عيون العرب - ملتقى العالم العربي - يا الخضرة يا الجزائر

الخضرة
أولاد الجزائر

هَيُو يَا لَبْطَالْ عَنْكُمْ انْعَـــــــــــــــــوَّلْ
................ وَ انْكَمَّــــــلْ خَطْوَاتْنَا للْمُنْدْيَالْ
نُوفَمْبَرْ ذَا عَزْنَا لاَشْ انْطَــــــــــــــوَّلْ
.............. لَرْبَعْطَاعَشْ فَاصْلَة مَصِيرْ اجْيَالْ
شَهرْ الْمُعْجِزَاتْ عَنَّا مَا يَبْخَــــــــــلْ
............... وَ الْفَاتَحْ مَفْتَاحْنَا جَابُوهْ ابْطَــــــالْ
يَا شَحَاتَة كُونْ رِيَاضِي و اعْقَلْ
............... وَ النَتِيجَة مَا اتْجِيكْ مْنَ التَكْسَالْ
مَا يَنْفَعْ تَصْرِيحْ وَ اكْلاَمْ امْعَسَّلْ
............ وَ الْخُطَّة مَاهِشْ لَعبْ عْلى الْمُورَالْ
الْمَيدَانْ اصْعِيبْ عَنْدَكْ لاَ تَعْكَلْ
............ هَاذِي الْخَضْرَة يَا الْخُو مَاهُمشْ اعْيَالْ
وْ تَشْكِيلَتْنَا مِيشْ لُقْمَة يَا رَاجَلْ
..............وْ مَا يَبْلَعْهَا قَا الْبَادِي في لَهْبَــــــــالْ
الْخُطَّة سَعْدَانْ رَابَـــــــــــحْ كِي تَسْألْ
..............ذَا الرَاجَلْ مَعْرُوفْ بَالْحَنْكَة مَـــزَّال
مَثلْ السَبعْ إذَا اصْدَمْ مَا يَتْعَطَّلْ
................مَا يَخْسَرْ هَيهَاتْ وَ الْمَخْلَبْ قَتَّالْ
جِيدَارْ الدِفَاعْ حِصْنُو مَا يَنْحَلْ
................حَيطْ امْلَبَّسْ مَا اتْعَشَّشْ فِيهْ اوْعَالْ
يَا شَحَاتَة رَاكْ فَارَحْ وَ اتْهَلَّلْ
.................وَ اتْغَطِي في شَمسْ بَانَتْ مَنْ غَرْبَالْ
ذَا حَلِّيشْ مْعَاهْ عَنْتَرْ قَا بَطَّلْ
..................بُو قَرَة وَ اجْمَاعْتُو مَاهُــــــــــــــــــــــمْ عُطَّالْ
الْجِيدَارْ امْتِينْ نَسْمَة مَا تُدْخُلْ
.................وَ الْمَرْمَى هَداَّفْكُمْ عَنُّـــــــــــو مُحَــــــــــالْ
قَوَاوِي مَعْرُوفْ رَشِيقْ امْصَيَّلْ
..................مَثْلُو نِمرْ اللِّي امْوَكَّرْ في لَدْغَــــــــــــالْ
حَارَسْ مَرْمَى بَيتْنَا مُوشْ امْكَنْبَلْ
..................مَا يَصْفَا شِبَاكْنَــــــــــــــــــــــا ذَاكْ الذَلاَّلْ
في وَسطْ الْمَيدَانْ ذَا لَعبْ إهَبَّلْ
.................لَمُّوشِيَة مْعَاهْ نَذِيرْ وْ لَشْبَــــــــــــــــــــــــــــــــــالْ
هَيَا يَـــــــــــا مَطْمُورْ يَاكْ انْتَ لَجْدَلْ
....................وَزَّعْ للْجَنَاحْ ذَا لَعبْ الْعُقَّـــــــــالْ
يَا زَيَانِي دُورْ بَالْكُرَة وَ اعْـــــــــــــــــــدَلْ
....................تَمْرِيرَاتَكْ زَايْخَة رَقَّصْ لَعْيَـــــــــــــــــــــــــالْ
مَقْنِي مَقْنِي يَاكْ للْمَرْمَى يُوصَلْ
.................أُمْ الدَنْيَا عَيطَتْ وَ ازْقَاهَا فَــــــــــــــــــــــــــالْ
جَا دَورَكْ يَا صَايفِي وَعْطِيني حَلْ
...................يَاكْ انْتَ هَدَّاف وَ امْعَاكْ الْغَزَالْ
حَرَّكْ الشِبَاكْ وَ الْفَرْحَة تَكْمَلْ
.....................وِيرَفْرَفْ اعْلاَمْنَا نَجْمَة وَ اهْلاَلْ