عرض مشاركة واحدة
  #12  
قديم 03-01-2010, 04:16 PM
 
في اليوم الثاني جاء وليد أخو غلا وأول مادخل ضم غلا وجلس يبكي بحرقه على أبوه لأنه مات وماشافه وجلست غلا تبكي معه
وطلع وليد أخذ أجازه لمده شهر
ومرت الأيام ووليد نفسيته تعبانه شايل هم أخته وفي الأخير أقترح أنه بيأخذها معه بس زايد قال له أنهم بيتزوجون ويرجع وليد لبعثته
وليد/ بس مايصير أبوي توه متوفي ونسوي عرس
زايد/ ياأخي عرس بدون طق وتكاليف المهم غلا تصير في بيتي وأنت تكمل البعثه بدال ماأنت شايل همها
وتردد وليد وشاور عمه ووافق عمه وحددوا العرس بعد أسبوعين
جلست غلا حيرانه مابين كيف تتزوج وأبوها قريب ميت ومابين بعثة أخوها اللي أخذ أجازه ثانيه عشان يتطمن عليها

@@@@@@@@@@@@

< عادي وأنا أخوك عارف أنك خاقه عنده فماله داعي القشعات اللي تقولينها >
ضحكت غلا وصارت تمشي مع وليد جهة الباب لأنه كان بيطلع وقاعد يسألها عن زايد
غلا بضحكه/ دامك عارف أني أحبه وشوله تسأل
وليد/ يعني أنتي باغيته هالمره
غلا تضحك من سؤاله اللي يشوفه يقول العرسان عند الباب
قالت/ طبعا وماراح أحب غيره
وليد/ حتى لو كنتي متملكه على غيره
غلا/ حتى لو متملكه على غيره ماراح أكون سعيده مع غيره
ضحك وليد وقال/ الله يوفقك أنا بروح تبين أجيب شئ وأنا راجع
غلا/ سلامتك
وطلع وجلست غلا تفكر أنها ماراح تحب غير زايد

وذاك اليوم ماجاهم زايد وأستغربت ودقت عليه ورد عليها وقال أنه مشغول وبيدق عليها وجلست تنتظره يدق عليها بس مادق

وقبل زاوجها بثلاث أيام أرسل لها زايد مقطع صوت لقصيده
< لاصرت بايعني أشوفك
على خير
مع السلامه دام مابه سلامه
قلت أنتهينا قلتلك خير ياطير!!!!
ماني بأول شخص يخسر غرامه!!!
محذرك من قبلها
ألف تحذير
لاعفتني بيعيف قلبي هيامه
مانيب ميت لا
ولا أحتاج تبرير
صح الله لسانك ووفر كلامه بسمعك حبكه وفكره
وتصوير
وأفهم عدل يامدعي بالفهامه
وجه الشعر أبيض ويحتاج تغيير
ودي تزين هالقصيده علامه
ماضيك الأسود بذكره دون تقصير
كذا يكون بخد هالشعر شامه
يصدق معي تعبير ويخون تعبير
ياضيعه الشاعر بوقت
أنسجامه
يمكن خطأ أدونك بالشعر مير
لو ماأحترمتك للغرام
أحترامه
ماكان حبك غير بس طعنتك غير!!!?
علمتني معنى الندم والندامه
ماجاك مني أي زله
وتقصير
كل ماخطيت أعاتبك
بأبتسامه
حسبي على الذكرى إذا هبت عصير
ماعاد تنفع شرهتي والملامه
البال ظامي وقتها
والحزن بير
خسرتك وهمي كسبت أهتمامه
والليل فازع لك كذا جاني مغير
ظلمتني وأكثر ظلمني ظلامه
لأقبل علي أوحيت صوت المسايير
وفزيت كل ضيفن أقوم بمقامه
وليا عزم هالليل ضيقه وتفكير
قلي بربك كيف بقدر أنامه
مافيه داعي للعتب والمعاذير
الغدر خال الجرح وأطيب عمامه
أما يجيب الله مطر تالي وخير
ولا السلامه ماااش
مامن سلامه >
أول ماسمعت غلا القصيده أستغربت وظنت أنه يستهبل
وقالت أنها بتسأله إذا شافته
لكن ماتوقعت انه ماراح يقدر يجاوب على سؤالها

@@@@@@@@@@@@

دخل وليد على غلا قبل العرس بيوم وكان ضايق صدرها لأنها ماشافت زايد ثلاث أيام وجواله مقفل
قال بصوت مرتبك/ غلا
أنتبهت غلا لنبره صوته
وفزت واقفه
قالت/ سم
جلس يتنحنح ثم قال بصوت متقطع / غلا......أنتي عارفه أن.......الأنسان المؤمن.....
غلا بقلق/ وليد وش صاير
كمل بنفس الأسلوب/ اللي صاير أبيك تحملينه......لأنك عارفه أن.....
غلا بخوف/ زايد فيه شئ ?
قال بصوت حزين/ يطلبك الرحمه زايد مات بحادث.........غلاااااااااااااااااااااااااااااااااا ااااااا طاحت غلا مغمى عليها

في المستشفى جاء عمه وعيال عمه
قال العم بصوت مرعوب/ غلا وش فيها
حكى له وليد الموضوع ضاق صدر عمه أول مادرى وأرسل ولده يجيب مضاوي عشان غلا أكيد بتحتاجها
دخلت مضاوي وأبوها على غلا
أول ماشافتها مضاوي أنهارت وجلست تبكي
ونزلت دموع عمها من حالة بنت أخوه كانت مثل الجسد بلا روح ووجهها شاحب وماهب غلا اللي يعرفها
وحاول يتمالك نفسه وقال لمضاوي بحده/ أنا ماجبتك عندها عشان تبكين أبيك تهدينها إذا صحت موب تزودينها
سكتت مضاوي وراح أبوها يسأل الدكتور عن حاله غلا وأخذ معه وليد
قال الدكتور/ تعرضت لصدمه عصبيه أثرت عليها وكان واضح أنها كانت تعاني من ضغط نفسي الفتره الماضيه
العم/ أبوها مات قبل شهر
الدكتور/ هذا يفسر عدم تحملها لصدمه ثانيه عموما راح تجلس عندنا لفتره عشان نتأكد من أستقرار حالتها لأنه صعبه نطلعها وحالتها في خطر
وافق عمها ورجعوا لغلا وجلست غلا بالمستشفى شهر تحت العنايه
وطلب عمها من وليد أنه يرجع لبعثته عشانه تأخر أكثر من اللازم
وليد/ صعبه ياعمي أروح وأترك أختي
العم/ ليه أنا وين رحت أنا الحين اللي أتحمل مسئوليتها لأنها بنت أخوي
وليد/ والنعم فيك ياعمي بس......
العم/ لابس ولاشئ أنت وجودك ماراح يزيد ولاينقص شئ فرح كمل البعثه وتطمن أختك بنتي الحين
سافر وليد بعد يومين وجلست غلا بعد سفرته شهر ثاني بالمستشفى
تحسنت صحتها لكنها صارت ماتكلم كثير
وبعد الشهرين طلعت غلا لبيت عمها الكل قام يحاول ينسيها زايد ويخليها تعيش حياتها
حتى عمها قام يسافربهم لمدن المملكه ومصر عشان بنت أخوه الحزينه
قدرت تتأقلم غلا مع الوضع لكنها مانست زايد حتى بعد مرور سنه على وفاته

@@@@@@@@@@@@

حست غلا بيد واحد تسحب البطانيه وترجعها من ذكرياتها للواقع
< أفاااااا ياغلا تقول لي مضاوي أن لك يومين ماتأكلين >
غلا/ لا ياعمي أكل
مضاوي/ لاتصدقها يابوي ماتشرب غير الماء وبس
غلا/ لأني ماأشتهي ياعمي
العم/ من متى وأنا أبوك
مضاوي/ من يومين يوم قلتلها عن ولد صديقك اللي خطبها
العم بضحكه/ أيه خطبها بس ماتزوجها
مضاوي/ والله أنت تعرف بنت أخوك ماتحب طاري العرس كله
العم/ غلا ياحبيبتي أنتي لازم تعيشين حياتك مايصير تعيشين على الماضي
غلا ودموعها تنزل بغزاره/ صعبه ياعمي أنساه
العم وهو يمسح شعرها
بيده/ بس هذا حكمه ربك وكلنا بنموت وأنتي لازم تنسين
أبوك لو كان عايش ماراح يرضى تسوين بنفسك كذا
غلا بصوت حزين/ أبوي قال أن واحد منهم بيبقى معي بس كلهم خلوني
نزلت دموع من عمها بس تمالك نفسه وقال بضحكه مصطنعه/ وأنا وين رحت أفاااااااا عليك بس
عموما الموضوع خطبه وإذا ماتبينه الحين أكلمه وأخليه يدور قمر غيرك
ضحكت غلا ومضاوي
العم/ أيه كذا خل نشوف الأبتسامه الغايبه من زمان
يله أنا بروح للشغل وأنتم أنزلوا عند أمكم تحت تراها طفشانه تدور أحد يسولف معها
وطلع الأب ونزلت مضاوي تحت على أساس غلا بتلحقها بعد ماتغسل وجهها
قامت غلا تغسل ورجعت تفتح درجها صقعت يدها صندوق ونزلت دموعها لأن الصندوق هذا فيه كل شئ أهديها زايد حتى الجوال قفلته وحطته بالصندوق
رجعت الصندوق ومسحت دموعها لأنها حست أنها تعبت عمها معها ولازم تنسى لو تظاهر بس قدام عمها لأنها مستحيل تنسى
ونزلت تحت عند مضاوي وأمها

@@@@@@@@@@@@
__________________
سبحان الله العظيم
سبحان الله وبحمده


فاضي دقيقتين؟
ادخل هنا
وشاركنا
هنا
مشاركة في دورة عيون العرب لتعليم الفوتوشوب خطوة بخطوة 2


يا كاشفني
ღ. ŚḿĨŁę ğĩŕĻ .ღ.