي تحت الشتا
لولا اني كنت تحت تأثير الصدمة لما شفتو مبارح
ما كنت اخدت منو الشمسية..."

مشيت لحد ما وصلت على محل مبارح لجيب صبغة جديدة، قمت فتش بين الصبغات على لون شعري الاصلي بس ما لقيتو، لفتني لون شعر نبيذي كتير حلو، عجبتني الفكرة، ليش ما بعمل تغيير صغير، ما بتشبه بنوال وبنفس الوقت بجدد شوي بحالي

اشتريت الصبغة الجديدة ورحت عالبيت مبسوطة وانا عم فكر كيف رح يكون ردة فعل الي حولي بلون شعري الجديد، امي اكيد رح تقتلني لان باقل من اسبوع رح كون صبغت شعري مرتين بينما البقية مش رح اجزم، بس المفروض انو هيدا لون غامق يعني بيلبقلي مش متل الاشقر، اخذتها ورحت عند البياع متحمسة من الخبرية الجديدة الي رح اكتبها بدفتر ذكرياتي...



[/ALIGN]
[/CELL][/TABLETEXT][/ALIGN][/QUOTE]
__________________
شكرا دودي عهدية العيد ميلاد الحلوة




هديتي لاني انشط روائية


  #23  
قديم 07-15-2017, 06:38 PM
 
][ALIGN=CENTER][TABLETEXT="width:70%;background-image:url('http://up.arabseyes.com/uploads2013/01_05_1714936484337918.jpg');"][CELL="filter:;"][ALIGN=center]



اطلعت بشعري الاحمر عالمرايا، جميل جدا، عملتلو ليس عالسريع احلى ما ارجع أخر نوال وهي عم تنطرني وتاكلها بهدلة من الناظرة بسببي، مشيت لبرا الغرفة بسرعة ولقيت هيي الصغير عم يطلع فيني نظرات مريبة، اطلعت فيه بحقد وقلتلو:
"وشو عملت اليوم؟..."

استغرب سؤالي وقلي بكل براءة:
"ولا شي..."

رجع ابتسم ابتسامة كبيرة وقلي:
"انت سوبز ساينز..."

طلعت فيه نظرة هبلة وقلتلو:
"سوبر ساينز ! ..."


كمل بحماس:
"هني لما يتطورو بيتغيير شعرهم للاصفر
ولما يتطورو اكتر بيصير شعرهم احمر متلك..."

فنجرت عيوني من كلامو، هلاء فهمت انو عم يشبهني بهيداك السخيف الي بيحضرو بالرسوم المتحركة دراغون بول، قلتلو:
"روح من ادامي قبل ما اقتلك
رح قول لماما معاش تخليك تحضر تلفزيون
لانك معاش قادر تميز الواقع من الخيال..."

بصوت مسخرة رد علي:
" هه... تلفزيون!...
ليش مين بعد يحضر تلفزيون
كل حلقة بيعيدوها الف مرة
والحلقات كلها قديمة
الي بدو يواكب لعصر لازم يحضر عالنت"

فنجرت عيوني وانا اطلع فيه لما سمعت كلامو:
"ولك...
بعدك مش طالع من البيضة..."

" اختي!...
افتحي عيونك
انت الي بعدك مش طالعة من البيضة
حتى ما تعرفي ان التلفزيون
ما بيعرض شي خرج ينحضر..."

تضحك علي بمسخرة ورجع راح ليجهز حالو للمدرسة، وانا الي كنت مفكرة خيي صغير وبريء، طلعت انا الصغيرة بنظرو وهبلة وبريئة، على كل حال مين مهتم بالي بيعرضه التلفزيون من رسوم متحركة، انا بيهمني المسلسلات الهندية والتركية وهول الشغلات، وبالفعل متل ما قال عالنت الحلقات بتكون اجدد بس ما بيحطوا الا اول خمس دقايق من كل حلقة جديدة ما معروضة علتلفويون ومش باللغة العربية، معقولة خيي بيفهم لغة غير العربية، بستبعد، ما هو باللغة العربية حمار فكيف بغيرها

تجاهلت كل هالافكار لان كنت مستعجلة وركضت عالثانوية، وعالطريق كالعادة التقيت بنوال، واظهرت انعجاب كبير بلون شعري، قالتلي كتير حلو وكتير لابقلي، انبسطت كتير من كلامها لان مبارح اللون الاشقر عملي كآبة، ان شاء الله وقح البرية كمان تكون ردة فعله ايجابية لان بالعادة شغلتو الانتقاد، ما اظن حتى لو انعجب باللون يخبرني هالشي، بحسو بيحب يزعجني وبس...

~~~

الصراحة مرت ايام بلا ما التقي بوقح البرية، دوامو ما كان يناسب دوامي، يجي عالمدرسة مأخر حسب الحصص ويرجع ابكر مما انا كنت اطلع، مرات شوفو بس من بعيد لبعيد، مع اني كنت عارفة انو رح يتمسخر علي كالعادة بس كنت حابة فرجيه اني غيرت عن الاشقر واني مش عم اصبغ بس كرمال قمر الليل انما لاني بحب التغيير، الصراحة قرفني لما قلي انو عم ضل ذل بنفسي كرمال شاب بيحب غيري، وما حبيت تضل هالفكرة براسو

اليوم ما قدرت نام بكير، اليوم اكيد رح التقي باستاذ الفزيك لان رح يعلمنا، فقت بكير كتير متحمسة واطلعت بحالي عالمرايا، الصراحة حاسة شعري صار ممل، الي تقريبا اسبوع على نفس الشعر، حسيتو بحاجة لشوية بهجة، شوية حيوية، اطلعت بالساعة، بعد بكير كتير للمدرسة، بلحق اعمل شي مميز من زمان كنت حابة اعمله بس بسبب وقتي الضيق او بالاحرى ما كان الي خلق، بس اليوم متحمسة كتير كرمال هيك رح اعملو، اخدت ماكينة الكيرلي وعملت شعري لكات صغيرة كتير لحد ما صار شعري حول راسي متل طابة، فرطت ضحك، ما كان بهالجمال بس التغيير حلو، اخذت شكلة ورجعت شعري عن وجي لورى والباقي تركتو مفلت، والصدمة اني تأخرت عالمدرسة، بقيت تلات ساعات وانا اعمل فيهم، لبست عالسريع وطلعت من البيت بلا اكل مشي سريع ووصلت لعند نوال وانا عم اتنفس بصعوبة، قالتلي مصدومة:
" ولك ليش هيك عاملة بحالك..."
ما بعرف ليش الصدمة اذا بسبب شعري الغريب متل الغجر او كرمال طريقة تنفسي، قلتلها بكلام كتقطش وانا ايدي عقلبي:
"تأخرت كتير بسبب شعري...
مع اني فقت بكير."

اكيد رح تتأخري
هالموديل كان المفروض تعمليه بالليل قبل النوم
لان لازم تعمليه خصلة خصلة
والخصل صغار
هلاء خلينا نمشي بسرعة
تأخرنا كتير..."

- وانت ليش بعدك ناطريتني
كل مرة بتحسسيني بالذنب
بيقولو عنك صديقة وفية
الاصدقاء ما لازم يحسسو اصدقائهم بهالنوع من المشاعر

- الصديق هو الي بيوقف مع صديقه وقت الضيق
وانت هلاء بضيق
ما يأنبك ضميرك لان انا اخترت انطرك
مش انت الي طلبتي مني

مسكتني من ايدي ومشيت ومشتني وراها، بالاحرى جرتني وراها لان بالكاد كنت قادرة امشي، وصلنا عالمدرسة والحمدلله بعدو ما كان داقق الجرس، مشينا لنروح عالمجموعة اصدقائنا بس لقيت استاذ الفزيك بعدو واصل للمدرسة، شكلي ما رح اضطر انطر لاخر حصة لفرجيه علون شعري، ودون ما انتبه لخبر نوال ركضت لعندو، وقفت ادامو لاقطع طريقو وقلتلو بحماس:

" شو رايك بلون شعري الجديد..."

ضليت مبتسمة بحماس بينما لسبب ما بعرف شو هو انصدم الزلمة لثواني ومجرد ما فاق من صدمتو عصب علي بدون سبب وقلي بلئمنة:
"انقلعي اختفي من وجي..."

بعدني عن طريقو بعصبية وراح كمل طريقو معصب وانا بقيت مصدومة، مسكتني نوال وقالتلي:
"شو قلتيلو للاستاذ؟
ليش هيك عصب؟..."

اطلعت فيها وانا بعدني مصدومة وارجعت اطلعت فيه وهو عم يفوت عغرفة المعلمين، غمضت عيوني وانا عم حاول استوعب شو صار هلاء بالضبط، رجعت اطلعت بنوال وقلتلها:
"وانا عارفة شو عم يصير مع هالاهبل!...
امشي خلينا نرجع لمجموعتنا..."

ما لحقت كمل جملتي حتى رن الجرس ونسينا امر مجموعتنا، بس رحنا لنوقف بالصف، الصراحة ردة فعل وقح البرية المزعجة خلتني متضايقة كل النهار وما ركز عالحصص، صح بالعادة بيتمسخر علي، بس هالمرة الشي كان مختلف، هو حكاني بطريقة بشعة كتير وانا ما عملتلو شي، معقول فكرني غيرت لون شعري لان قمر الليل ما عجبو اللون الاشقر؟ بكل الحالات ما بيحقلو يعاملني بهالطريقة

والصراحة انو ردة فعل معلمة الكيميا ما كانت مختلفة كتير عن خيها، مع انها ما حكتني، بس نظراتها الي طول الحصة ما كانت بتطمن، وهي شو قصتها كمان، ما تكون مفكرتني اني عملت هيك كمان كرمال قمر الليل، تأففت منزعجة وفكرت، شو ما كان السبب هني شو خصهم

اخيرا خلصت الحصة لاتخلص من نظرات المعلمة المزعجة، مع اني كنت خايفة من الحصة الي بعدها لان الاستاذ الصبح كان مش طبيعي لما شافني، وعن غير عادة المعلمة ما قعدت تفتح احاديث جانبية مع رفقاتي انما طلعت من طاولتها واجت لعندي مباشرة، شلحت الطئية من راسها وحطتها براسي وقالتلي:
"حاولي تخلي شعرك مخبى بحصة الفيزيك
ما بعرف شو رح تكون ردة فعل جواد لو شافك هيك
بس اكيد النتايج ما رح تكون مرضية..."

حملت حالها وطلعت من الصف وانا اطلع فيها وفكر:
"شو عم يصير اليوم بالعالم؟
هه... واضح انها ما بتعرف ان الاستاذ شافني بالفعل اليوم
وبالفعل النتايج ما كانت مرضية..."

وبما ان الاستاذ شافني وخلص شلحت الطئية وحطيتها عجنب، فات الاستاذ عالصف واطلع فيني بطرف عينو وحاول يتجاهلني، احذ كتاب اول تلميذ طلع بوجو بلا ما يسألو وصار يتصفح الكتاب بينما سأل رفقاتي:
"لوين وصلنا اخر حصة؟..."

خبروه التلاميذ بس مش شكلو كاين عم يتسمع عليهم، خلص تصفح الكتاب رجع يتصفحو بالمقلوب ووقف بنص الكتاب شارد رجع اطلع بالتلاميذ وقلهم:
"وين قلتولي وصلنا؟..."

فرطو التلاميذ ضحك ورجع خبرو هيدا الي اخذ منو الكتاب وفتح اخيرا عالصفحة المناسبة، وقبل ما يبلش شرح رجع اطلع فيني نظرة سريعة ورجع للكتاب متلبك، ولسبب من الاسباب كان الاستاذ ضايع اليوم بشكل مش طبيعي، شي يطلع فيني ويشيل عينو عني هالسريع، كلو معصب مش عارف يركز ولا عارف يشرح الدرس لحد بالاخر انفجر وصرخ علي:
"اطلعي برا الصف اريج..."

صدمة على صدمة، الصبح عييط علي بلا سبب وهلاء عم يطردني من الصف كمان بلا سبب، معقول كل هيدا كرمال شعري؟ لا اكيد في شي تاني، اطلعت بازرار المريول لاتأكد انهم مسكرين متل الخلق لان هيديك المرة هددني يطردني من المدرسة لو فتحتهم بس كانو طبيعيين متل كل رفقاتي والاكتر كنت لابسة كنزة قبة خنق، فشو القصة معو هالزلمة

الكل عم يطلع فيني بدو يعرف شو الي عملتو حتى قرر الاستاذ يطردني، الاستاذ وقف محتار وغطى وجو بايدو مش عارف شو يساوي رجع حكا معي باحترام بس ما غير قرارو عن طردي:
"اعملي معروف اريج اطلعي برا..."

اطلعت فيه منشفة وج وقلتلو:
"ما بطلع برا حتى اعرف السبب"

زم شفافو كأنو عم يحاول يضبط اعصابو وقال عم يهدد:
" بعدني عم حاول احكيكي بهدوء
ما تخليني عصب
اطلعي برا احسن الي والك..."

تكتفت مغترضة وقلت بتحدي:
"مش طالعة قبل ما اعرف شو ذنبي... "

اشر لبرا وهو عم يعيط:
"قلتلك اطلعي
مش عارف ركز مت ل البشر وانت واقفة ادامي بهالشعر
ما فيني اظلم رفقاتك كرمال حضرتك قررتي تغيري موديل شعرك
اطلعي وبتمنى بحصصي معاش تعملي شعرك هيك
واذا ما عملتيه هيك بغير ايام كمان بيكون افضل..."

الصراحة ما بعرف شو مشكلة الاستاذ مع هالموديل، انا كتير حبيتو، او انو متل ما قال الكل لابقلي لدرجة ان جمالي مش سامحلو يركز متل البشر، عرفت انو استنتاجي كان سخيف، بس عذر الاستاذ كان اسخف، بس مع هيك قررت اطلع لان عيون التلاميذ صارت عم تتردد بيني وبين الاستاذ، ورغم ان الكل ساكت مصدوم من كلامو الا انني متأكدة انو الف فكرة عم تبرم براسهم، واكيد افكارهم مش رح تكون افضل من افكاري، بالاخص انو مش عارفين اديش اني انا والاستاذ ما منطيق بعضنا

وقفت وطلعت لبرا بلا ما ضيف ولا كلمة لان الوضع صار محرج، مع اني للصراحة بعدني مش فاهمة شو مشكلة وقح البرية بالضبط، طلعت قعدت بالملعب وصرت اكتب بدفتر ذكرياتي عن جنون الوقح اليوم، وسبيتلو بكل لغات العالم وتمنيت لو اني ما شفتو اليوم ولا شافني، خلصت كتابة وضل شوية وقت قعدت عد الثواني لحد ما كان خلص الوقت لان ما سمحولي اطلع قبل ما يخلص الدوام، كمان كنت تاركة شنطي بالصف، واخيرا رن الجرس، قمت لجيب الشنطة بس لقيت نوال جايبتلي اياها واجت لعندي بفضول مش طبيعي:
"شو صار معك ومع الاستاذ
ليش هيك عمل..."

رديت عليها معصبة:
"وانا شو بعرفني شو بيصير معو فجأة
شكلو عندو مشكلة مع الصبغات
هيديك المرة لما صبغت شعري كمان عملي مشكلة
نكاية فيه رح ضل على هيدا اللون وهيدا الموديل
مش معاجبو يروح يبلط البحر..."

وفجئة لقيتو نازل من الدرج عم يطلع فيني بحقد رجع فات عغرفة المعلمين، رمشت بعيوني مصدومة، بلشت راجع حساباتي بس مش ذاكرة اني عملت شي لهالزلمة، ليش هيك عم يتصرف معي، مسكت ايد نوال وقلتلها:
"خلينا نطلع من هون قبل ما يفقعو فيوزاتي ومعاش يضل فيني عقل..."

"اممم... انا..."

اطلعت فيها مستفسرة وقالتلي:
"بعتذر بس كنت متفقة مع ايمن نطلع مع بعضنا شوي قبل ما ارجع عالبيت..."

اطلعت فيعا شاردة رجعت قلتلها:
" اوك...
خذي راحتك..."

- عنجد بعتذر ما كنت ناوية اتركك بهيك موقف بس...

- انسي...
روحي بيكون هلاء ناطرك

- اوك...
عنجد لو عارفة انو...

- خلص نوال روحي

قلتها وانا متضايقة وما الي خلق احكي معها او مع اي حدا تاني، قالتلي:
"بس ما بتزعلي مني؟..."

تطلعت فيها شاردة ورجعت قلتلها:
" لا ما بزعل منك
بزعل بس من ايمن لان صاير عم يسرقك مني..."

- لا لا... هو ما دخلو
يعني هو ما كان عارف يصير هيك

ابتسمتلها وقتلها:
- طيب يلا روحي

لما شافتني قادرة ابتسم ساعتها اطمنت علي شوي وقالتلي "باي" رجعت ركضت عند ايمن، يعني انا اكيد مش رح امنعها تروح معو وانا شايفتها قاتلة حالها لتطلع معو، لو كنت مكانها كنت بطلع معو بلا ما اعتذر منها ويمكن كنت نسيت اصلا انو الاستاذ طردها من الصف، عليها حظ هالبنت، الا حظي انا لازم يكون متل التبن، لقيت معلمة الكيميا رايحة عغرفة المعلمين، ركضت لعندها لرجعلها الطئية، اخذتها مني وقالتلي:
"نفعتك؟ قدرتي تخبي شعرك منيح؟..."

تأففت وبيين الهم واضح بوجي، عرفت من هالشي انو ما مشي الحال، بس الي ما توقعتو انو:
"اصلا ما لبستها..."

فنجرت عيونها وهي عم تقلي:
"وليش؟
ما انا حذرتك من قبل..."

"انت قلتي لو شافني ما رح يكون مبسوط
بس هو كان شايفني الصبح وبالفعل ما كان مبسوط
وبالفعل النتايج ما كانت مرضية
بس ما توقعت توصل معو يطردني من الصف
بقدر افهم شو صار معو بالزبط؟..."

الببغاء فنجرت عيونها وفتحت تمها متل الهبلة رجعت قالتلي بصدمة:
"طردك من الصف!..."

" اي طردني و..."

هالمعلمة بلا احترام، قطشت كلامي بنصو لما برمتلي ضهرها وراحت، مش رح استغرب لو هي ووقح البرية اخوة، تنينهم مش طبيعيين، كنت رح روح بس سمعت صوت وقح البرية ارتفع وشكلو علق مشكلة مع صوت الببغاء، حاسة اني تسببت بمشكلة بين خيين، يمكن ما كنت لازم خبر المعلمة عن الي صار، قررت اهرب قبل ما تكبر اكتر، وقبل ما لحق اطلع من المدرسة كمشتني صوت الببغاء وفوتتني على غرفة المعلمين ووقفتني ادام الوقح وقالتلو:
"اعتذر منها هلاء... "

صرخ عليها:
"ما خصك فيني..
ما رح اعتذر منها
مش انا الغلطان..."

- لكن هي الغلطانة؟
ما تفوت الامور ببعضها

- اي غلطانة ونص

- جواد!

بعدت ايدين المعلمة عني لانها بعد ما عصبت من خيها غرزت ضفيرها بلحمي دون ما تنتبه رجعت بعدت عنهم وانا عم صرخ:
"بدك تحلو مشاكلكم حلوها بالبيت
ما تجو تدخلوني بيناتكم
لا بدي اعتذار منو ولا شي..."

تطلع فيني بمسخرة وقلي:
"بالناقص... "

طلعت فيه اختو معصبة وقالتلو:
"النا كلام تاني بالبيت
مش رح تمرء هيك.."

بعدت عنو واجت لعندي وقالتلي:
"بعتذر نيابة عن خيي
عم يمرء بظروف صعبة كرمال هيك..."

وقطشت جملتها بسبب الوقح لما صرخ:
"مش مضطرة تخبريها بشي
خليها ترجع عالبيت وما تتدخلي بالي ما بيعنيكي..."

برمت لعند خيها رح تقتلو من كترة ما عصبها بينما انا قررت اهرب قبل ما ترجع تفتحلي موضوع جديد ويرجعو يتخانقو، الصراحة انا مصدومة بشكل مش طبيعي من حالة الاستاذ جواد، لاول مرة بشوفو هيك، كل عمرو كاين هادي ومحنك، اليوم شفت وجو التاني، لو اني ما شفتو بعيني ما كتت بصدق انو بيقدر يكون هيك، مشيت والشغلة شاغلة بالي كل الطريق

وصلت عالبيت فتحلي خيي الباب ورجع قلي:
"الك ايام بهاللون
امتى رح تتطوري ويصير شعرك ازرق؟.."

اتطلعت فيه مصدومة:

"ازرق!..."

رجعت فكرت شو رح يكون ردة فعل وقح البرية لو صبغت ازرق:
" اول مرة صبغت تضايق وعملي محاضرة
تاني مرة صبغت طردني ن الصف
لو بعد صبغت ازرق اكيد بيطردني من المدرسة..."

اتطلعت بخيي الصغير وسألتو:
"لما الساينز بيصير شعرهم ازرق بيطردهم الاستاذ من المدرسة؟..."

استهبلني وقلي انو الساينز اصلا ما بيروحو عالمدرسة لانهم قوايا كتير، بس بيحاربو الاشرار، عجبتني فكرة اني اصبغ ازرق واترك المدرسة وروح كافح الجريمة وصير بطلة عالمية، بس هيدا اكيد بيصير بس بالتلفزيون، او متل ما قال خيي الصبح، عالانترنت، تناسيت ريحة الاكل الي منتشر بكل البيت لان على الي صار معي انقطعت شهيتي عن الاكل

رحت عاوضتي مباشرة وكبيت حالي عالتخت وافكار تجيبني وافكار تاخذني، قررت طلع دفتر الذكريات لاكتب الي صار بعد ما رن الجرس ونفس شوي عن الي بقلبي، بلشت اكتب واكتب وانا عم استفسر شو سبب تصرف هالاستاذ الغبي وبعد جهد بالتفكير عجزت اتوصل لحل وفجأة لقيت دموعي بلشو ينزلو، بكره هالوقح من يوم التقينا واليوم صرت اكرهو اكتر، سكرت الدفتر وحطيتو تحت المخدة ورجعت دفنت وجي بالمخدي وبلشت ابكي وابكي لحد ما تعبت وارتخت اعصابي ونمت بكل هدوء




[/ALIGN]
[/CELL][/TABLETEXT][/ALIGN][/QUOTE]
__________________
شكرا دودي عهدية العيد ميلاد الحلوة




هديتي لاني انشط روائية


  #24  
قديم 07-24-2017, 08:42 PM
 
لا رد ولا لايك ولا تقييم
__________________
شكرا دودي عهدية العيد ميلاد الحلوة




هديتي لاني انشط روائية


  #25  
قديم 07-30-2017, 05:56 PM
 
[ALIGN=CENTER][TABLETEXT="width:70%;background-image:url('http://up.arabseyes.com/uploads2013/01_05_1714936484337918.jpg');"][CELL="filter:;"][ALIGN=center]



على اد ما كنت محمسة من لما صبغت شعري واضهر كل يوم مبسوطة بعد ما اطلع بحالي خمس دقايق عالمراية، اليوم كل شي انعكس، اطلع بالمراية وانا حاسة حالي عم شوف بومة، لكة شعري خفت عن مبارح بس ما راحت عالاخر، صار مجعلق اكتر مما هو ملكلك، بس معاش الي خلق اهتم فيه بعد الي صار مبارح، وللصراحة كنت حابة قص شعري من الاصل بس ما عرفت شو المصيبة الي رح تصير لو قصيتو، صرت بتشائم من التغييرات الي بعملها بشعري، ربطت شعري لورا عالسريع وحطيت عراسي طائية، لفيت شال حول رقبتي وشعري ومشيت معصبة لبرا الغرفة وخبطت بخيي الي كان راكض لعندي عالغرفة، اطلع فيني وقلي:
"صار شعرك ازرق او بعد؟..."

رفعت ايدي وانا عم جهزلو بقس مرتب فركض عند امي عم يشتكي، اجت امي لعندي لتعطيني ساندويشة احلى ما روح بلا اكل متل مبارح بس قلتلها انو ما الي نفس، اطلعت فيني مستغربة، بالعادة بروح عالثانوية كأني رايحة عحفلة بس اليوم شكلي حسب ما قالت مخيف، رديت عليها بكل بساطة انو انا رايحة عالمدرسة لادرس واتخرج مش لاعرض ازياء او شي من هالنوع، قلت كلامي وانا بقلبي عم اضحك عحالي، اما امي فكانت مصدومة بشكل غريب، وانا مأكدة انها كانت عم تشكر ربها لاني عقلت اخيرا، ومع هيك ما خلتني روح عالمدرسة بلا ما اكل اقل شي نص الساندويشة، اخذت الساندويشة منها وطلعت من البيت لاكلها عالطريق، ولما بلشت اكلها اكتشفت اديش اني كنت جوعاني وتمنيت لو كنت بعدني بالبيت لاطلب منها تلفلي ساندويشة تانية، مش مشكلة هلاء بالمدرسة بشتري منقوشة زعتر، مشيت لحد ما وصلت لعند نوال وكانت نظرتها الي نفس نظرة امي، بس هي علقت على منظري بطريقة مختلفة عن امي:
"شو ها...
ليش هيك عاملة بحالك؟
طالعة بتشبهي الموميا..."

سكتت لاني عارفة انو هي مش متل امي وما رح تصدق لو قلتلها انو رايحة عالمدرسة لادرس فقلتلها بس اني ما حبيت اتأخر متل مبارح بتزبيط شكلي واكل عيطة من الناظرة وعيطة من الاستاذ...

سكتت شوي ومشينا رجعنا فتحنا احاديث بناتية لحد ما وصلنا عالمدرسة، قعدنا مع مجموعة اصدقائنا وكالعادة كانو مبسوطين عم يتحدثوا وينكتو ويتمسخرو عالاساتذة المسكينة، لسبب من الاسباب ما ذاكرة انو بيوم من الايام حكو شي بشع عن صوت الببغاء، شكلهم كلهم بيحبوها، وانا الوحيدة الي بكرهها، مش غريب، ما بكل اخر حصة بتقعد تحكي معهم كأنها صديقتهم وبتنصحهم كانها اختهم الكبيرة، بس انا ما بيكون الي خلق اتسمع عليها ولا بحب الناس الفضوليين الي بيعرضو نصايحهم علي كأنهم بيعرفو عن حياتي اكتر مني، واكتر الفضوليين الي بكرههم هو وقح البرية، ومبارح اظهر حقيقة بشعة كتير عن شخصيتو، بظنه مجنون او شي من هالنوع

فجاة قطع تفكيري وحدة من الرفقات وهي عم تتمسخر على وقح البرية بسبب انفعالو الغير مبرر معي مبارح بنص الشرح، الكل سكت واطلع فيني وانا مش عارفة شو قصتهم، وحتى الي بلشت تحكي عنه وطت راسها كأن كلامها كان زلة لسان، الصراحة هالوضع ما عاجبني ابدا، مع اني كنت اكره احدب نوتردام، بس معاش مصدقة امتى تخلص عمليتو ويقوم بالسلامة ويرجع يعلمنا واتخلص من عالاستاذ الفظيع

رن الجرس وقمنا كلنا على صفنا، وانا طالعة عالصف لاحظت الاستاذ عم يطلع فيني من بعيد ومنشف وج علي، بس اليوم نظراتو كانت غير مبارح، كأنو متأسف على عملو، ومع هيك ما حبيت اتأمل منو كتير لانو مليان مفاجئات، تجاهلتو وطلعت عالصف وانا متعبطة بيد نوال كأن عم احتمي فيها مع اني انا اقوى منها، فعلا اني غريبة

وقت الفرصة نزلنا كلنا عالملعب وفجأة بتتكمش فيني معلمة الكيميا وسحبتني وهي عم تقول:
"تعي معي عاوزيتك"

انا ورفقاتي اطلعنا ببعضنا مستغربين بس ما سمحت الفرصة ليسألو اي شي لان المعلمة سحبتني عالسريع، اخذتني على صف شعبة تانية عم يطلع منها التلاميذ وفوتتني وفجأة بلاقي وقح البرية عم يضب عراض ليطلع من الصف، اطلعت فيه معصبة وجيت بدي اطلع بس المعلمة كمشتني ورجعتني وعيطتلو، اطلع فيني، نزل عيونو عالارض متلبك وقلي:
" بعتذر عن الي صار مبارح...
بس وجودك كان كتير مزعج و..."

عمل هالوج المنزعج وقال: "انسي" حمل حالو وطلع بسرعة من الصف، الصراحة اعتذارو الناشف والسبب السخيف الغير مقنع كانو مزعجين اكتر من تصرفو مبارح بحذ ذاتو، كزت عاسناني ورجعت قلتلو:

"مش ذاكرة اني عملت اي شي مزعج مبارح
كنت كل الوقت عم اتسمع عشرح الدرس
انت الي كنت مزعج بشرحك وتصرفاتك الغريبة من اول الحصة
لا من قبل كمان
من الصبح عيطت علي من دون سبب..."

بالاول كان شكلو مقرر يتجاهل كلامي بس شكلو كلامي ازعجو لدرجة اضطر يوقف وريرجع يبرم لعندي، اطلع فيني باحتقار كإني قلت شي غلط وقلي:
" ما تتدخلي بشي ما بيعنيكي..."

طلع من الصف معصب وانا صرخت عليه:
"شي ما بيعنيني
ليش مين الي انطرد من الصف
وعمين عيطت الصبح من دون سبب..."

رجعت اطلعت بمعلمة الكيميا وانا معصبة عالاخر:
"شو بو هيدا
شكلو خييك مجنون
احسنلك تاخديه عند مختصين اعاقة
او دكتور نفسي لانو مش طبيعي..."

وطت المعلمة راسها كأنها حزينة وقالتلي:
"معليش اعذريه
عندو اسبابو ليتصرف هيك
وانا من الاول حذرتك مبارح
بتمنى يرجع لحالتو الطبيعية قريبا..."

تأففت منزعجة وقلتلها:
"وانا كمان بتمنى يرجع لحالتو الطبيعية وقبل اسبوع
لان مش ناوية انطرد من الصف مرة تانية بلا سبب..."

طلعت من الصف معصبة ورجعت لشلتي وقعدت بينهم، لاحظو من شكلي انو معصبة وسألوني عن الي صار معي، قلت وانا عم عيط وطلع كل شي بقلبي:
"هيدا استاز الفيزيك، مدري شو صاير معو
لو ياخدو على عصفورية
بيعتذر وبيعطى عذر اقبح من ذنب
انسان غبي بكرهو"

نوال: ليش شو صار؟

- قال انا كنت كتير مزعجة بالصف
وانا كل الي سويتو بكل الوقت اني كنت عم اتسمع عالدرس

- ايمن: بس الاستاذ من لما فات عالصف وهو عم يتطلع فيكي،
واضح انك كنتي عم تشتتي انتباهو،
وهو ما قال عنك عم تزعجي انما قال وجودك مزعج

- وحدة من المجموعة:
ياااا
يعني الاستاذ معجب باريج

فرط الكل ضحك وانا عصبت وبلشت صرخ:
"شفتو بحياتكم استاذ بيطرد
تلميذة من الصف لان معجب فيها
عذركن اقبح من عذرو

صارو رفقاتي يتزانخو علي وانا عيط عليهم وانكر كلامهم، والي اكتر شي زعجني انو قمر الليل قعد يتزانخ معهم، انو يقول انو واحد شاب غيرو معجب فيني يعني انو هو ما مهتم فيني ابدا، حاولت سكتهم بس ما كانو يقنعو بالاخر عصبت منهم وقمت ورحت عمطرح تاني لاقعد فيه لحالي مرتاحة لانهم ما كانو ناويين يسكتو ولحقتني نوال عم تروقني وتقلي " انسي امرهم شو بدك فيهم" غيطت عليها وفشيت خلقي فيها، المسكينة مشكلتها الوحيدة انها صديقة وفية زيادة عن اللزوم ولازم ديما تطلع فشة الخلق براسها، بعدت نظري عنها محرجة بلا ما اعتذر وسكتنا صارت تفتح مةاضيع جنابية لحد ما اخيرا رن الجرس واطلعنا عالصف

رن جرس اخر حصة، اطلعت فيني نوال محرجة وقالتلي:
"انا اليوم كمان رح اضهر مع ايمن"

اطلعت بقمر الليل مقهورة ورجعت لنوال:
"ليش ما بتقولي فرض مرة انك رح ترجعي يوميا من
المدرسة مع ايمن؟...احلى ما تضطري كل يوم تخبريني..."

نزلت راسها محرجة فقلتلها:
"رح اقتلو لايمن
عم يسرقك مني..."

- اذا بدك تعي معنا، احلى ما تضطري ترجعي لحالك

اطلعت فيها مصدومة، شو بدي روح اعمل معهم، يعني هني بيحبو بعض بس انا بحبو هو، رح يقهرني هالشي كتير، قلتلها:
"لا عادي خذي راحتك
بعتبرك عندك بحث ورحتي عالمكتبة كالعادة"

زمت شفافها بقهر وقالتلي:
"لو في شب بيحبك كنا منضهر اربعتنا سوا،
كنا منمبسط كتير"

فجأة اجا عبالي اضربها كف، هلائد شايفتني بشعة وما حدا قادر يحبني، ابتسمتلها ابتسامة باهتة وقلتلها:
"مش مستعجلة عالارتباط
عندي اهتمامات اولى حاليا..."

- وبالنسبة لاستاذ الفيزيك؟
قلت بما انو... يمكن...
بتعرفي متل ما كنا عم نقول بالفرصة...."

فنجرت عيوني لما سمعتها قطعت كلامها وانا عم صرخ عليها:
"حتى انت يا نوال..."

اخذت شنطي وطلعت من الصف عالسريع، وانا طالعة من المدرسة لقيت وقح البرية عم جهز حالو ليطلع، اطلعت فيه بحقد ورحت لعندو:
"وانت فيك توقف هول الحركات الغبية
ما بقي حدا بالصف الا عم يقول انك معجب فيني
اذا ضليت هيك رح تقطع بنصيبي
ما تكون عم تعملها قصدا لتبعد قمر الليل عني..."

اطلع فيني بنشفان وكمل طريقو لبرا المدرسة، مشيت وراه وانا صرخ:
"ما تطنشني لما احكي معك.."

برم لعندي متضايق وقلي:
"عم يحكو علي مش عليك
فانت ليش مزعوجة"

- كيف ما عم يحكو علي وانا الي انت معجب فيها

- انا مش معجب فيكي

- بس هيك عم تظهر لرفقاتي

- طيب حلي عني

برم وكمل طريقو وانا رجعت عصبت منو ولحقتو:

- اكيد رح حل عنك بس هالشي بعد ما انت تحل عني
الك من لما جيت عالمدرسة بتلحقني ومش تاركني بحالي...

برم لعندي معصب يطلع فيني بحقد وبادلتو نفس النظارات لحد ما لانت نظراته وفجأة صارت حزينة، ما بعرف للصراحة شو عم يصير مع هالاهبل بس لكون صريحة نظراتو مدري ليش قطعتلي قلبي، وفجأة بلا سابق انذار كبست علينا شتا مش طبيعي، طلع بسرعة شمسيتو وفتحها فوقنا وفجاة بسمع صوت من الطرف التاني من الشارع:
"قوي قلبك استاذ وصالحها
كانت زعلانة كتير اليوم وقت الفرصة... "

برمت عند صاحب الصوت لشوف نوال عم تلكش قمر الليل بسبب كلامو المزعج، تضحك هو وكملو طريقن بينما هي اطلعت فيني محرجة وتقلي:
"شو بدك فيه، بتعرفي مزحو ديما تقيل..."

برمت عند وقح البرية بحقد بينما هو برملي ظهرو وقلي:
" اذا ما بدك تنتلي ماي امشي معي تحت
الشمسية واذا ما بدك انت حرة..."

بعدت عنو ورحت بطريقي لحالي وانا عم سبسبلو، ولأن الشوارع عنا محترمة كتير بالاحياء السكنية الغبية الي عنا، ما بنلاقي وقت الشتا القوي الا الشوارع كلها بنفس المستوى، مش هون المشكلة، المشكلة انك ما فيك تتكهن وين الخنادق، لان الارض بتكون كلها جور ومطبات، وهول كلهم وقت الشتا بيصيرو اسرار مدفونة تحت المجارير، مديت اجري وانا عم حاول امرق بس تغمست بالماي وبلشت توصل عالكاحل، هيدا واجري بعدها ما وصلت عالارض، تراجعت لورا وانا عم فكر بطريقة لاقدر اجتاز الطريق بلا سباحة بس للاسف ما لاقيت، وقفت عجنب الطريق تحت شجرة عسى انو تخف الشتا ومعها بيخف الماي بالشارع، شلحت طائيتي وعصرتها رجعت عصرت شعري ورجعتو لورا ورجعت الطائية عراسي لان حسيت انو شعري المغمس بالماي بلش يسببلي صداع كل ما يهب الهوا البارد عراسي، بعد شوي بلاقي وقح البرية بيصف حدي، قلي:
"صح مش طايق شوفتك
بس احسن من اني اقعد ساعة انطر لحالي"

لا بعد مش ناقص الا يشوفونا سوا التلاميذ ويطلعو علينا اشاعات، ما بيكفي الي صار بالصف مبارح واليوم وقت الملعب، هالعالم كيف بيشتغل عقلها ما بعرف...

طلعت في بطرف عيني لقيه عم يطلع فيني ورجع لهيديك النظرات الحزينة، شلت عيني عنو منزعجة، وشو قصة هالنظرات، بعد ثواني رجعت اطلعت فيه لقيتو بعدو عم يطلع، عصبت منو وعيطت عليه لبعد نظرو عني، بعد شوي شلح جاكيتو الجلد السودا وحطها على كتافي وقلي:
"يعني اذا ما بدك تستعملي شمسية اقل شي البسي شي ما يتسرب فيه الماي..."

رديت عليه بمسخرة:
- وشو رح تفرق الشغلة عن الشمسية

تأفف منزعج الا وبعد شوي اضطريت اطلعت فيه نظرة حادة ليحس عدمو ويرجع يشيل عيونو عني


خفت الشتا بس الشارع كان بعدو ماي كأنو نهر، مرقت من حدنا سيارة طرشتنا ماي، سبيتلها لشبعت الا بعد شوي وقفت ورجعت لورا لحد ما وصلت لعنا، وفتح صاحب السيارة الشباك، كان شاب حلو ومرتب وبيلفت النظر بطريقة غريبة، اطلع فينا وقلنا:
"طلعو لوصلكن، لبكرا لينشف الشارع منيح..."

بلا جدال طلعنا معو ورا لان كان في حدو حدا، مجرد ما طلعنا مشي الشاب بالسيارة وصار يحكي عن الشتا والشوارع كيف بتصير بهالمنطقة ويقارنها بالمنطقة الراقية الي عايش فيها، انا رد عليه واحكي معو بطلاقة واضحك بينما البنت الي حدو ساكتة ما حكت ولا كلمة من لما طلعنا عالسيارة، اما الغبي الي حدي كان منشف وج قبل ما يطلع عالسيارة بس بعد ما طلعنا ضل يهز بإجرو متوتر معصب كأن رح يقتل حدا، اطلع فيني الشاب عن مرايا السيارة الي ادام وقلي:

"بتصدقي لولا انو خطيبتي قاعدة حدي لكنت فكرتك هي..."

اطلعت من شباك السيارة على مرايا الي ادام عاليمين ليشوف وجهها منعكس، عنجد بتشبهني كتير، مع ان لون شعرها غير بس بعد ما صبغتو صرنا كأننا توأم، حتى نفس اللكلكة الي كنت عامليتها مبارح، فكرت انو يمكن كرمال هيك معصبة، يمكن البنت ما عجبها انو خطيبها يقول عن بنت بتشبهها لان بتحب تكون مميزة بعينو بس لما اخيرا فتح تمو وقح البرية وحكا توضحلي شي تاني:

"سبحان الله
بيخلق من الشبه اربعين
ما بتصدق لاي درجة خطيبتك كمان بتشبه خطيبتي السابقة..."

قالها وهو عم يطلع فيها بحقد بينما هي برمت وجها عنو لتطلع من الشباك لبرات السيارة، برمت لعند وقح البرية مصدومة، ما بعرف اذا انا كالعادة ما بعرف اقرا تعابير الناس بس هالموقف كان كتير واضح وما بظن غلطت فيه، هالبنت الي قاعدة ادام هي خطيبة وقح البرية السابقة، والي عم يسوق السيارة بيكون خطيبها هلاء، يا ترى الشاب كان عارف هالشي او هلاء اكتشف الشغلة متلي، منظرو بيوحي انو هلاء اكتشف الشغلة لان تصرفاتو تغيرت، فجاة راحت البشاشة الي بوجو وبطل يحكي كتير ويمزح متل ما كان بالاول، صار ما يحكي الا للضروة"

فجأة صارت الاجواء بالسيارة تقيلة ومعاش تنحمل لحد ما وصلنا عمنطقة ارضها شبه ناشف فقال جواد باحترام:
"نزلني هون عجنب اعمل معروف..."

الشاب ما صدق خبر وبسرعة وقف السيارة ونزل جواد وانا لحقتو عالسريع، اطلع فيني وقلي:
"ليش الحقتيني يعني؟
كان فيكي تنطري لتوصلي عبيتك..."

نزلت راسي وانا عم فكر، فعلا... ليش نزلت، سائبت طلعنا سوا فنزلت معو دون ما فكر... اطلعت فيه لقيته فتح الشمسية وبلش مشي من دون ما ينطرني، اسرعت لصرت حدو وضليت ماشية ساكتة لحد ما وصل هو عبيتو وطلع عالدرج بلا ما يسلم حتى، طلعت فيه منزعجة بس ما اعترضت لان شكلو ما كان ناوي يحكي معي ابدا

كملت طريقي وانا عم فكر، مقعول تصرفو معي بالصف بهالطريقة البشعة كان بسبب اني ذكرتو بخطيبتو؟ اول مرة شافني انصدم وجن وعيط علي كأن الي واقفة ادامو حدا غيري، وبالصف كان متلبك كل الوقت ويطلع فيني بسبب شبهي الها ولهالسبب مش كاين قادر يركز، بعد كل شي يمكن نقول انو هو بعدو بيحب خطيبتو السابقة بس نهاية علاقتهم ما كانت حلوة حتى هيك معصب منها كتير

قطع تفكيري حدا واقف ادامي، انصدمت لما لاقيتها خطيبة الوقح، سلمت من بعيد رجعت هي ومتلبكة سألتني:
"انت حبيبة جواد الجديدة؟..."

كنت رح اضربها لاني زهئت اد ما سمعت هالشي اليوم بس فضلت حافظ عأعصابي ونكرت كلامها، قلتلها:
"مجرد تلميذة عندو..."

اطلعت فيني مستغربة:
"ليش هو بيعلم؟...
اه قصدك بيعطيكي دروس خصوصية؟..."

- لا... بيعلم بثانويتي

عملت هالوج كانها فهمت كلامي رجعت قالت
- لما كنا خاطبين ما كان بيشتغل بعدو، كاين بعدو بالجامعة..."


سكتنا شوي رجعت قالت:
"الك علم هلاء خاطب او مرتبط؟..."

هزيت كتافي:
"وشو بعرفني فيه،
قلتلك انا مش اكتر من تلميذة من تلاميذو..."

ظهر الانزعاج بوجهها وقالت:
"كنت بتمنى اسمع منك انو مرتبط لريح ضميري...
على كل حال ما بظن يقدر ينسى بهالسرعة..."

- ليش اديش الكم تاركين؟

- شهر تقريبا... يمكن اقل

اطلعت فيها مصدومة، القصة ما الها زمان، تقريبا من لما بلش يعلمنا، اكيد ما رح يكون ناسيها، سألتها:

- وانت قدرتي تنسبه بهالفترة القصيرة؟

اطلعت فيني رجعت غمضت عيونها بتعب وتأففت كأن حاملة ثقل عضهرها:

- القصة طويلة كتير...
الصراحة مش عارفة حتى شو مشاعري تجاهو
اذا حب او شفقة او شو بالضبط

- ما كنتي تحبيه من الاول يعني؟

زمت شفافها رجعت قالت:
- مبلى... كنا تنينا نحب بعضنا كتير
من شي خمس سنين، بس سافر هو من شي 3 سنين ليدرس بفرنسا وبقيت انا هون ناطريتو
بالاول كان ديما يتصل فيني ويحكي معي
كنت انبسط كتير لما يتصل ونبقى ساعات نحكي مع بعض
بس مع الوقت خف اهتمامو فيني
وكل ما اسألو عن السبب يقلي عندو دروس كتير وما عندو وقت لشي
انا صدقتو بس ضليت منزعجة من الموضوع
بس رفقاتي بصفي صارو يلعبولي براسي
ويقولولي انو عايش برا وكل البنات هونيك بتعرفي كيف لبسهم
وجواد حلو والبنات بيتمنوه
اكيد ما بيكون تارك بنت من شرو
والا ما يرجع من السفر وفي ولد بايدو
متل كل الشباب الي بتسافر لتدرس برا
وانا لما سمعت كلامها بلش الشك يلعب فيني
لاني بالفعل بعرف كتير شباب هيك عملو
رحت عند بابا وخبرتو انو بدي انفصل عنو
لانو عمل هيك وهو ما خصو
عالسريع راح اتصل بجواد وبهدلو وقلو انسى امر بنتي
بهالوقت كان واحد شاب منيح وحلو حب يتعرف علي
وما قلتلو اني مرتبطة لاني كنت نويت انفصل عن جواد
بس الي ما توقعتو انو جواد يرجع بهالسرعة من السفر
بمجرد ما سمع هيك من بابا
بس للاسف لما كان راجع كنت انا صرت مرتبطة بشادي
وكنت كرهانة سيرتو لجواد ومش طايقة شوفتو من كترة ما لعبو رفقاتي براسي
خبرتو اني مش رح ارجعلو وبدي ارتبط بشادي
اصر علي وجاب اهلو ليحكو معي ويقنعوني
بس ركبت براسي عوجة وما قبلت اسمع من حدا
وهيك ضليت مع شادي وهلاء خاطبين
كنت مفكرتو رح يرجع بسرعة عفرنسا بس استغربت انو بعدو هون

اطلعت فيني لتلاقيني مصدومة، ما لحقت استنتج ان القصة خلصت بهالطريقة الهبلة حتى رفعت ايدي وفقعتها كف:
"ولك كيف الك قلب
حب خمس سنين ونسيتيه بهالسرعة
بس كرمال رفقاتك حكو عليه
كنتي اقل شي اسأليه"

هي المسكينة. حطت ايدها عخدها ومش مستوعبة اني ضربتها، قالتلي:

"انت بتحبي جواد؟.."

- رديت معصبة عليها:
معاش تقولي هالجملة...

- لكن ليش هلائد مهتمة؟

- مش مهتمة بس عندي ضمير،
انا بحب واحد من سنة من طرف واحد
وحب رفيقتي ومش قادرة انساه
انت خطيبك بتحبيه من خمس سنين وبعدو بيحبك
ونسيتيه كرمال كلام مش مأكدة منو

- ما تحكي هيك وانت ما مرئتي بتجربتي،
لو كنتي مكاني ما كنتي رح تحكي هالكلام

وطت راسها ورجعت قالت بهدوء:
"كيف عرفتي انو جواد بعدو بيحبني؟..."

اطلعت فيها وانا عم فكر، شو بيهمها هاي اذا كان بعدو بيحبها او لا، هي بكل الحالات خاطبة لواحد تاني، ومعرفتها بحبه او عدمو ما رح يفيدها بشي...

تجاوزتها وضليت ماشية عبيتي، صرختلي من مطرح ما هي:
"حتى اذا كنتي بتحبيه وحبك
مش رح يحبك لنفسك
رح يحبك لانك بتشبهيني
لانو متل ما قلتي بعدو بيحبني..."

برمت لعندها معصبة وكنت رح كرفتلها بس حاولت حافظ على اعصابي وجكارة فيها كذبت عليها:
"الاستاذ جواد من لما صبغت شعري
قلي اني مبشعة وكاين شعري اجمل
عادي ما تقلقي، بكرا برجع شعري للونو
الاصلي وبيرجع بينعجب فيني"

- قالت بمسخرة:
فكرتك قلتي انك مش مهتمة فيه

- صح مش مهتمة
بس بيهمني يزيدو معجبيني بدل ما ينقصو

سكتت وهي عم تطلع فيني بحقد، برمتلها ضهري وضليت رايحة، وصلت عالبيت متشتشة ماي لولا جاكيت الاستاذ الي دفتني شوي وخففت عني العواصف، اطلعت فيني امي وقالتلي:


المحاضرة الي بتقلي اياها ديما لما ارجع كلني ماي بسبب الشتي، مش ضروري ارجع خبركم اياها كل ما تقلي اياها، انا زهئت منها فكيف انتو، بس رجعت قطعت محاضرتها بنصها هي وعم تطلع بالجاكيت:
" لمين هالجاكيت؟..."

- لاستاذي الغبي
بما انو كان عندو شمسية عارني جاكيتو

- ولشو تروحي بشمسية انت
كأن اهلك ما بيهتمو فيكي وما بيجيبولك وحدة
شو بيكون اخذ نظرة عننا هلاء

- ماما ما رح يكون له نظرة خاطئة
انا خبرتو اكتر من مرة اني بحب امشي تحت الشتا

اطلعت فيني نظرة مريبة وقالتلي:
"قلتيلو اكتر من مرة انو بتحبي تمشي تحت الشتا؟
ليش عن شو كان درسكن؟...
من امتى بيحكو التلاميذ والاساتذة عن مواضيع جانبية"

تذكرت مباشرة صوت الببغاء، ديما بتخصص اخر الوقت لتتبادل حكي مع للتلاميذ، فقلتلها:
"ليش وين المشكلة
في اساتذة متفاهمين ومش عقلهم بس بالتعليم..."

- اها... واكيد هول الاساتذة بيكونو شباب وحلوين
وبيغازلو بنات حتى يوثقو فيهم ويحكولهم كل شي عن حياتهم وبعدان الله العالم شو بيكملو...

اطلعت بامي مصدومة، يعني انا كنت عم لوم رفقاتي طلع تفكير امي اضرب من تفكيرهم، على كل حال هيك الام بتفكر عادة، بتحسب لكل شغلة الف حساب من كترة خوفها عاولادها

- قلتلها: اطمني ماما
بيني وبين هالاستاذ ما في الا الكراهية والانتقام
اكتر من كل الاساتذة الي مرت علي بحياتي فبطمنك وحطي ايدك واجريك بماي باردة

اطلعت فيني بشك وقالتلي:
- انت متأكدة

- اي

اخذت نفس وقالتلي:
- طب يلا روحي خدي حمام دافي وخبي الجاكيت عن خييك احلى ما ينزعها متل ما نزع الشمسية، وقفت امي فجأة وقالتلي:

- انت متأكدة انو بينك وبين الاستاذ ما في الا كراهية؟
من امتى الي بيكره حدا بيساعدو وبيفديه بالي عندو بنص الشتا؟

- ما فداني بالي عندو بنص الشتا، الشمسية عطاني اياها بعد ما وصلنا عبيتو لكمل انا الطريق بلا ما انتلي ماي

شهقت امي من الصدمة وقالت بعصبية:
- ورحتي معو عبيتو كمان؟

غطيت وجي بيديي، كل ما تحكي اكتر كل ما اعلق اكتر، تحسن شي اتهرب من الكلام:
- سوري ماما بس اذا ضليت هون رح امرض
لازم اخذ حمام دافي

- طيب بسرعة اركضي

ركضت انا عالسريع قبل ما ترجع تعيطلي، ومجرد ما غبن من هونيك تفكرت الام:
"ليش حاسة حالي انخدعت!..."

اطلعت بطرف شمسيتي الي جابتلي اياها امي مكبوبة تحت الخزانة ومش مستعمليتها الا مرة او مرتين ولانها جبرتني والا ما كنت لمستها، تذكرت شمسية وقح البرية، كنت عاساس واعديتو جبلو وحدة جديدة، بس لحق وجاب وحدة تانية، شكلي مش رح اضطر جبلو، انسي الامر، مشيت بأوضتي لجيب تياب لاتحمم حمام دافي وبلشت اتفركش بالغراض عالارض، ما بفهم ليش الاوضى بتاخذ سنة لتنضف وبتخرب بيوم واحد،

تحممت حمامي الدافي الجميل والحمدلله ما مرضت متل هيديك المرة، والاغلب يكون الفضل لوقح البرية لانو عارني جاكيتو، اطلعت بالجاكيت الي فوق كومة التياب الي رجعت تكدست فوق الكنباية وتذكرت عملة خيي بشمسية وقح البرية، اسرعت لعند الجاكيت نشفتها من ماي الشتا وحطيتها بالخزانة وقفلت وخبيت المفتاح حتى ما يوصلها خيي، يعني خلقة الاستاذ مش طايقني ومربحني جميل على المحارم الي صار عطيني اياهم ومدري شو صار فيه لما شاف الشمسية، بعد ما ناقص الا الجاكيت، اخذت دفتر الذكريات وبلشت اتذكر الاشيا الي صارت معي اليوم، زعجني كتير انو الوقح كان عم يعاملني بهالطريقة البشعة من لما صبغت شعري بس لاني بذكرو بخطيبتو السابقة، انا شو ذنبي عكل حال، يعني مش حلوة منو، استاذ غبي بكرهو، بس بالتفكير بالامر، خطيبتو بتشبهني مش بس بشعرها، لما صبغت شعري صرت كأني توامها بس ملامحها كمان بتشبه ملامحي كتير ويمكن انا من الاول بذكرو فيها، تفكرت بالشغلة شوي وانصدمت، معقول من الاول هيك مزعج معي وبيكرهني لاني بذكرو فيها!... وكرمال هيك كان عم يحاول يبعدني عن قمر الليل؟...

مجرد التفكير بهالشغلة خلاني اكره وقح البرية اكتر مما بكرهو، يعني انا شو ذنبي اذا هي غلطت معو، بدي اتحمل كل كراهيتو الها بس لاني بشبهها بينما هي بتروح مع هيداك الشاب الحلو والملفت بشكل غريب، كتبت كل شي صار معي بدفتر الذكريات وانا بكل كلمة اكتبها اتمنالو الموت، للصراحة، ما بستغرب لو بكرا ما اجا عالمدرسة، اكيد بيكون مات بسبب دعائي عليه...




[/ALIGN]
[/CELL][/TABLETEXT][/ALIGN]
__________________
شكرا دودي عهدية العيد ميلاد الحلوة




هديتي لاني انشط روائية


 

مواقع النشر (المفضلة)

أدوات الموضوع
انواع عرض الموضوع

تعليمات المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code is متاحة
كود [IMG] متاحة
كود HTML معطلة
Trackbacks are متاحة
Pingbacks are متاحة
Refbacks are متاحة


المواضيع المتشابهه
الموضوع كاتب الموضوع المنتدى مشاركات آخر مشاركة
ربيع ,صيف,خريف و شتاء, انمي من كل فصول السنة izayoi أرشيف المواضيع الغير مكتمله او المكرره او المنقوله و المخالفه 1 04-09-2015 12:37 AM
ربيع ,صيف,خريف و شتاء, انمي من كل فصول السنة .~(مشاركتي في مسابقة عشرة لعشرة^^)~ izayoi صور أنمي 11 04-23-2013 08:07 PM
انها الحياة......حياتي 3arous elbaher أرشيف المواضيع الغير مكتمله او المكرره او المنقوله و المخالفه 13 10-07-2009 11:58 PM
أنت حياتي واّه من هذه الحياة ..اهداء... toplain أرشيف المواضيع الغير مكتمله او المكرره او المنقوله و المخالفه 11 08-12-2009 03:18 AM
حياتي بين الحياة والموت amira_alg صحة و صيدلة 0 06-24-2009 10:59 PM


الساعة الآن 01:54 AM.


Powered by vBulletin®
Copyright ©2000 - 2024, vBulletin Solutions, Inc.

شات الشلة
Powered by: vBulletin Copyright ©2000 - 2006, Jelsoft Enterprises Ltd.
جميع الحقوق محفوظة لعيون العرب
2003 - 2011