عيون العرب - ملتقى العالم العربي - قصيدة عن رحيل الشجاع صدام.. تستحق القراءة !!!

ثقيـل الليـل وعيونـي عَصَيّـه

غَدَت لي فـي ظلامـه حاتِمِيّـه

أغالب دمْعهـا و الدمـع غالـب

و لابه خَدّ ما هـو لـه ضِحيّـه

تِطاول في ظـلام الليـل حزنـي

و ضاقت بـي وَسـاع المهْمِهيّـه

همومٍ فـي همـومٍ فـي همـومٍ

تِضيق بْهـا حـروف الأبجديّـه

أحس من الغضب فالصَدْر بِـذره

تِمِصْ مـن العـروق الشمريّـه

و كم بذرةْ غَضَب قبْلهْ بِصـدْرِي

نِمت وَ اوْراقهـا خِضْـرٍ نِديّـه

نِمت حتـى غـدا وآرف ظِلالـه

مِقيـلٍ ياسـع هْمـوم البِـريّـه

قِتيل الغبْـن و الحسـرات قلبـي

و لا له في سُلُـوم الغبْـن دِيّـه

غَبِن مما أرى و اسْمع و أعايـش

صور تِثْقِـل فضـاء الشاعِريّـه

شِتات و ضعْف و اسْتِعمار غاشم

يبـونـا نقْبَـلـه و بأرْيَحِـيّـه

وِ آخِرْهـا وَ لاهـي بالأخيـره

مَعَ المشنوق في عِيـد الضِحيّـه

مَعَ اللـي زاد موتـه و بْجـداره

سِجـلات الخـنـوع اليعْرُبـيّـه

مَعَ اللي منْظـر اعْدامـه ذَهلْنِـي

له اللّْه منْظرٍ وِشْ هـزّ فِيّـه؟!!

رُفض يِخْفي عن الجلاد و جهَـه

وِ قابَـل كالجِبَـل وجْـه المِنيّـه

له اللّْه كيف ما غمّض و لا ارْمش

و لا هـزّه نِـبـاح الرافِضـيّـه

وِقفْ فوق المنصَّـه فـي ثِبـاتٍ

مِهِيـبٍ يعْجِـب النفْـس الأبِيّـه

كأنّـه حاكـمٍ مِـن فـوق منبـر

يبـي يِلْقـي خطـابٍ للرِّعِـيّـه

وِقفْ شامخ وِ ذَكَّرْنـي شُموخَـه

شموخ جْبـال سلمـى الحايلِيّـه

رَحل صدام وآخـر شَـيِّ قالـه

بِأنّ اللّْه ( أَحَدْ ) و أحمـد نِبِيّـه

رِحيلٍ صـاغ للتاريـخ صـوره

تبي تبقـى مَـعَ الأجيـال حيّـه

بِكيت و لا تِحَسْـب إنـي بِكيتـه

سِبـب رِقّـة عواطـف إنثوِيّـه

و لاني يوم مِـن أنصـار ظلْمـه

و حزب البعْث ما هو حِزْب لِيّـه

وِ لكِنّـي ذِرفْـت الدمْـع لَـمّـا

عَرفت أعْماق و أبْعـاد القِضيّـه

رَحل صدام فـي مشْهـد يِأجِـج

فِتِـنْ وِيْزِيـد نـار الطائِفـيّـه

رِحيلٍ عَجَّلوا بَهْ فَجْر الاضْحـى

وِ فالتَّعْجِيل بَـهْ مقْصـد وِ نِيّـه

وِصل يا بوش مضمون الرسالـه

يِجَلِّـي كِـل مسْتـور و خَفِـيّـه

وِصل وِ إن كان في قومي عقولٍ

تَغَابـتْ عَـن مَعانِيـه الجِلـيّـه

سلامي يـا زعامـات الكراسـي

أسوقه في أسى صِبْـح و عَشِيّـه

و مِنّي قبْل مـا أنْهـي قِصيـدي

لِكـل النايِميـن أحـلا تِحِـيّـه