عيون العرب - ملتقى العالم العربي

\خاطرة بتذكرك سيدي
( رحم الله جدي مات بحسرته على بلده غريبا في عالية وقت الحرب الاسرائيلية ،واجتياح بيروت ، احتارت جدتي أين تدفنه في الجبل ؟؟يسر الله لها جيران طيبين من الدروز، دفنوه هناك ،في مقبرة لإخواننا الدروز ، على أن ينقل جثمانه بعد هدوء الأحوال لبيروت في مقبرة الشهداء .. ثم نسيت جدتي مكان القبر !أو سرق شاهد القبر ؟؟ لم تعد ستي تعرف ؟؟!)

بنتذكرك... سيدي ...دايما على بالي
وبتفتح القرآن .. تقرى بهداك الصوت
نبراتك قوية كثير ... لكن حزينة كمان
تتقرأ الآيات.... بالحكمة والايمان
ليلية ليلية
وولادك طاروا زمان.... وتاهوا بالغربة
تيفتوحوا بيوتن ..... ويطلقوا جناحن
وشمسن الحلوة .....ما بتعطي ضي ولافي
وقمرن الزعلان .... ناسيهم وغفيان
عماتي وعمامي ...راحوا... وصاروا بعاد
عن سيتي ..عن سيدي
لكن قلب سيدي... عجيبة كان فرحان
ستي معاه بالبيت ... بتحصن ولادا
بتذكرك ستي .. مرة اجينا بصيف... تنشوف عمامي
عماتي شفناهم ...خالاتي وخوالي... ما احلى لقياهم
ومرت بسرعة كثير.... صيفية صيفية
كان قلب سيدي رقيق ....وبيكره الفرقة
ووداع ولادو صعب .... وداع و حرقة
يالليل سيدي بيسهر .... وبيحكي اخباروا
وبيفتح القرآن... وبيبدأ يصلي
وهيك بودعنا ....من غير ما يعلي
صوت القلب مكتوم .. وبيقرأ القرآن ...وصوتوا بيعلي
وبيجي صبح بكير .... بيروت عم تبكي
صار الوداع قريب ... وصرنا كمان اغراب ....بيروت عم تحكي
شدوا العزم يا اولاد ....غربة و ناطراكم
وستي من بكير..معجوقة ...فرحانة
أو يمكن زعلانة ؟؟ بس جايبة كنافة 1....من نمر الوادي
وبنفطر الزعتر ... ومنقوشة الجبنة
بتزين الزيتون ...بالنعنع الريان
وصحن الفول غرقان ... بزيت من لبنان
من عيسى بتجيبوا 2
تعطينا حب وحنين .. بكفينا منو سنين
وبتوقف على البلكون... بتحصن ولادا
بتذكرك سيدي ما بشوفك يومتها
وين رحت يا سيدي ... بسألها لستي
ضحكت وقالت .. هلق راح ...وبعدين بيرجع
حبيبي ما تسأل
بس انتو ....متى راجعين ..وعلينا بتطلوا
بشوق مستنين... رجعتكم الحلوة
رديت وقلتها
نحنا لوين رايحين ....من غربة لغربة
ضحكت ستي كثير... وقالتلي ما تحزن
هيدا قدر مكتوب... ما منو ابد مهروب
فلسطين بلادك
احملها بقلبك ... دفيها من حبك .. حنين وشوق وانين ...
وهيك بترجع
قالتلي ستي كمان... والله لنرجع
بتذكرك سيدي
تتفقد الزيتون ....وتينة مزروعة ...وبقلبي ما نسيتا
ووبيضحك الحسون ...من شوفة الراجعين
وبتزرع جذورك ... وبتروح للأقصى
تتصلي فيها هونيك... وبتعمل زيارة
بتذكرك سيدي
ملاحظة: 1 كنافة كانت ستي دائما تحضرها من كنافة نمر الوادي وهو محل شهير، للكنافة فقط (يصنعها بطريقة أهل فلسطين وهي لذيذة جدا جدا )
2: فول عيسى محل شهير جدا ..يصنع الفول بطريقة أهل فلسطين صدقوني شهادتي مجروحة لكنها حقيقة هو أطيب فول تتذوقه ..وكلا المحلين ببيروت قرب الجامعة العربية ..صحتين وعافية ..