عرض مشاركة واحدة
  #10  
قديم 10-17-2016, 03:12 PM
 



.: الجزء السادس :.

" يآنآيف كفآيه لاتزيد النآر حطب .. يآنآيف كفآيه لاتشعل بقلبي النآآر ..
يآنآيف بيوم وبليلة حالي إنقلب .. يآنآيف شف ذا ينآظرني .. مآتغآر ؟؟ "


/
\
/

بصراحه انتفخ راسي على البنات كل وحده تسأل عني شعور حلو بس انا مبي غير نايف .. نايف وبس .. وادري انه مستحيل يكون لي أبداً هو لسلمى .. الصراحه تمنيت لو نايف يشوفني كيذا طبعا لو كنا مخطوبين أو على الاقل مملكين على الاقل .. انا استحي حد يقزني أحس ان فيني شي غلط .. تمشينا في المدرسه وانا ادعي ربي مروى ماتشوفني ابد .. وخلصت الفسحه ودرسنا .. بعدين جينانطلع للبيت .. ياربيه خالي بيشوفني تغطيت وتغطت ريم لأن مروى تعرفها .. شفت سيارة خالي مرت وتعدت أووف الحمدلله أخذ مروى وراح ..!
ابتسمت : يلا انا بروح البيت بايو ..
قالت : لاتقولين ؟! ألحين بتطلعين الشارع كيذا بروحك ؟ قسم بالله انك امهبولا ..
ضحكت بسخريه : يعني ؟! اركب تاكسي ولا ايش ؟؟
سمعتها تقول : أخوي يوصلني كل يوم مو عاجز عن توصيلك يوم واحد ..
قلت : لامشكوره أنا أستحي يشوفني كيذ أعذريني ماأقدر أركب معك ..
تخصرت : وتروحين كيذا ؟
واشرت علي من فوقي الى تحتي ..!
قلت : عندي أهون يشوفني اخوك ..
قالت : شوفي مابي اغصبك بس لو حد شافك .. بنت وبروحها في الشارع لا ومتزينا ماأتوقع يطوفها على نفسه ..
بلعت ريقي والله كلام ريم صحيح بس مشكله يشوفني اخوها كيذا وماأقدر أتغطى قسم اني أفطس ومو متعوده .. بس اش الحل ؟! اروح معها ولا أروح مشي ؟؟ هو في الحالتين ابمشي والكل يناظرني .. يعني اروح معها ؟؟ فشيله صاير سواقي ذا الاخو .. لعنت نفسي يوم اني عملت كيذا .. كيف مافكرت في ذي الحاله ؟؟ أتكلت على ربي ورحت مع ريم انتظرنا اخوها وفعلا جاء ركبت ..
وقلت : السلام عليكم ..
ردوا : وعليكم السلام ..
سكرت الباب وانا منزله راسي مابيه يشوفني ..
سمعته يقول : وين بيتكم ؟؟
اقسم بربي ان فيني الضحكه هذا كل مره ابركب معه بيسوي لي كيذا ؟؟ ماعنده الا ذي الكلمه .. ضحكت من داخلي وفيني ضحكه ماأقدر اخبيها وطلعتها فعلا بس بأدب .. كأن ريم فهمت قصدي وضحكت .. ولا من ضحكتي اللي تفشل ..
قالت : بيتهم جاسم الجابر ..
تلقفت وناظرت المرايا ابي اشوف ردة فعله مدري اقول لكم مصدوم ولا ايش .. التزم الصمت .. ووصلت البيت سلمت على ريم وشكرته ودخلت البيت وانا متسلله ووصلت غرفتي الحمدلله رب العالمين ..

أول شي سويته شلت العدسات وربطت شعري بعدين مسحت الكحل والقلوس وغسلت وجههي بصابون توضيت وصليت وتحجبت ونزلت صلحت الغذا وصعدت غرفتي .. انسدحت على السرير وانا اتذكر كيف البنات يناظروني .. معقوله انا حلوه ؟؟ أول مره اسمع كلمة مدح من غير خالتي مشاعل ياعمري فديتها ..
شوي ودخل فيصل : انزلي تغذي ..
ابتسمت : صايمه ..
هز راسه بعدين قال : مين اللي جابك هينا ؟؟
قلت بكذب قسم ان قلت له الحقيقه بتصير مشكله : رجعت مشي ..
فتح عينه : بروحك ؟!
تبلعمت : لا طبعآ .. ريم خويتي رجعت معي ..
ماعلق وطلع يااي ونااسه فيصل يخاف علي .. نمت

*

وصحيت على اذان العصر حليت واجباتي علشان يوم الجمعه اكون فاضيه ابتسمت لأن قرب يجي يوم الجمعه .. قررت اشغل نفسي بالمذاكره وفعلا خلصت ونزلت أصلح لي فطور عملت حلا الفيمتو مدري ليه سميته كيذا يمكن لأن فيه طبقه من الفيمتو .. يكفي ذا فطوري مع بعض الشغلات ..
صعدت غرفتي بعد ماخلصت .. وفتحت دولابي ابي اختار ملابس ليوم الجمعه .. اخترت بلوزه بيضاء فيها خربشات بالياباني وفيها الوان كثيره .. رغم اني ماأحب كثر الالوان بس يلا تمشي الحال .. عليها البرمودا الابيض اللي حكيت لكم عنه من قبل .. رحت كويتهم وغسلت عبايتي والحجاب .. جهزت كمان عدساتي والرولات والكحله والقلوس قررت اني أعمل شكل يوم الاربعاء ليوم الجمعه .. ماندري يمكن فيصل يفتشل اذا صرت بذاك المنظر .. وتوضيت وقريت قرآن الين أذن صليت ونزلت صلحت العشا بعدين افطرت ..
قررت انزل الحلا بعد العشاء .. صعدت غرفتي وغيرت ملابسي علشان اقدر أتحرك .. رحت المقلط وناديت على نايف وفيصل وقلت لمروى وخبرت مرت خالي وخالي .. جلسنا على الطاوله أكلت اللي بصحني ولما خلصت جبت الحلا الكل أعجبه بس طبعا بعض الناس ماقالوا حتى كلمة " شكرا " .. أتوقع تعرفون مين ياجعلها الماحي يارب .. شلت الأكل وصعدت غرفتي تمددت على السرير وقلبي يدق من بكره واللي عقبه .. و...نمت

*

وماصحيت الا الساعه 12 صلاة العشا دايم متأخره استغفر الله بس .. صليت وكنت فاضيه أكيد الكل نايم نزلت تحت فتحت التلفزيون مافيه ولا شي .. حطيت روتانا ماعندهم الا غنيتين انقهرت وقفلت التلفزيون نظفت المقلط والمطبخ وغرفتي في ساعه ونصف .. تثاوبت .. كثير صايره احب النوم بس علشان يوم الجمعه لازم انام .. نمت ..
وصحيت على الساعه اربع صليت وعملت الفطور رجعت نمت ناويه أصوم كمان اليوم لأن مالي خلق آكل وادري ان طول اليوم بكون نايمه .. صحيت على صوت فيصل يسألني وين حطيت البلايستيشن قهر والله .. أعطيته هوا ورجعت ابي انام ماجاني نوم ناظرت الساعه 11 الصبح صلحت الغذا بعدين رحت لفيصل لقيته بروحه لعبت معه .. ولما جاء نايف قمت وصليت ..
عند اذان العشا تقريبا طرت على بالي ان أرسم .. رسمت عيون نايف صحيح ماضبطتها بس تمشي الحال .. وتعتبر انجاز للي ماجربوا يرسموا .. جلست ارسم في عيون الخلايق الين الساعه عشر وربع نمت ..
كالعاده صحيت أربع الفجر صليت وقلبي يدق بقوه أحترت أصوم ولا لا بعدين قلت لا .. نزلت تحت صلحت الفطور مالقيت خبز انقهرت يعني يوم فطرت ؟؟ صعدت غرفتي بملل .. قررت أصعد السطح مغامره فعلا .. قفلت غرفتي وصعدت جلست تقريبا ربع ساعه حسيت ان فيه شي لأن قلبي ناغزني نزلت متسلله لقيت مروى تطق باب غرفتي ..
قلت : خير مروى ؟!
تخصرت : أنتي وين كنتي ؟؟
قلت : كنت تحت ليش اش صاير ؟!
قالت : كذابه لفيت عليك البيت كله مالقيتك .. أعترفي صعدتي السطح اليوم ؟؟!
جاوبتها : لا طبعا .. يمكن ماشفتيني لأني كنت بالمطبخ بعدين رحت المقلط بعدين الصاله وانتي غريبه صاحيه .. أكيد كنتي نعسانه ..!
سكتت وماردت .. بعدين قالت : أمي تقول لك صلحي لها شوربه بسرعه لأنها مشتهيتها ..
مالي خلق مشاكل على الصبح هزيت راسي ونزلت عملتها ..
يوم صارت الساعه تسع جات خالتي مشاعل وميشو ماكلن لي خلق ورحت نمت أكيد مروى تقوم بالواجب .. تذكرت اني قلت مشاعل وفيصل مشتهيين من يدها قهوه .. فزيت من سريري ونزلت .. من الحظ على طول تكلمت ..
خالتي : قلتي لمروى اني مشتاقه اذوق من يدها قهوه ؟؟
عملت لها حركه يعني بليز .. ولما فهمت قلت : ايه مو انتي الاسبوع اللي طاف قلتي ؟؟
ابتسمت وناظرت مروى : تعلمتي ؟؟
ضحكت مروى : تبين تجربين ؟!
هزت راسها .. طلعت وطلعت وراها رحنا المطبخ فكرت اني اقول لفيصل علشان مايتكرر السيناريو معه رحت له ..
قلت : فيصل قلت لمروى انك مشتاق تذوق قهوة من ايدينها وهي في المطبخ تسويها ..
ابتسم : أحلفي ؟! تتكلمين جد ولا ايش ؟؟
ضحكت : مبسوط لذي الدرجه ؟! طيب انا نازله اساعدها ..
ابتسم اكثر : تشكرري والله أنك أحلا أخت بذي الدنيا ...
نزلت تحت وانا اسمعه يمدحني .. وجع كل ذا حب في اللي ماتتسمى ؟؟ ساعدتها وفعلا كانت مره حلوه القهوه والكل مدحها ..
عملت الغذا بعدين صليت الظهر وساعدني ميشو في السلطه .. العصير فيصل اللي عمله .. والله حسيت اني طايره في الجو أحب لما أشوف الكل مجتمع ومبسوط فعلا شي روعه تغذينا بعدين صلينا العصر .. بعدين جلسنا في المقلط القهر ان نايف مو موجود .. كان فيصل منسدح على رجلي ومروى جنب امها وميشو جالس على الارض ..
سمعت خالتي تقول : مشعلوه ليش جالس هينا قم يامال اللي منيب قايله قم فشلتنا ..
ابتسمت : سيبك منو ياخالتي أحيانا هوا يقفل تفكيره ..
ميشو : هيهيهي يعني ينقال لك المحقق كونان جبتيها مع وجهك ؟
قال فيصل : عندك اعتراض ياولد الخاله .. ساره احلا بنت واعقل بنت بالدنيا ..
خالتي : صادق فيصل .. قم احسن ما اهفك كف ..
ميشو : يمه لا تحرميني من السعاده ..
خالتي : ألحين جلستك على الارض عندك سعاده ؟! ..
ميشو : يمه يقولون الجنه تحت اقدام الامهات ألحين انا جالس بالجنه وناسه ..
مروى : أجل أذا كيذا بقوم أنا اجلس عند رجل امي ..
حسيت بغصه الكل يقول أمي الا انا .. الله يرحمها ان شاء الله حسيت ان الدموع تستعد للنزول كتمتها وابعدت فيصل عن رجلي وصعدت غرفتي ,,
الكل عندهم ام و أبو الا انا .. لا أم ولا ابو .. نزلت دموعي وكأنها شلال رحت للمرايا وجلست جنبها أراقب الدمعه كيف تنزل وتشق طريقها على خدي .. شي يؤلم الصراحه .. انفتح الباب ودخل فيصل ..
قال : تحسستي من الكلام اللي انقال تحت ؟! ..
هزيت راسي بـ لا : بس تعبت شوي ..
جلس على السرير : لا تكذبين حسيت لك لأني مثلك ..
كابرت : أبد فيصل شي تعودت عليه من يوم انخلقت على ذي الدنيا صار عندي شي عادي ..
سمعته يقول : لا ساره .. اذا انا الرجال ماتحملت ابد كيف ببنت حساسه مثلك ؟ أنا جلست معها سنتين انتي ولا حتى شفتيها .. كيف ماتحسين بالغصه ؟؟