عرض مشاركة واحدة
  #12  
قديم 10-17-2016, 03:18 PM
 
.: الجزء السابع :.

" يقولون السعآدهـ في الضحكـ .. أقسم ضحكت وماشفت سعآدهـ
يقولون دايم العين تفضحكـ .. ولو مآشكـى لهى القلب مرآآدهـ "


/
\
/

شفت شاب تقريبا بعمر فيصل ماأتوقع سمع صوت الباب ..
قلت : السلام عليكم ..
رفع عينه وظل يناظرني فتره استحيت منه .. وقلت : السلام عليكم ..
كأنه انحرج : وعليكم السلام .. خير ؟!
قلت بجرأه : اسمعني ارجوك .. باختصار انت كل يوم جمعه تيجي وتاخذ فيصل مين انت ؟؟ ووين تاخذه ؟ وليش كل يوم تاخذه اصلا ؟!
ناظرني : انتي مين ؟! ..
ارتبكت ياربيه اش اقول له ؟ ..
سمعته يقول : انتي مروى صح ؟!
خيبه فيصلوه مخبر أخوياه عنها وجع ان شاء الله .. سكت فتره ..
ثم قلت : ممكن تخبرني وين تاخذه ؟!
تكتف : يهمك تعرفين ؟!
قلت له : أكيد ..!
ابتسم : فيصل عندك روحي اسأليه !!
وجع ذا اش فيه ؟! مايفتهم ..
ابتسمت وناظرته : أنا ماسألتك علشان تقول لي كيذا انا سألتك ابي اعرف ..
ضحك : ليه تسألين ؟!
دخلت خصلات شعري بغرور : فيصل عندي اقدر أسأله بس مابيه يحس اني اراقبه ..
ابتسم وجلس فتر يناظرني .. قلت مابنزل عيني علشان لا يحس اني منكسره صحيح استحيت بس عادي ..
انقهرت : بنتاظرني كثير ؟!
قال : اش تبيني اطالع وانتي واقفه على راسي ؟!
شوي واقوم اذبحه .. سمعت نايف " فيصل الحين بتروح ؟؟! "
اخترعت وقلت : اسمع لاتخبر فيصل اني جيت لك ابدا ارجوك ..
سمعته يقول : ليش ؟
هذا اللي برتكب فيه جريمه : مو شغلك واسكت ..
وطلعت من الباب وتخبيت ورى الشجره ..
شوي وشفته طالع كنت بدخل البيت بس شفت فيصل طلع وراه يعني علشان لا احس يطلع بعده .. تأكدت انهم طلعوا ودخلت البيت صعدت غرفتي لقيت ورقه أول مادخلت على الارض عند الباب مباشره " خبريني بالنتايج انتظرك بنفس الوقت والمكان .. ولد خالتك " تركت الورقه ورحت ضبطت أموري ..

*

حسيت بألم في عيني أكيد من العدسات شلتهم وبقيت بمكياجي تذكرت اني ذاكرت يوم الاربعاء أووف قهر .. حطيت الكتب في الشنطه وغسلت المراييل ناظرت الساعه عشر بالضبط حطيت المنبه على وحده الا ثلث وانسدحت على السرير أفكر .. الرجال يقول مروى مبين انه يعرف العيله كلها .. معقول فيصل يخبر الناس عن حبيبته ؟! حتى اسمها ؟؟ خيبه زين اذا ماوزع عليهم صورها .. غمضت عيوني اذا على ذا الرجال عز الله اني مابعرف الا في العيد ..
أكلت بندول ونمت على طول ..

*
*
*

صحيت على صوت المنبه غسلت مكياجي وحطيت بس كحله وقلوس ورتبت مظهري لبست الحجاب فيصل مو في غرفته اووف والحل ؟! انتظرته الين شفته جاء دخل غرفته كأنه تعبان ماصدقت خبر وصعدت لنايف ..
سمعته يقول : دوم متأخره ..
ابتسمت : أكيد أتأكد ان كل المخلوقات الحيه نايمين ..
جلس على الارض جلست قباله ..
اشر علي : احكي لي اش صار ؟!
هزيت كتوفي : ماصار شي ابد ..!
فتح عينه : كيف ؟!
ابتسمت : ذا الرجال يقهرني ما احبه يبط الكبد ويلوعها كمان يستهبل مع وجهه .. اسألي فيصل ومدري ايش قسم بغيت ارتكب فيه جريمه ..
ضحك : طيب لو سبيتيه في قلبك أحسن ..
قلت : ماتعودت ابتسم لأحد وانا أكرهه ومستعده اعترف له .
ابتسم : طيب ما اخذتي اسمه رقمه عنوان بيتهم ؟!
اشوي وتطلع عيني : انهبلت انا ولا ايش ؟! علشان خالي يقصف عمري نصفين .. صح !!
نزل راسه ياربيه نسيت ان اللي نتكلم عنه ابوه اووف ..
قلت : لا تتضايق بس انا بطبيعتي الانسان اللي اكرهه أصرح للكل بذا الشي ..
سمعته يقول : طيب اش ناويه تسوين مع الاستاذ ؟؟
ضحكت لتسميته : مدري اروح له يوم الجمعه الجاي ولا اش اسوي محتارهـ ..!
قال : تبين رايي ؟؟
هزيت راسي وقلت : ياريت ...!
كمل : اسمعي انا مستعد كل ليلة جمعه اراقب لك الوضع بس تعرفين السالفه ..
مدري اش اقول والله لولا الحيا قمت وحبيته على راسه معقول هو طيب لذي الدرجه ؟؟ ماقد جلست مره وتعرفت على حياته ابد ..
قلت : والله مدري كيف اجازيك ..
ابتسم : ولا شي ..
سكتنا فتره ثم قلت : حطيت لك جوالك عند الباب شفته ؟
هز راسه بـ ايه ..
رجعنا سكتنا لكن ذي المره طولنا واستمرينا في السكوت مده طويله ..
رفعت عيني اناظره : تبي تقول شي ؟!
هز راسه بـ لا ..!
كملت : طيب ناوي تقول شي ؟؟
هز راسه بـ لا ..!
سألته : طيب تبي تتكلم ؟!
هز راسه بـ لا ..!
طفشت .. أتكلم بلحالي انا ؟!
قلت : اش فيك بس تهز راسك لا ولا مافيه جواب ايه ؟؟ ولا خلص حكيك ؟!
رفع عينه : اش تبيني اقول لك يعني ؟!
ابتسمت : خلصت كلامك ؟!
هز راسه بـ ايه ..!
وقفت : يلا اجل انا بكمل نومي تصبح على خير ..
ماسمعت رده ونزلت تحت على طول انسدحت على السرير ونمت ..

*
*
*

وماصحيت الا الساعه اربع صليت وكملت نومي .. رحت للمدرسه ورجعت مافيه شي جديد ..
عند صلاة العشا كان فيصل يبي يكلمني الله يستر اكيد الاستاذ على قولة نايف خبره بشي .. الطريف في الحكايه اني كنت ارتجف وفيصل مستغرب .. في النهايه كان يبي يفضفض من عذاب مروى .. انا مابقول هي مش حلوه ماشاء الله عليها بيضاء موت صحيح انا فيني سمار على خفيف بس عندي ملامح .. مشكلتها انها تخينه أوي .. قلبت مصري .. أراهن اذا ماوصلت للسبعين او فوق .. كعادتي مضى يوم السبت عادي ..

*

يوم الاحد ساعدني فيصل في العشا وناسه ذا الفيصل .. علمته كيف يصلح المكرونيه اش اقول لكم ساعتين يستوعب .. مو لأن فيصل مايفهم بس الرجال مايعرفون شي في المطبخ ابد بس بحد ذاته وانا اعلمه كيف تحس ان فيه حد مهتم لك .. يوم الاثنين من الصبح صحيت صليت وأفطرت .. ورحت للمدرسه ولما رجعت تحممت واتجهت للمقلط .. سمعت حد يناديني التفت لقيته فيصل ..
قلت : خير فيصل اش صاير ؟!
تقرب مني وهمس : اذا ناويه الليله تنامين مقهوره ادخلي ذا المقلط ..
ارتجفت : خير مين فيه ؟!
ضحك : هههههه لاتخافين بس سلمى ونايف مع بعض ..
صرخت : بروحهم ؟!
حط يده على فمي وقال : اسكتي لاتفضحينا ايه بروحهم ..
تنرفزت : وامها واخواتها وينهم ؟!
اشر على جهه معينه : في المقلط الثاني ..
صعدت غرفتي وغيرت ملابسي ونزلت تحت تقصدت افتح الباب بقوه عليهم ويوم شفتها ارتبكت ابتعدت ..
وقلت : سوري ..
سمعتها تقول : ماقالت لك مروى لحد يدخل ؟!
ابتسمت : لا والله .. حتى انا اسغربت ليه الباب مسكر اللي اعرفه ان ماعندنا مخطوبين في العيله علشان يسكرون الباب وممنوعندخل ..
ما أتوقع لقت رد .. فـ قالت : من الذوق تفتحين الباب بهدوء ..
ابتسمت : تامريني ياقلبي كم سمسم عندنا في الكون كله ؟!
اتوقع اتنرفزت : سمسم ذا دلعك انتي انا سوسو ..
ضحكت : ولو انه اللقب بتاعي بي عادي حبيبتي الحلال واحد .. اعتذر على الازعاج مرة ثانيه كملوا كلامكم ان قطعتكم ..
طلعت وسكرت الباب بهدوء والنيران في قلبي تشتعل ودي اكسر راسها .. القهر ان بكره عندي مدرسه ومالي خلق شي .. صلحت العشا وتعشينا بعدين رحت نمت ..

*
*

يوم الثلاثاء رجعت زارتنا خيبه كل يوم رازه الوجه وجايتنا مدري من حلاتها ولا ايش .. تذكرت كيف كان شكلهم وهم يتكلمون ونايف مندمج ويسولف ودي أقطعها قطعه قطعه ولا أشوفها معه .. ضحكت على نفسي .. هي لنايف ونايف لها .. غيرت افكاري الى الرجال خوي فيصل .. لازم ارتب كلام علشان ماأتلخبط ضروري اسأله مين يكون واش سالفته مع يوم الجمعه .. بعد مااتأكدت انها طلعت لقيت نايف طالع أكيد يوصلها كيف يضيع على نفسه ذي الفرصه الذهبيه اللي جاته من السما ؟! انقهرت منه ورحت للمطبخ ..
سمعت صوت مروى : سارهـ ..!
التفتت لها وابتسمت : آمري ؟!
قالت : ابيك تعلميني كيف أصلح حلا !!
ضحكت : من عيوني ياقلبو بس ليش حد قايل لك انه يبي يذوق ولا اش السالفه ؟!
سمعتها تقول : لا بس حبيت اتعلم ..
مروى شوي صارت تغير معاملتها بس اذا جيت اعلمها تصلح اي أكله وبعدين تقلب علي .. المهم خبرتها عن كل شي اعرفه .. مدري هي تغار مني لأني اعرف أطبخ ولا اش الحكايه .. المهم بعدها رحت ذاكرت ونمت .. يوم الاربعاء من الصبح صحيت وصليت ورجعت نمت صحيت على صوت خالي !!
رفعت عيني : آمر خالي ؟!
قال : ساعه على ماتقومين ؟!
الله يستر اش فيه ذا يهزءني ؟!
قت : آمر خالي ؟؟
سمعته يقول : اليوم مابتروحين لا انتي ولا مروى المدرسه تفهمين ولا لا ؟!
بربكم فيه مره حد يقول للي يربيها لا تروحين المدرسه ؟! اش صاير ؟!
تلقفت وقلت : آمر ليش عسى ماشر اش صاير ؟!
قال : من غير ليش مو شغلك والساعه عشر الصبح ابيك جالسه والحين انخمدي يامال الوجع ..
وطلع من غرفتي .. بسم الله الرحمن الرحيم .. حد متهاوش معه ذا ؟؟ .. أووف ليش افكر فيه بالطقاق .. حطيت المنبه على 9 ونصف وكملت نومي ..

*
*
صحيت على صوت المنبه رحت تحممت لبست جينز زيتيي وقميص ابيض فيه سلاسل بشكل عشوائي .. الحجاب زيتي وتعطرت ونزلت شفت مرت خالي جالسه وكأنها تنتظر شي ..
قلت : السلاام ..
ماردت .. وجع ذي اش فيها ترى السلام سنه ورده واجب ..
همست : اش صاير ؟!
قامت بعصبيه وراحت للمطبخ أتروعت من حكايتها جلست مكانها شوي وانطرق الجرس .. اتجهت الى الباب لقيتها سابقتني كانت خالتي مشاعل راحت مرت خالي الى المطبخ أما أنا وقفت اناظر خالتي اش صاير ؟؟ قسم انه فيه شي بس اش ممكن ؟! قلبي ناغزني أكيد حكاية يوم الجمعه لها يد في السالفه .. جلست جنب خالتي ..
وهمست : اش صاير لهم ؟!
هزت كتوفها : والله علمي علمك اتصل علي جاسم وقال لي تعالي ..
ارتعشت : ماقال لك كلمة زياده يفهمك ليش كيذا ؟!
هزت راسها بـ لا ..

نبضاتي تتسارع مدري بالي مشغول وفكري متشتت أول مرة بالتاريخ يصير لنا كيذا .. ناظرت في الفراغ وسرحت في عالم بعيد .. مرت خالي مبين انها مرتبكه وخايفه وخالي ... ايه صح خالي وينه ماشفته ولامروى ولانايف يمكن نايف في الكليه وفيصل اكيد معه .. اتجهت للمقلط سمعت اصوات رجال !! قلبي يدق بقوه ياخوفي خوي فيصل معاهم بس اش اسوي ؟! كيف اعرف ؟! انتظرت دقايق عن الباب طلع نايف !! استغربت وجوده وليش هو ماطلع للكليه .. صعدت غرفة مروى لقيتها تتزين ؟؟؟؟؟؟ استخفت ولا ايش ؟ نزلت تحت سمعت اني مصحيني علشان اساعد خالتي ومرت خالي في الغذا لأنها عزيمه .. عزيمه الصبح ؟ ومروى ليش غايبه ؟ يعني بس كيذا لأني مابروح هي مثلي ولا ايش ؟! مسكت راسي مصدع مو قادره أقاوم التعب أفكار توديني وغيرها تجيبني دخلت المطبخ وعملنا الغذا لهم كميه كبيره !!
شوي وسمعت صوت باب المقلط ينفتح طليت براسي لقيت فيصل !!
اش صاير الكل اليوم مو رايح المدرسه ومين الاشخاص اللي في المقلط ؟! كملت شغلي بعدين طلع خالي وسمعته يناديني ..
رحت له ..
قال : اسمعي سوير أول مايأذن الظهر تصلين وتصعدين غرفتك ولا عاد اشوف وجهك ثاني الا الليل تفهمين ولا لا ؟؟!
هزيت راسي .. سمعته يقول : باقي ربع ساعه على الاذان انقلعي من الحين غرفتك ..

هزيت راسي وانا مو فاهمه شي من اللي يسوونه صعدت غرفتي توضيت وجلست على سجادتي ادعي ربي مايكون لي دخل في السالفه .. أذن الظهر وصليت ماكان عندي شي اشغل نفسي فيه رحت ذاكرت دروس اليوم وفهمتها من خلال الامثله تقريبا أذن علي العصر صليت ورجعت لمذاكرتي شوي وسمعت طق ..
همست : مين ؟!
دخل فيصل كانت ملامحه أغلبها حزن أخاف والله صاير شي .. ماصدقت على ربي اشوف حد على طول قفلت الباب وجلست ..
وقلت : فيصل بربك اش صاير تحت والله خايفه ..
رفع عينه لي ورجع ناظر الأرض وهمس : مروى .!!
اخترعت : اش فيها ؟؟
شفته قريب ويبكي ..
فيصل يبكي ؟؟
اللي اعرفه ان دمعة الرجال صعب تنزل الا في اشد المواقف وأعظمها يعني فقد الام ولا الابو .. شخص عزيز .. بس مروى باقي عايشه معنا في الحياه وقبل شوي شفتها تتزين يعني اش بلاها ؟! ناظرت فيصل لقيت دمعته على وشك النزول ضميته لصدري حسيته محتاج يبكي ماتخيلت ان اشوف دمعة رجال علشان حرمه !! المشكله مو فاهمه ولا شي من اللي يصير .. ظلينا تقريبا في احضان بعضنا ربع ساعه ويوم انه هدأ ماحبيت اقلّب المواجع عليه فسكتت رغم ان الفضول وانواع اللقافه ذابحيني .. رحت معه ودخل الحمام عزكم ربي وانا وقفت عند الباب اناظره وهو يغسل وجهه رحت واخذت المنشفه واعطيتها له ..
وهمست له : اذا بغيت تحكي او محتاج تتكلم في اي وقت باب غرفتي مفتوح في اي وقت ..
ابتسم وقال بصوت مبحوح : ربي لا يحرمني منك ..

ابتسمت له وطلع انسدحت على السرير اش فيها مروى ؟؟!
شوي وشفت فيصل قدامي ..

قلت : بسم الله الرحمن الرحيم اللهم سكنهم في مساكنهم يارب لطفك .. من وين طلعت لي ؟!
ضحك : الكل تحت متجمعين ليه ماتنزلين معنا ..
ابتسمت : خال جاسم حط قانون علي منع التجول الا بعد اذان العشا ..
فتح عينه : وبتجلسين هينا بروحك ؟!
هزيت راسي بـ ايه ..
كمل : طيب ذاكرتي ؟!
ابتسمت ابتسامه كبيره : ايه ذاكرت ..
سمعته يقول : والله ملل كيف بتجلسين هينا بلحالك تحكين مع الطوفه وتسولفين مع نفسك .. اكيد بتنهبلين
طرت على بالي فكره : شف اذا لهالدرجه خايف علي رح جب لي التلفون خلني احكي مع خويتي واذا سألوني قلت اسألها عن حصص اليوم .. ابتسم ودخل يده بجيب الجينز اللي ورى وأعطاني جواله ..
قلت له : قلت لك ابي التلفون لو سمحت ..
ناظرني : لأن بتصير كارثه لو أخذت التلفون ..
مديت يدي وأخذته وقلت : يسلمو ..
ابتسم لي وطلع ..
ماشاء الله اخوي يعرف الذوق يدري اني ابي اسولف معاها سوالف بنات احترم نفسه وطلع ياحبني له والله .. دقيت رقم ريم تقريبا ماردت ظليت ادق لين ردت ..
قلت : هلووو ساره تتكلم وين ريم ؟!
سمعتها تقول : يادووبه روعتيني اشوف رقم غريب خفت يكون حد ثاني ..
ضحكت : هههههههههااي لو انا عاقله هبّلت فيك ..
حسيتها تبتسم مدري ليه : تعالي بعدين ليش حضرة جنابك ماجيتي اليوم ؟
قلت : والله بس كيذا لعانه ..
قالت : لا صدق أتكلم عسى ماشر ؟!
قلت بخوف : والله مدري اش اقول لك ياريوم !!
سمعتها تقول : اش السالفه خبريني والله نقز قلبي وراح في بطني ..
ضحكت على تعليقها : هههههههههاااي احلفي انتي بس !!
ريوم : لا بجد انا خايفه وقلبي يقرقع وذي تستهبل مع وجهها .. يابت خبريني ..
قلبت جد : والله مدري اليوم صحيت على صوت خالي يقول لي لا تروحين المدرسه لا والأجواء في البيت مكهربه مدري اش صاير ..
قالت : ياخوفي انخطبتي ..!
ماقدرت اكتم ضحكتي : ههههههههههههههه آآخ بطني بمووت من الضحك .. هذا همك ؟!
سمعتها تقول : صدق انك فاضيه وماعندك ماعند جدتي .. ألحين انا خايفه عليك وانتي تضحكين ؟!
قلت : يابعدي والله .. خايفتن علي ؟! فديتس والله ..
تقريبا جلست أسولف معها نصف ساعه ربي يعينك يافيصل على الفاتوره ولو اني ادري انه عنده والحمدلله ماناقصنا شي ابد ..

*
*

صليت المغرب وحطيت المنبه قبل اذان العشا بشوي .. نمت وتقريبا صحيت على الوقت اللي بغيته حسيت بجوع فظيع .. صليت ولبست حجابي ونزلت البيت فاضي رحت المقلط لقيت فيصل ..
سألته : وين نايف ؟!
قال بدون مايناظرني : حسينا بجوع وقرر انه يروح يصلح لنا اي شي ناكله ..
ابتسمت : أجل الباقي وينهم ؟!
ابتسم لي : خالتي مشاعل طلعت قبل اذان المغرب ومرت خالي نايمه وخالي عند مروى ..
مو قلت لكم صاير شي ؟! من متى خالي يجلس مع بنته المصون ؟! ..
مديت له جواله : تفضل ومشكور وماقصرت ..
قمت وقفت .. قال : على وين ان شاء الله ؟!
ابتسمت وهمست : بيني وبينك انا اليوم لا أفطرت ولا تغذيت ..
طلعت من المقلط قابلت نايف عند الباب مريت ورحت المطبخ مو عارفه اش اسوي رجعت المقلط ..
وقلت : قيصل ش تبي اصلح لك ؟
سمعته يقول : مثل اللي بتاكلينه ..
ضحكت : انا خبز وجبن .. آمر اش تبي اصلح لك ؟!
ابتسم : ياحبذا لو يكون مكرونيا بالباشميل ..
ضحكت : أيه تآمرني .. ونايف اش تبي ؟!
سمعته يقول : لا مشكوره ..
قلت : فيصل يقول انك جيعان معقول شبعت من غير ما تاكل ؟!
قال : لا أكلت من شوي في المطبخ .. مشكوره ..
كيفه والله مايبي .. رحت المطبخ وصلحت المكرونيا .. طرى على بالي اغني وانا اصلحها ..
لا شعوريا غيرت صوتي لأصاله : أضيع في ذي الدنيا بلياك .. عني عذولك لا يردك .. أنت آمر ويلي تطلبه ياك .. الا الوداع وصوت صدك .. اقرب قريب الروح تهواك .. والله وربي ما أردك ..
وجلست اكررها وانا ادندن على نفسي وطق من زمان عنها ذي الاغنيه قررت اول أخلص أسمعها ..
سمعت صوت : قرفتيني مع صوتك ذا اللي لو أصاله سمعته اعتزلت لجل عينك ..
صحح اني افتشلت بس انقهرت ..
ابتسمت : محد طلب رايك انا عاجبني ..
قالت وهي متقززه : وااع والله لو صوتي كيذا انتحرت ..
أخذت اسلوب التطنيش وكملت اصلح وعناد لها مابقت اغنيه بالكون الا وقلتها .. المهم خلصت المكرونيا بسلام وقطعت وحطيت لفيصل واعطيته ..

قلت ابي اصلح حلا محد ذاقه من قبل عملت كيكه بعدين حطيت طبقه ثانيه شوكولاته بعدين كيك مع بسكويت بصراحه كان شكلها مرة نايس أما الطعم ماذقته .. حبيت اضيف لها لمساتي الخاصه قطعتها 6 قطع وذقت قطعه بصراحه روعه كسرت بسكويت وحطيت على كل قطعه مستطيل بسكويت أخذت الشوكولاته وكتبت على قطعه " فيصل " أعجبتني الفكره وكتبت " مروى " وكمان " نايف " بقت قطعتين خالي ومرت خالي كتبت شخبطات لاتصير لي سالفه .. أخذت " فيصل " و " نايف " ودخلتهم المقلط وأعطيتهم وصعدت لمروى على الاقل تحسن اسلوبها علشان اعلمها كيف تصلح مثله .. لصقت اذني لقيتها تتكلم بصوت واطي هه أكيد تتكلم مع اخوياها الشباب .. ماعلي منها طرقت الباب ..
فتحته لي : خير ؟!
ابتسمت : ذوقي ذي الكيكه باسمك ..
والله لو تشوفون كيف مستغربه تضحكون ..
قطبت حاجبينها : مين اللي صلحها ؟!
ضحكت : أنا ..!
ابتسمت : مشكوره ..
ودخلت وقفلت الباب .. قسم انها وناسه رحت غرفتي الساعه 12 وربع تذكرت اني ناويه اسمع الاغنيه وفعلا حطيت الكاسيت وشغلتها .. تذكرت سالفة مروى اليوم قسم انها شاغلة تفكيري هي مبسوطه ولا على بالها أصلا .. وفيصل مدري اش فيه بس مبين انه يوم كان تحت مزاجه عادي ؟؟ اش صاير ؟! سبحان مغير الاحوال .. حسيت بتعب رحت وفرشت اسناني ونمت ..

/
\
/

.: نهاية الجزء السآبع :.