شيخه والي رفع سابع سما احبج اكثر من امي
 

السلاام عليكم
شلونكم شخباااركم انشالله بخير
الصراحه انا قريت القصه وكانت تينن
ما ادري اذا حابين احطها ولا لا
يليت تعطوني راايكم
مع تحياااتي

شدعوه محد رد
لو ادري ما ضيعت وقتي ونزلت القصه
حتى من البيت ما طلعت

والله شكلي بنزلها

الخميس
8/12/ 2005 الساعة 11:30 الضحى

الام : شيوخة بنيتي ترا ياييلج خـِطاب...
شيخة : يما وبعدين ويا هالسالفة...احنا خالصين من هالموضوع من زماان.. تدرين اني شايلة موضوع الزواج من بالي خلاص..
الام : والله الريّال لــقطة ومايتطوّف ...ضابط وولد عايلة واهلهم ماعليهم قاصر....و..
قاطعتها شيخة :ويييه ضابط.. مادري عااد شنو...طبيب ويلا مهندس..هذا اكيد فيه عيب...بدام اتقولين إنهّ مايتطوّف ...أشيبي بوحدة نفسي مطلقة!!!!
شيخه عمرها25 سنه تشتغل مدرسه
بالمرحلة الابتدائية...خريجة كلية الآداب...طبعا ريلها او طليقها اهوا الي خلاها اتصير مدرسة لأن كان يغار عليها ومايبها تشتغل مع الرياييل....كانت مملوحة وايد واقدر اقول انها حلوة..شعرها لي نص ظهرها صبه وحدة ولونه امشوقر من الله..بيضة وملامحها ناااااعمة وكلها على بعضها اتزوغ...يعني الي يشوفها دايما يعطيها اصغر من سنها...ويسمونها الكتكوته...حدها هادية وحساسة..كانت متزوجة من واااحد حدة محترم وخلوق وجميل وولد عايلة كبيرة ومنصب وكل وحدة تتمنى واحد نفسة...كانت اتموووت فيه وطايرة فيه وماعندها غير (ضاري وضاري ...راح ضاري ويا ضاري) واهو بعد كان وايد يحبها ...وكانت حياتهم اسعد مايكون ...طلعات وروحات وييات وسفر وهدايا....وعاشوا مع بعض 4اسنين...بس سبحان الله ...يمكن عين ماصلت عالنبي ....راح اتعرفون السبب...

الام: ايه انتي ماعطيتيني فرصة اكمل ,, مو اهو...اهو..


شيخة: ايه اهو شنو<<اتقولها بطنازة ,,,الله يستر من اهو مالتج يايما
الام: اهو بعد مطلق...
شيخة : عنده اعيال ...؟؟!!
الام اتأشر بصبعها السبابة وتقولها ابسرعة : بنت وحدة بس...
شيخة :حلو حلو ...لا خلاص مابيه ...خل يولي ....انا قبل لا اعرف انه متزوج كنت مابيه ...هالدور متزوج وعنده بنت...لا يبا انا مافيني شي عشان اخذ واحد عنده اعيال...توني صغيرة وحلوة والحمد الله ماأنعاب...انتي تدرين ان طلاقي مو انا السبب فيه...
(قاطعتها امها) : يماما الحين بنات مو متزوجات مو لاقيين احد ياخذهم ...اشيبون بمطلقة مثلج...وترا مافيها شي اذا عنده بنت...البنت اكيد عند امها يعني ماراح اتعيش معاكم....ترا والله الريّال مايتطوف ..والام شكلها حليوة ...خالتج غنيمة (اخت ام شيخة) اتعرفها وخابرتها تمدحها حييييييييل...
شيخة تبي تفتك من حنة امها : مادري اشوف ..اشوف...عطيني فرصة افكر ...عالاقل هاليومين..بس هااااااا ...ماوعدج
الام: واي ياعنادج...ترا اهم بس ناطرين موافقتج لان الصبي شايفيج بالهدة عند باب مدرستكم..
شيخة: وييييه بعد...عاااد شكلي أرف لمن اطلع من المدرسة ...اف شالبلشة .....
الأم: فكري واستخيري وعسى الله يكتبلج الخير والصالح..انا ابيلج السعادة يابنيتي...
شيخة: أيه ...ايصير خيييير <<<وبقلبها اتقول هين اذا وافقت....

خلنتكلم عن عايلة شيخة اشوي...شيخة عندها اختين ( طيبة 27 تشتغل بالوطني متزوجة وعندها بنتين ..الاولى اسمها ليان وعمرها 4 والثانية اسمها دانية وعمرها 2 ) اما اخت شيخة الثانية (حصة وتشتغل بالمالية وعمرها 23 متزوجة وعندها ولد واحد واسمه عبود (عبدالله ) وعمره سنتين يعني كبر دنويه..يعني شيخة الوسطية بين خواتها....واخو شيخة الوحيد اسمه (ناصر واهواا الجعدة وعمرة 21 سنة يدرس بالهندسة ...امها فوزية 47 سنة كانت ناظرة روضة وتقاعدت....وابوهم عبدالمحسن متوفى من 6 اسنين بمرض الشين.....
...اهم من سكان منطقة السرة...وبيتهم عالشارع امجابل قرطبة...وحالتهم المادية زينه ...مو غنايه حييل بس عندهم خيير...

شيخة: الوو ..الوووو
طيبة : هلا ..شيوخ
شيخة:انتي وينج؟؟ ..عيزت ادق عليج...لازم يعني اموت واحيا عشان احصلج....!!!!
طيبة: واااي كليتيني ...انتي داقة علي حزة دوامااات وتدرين عندي عملاء وماقدر ارد عليج....
شيخة:ويييييه نسيت انتي اداومين الخميس مومثلنا عطلة هيهيهيهي.. الله يعينج على دواام البنوك....قثه.....
طيبة : والله.. بنووووك.. احسن ..من مُدرسة <<اتقولها بطنازه....قعدي قعدي بالتدريس لين تندثرين...
شيخة: المهم المهم ...انا كلمت حصونة واتفقنا انروح مرينا اليوم ... اذا تبون نتسوق او انروح موفي كيفكم...بس اهم شي نتعشى ابــ جوني ..حدي مشتهية البيرجر مالتهم...
طيبة : خوووش ...انا اقول حق طلال (ريلها) ياخذ اليهال معاه بيت اهله...وامرج انتي وحصوص عالسبع ..سبع وشوي..قوليلها اتيي السرة...
شيخة :خلاص صااار....

((غرفة شيخة))

الساعة 6 ونص...شيخة قاعدة تتزهب حق الطلعة...حطت ميكآب خفيف..ولبست بنطلون جينز ماركة dolce & gabbana ,,ولبست قميص ابيض لي نص الفخذ من zara حده نعوم ..مطرز عند القوله و في كسرات عالصدر والجم واسع ...وبعدين البست معاه لفة بيجية فيها استراس برونز خط واحد بس (كانت شيخة الوحيدة بين خواتها متحجبة لا ن ضاري طليقها كان محجبها) .....كان شكلها حده ذرب...

طق طق طق طق <<< احد قاعد يدنبك عالباب
شيخة : لحظة لحظة لحظة...كاني الحين افتح ...ادري هذي سوالفك نصووووو.....

ناصر: هذا انا...ايه ماعندي احد اتحرش فيه بالبيت غيرج.....يا احلى اخت بالدنيااا
شيخة: اخلص اخلص ..اشتبي ...افلوووس ماعندي...
ناصر : اشدعوااا ...انا اخوووج الصغير اليتيم الوحيد جذي تقوليلي.....
شيخة:نصووور بسك عيارة...مو لايق عليك الدلع...انا قبل امس بليل شايفة امي معطتك 50 دينار ...شنو سويت فيهم..
ناصر: يعني تدرين ...انا بالجامعة اروح وايي..طلعات وروحات و...
شيخة: والله لعب وفسق ..انت الوحيد بينا ماتعرف قيمة الفلوس...الله يرحمك يايبا ...لو ابوي اهني جان علمك المسؤولية...
ناصر : عدااااال...كا انتي من فوقج ليتحتج كله ماركات ...مو هذا فسق بعد....
شيخة: الحمد الله من افلوسي ...ماطلب من امي وخواتي كل ساع وأاذيهم...وحتى يوم كنت بالجامعة...المصروف الي يعطوني اياه امي وابوي كنت ايمعه واشتريلي الي ابيه...وكل جم شهر امي او ابوي اييبولي جنطة او ساعة او أي شي بخاااطري فيه...مو كل يوم ...

ناصر: انزين الحين بتعطيني ويلا اروح....<<<يعني انا الي عندي كرامة..
افتحت شيخة جنطتها marc jacobs وطلعت منها 20 دينار ..

شيخة : هذول 20 ماكو غيرهم...لا تييني عقب يومين تطلب شي...روح عند امي اخذ منها زفتين...
ناصر :مشكوووووووورة يااحلى اخت ....

باسها ناصر على خدها وطلع....طبعا ناصر كان الابن المدلل بالبيت ...الي مايرفضون له طلب...حده يحب الكشخة والرزة والمظاهر....ومأذي امه بالطلبات وكلساع مغير سيارته...مره بورش ومره هامر ومرة كايين ...والحين سيارته رينج روفر ...ماعنده مسؤوليه ..بس في شي واحد حريص عليه...دراسته ...يعني بالدراسة يسمون ((المصري)) ياكل الكتب بالدراسة...وهذا الي كان يشفع له....اما عن شكله كان كيوت ...يشبه شيخة... ملامحه ناعمة..عيونه اصغار مسحوبة سحبه حلوة...خشمه دقيق وحلجة صغير...ابتسامته حيييل حلوة...حنطاوي وشعرة اسود كثيف وناعم...جسمة حلو وطوله بعد حلو تقريبا 175...دمه خفيف حيل..وكان كريم ..كله يعزم ربعه ويسلف هذا وذاك..عشان جذي كله افلوسة طايرة بس محبوب من الكل....






طيبة: ألو حصة...وينكم صارلي سنة تحت انطركم ...عيزت ادق على شيخة ماترد....يالله خل نمشي قبل لا يتأخر الوقت ترا طلال مايرضى اتأخر ...تدرين المرينا والمسخرة واليوم خميس بعد....

طيبة الاخت الكبيرة مثل ماذكرت من قبل...مو ذاك الحلات بس نعووووومة وملامحها دقيقة ولونها حنطاوي وشعرها كستنائي قصير ...استايلها غربي ..ولبسها كله عملي...جينز مع تيشرت....نفانيف الي تحت الركبة...ثري كوارتر مع بلوزة اشوي طويله ...لازم اتغطي (شسمونها) كانت حيل محتشمة وبنفس الوقت امرتبة وانيقة....طبعا ولانتفة ميكآب....
اما حصة فكانوا يسمونها البطة....كانت متروسة شوي ..لا موشوي متروووسة بس مو متينه...وكانت بيضة ومملوحة ملح الدنيا...وشعرها اسود وطويل تقريبا اطول من نص ظهرها بشوي وكثيف وناعم....عيونها صغار ومسحوبة سحبه حلوة نفس اعيون ناصر اخوها...وحدها اتشوق وتدخل القلب...وريلها ميت عليها ويغار عليها حيييل...واهي نوعها فل ميكآب...والحمرة الحمراا والآي لاينر الاسود....والشعر كله مفلول...اميننه ريلها...بس كان واثق فيها...ماشاء الله ...كانوا خوااات شيخة محظوظين ..كله وحدة حظها احسن من الثانية...

المهم اوصلو المرينا ...طبعا زحمة..وسنه على مالقوا موقف حق السيارة...مادخلو المرينا الا الساعة جريب الثمان....

طيبة : اووف الساعة ثمان...ترا يالله يمدينا انتعشى ونطلع...
حصة: ويه اشدعوااااا ....تو الناس ...اصلا الناس الحين تبدي اتيي..نبي نستانس ...
طيبة: ايه طبعا...ريلج بالشاليه اليوم ...وبتنامين ابيت امي ...لاحسيب ولارقيب...تدرين انا طلال مايرضى اتأخر... حدي 10:30...
(قاطعتهم شيخة): هوووب هوووب ...شنو بتتخانقون يعني...خلاص خل انمر زاره بس باخذ شغلة منهم ...بعدين انروح مرينا كرسينت...اوكي
طيبة : ايه بس خل نحجز ..ونرجع زارة لان شكله زحمة مو طبيعية...
شيخة وحصة : ياله اوكي...

((مرينا كرسنت))

شيخة : واااااااو شالزحمة ...
طيبه: اكيد زحمة ..الكويت كلها اهني ...لا والجو بااارد وحلوو بعد...
شيخة: انزين عندي اقتراح اشرايكم انروح تشوكلت بار...الي تبي تاكل في اكل والي تبي اتحلي تاخذ سوييت...
طيبة: كيفكم...عااادي
شيخة:حراام عليكم حدي مشتهية جوني ...بس ياله ميخالف..امساع كليت كرواسو بالبيت ...احس قثتني...بس شرايكم داخل والا بره...
حصة : لا وييه ..ليش داخل؟؟؟ الجو اشحلاته ...بره اونس وانفه...

طبعا كان المكان زحمة عالآخر ....احجزوا طاولة بأسمهم ...قالولهم نص ساااعة وتعالوا....وفعلا راحوا شيخة وطيبة وحصة تمشوا وخذت شيخة الشغلة الي تبيها من زاره وراجعوا المطعم...وقعدوا بطاولتهم...واطلبوا فوندو وكل وحدة اطلبت الكوفي الي تبيه...شيخة اطلبت لاتيه...
يابلهم الويترس الطلبات....
شيخة : ايه ماقتلكم اشصار اليوم ...صار شي شي...<<اتمطط الكلام وتتكلم مع ابتسامة خفيفة وماسكة القفشة واتحوس قهوتها شوي شوي...قاعدة اطفر خواتها
حصة الملقوووفة : اشصار اشصار...ياله قولي
طيبة: شنو لا تخرعيني @@
شيخة: شكو اخرعج ..انتي كله مخترعة وبس...
حصة اتقاطعها : شيخووه شنو...
شيخة: يالي خطييب.....
حصة وطيبة مع بعض وبصوت عالي : حلفييييييييي ..متى؟؟؟
حصة : وناااااااسة ...ماتقولين ماتحجين
شيخة: لا واللـــ........
فجأة طيبة ترفس ريول شيخة من تحت الطاولة....جان تلفت شيخة على طيبة ...
شيخة:آي طيوووب اشفيج عورتيني.....
طيبة بصوت وااااااطئ ومنزله عينها عالطاوله: شوفي منو ياي ..على يسارج..بس لا تلتفتين حيييل ...اشوي اشوي
التفت شيخة ...طولت واهيا اطالع ...يمكن دقيقة مارمشت عينها...جنا احد كااات ماي باارد عليها....شافت ضاري ...ايه ضاري...صارلها من طلاقها منه سنه كااااملة....سنه كاااملة ماشافته...بقا قلبها يطلع من مكانه...كانت شيخة وفية ...اذا حبت ..حبت...
بس الطامة الكبرى ضاري مو بروحه...مع زوجته ..او بالاحري حبيبته...الي خان شيخة معاها...ايه حبها يوم كانوا متزوجين وطلق شيخة علشانها ....ضاق خلق شيخة حييييل يوم شافتهم...واكثر شي يوم شافتها حااااااااامل....

ترجع ذاكرة شيخة سنتين ورا........طبعا ضاري تغير على شيخة عقب 3 اسنين من زواجهم...صار عصبي ..مايعطيها وي ...كله طاالع ...وماله خلقها كلش...طبعا هذا الكلام بالسنة الرابعة من زواجهم والاخيرة.....

ضاري: شيخة قعدي ...بقولج شي
شيخة: هلا حبيبي ...آمر
ضاري (كان ويهه معتفس): شيخة انت اتعرفيني زين ماحب الف وادور...
اهني طاح قلب شيخة ابطنها: ايه قول ...خرعتني...
ضاري:مادري من وين ابدي...انتي تدرين صارلي معاج الحين 3 اسنين ونص.أوو..وليــ...وليلحين ...مــا حـ......
قاطعته شيخة: وماحملت...ادري...انزين...<<<قاعدة على نار خايفة من الي ياي...
ضاري: انا ريال الصراحة وابي اعيالــ..
قاطعته شيخة: صارلنا 3 اسنين مو وايد وتونا اصغار..يعني العمر جدامنا ..والحمد الله لا انا فيني شي ولا انت..بس اهي مسأله وقت ان شاء الله...بس لحظة شنو قصدك؟؟؟ شنو تبي بالضبط؟؟؟
ضاري: خلاص انا قررت ننفصل..
شيخة مو مصدقة الي تسمعه: شنووووووو ...انت من صجك...انت خذيت القرار بروحك وخلصت...وانا ...مافكرت فيني...<<<كانت قاعدة اتصرخ
ضاري: انا صبرت 3 اسنين وشي ...ماقدر اصبر اكثر ...ابي اعيال...
شيخة :لا هذا مو كلامك ...مو كلام ضاري...انت قتلي ان ماراح تتخله عني لوشنو...شالي غيرك علي...<<<قاعدة اتصرخ مو مستوعبة الي قاعد يقوله ضاري

وصكت هوووووشة وصرااااخ....

جان يفجر القنبله بويه شيخة: يبا تبين الصج....انا احب وحده....واموت فيها ...وخلاص مابيج...

مابييييييييج مابييييييييج مابيييييييييج<<<كانت شيخة تسمع صدى كلمة (مابيج ) ....طاحت دمعة من اعيونها داخل قهوتها...واشربتها....كانت مرة حيييييييل...هل ياترى كانوا زايدين مقدار القهوة...او دمعة الحزن زادتها مرارة....مسكينه شيخة

طبعا صار سكوت بالطاولة...

طيبة بنبرة هادية: اسفة شيوخ ماكان قصدي...بس ردة فعلي كانت طبيعية....
شيخة بنبرة حزن وغصة: لا ...لا تحاتين....انتي مالج شغل...

حصة ساكته ولاكلمة...ومنكسر خاطرها على شيخه...يدرون اشكثر كانت اتحب ضاري...معنها كانت متزوجته زواج تقليدي ...بس كان اول حب بحياتها ...كانت تسمع كلامه بكل اصغيرة وكبيرة...كانت اتموووت عليه...

حصة بانفعال: خل يويلي ...مو كفو ولا يستاهل دمعة من اعيونج
شيخة وخانقتها العبرة: لا حرااام ...اهو يبي اعيال من حقة يتزوج ....

ادفعت طيبة الحساب...ومشوااا






((بالسيارة))

طبعا حصة وطيبة طووووووول الطريج كانوا يحاولون يلطفون الجو...بس لا حياة لمن تنادي ...كانت شيخة بوااادي ثاني ...تتذكر شكل مرته...كانت مملوحة بس شيخة احلى منها ..يمكن جسمها احلى لانها اطول من شيخة...بس شيخة جذابه ومغرية اكثر منها....حست شيخة بغييييرة موطبيعية...والي قهر شيخة اكثر...انها كانت مو متحجبة!!!!! فكانت شيخة اتقول بقلبها: الله لاني مطيعة واسمع الكلام واحبه.. ركب على راسي وحجبني وخلاني اصير مدرسة...وهالصايعة الضايعة الي تدري انه كان متزوج وخذته بشرط ان يطلقني..امخليها على كيفها!!! الله عليكم يالرياييل ....الله عليكم...بس الحمد الله كل شي خيرة والحمد الله ان حجبني ...يمكن جان ماتحجبت ...الحمدالله ..الحمدالله
ويمر عليها شريط حياتها مع ضاري...صج كانت ايام كلها عسل بعسل...الله ياضاري اشكثر احبك ..ليلحين احبك.....ولهانه على حضنك الدافئ ولمتك وبوساتك وحنانك...ضاري انا عمري ماحبيت غيرك...انت كنت كل شي بالنسبة لي...انت كنت كل حجوة بلساني...انت كنت حياتي وروحي...

فجأة انقطع حبل افكار شيخة على هالاغنية عالاف ام :




لا تلوح للمسافر
المسافر راح
ولا تنادي المسافر
المسافر راح
يا ضياع أصواتنا في المدى والريح
القطار وفاتنا
والمسافر راح

يالله يا قلبي تعبنا من الوقوف
ما بقى بالليل نجمة ولا طيوف
ذبلت أنوار الشوارع وإنطفى ضيّ الحروف
يالله يا قلبي سرينا ضاقت الدنيا علينا
القطار وفاتنا

قالت شيخة بقلبها وبكل حزن : ايييييييه..راااااح ...خلاص راااااح.....


شيخة من اول ما طلقها ضاري كانت تدري بيتزوج هذي الي يحبها....بس شنو الي كسر ظهرها ...يوم شافتها حاااامل....مسكينة شيخة ...كانت حاطة امل ان ضاري بيرجعلها بيوم...كانت حاطة ابالها انها نزوة واتعدي....بس خلاص ...تلاشى الامل...وضاري خلاص ...رااااااااح ...راااااااااح ...رااااااااح ضاري.......




طيبة: شيخة حبيبتي ...وصلنا البيت ....

كانت شيخة سرحاااااااااانة .....انزلت شيخة وحصة وسلمت وتأسفت منهم لانها خربت عليهم الطلعة...قالتها طيبة: انا اسفة شيوخ...انا الي خربت عليج<<<نزلت راسها...

شيخة: لا طيوب ...عااادي...انا كنت راااح اشوفه اول وتالي...الحين ويلا بعدي...صدقيني خيرة لي...يمكن هالشي يصحيني من الاوهام والخيالات الي انا متمسكة فيها ليلحين.الله كريم.....ياله عيل روحي لايزفج ريلج ...الساعة 11 الا ثلث....قوود نايت...good night
طيبة: حبيبتي انتي...
ادخلت شيخة مع حصة البيت...

اول مادخلوا ويلا عبووود ولد حصة باستقبالهم...ويلم امه حيييل ...
حصة: يالشيطان انت ليلحين مانمت ...ياله نصعد فوووق انبدل وانام....

شيخة: يمااااااااااااااااااااااا ........يماااااااااااااااااااااااااا

الام: ها ..يما...تعالي انا بالصاله....

شيخة: شنو ماطلعتي اليوم؟؟

الام: لا والله مالي خلق مولية؟؟؟ هاشعندج اتناديني..؟؟

شيخة : يما انا موافقة....

الام :على شنو؟؟<<<الام نست السالفة

شيخة : على الي خاطبني

الام طاقتها البوهه: هو هو هو ....اليوم اتقوليلي عطيني جم يوم افكر ..ومو اكيد ومادري شنو....حتى يوم واحد ماصارلج ووافقتي ...!!!! ليش اشصاير...

شيخة : سلامتج ولا شي...بس فكرت فيها...صح كلامج...اهو مايتطوف ..ومابي اتشرط ...يمكن اهو احسن واحد اييلي وبعدين اتحسف....وشفت خواتي كلهم مستقرين مع رياييلهم وعندهم اعيال...لازم اشوف نفسي انا بعد....

الام: عفية على بنتي ...هذا العشم فيج ...سنعة....بس خوالج قاعدين يسئلون عنـــ.....

شيخة: لا ...لا ...مو إله يسئلون...انتي مو تقولين خالتي غنيمة اتعرف امه ....خلاص ...
الام: انزين شوفيه......يمكن مايعجبج وبعدين تبلشيني......

شيخة: لا مابي اشوفه...ريال مايضره ... دقي باجر وقولي اني اموافقة......ومابذني ماااااااي...






مادري اشلون ...بقدرة قااادر باسبوعين صااار كل شي...اهي خطبة ..واهي دزة...واهي تجهيز..واهي صالون ومغربي وشيرة وتبعووه...طبعا ام المعرس (ام محمد) قالت حق ام شيخة...انها بتسويلها حفلة محفوفة ابيتهم بالعديلية بنفس يوم الملجة...واتييب عشا ودي جي وتعزم المقربين حيييل <<هذي عادة الكويتيين.....اهني استانست شيخة...وقالت فكة ...مالي خلق اسوي عرس ولاشي ...بالملجة اييبلي مصورة غير مصورتهم اتصورني انا وخواتي وبس ...وكان الله غفورا رحيما...

طبعا هذي ملجة ودخلة بنفس اليوم.....

22/12/2005 يوم الخميس

كانت شيخة صالون لامود باليرموك تسوي شعرها ...اما الميكاب راح اتييلها وحده البيت اتحطلها...مادحين شغلها ...يقولون ناعم ونظيف...وكلش كلش مو اوفر ولا خبة.... صج كان ودها منيرة الفرج اتحطلها ميكابها...بس وين ...تدري ان مستحيل تلقى موعد عندها ...يعني منيرة الفرج لازم تحجزين شهرين قبل العرس ...لا ويوم الخميس بعد....

شيخة قاعدة على كرسي الصالون ...يسوون شعرها ...اتقول بقلبها:

امبيييييه ...اشقاعد يصير ....انا ينييييت...اكيد ينيت....شلون سويت جذي ...شلون اقرر هالقرار المصيري بيوم وليله...اشلون اتزوج واحد واليوم راح يدخل على وانا لاشفته ولا اعرفه....امبييييييه اشلوووون<<<<توها استوعبت الي صار
انا الفاهمة العاقلة المتعلمة...والي مفروض اكون مقروصة من الرياييل ...اسوي جذي....كل هذا بسبب غيرتي ...كل هذا بسبب ضاري....اقوم انتقم من نفسي...واهو ولا يدري عني...امبيه ...بس خلاص ماكو فايدة الفاس طااح بالراس ....

طلت بساعتها ويلا الساعة خمس....والملجة الساعة 4...عمامها وخوالها متفقين ان الملجة اتم ابيت اهلها الساعة 4 العصر ...يعني خلاص ...الحين صارت زوجة ((جراح))...ايه اسم زوجها ((جراح))...

فجأة ويلا يوصلها مسج.....طلعت الموبايل من جنطتها وافتحت المسج...ويلا رقم غريب....ومكتوب بالرساله : مبروك عليج أنا <<<< الاخ وايد واثق من عمره
شيخة بقلبها: ويييييع ...اشيبي هذا ...لايحسب اني ميته عليه.....
ماردت عليه...خلصت شعرها وسوت بدكير منكير...وكانو طيبة وحصة ناطرينها ...لانهم خالصين من زمان....
طيبة: ياله امبيه تأخرنا...مالت المكياج يمكن اوصلت بيتنا....
شيخة بصوت واطي ومستحية: طيوووب..حصوووه..ترا ملجنا خلاص...
طبوا عليها ولمووووووها حيييييييل....وقالولها ...الله يسعدج وو يهنيج ويعوضج عن الي فات....



((بالسيارة))

شيخة: امبيه ....شلون تتوقعون شكله..تتوقعون منو احلى اهو ويلا ضاري..؟؟!!
حصة: اكيد ضاري...هذاك زوغة حدة...ومـــ
(قاطعتها طيبة) : شيخة حبيبتي...خلاص ...انتي الحين على ذمة ريال ..مايصير تتكلمين عن غيرة...لازم تنسين شي اسمه ضاري...تمحينه من ذاكرتج...ولاتقارنين بينه وبين ريلج...كل ريال عنده طريقة واسلوب خاص فيه....لازم اتحبين ريلج بكل اعيوبة ومزاياه....ترا الوحدة ياشيخة موكل يوم لها ريل.....

الله ياحلو كلام طيبة...كانت ثقيلة وعاقلة وموطيورة مثل حصة...وكان عقلها يوزن بلد وكلامها كله درر وموزون...وصج اهي قدوة الواحد يقتدي فيها...خصوصا بمعاملتها مع زووجها وتربيتها لبناتها...



((البيت))


توهم البنات داخلين ...
الام اتلم شيخة حيييل ودمعتها بعينها : مبروك شيوخة بنيتي...الله يوفقج ياحبيبتي ويهنيج ويسعدج يااارب...
شيخة وصوتها مخنوق : يما بس عااد ترا الحين ابجي...

حصة بصرااااخ: شيوووخ بسرعة صعدي فوق ...ترا مالت المكياج من زمان ناطرة ...ياله انتي خلصي واحنا وراج ...اخاف ايي ريلج...

اصعدت شيخة فوق وحطت مكياج خفيف ...الاي شدو كان بني ومخلوط بذهبي بس خفيف ...مع أي لاينر اسود...وحطت حمرة حمرااا غامجة لونها لون (دم الغزال)...وكانت رافعة شعرها رفعه ناعمة...ومسوية شعرها من فوفق على شكل فيونكة...وكانت بدلتها نااااعمة....لونها اوف وايت وفيها دانتيل بيج غامج ...امخصره من فوق لين الخصر ...بعدين قصة واسعة اشوي....امخليه جسمها حلو وايد...وطاالعة حيييل نعومة

ادخلت امها وخواتها عليها....يوم شافوها

الام: بسم الله عليج...الله يحفظج ...طالعة اتهبلين
طيبة: حدج زوغة....يما اقري عليها لاينضلونها....
حصة:ايه ماشاء الله...حدج اتعقدين ...اكيد بتصكين على ..هذا ...شسمه نسيت....


طق طق طق......ناصر يطق باب دار شيخة.......
ناصر : ادخل ويلا لأ....
الام: ايه يما ادخل .....

بطل الباب بسرعة....
ناصر :الله الله الله ...شالزين شالجمال.....مبروك خيتو

قام ناصر باسها على راسها.....وباس راس امها وباركلها

شيخة : مشكوور نصوري ... الله يبارك فيك...وحتى انتا اتهبل بالقترة والعقال...ان شاء انشوفك معرس...

ناصر حدة مختب : ايه نسيت ....يالله نزلي ترا جراح ناطر تحت ....يالله ترا تأخرتوا الساعة 8 والحريم اهناك ابيتهم قاعدين ينطرونكم....

شيخة حدها مرتبكة وخايفة : انزين يما انتي وخواتي .....

قاطعها ناصر: احنا بنلحقكم بالسيارة ....يالله نزلي الحين.....

شيخة: وين قاعد هذا ...

ناصر : بدار الاستقبال....

شيخة: ناصر اشلون شكله ....حلو جيكر ......

قاطعها ناصر: سحت ومربرب ...انتي احلى لا تخافين....

قام ناصر يدزها من ظهرها اشوي اشوي عشان تنزل بسرعة...لا ن الريال صارله سنه ينطر تحت .....
اهني ضاق خلق شيخة اشوي ....يعني هم ماتحبة ولاشي وهم جيكر ومتين.....انزلت بالدري وكل خطوة اثقل من الثانية...خايفة...خايفة من كل شي....من هالدنيا اليديدة الي بتعيشها...خايفة من حبها لضاري يغلبها ويخرب حياتها ...خايفة من هالريال الي عمرها ماشافته.....
واهي قاعدة تمشي ...قربت يم الباب ...ماتبين الا اريوله....لابس دشداشة سودة...او كحلي غاااامج حيييل...قاعد يهز ريله اليمين....شكله متوتر او معصب ...وحدة من الثنتين....دخلت شيخة ...اهو قاعد يم الباب على يسارها....يعنها واهي داشة ماتشوف الي امقفاه من ورا ...قترته و ينبه اليمين.....

شيخة :السلام عليكم .....

قام جراح ولف ويها على شيخة.....

ويلا شنووو....انصدمت يوووم شافته ....وقالت بقلبها : انا اعلمك يانصور يالكلب....

ويلا هذااااك الطول والجسم ...والوي قطعة ...اينن...شكله لونه الاصلي ابيض ...بس ضاااابط ..الشمس حااااكته حك...فصاير لونه حلو...السمااار الحلو النظيف....والعيون وساع وحواجبه اعراض بس مرسومين وحدهم حلوين والظاهر يوم كان اصغير كان مفلوع ابحاجبة اليمين لان فيه شخطة يايه بالعرض..بس معطته شكل حلو وسكــ...) ...وخشمه حلو وايد حلو ...موسله سيف بس حلو ...صغير مو كبير ...وامبيه ويلا حلجة عذاااب....شفايفة متروسين وحلجة اشوي واسع ...بس حلوة حدة....بس الي ضيق خلقي ...لون شفايفه ....عرفت انه يدخن على طووووووووووول....

شيخة (بقلبها):..امبيه كلش ماتوقعته انه جذي ...حده جذاب حده اينن حدة زوووغة....صج على قولة امي مايتطوف....

جراح بكل ثقل مع ابتسامة خفيفة وماتبين اضروسة: هلا شيخة ...اشلونج...

قرب من شيخة وباسها على خدها اليمين وخدها اليسار....

شيخة حدها مستحية وخصوصا بعد ماشافته حلو: هلا هلا والله...الحمدالله وانت....

جراح من غير مقدمات : وين ملفعج لبسيه ....ترا امي كلساع داقة علي ...قاعدين ينطرونا بالبيت....ترا هذي ملجة موعرس...

شيخة مفتشلة : ايه ...كاهو ...يالله مشينا.....




اطلعوا من بيتهم رايحين السيارة....ويلا سيارته رينج....

شيخة (بقلبها) : امبيه اتلوق عليه الرينج ....

استغربت شيخة من شي...قاعد يشوف حوستها مع نفنوفها وملفعها ومسكت الورد الي بايدها...انزين من باب الذرابة كان المفروض يبطل لها باب السيارة....شيخة طبعا ماحطت شي ابالها....وقالت : مسكين امتدوده ومتوتر...حاله من حالي...

دخلنا السيارة....طبعا ماكو مسافة كلش بين السرة والعديلية.....مسرع ماوصلنا ...طبعا طووول الطريج ساكتين....يمكن ليلحين كل واحد مايدري شيقول حق الثاني....وماننلام مانعرف بعض....اول مرة اتشوفه واهو يعتبر بعد اول مرة يشوفها...

وصلوااا البيت...ويلا البيت عوووود (كبير) يمكن مساحته الف متر...اتعرفون ابيوت العديلية...بس البيت ماكان يديد ...كانوا مجددينه...املبسينه من بره...يعني شكله كان ناعم...ومرتب.....بس موقعه صج موطبيعي....على زاوية .....وارتداد اشكبرة وحديقة على كبر الارتداد....
طبعا انا عرفت ان هذا البيت من زحمة السيارات .....ماكانوا حاطين زينه ولاشي....قلت بقلبي: ايه لان هذا ثاني زواج له....خلاص مو اول فرحتهم...بس عادي ...يعني ماحز بخاطري....لان انا نفس الشي ...حتى عرس ماراح اسوي...

والي استغربت منه بعد ان محد زافه....لا اخوانه لاربعة....وهم قلت بقلبي نفس الكلام...او يمكن مايبي يبطل اعيون الناس عليه...هذا الي حطيته ابالي....(شيخة اتقول بقلبها هالحجي)

وهم حسيت بشي...مادري يالي هالاحساس....ان جراااح وايد جاااف....طبعا ضابط والضباط كلهم جذي....يندقون دق بالكلية ويطلعون حرتهم فينا ......

بس هم قلت بقلبي : ماقدر احكم عليه بهالنص ساعة...تو الناس ...تو الناس......بس مادري ليش يتلي قمته بقلبي ....وقلت : الله يستر من الي ياي....مادري ليش......!!!!!!!



صفط جراح عند بيتهم من ورا...يعني مو من المدخل الرئيسي ..ويلا وراي امي وخواتي بالسيارة...انزلوا بعدنا.
شيخة: امي وخواتي ورانا...
.جان ايروح جراح عند امي ويحب راسها ..ويلا حصوونة الملقوفة...

حصة:قوة جراح...اشلونك ..انا اخت شيوخة الصغيرة...
جراح لف ويه اشوي صوبها: ايه ..هلا هلا <<<<دقره حده
طيبة :اشونك جراح ...بالمبارك ان شاء الله ...الله يوفقكم
جراح :هلا هلا...الله يبارك فيج

دق جراح على اخته الكبيرة ( نورة) :الو ...هلا نورة ...ترا احنا برة بالحوش....
نورة: لا... ادخل داخل من الباب الخلفي ...ابسرعة لاحد يشوفكم...
جرااح: وليّيين ...والله شغله ....يالله خوش خوش ....


ادخلت شيخة وجراح البيت من الباب الخلفي...استقبلتهم نورة...سلمت على شيخة سلام حاار وباركتلها ودعتلها ان الله يوفقها....سلمت على اخوها عادي..عادي جدا ...!!!!!!!
نورة: جراح وين بشتك..؟؟
جراح: انا قايل أني ماراح البس بشت<<<جنا يقول يالله خلصينا خندش ونفتك...
نورة: بس لازم عشان الصور...
قاطعها جراح بنبرة حادة اشوي وبعصبية: ترا انا زين رضيت ادش...
نورة خذت نفس عميق تتكلم بهدوء مغمضة عيونهاوهي تتكلم: انزين خلاص خلاص...ماصار الا الخير ..

طبعا لا حد يشوف ويه شيخة بهالموقف...حده مصفوق ...واتقول بقلبها :الكتاب باين من عنوانه....

ادخلوا عند المعازيم...ويلا الاخ طاااير جنا مقروص...ومعصب حده...ولاابتسامة ولاشي...وماسك ايديها ...لا والله الا ساحبها ...حتى جان اتساسرة نورة : جراااح اشفيك اشوي اشوي ...البنت بطيييح على ويهها بسبتك...اشوي اشوي....
خفف بس عقب شنو ...خطوتين ويلا احنا عند الكوشة... قعد حده متنرفز...جنا اول مره يعرس...يت امه وخواته الثنتين لطيفة و ودلال ويسلمون علي ويبوسوني ويقولونلي:ماشاء الله اتهبلين ...وام جراح... اتحط ايدها على راسي وتقرا علي عالسريع...والابتسامة شاقة الحلج.....ارتحت وايد حق امه وخواته..

..راحت صوب ولدها ...ويلا عااادي ..باسته وسلمت عليه وصورت معاه ...بس....لا امدحته ...لا باركتله ...لا قرت عليه...مع انه طاالع اينن ...وطول جمال ورزه.....بس مادري..يمكن شايفته قبل لايطلع من البيت....او يمكن ..بس ماحسيتها فرحانه فيه وااايد...حتى خواته نفس الشي....واذا طاحت عيني بعينهم ..يتبوسمون ويرقصون عندي...فجأة ...يالي احساس قوي يقولي (كأنهم يساحلوني!!! كأن يغطون على شي..كأنهم خايفين من شي) بس كان مجرد احساس لا اكثر...يمكن لأني قمت اوسوس..يمكن...

لا وتخيلوا بعد...مو كان في مصورتين وحدة مالت شيخة وحدة مالت اهل جرااح..وغير خواته وبنات عمه وبنات خالته ..كانوا قاعدين يصورونه يتشكتشكون بهالصور...تخيلوا تنرفز على المصورتين...وأشر بايده على اعيونه وقال بصوت موعالي بس مسموع : بس خلاص بطيتوا اعيوني...
واشوف الناس يتهامسون..امبيه جنا قاعدين يقولون...اشفيه المعرس امعصب ...وانا اقول بقلبي وااااي شنو هذا يفشل هالريال....

المهم بعد ربع ساعة يمكن... ومن غير مقدمات...مسك ايدي ويقول: يالله مشينا <<<طبعا يمسك ايدي بدفاشة..مو بنعومة بدون رقة....ودي اصرخ عليه واقوله<<<<ترا احنا معاريس تونا...ترا والله اول مرة اشوفك ...ترا والله مــــــــــــــــــــاعرفك....

جان يوقف.. وقفت انا معاه عند الكوشة.....والي اتيي لطيفة اتقول حق جراح: اشفيك قمت جذي فجأة ...
جراح: بس ماخلصنا بعد... دشة ودشينا وصور وصورنا ...حلاو ....

لطيفة تتكلم بصوت واطئ: جراح شوي شوي في ناااس....انزين انطر خل اقول حق الدي جي يحط اغنية طلعتكم....

ظلوا واقفين اشوي....وبعدين حطو اغنية طلعتهم.....وشيخة يرن بأذونها مقطع الزفة الي يقول :

(( تهنيتي ياشيخة.... تهنيتي)) !!!!!!

طبعا امه قالتله : جراح انزل مع شيوخة السرداب تعشواااا...قبل لا تروحون....
جراح :لا لا خلاص...نتعشى بالفندق
شيخة بقلبها : مستعيل عالفندق...ماااااالت عليك <<< حاقدة عليه

وطبعا احس مالي خلق شي....احس بقمته مو طبيعية...لا ...واشوف امي وخواتي من بعيد قاعد يبجون....فرحانين لي ....وانا بقلبي ادعي : يارب تسعدني يااارب...يااارب ماشوف دمعة حزن بعيونهم علي.....يالله يارب ...
قاعدين يسووولي باي باي بايدهم ....طلعنا وصكوا خواته الباب ......

يوم وصلنا عند باب السكة .....الا وينفتح الباب ....وتطلع بنت اصغيرة تهبل ماشاء الله ...ضيعفونه حيييل ولونها حنطاوي مايل للبياض وشعرها مكتكت لونه اسود لين اجتوفها...لابسة نفنوف ابيض ناعم تحت الركبة وفي شريطة سودة تحت الصدر على شكل فيونكة..حدة كيووته... يمكن عمرها بو سبع ثمان اسنين.....اطب على جرااااح واتلمه حيييييل....واهو حدة متشقق <<<<< اصلا هذي اول مرة اشوف اضروسه.......
واسمعه يقول ديومه ديومه....جان اقوله: ياحليلها هذي بنت وحدة من خواتك ويلا وحدة من اخوانك....
رد على واهو قاعد يشيلها : لا هذي بنتي.....
انا اهني طقتني البوهه: بنتك...!!! ايه ماشاء الله ....

ويلا اتيي دلوله اخت جراااج ركض: امبيه سووووري...مادي اشلون اطلعت...ديوووم يالله دخلي داخل.....
ديمة بدلع : ابي ابوي...
جراااح: بابا ..دخلي داخل مع عميمه...انا ماراح اطول ...باجر راجع...

شيخة اهني جنا احد معطيها اطراق.....شنو باجر ارجع....بسم الله الرحمن الرحيم...تونا امعرسين...بيرد باجر ويجابل بنته.....طبعا شيخة ولا كلمة.....

راحت ديمة عند شيخة وقالتلها: انتي حلوة....شسمج؟؟؟
شيخة : انا اسمي شيخة....
ديمة : اسمج حلوووو .....نفس اسم امي .....

وو برربو قولولي رايكم اكملها ولالا